Nguun Ngongol ni Bod Rogon ni I Rin’ Jesus Kristus
“Ma en nra gaar e be par u fithik’ [Got] e ngi i par e wok rok ni bod rogon ni i rin’ Jesus Kristus.”—1 JOHN 2:6.
1, 2. Mang e ba muun ngay ni ngad l’eged owchedad ngak Jesus?
“NGAD athamgiliyed e gin ni ka ba’ ni ngad milgad riy ngad tawgad ko gin ni gad be nameg,” aram rogon ni yoloy apostle Paul, “ma gad par ni kad l’eged owchedad ngak Jesus, ni En nib Ga’ ni ir e be tor e michan’ rodad ngak.” (Hebrews 12:1, 2) Ngan fol u woen e yul’yul’ e ba t’uf ni ngan l’eg owchey ngak Jesus Kristus.
2 Fare bugithin ni kan piliyeg ni “ngan l’eg owchey,” ni kun fanay ko Greek Scripture, e be yip’ fan ni “ngan tiyan’uy nga ban’en nib fel’rogon.” Reb e babyor e ke yog ni gaar: “Yugu nap’an nra dabki tiyan’ fa en ni ma un ko mil u lan tafen e gosgos ko gin ni be mil i yan ngay nge n’en ni be nameg ko re sagreng nem, me sap ko pi cha’ ni yad be yaliy e mil, ma rayog ni nge sagaalnag. Taareb rogon e re n’ey ko piin Kristiano.” Pi n’en ni ma magawonnagdad e rayog ni nge taleg rogon e mon’og ni gad be tay ko tirok Got ban’en. Thingarda l’eged owchedad ngak Jesus Kristus. Mang e gad be yaliy rok Jesus? Fare thin ni Greek ni “en nib ga’” ara chief agent e be yip’ fan e “en be pow’iyey, be’ ni ir e ma pow’iy gubin ban’en ma be dag e ngongol nib fel’.” Faanra ngad l’eged owchedad ngak Jesus mab t’uf ni ngad folwokgad ko pi n’en ni i rin’ nib fel’.
3, 4. (a) Mang e ba t’uf rodad ni faanra ngauda ngongolgad ni bod rogon ni i rin’ Jesus? (b) Mang boch e deer nib t’uf ni ngad tedan’dad ngay?
3 Be yog e Bible ni gaar: “Ma en nra gaar e be par u fithik’ Got e susun e ngi i par e wok rok ni bod rogon ni i rin’ Jesus Kristus.” (1 John 2:6) Thingarda pared ni gad ba peth ku Got ni aram e gad be fol ko pi motochiyel rok Jesus ni bod rogon ni i fol ko pi motochiyel rok e Chitamangin.—John 15:10.
4 Ere, nguuda ngongolgad ni bod rogon ni i rin’ Jesus e be yip’ fan ni ba t’uf ni ngad fal’eged i yaliy ni ir fa en Ma Pow’iyey ma gad lek luwan ay. Pi deer nib ga’ fan ni ngad fal’eged i lemnag murung’agen e re ne’y e: Uw rogon ni ma pow’iydad Jesus e ngiyal’ ney? Uw rogon ni ra yib angin ngodad ni faan gad ra folwok u rogon e pi n’en i rin’? Mang angin ni ra yib riy ni faan gad ra fol ko tin ni ke dag Jesus Kristus ni ngad rin’ed?
Rogon ni I Pow’iy Jesus Pi Gachalpen
5. Mang e micheg Jesus ngak pi gachalpen u m’on ni yan nga tharmiy?
5 U m’on ni sul Jesus ni kan faseg ko yam’ nga tharmiy, me m’ug ngak pi gachalpen me pi’ ngorad reb e maruwel ni rib ga’ fan ni ngar rin’ed. I yog ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg.” Re ngiyal’ i n’em me micheg fa en Ma Pow’iyey ni ra un ngorad ni ngar mu’naged e re maruwel nem ni gaar: “Ma dab mpaged talin ni gu ba’ romed, nge yan i mada’ nga tomuren e fayleng.” (Matthew 28:19, 20) Uw rogon ni bay Jesus Kristus rok pi gachalpen e ngiyal’ ney ni tungun e re m’ag ney?
6, 7. Uw rogon ni ma pow’iydad Jesus u daken fare kan ni thothup?
6 Gaar Jesus: ‘En ni bay i ayuwegmed e aram fare kan ni thothup ni en ni Chitamangiy e bayi l’og nge yib ni owcheg, ma bayi fil urngin ban’en ngomed, me ayuwegmed nge mit ngomed urngin e tin ni kug weliy ngomed.’ (John 14:26) Fare kan ni thothup, ni kan pi’ ni owchen Jesus, e ma pow’iydad ma ma gelnagdad e ngiyal’ ney. Ma tamilangnag lanin’dad ko tirok Got ban’en ma ma ayuwegdad ni ngad nanged fan e “tin nda nang ni ke m’ay i lemnag rok Got.” (1 Korinth 2:10) Tin ni kub muun ngay, e fapi felngin ni bay rok Got ni aram e “t’ufeg, felfelan’, gapas laniyan’, gum’an’, gol, fel’ ngak e girdi’, yul’yul’, sobut’an’, nge t’ar laniyan’” e aram fapi “womengin e kan ni thothup.” (Galatia 5:22, 23) U daken e ayuw ko fare kan ni thothup ma rayog ni ngad maruweliyed e pi fel’ngin ney.
7 U nap’an ni gad ra fil e Bible ma gad athamgil ni ngad rin’ed e tin ni kad filed, ma aram e ma ayuwegdad e kan ni thothup rok Jehovah ni nge yog ngodad e gonop, nge gelngin ni ngan nang fan ban’en, nge tamilangan’, nge rogon ni ngan turguy ban’en, nge gelngin e lem. (Proverbs 2:1-11) Kan thothup e ku ma ayuwegdad ni ngad gel gad ko pi n’en ni ma wawliydad nge skeng. (1 Korinth 10:13; 2 Korinth 4:7; Filippi 4:13) Kan pi’ e athamgil nga liniyan’ e pi Kristiano ni ngar ‘pithiged yad u urngin mit ban’en ni ma alitnag e dowef nge lanin’uy.’ (2 Korinth 7:1) Rayog ni ngad pared nrogon nib puluw ko tin ni baadag Got ni ngada pared riy ni gad bbiech, ni dariy e ayuw ko fare kan ni thothup rodad fa? Reb e kanawo’ ni ma fanay Jesus ni nge pow’iydad e ngiyal’ ney e aram fare kan ni thothup, ni ke pi’ Jehovah mat’awon Jesus ni nge fanay.—Matthew 28:18.
8, 9. Uw rogon ni ma fanay Kristus fare “tapigpig nib yul’yul’ mab gonop” ni ngar pied e kanawo’ ngodad?
8 Kum lemnag reb e kanawo’ ni ma pow’iy Jesus e pi ulung riy e ngiyal’ ney. I weliy Jesus murung’agen e ngiyal’ ni ba’ nge tungun e re m’ag ney ni gaar: “Ere mini’ fa en ni ir e tapigpig nib yul’yul’ mab gonop ni ir e en ni masta rok e ke ta ni nge mil fan e tin ni ka bay e tapigpig ngak ni nge pi’ garad ko ngiyal’ ni yima pi’ riy? Rib ga’ ba felfelan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’. Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.”—Matthew 24:3, 45-47.
9 Fare “masta” e aram Jesus Kristus. Fare “tapigpig” e aram fare ulung u roy u fayleng ni kan dugliyrad. Re ulung ney e kan pagan’uy ngorad ni ngar ayuweged e tirok Jesus ni bay u roy u fayleng ma yad be duruiyrad ko tirok Got ban’en ko ngiyal’ ni ngan pi’ riy. Bochi ulung ni yad ma ayuweg e ulung ni yad bay u fithik’ fare “tapigpig nib yul’yul’ mab gonop” e aram fare Governing Body, ni yad be maruwel ni owchen fare ulung ni kan duguliyrad. Yad ma pow’iy fare maruwel ni bay u ga’ngin yang e fayleng ni ngan machibnag murung’agen fare Gilil’ungun maku yad ma pi’ e ggan ni fan ko tirok Got ban’en ko ngiyal’ ni yima pi’ riy. Ma pow’iy Kristus e ulung u daken fare ulung ni kan duguliyrad ko kan ni thothup ni aram “fare tapigpig nib yul’yul’ mab gonop” nge fare Governing Body ni bay riy.
10. Susun uw rogon e ngongol rodad ngak e piin piilal, ma mang fan?
10 Maku reb e pow ni be dag ni Jesus e ir en ga’ ni be pow’iyey u daken “fapi girdi’ ni taw’ath”—ni aram e piin piilal ni Kristiano, ara pi overseers. Kan pi’rad ni ngar ngongliyed “rogon urngin e girdi’ rok Got ngar pigpiggad ngak Got ni aram e maruwel rok girdien Kristus, mi yad ayuweg girdien e dowef rok Kristus ngar ilalgad i yan.” (Efesus 4:8, 11, 12) Be weliy e Hebrews 13:7 murung’agrad ni gaar: “Um tafinayniged fa piinem ni yad e urogned e thin romed, ma yad e rogned e thin rok Got ngomed. Mu tafinayniged rogon ni ur pired nge rogon e yam’ nra tiyed, mi gimed fol u rogon ni ur pired nib michan’rad ngak Got.” Piin piilal e ir e yad ma pow’iy e ulung. Bochan ni yad ma folwok rok Jesus Kristus, ma michan’ rorad e bay rogon ni ngan folwok riy. (1 Korinth 11:1) Rayog ni ngad daged nib fel’ u wan’dad e pi yaram ni ke ngongliy e piin piilal ni faan gad ra dag ni gad be fol ko “fapi girdi’ ni taw’ath.”—Hebrews 13:17.
11. Ma pow’iy Jesus pi gachalpen u daken e mang e ngiyal’ ney, ma mang e ba muun ngay ni ngan ngongol ni bod ni i rin’?
11 Arrogon, ma pow’iy Jesus pi gachalpen e ngiyal’ ney u daken fare kan ni thothup, “fare tapigpig nib yul’yul’ mab gonop,” nge pi piilal u lan e ulung. Ngad ngongolgad ni bod rogon ni i rin’ Jesus e ba muun ngay ni ngad nanged fan rogon kanawoen ni ma pow’iydad ma gad fol riy. Kub muun ngay ni ngada folwokgad u rogon e n’en ni i rin’. Rogon ni yoloy apostal Peter e gaar: “Ereray e n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) Faan gad ra folwok u rogon e ngongol rok Jesus ma ra yib angin ngodad u daken e mang kanawo’?
Mu Par nib Tabthabel e Lem Rom u Nap’an ni Ga Be Fanay Mat’awom
12. Gin ngan ko ngongol rok Jesus nib fel’ e rib ga’ fan ngak e piin piilal u lan e ulung?
12 Yugu aram rogon ni boor mat’awon Jesus ni ke pi’ e Chitamangin ngak ndariy be’ ni bod, mab thathabel rogon ni i fanay. Gubin e girdi’ u lan e ulung—ni baga’ ni piin piilal—e thingar ra “sumunguygad ngak urngin e girdi’.” (Filippi 4:5; 1 Timothy 3:2, 3) Yugu aram rogon ni piin piilal e bay boch i mat’awrad u lan e ulung, ma baga’ fan ni ngar leked luwan ay Jesus nrogon ni i fanay mat’awon.
13, 14. Mang reb e kanawo’ ni rayog rok e piin piilal ni ngar leked luwan ay Kristus u nap’an ni yad be pi’ e athamgil nga laniyan’ boch e girdi’ ni ngar pigpiggad ku Got?
13 Ma fal’eg i lemnag Jesus e gin ni nge mus e piin ni gachalpen riy. De towasariyrad ni ngar pied e tin ni dabiyog ni ngar pied. (John 16:12) Machane i pi’ e athamgil nga laniyan’ pi gachalpen ni ‘ngar athamgilgad’ i rin’ e tin nib ma’gan’ Got ngay. (Luke 13:24) I rin’ ni aray rogon ni aram e be pow’iyrad ma be pug lanin’rad. Taareb rogon ko ngiyal’ ney, piin piilal ni Kristiano e darur towasariyed e girdi’ ni ngar pigpiggad ngak Got u fithik’ e tamra’. Machane, yad ma pi’ e athamgil nga lanin’rad ni ngar pigpiggad ngak Jehovah u daken e t’ufeg rorad ngak nge Jesus, ma ku arrogon e piin nib migid ngorad.—(Matthew 22:37-39)
14 De fanay Jesus mat’awon u reb e kanawo’ nde fel’ ni aram e nge gagiyegnag e yafas ko girdi’ ngay. Ku de tay boch e motochiyel ni dabiyog ni ngan fol riy ara motochiyel ni ke pag urngin. N’en ni baadag e nge k’aring lanin’rad ni aram e nge taw nga gumircha’rad e pi motochiyel ni kan pi’ ngak Moses. (Matthew 5:27, 28) Rogon ni yad be folwok rok Jesus, e piin piilal e darir ngongliyed e motochiyel u rogon ni yad be lemnag ara rogon ni yad be sap ngay. Faanra boch ban’en ni bay rogon ko munmad nge rogon ni fal’eg ya’ey ara fafel, ma piin piilal e yad ma gay rogon ni nge taw nga gumirchaen e girdi’ ni yad be fanay e pi fonow rok Got ni bod rogon e tin ni bay u Mikah 6:8; 1 Korinth 10:31-33; nge 1 Timothy 2:9, 10.
Mu Runguy ma Ga N’ag Fan
15. Mang e yog Jesus ko tin nde yog ni nge rin’ pi gachalpen?
15 Ke tay Kristus reb e kanawo’ ni ngad folwokgad riy u rogon ni i ayuweg pi gachalpen ko pi oloboch rorad. Am lemnag l’agruw ban’en ni ke buch ko fa bin ni tomur e nep’ rok u fayleng nib girdi’. U tomuren ni ke taw nga Gethsemane, me fek Jesus “Peter nge James nge John ngar uned ngak” me yog ngorad ni gaar “nguum odgad.” Ngemu’, “me yan buchuuw nga orel, me yan i palpal nga but’ me meybil ngak Got.” Nap’an ni sul, me “piriegrad ni yad be mol.” Mang e ke rin’ Jesus? I gaar: “Ya lanin’uy e ba adag, ma dowef e mmeewar.” (Mark 14:32-38) I dag e runguy ngak Peter, nge James, nge John ko bin ni nge puwan’ ngorad nib gel. Ku re nep’ i n’em ma dalip yay ni yog Peter ni de nang Jesus. (Mark 14:66-72) Uw rogon e ngongol rok Jesus ngak Peter u tomuren e re n’em? “Faanem i Somol e riyul’ ni ke fos ko yam’! Yi Simon [Peter] e ke guy!” (Luke 24:34) “Me m’ug ngak Peter,” nrogon ni yog e Bible, “nge mu’ me m’ug ngak fa ragag nge l’agruw i apostal.” (1 Korinth 15:5) I n’ag fan u wan’ e n’en ni ke rin’ fare apostal me gelnag laniyan’, ma de damumuw. Tomuren, me pi’ Jesus boch e maruwel ni baga’ ngak Peter.—Acts 2:14; 8:14-17; 10:44, 45.
16. Uw rogon ni ngada ngongolgad ni bod rogon ni i rin’ Jesus u nap’an ni ra rin’ be’ ni taareb e michan’ rodad ban’en nib kireb ngodad nge kireban’dad ngay?
16 Nap’an ni piin ni taareb e michan’ rodad e yad ma kirebnag lanin’dad ara rin’ed boch ban’en nib kireb ngodad ni bochan ni dawor ra flontgad, machane gathi susun ni ngad runguyed yad ma gad n’ag fan rorad ni bod rogon ni i rin’ Jesus? I tay Peter ir ngak pi walagen ni gaar: “Ere thingari gimed gubin ni nga taareb rogon e lem romed mu um runguyed gimed; me bigimed me t’uf rok bigimed nrogon e piin ni walag ni girdien Kristus, mu um pired nib fel’ e thin romed ngomed ma ba sobut’ lanin’med ngomed. Dab mu puluwniged e thin nib kireb; machane ngam fulweged taban nga ban’en nib fel’.” (1 Peter 3:8, 9) Uw rogon ni faanra de yog rok be’ ni nge rin’ ban’en ngodad ni bod rogon ni i rin’ Jesus, me siyeg ni dabi runguydad me dabi n’ag fan? Ku aram rogon nib mil fan ngodad ni ngad gayed rogon ni ngad leked luwan ay Jesus ma gad rin’ u rogon ni i rin’.—1 John 3:16.
Mu Tay fare Gil’ilungun nib M’on
17. Mang e be dag ni i tay Jesus nib m’on u lan e yafas rok fare maruwel ni nge rin’ e tin nib m’agan’ Got ngay?
17 Machane ku reb e kanawo’, e kub t’uf ni ngad ngongolgad ni bod rogon ni i rin’ Jesus Kristus. Fare maruwel ni ngan machibnag fare thin nib fel’ ni murung’agen Gil’ilungun Got e mang ban’en ni rib ga’ fan u lan e yafas rok Jesus. U tomuren ni ke machibnag fare ppin nu Samaria u tooben fare binaw nu Sychar u Samaria, me yog Jesus ngak pi gachalpen ni gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu maruweliy.” (John 4:34) N’en ni i rin’ nib m’agan’ e chitamangin ngay e ayuweg Jesus; bod e ggan nib fel’ nga fithik’ i dowey ma ma fel’ rogoy riy. Gad ra lek luwan ay Jesus ngad pired ni kad yiluyed owchedad ma gad be rin’ e tin nib m’agan’ Got ngay ma ra pow’iydad ko yafas ni dariy fan ma dabi fel’ rogodad riy, fa?
18. Mang e tow’ath e ke yib ko ngan pi’ e athamgil nga laniyan’ e bitir ni ngar uned ko machib u polo’ e tayim?
18 Nap’an ni ra pi’ e piin ni gallabthir e athamgil nga laniyan’ e bitir rorad ni ngar uned ko fare maruwel ni ngan machib nib polo’ e tayim, ma ma yib boor e tow’ath ngorad nge bitir rorad. Chitamangin l’agruw i pagal nib athlog e pi’ e athamgil ngak e gali pagal nem ni ngar tew e pioneer ni nge mang ban’en ni ngar namegew ni nap’an ni ka yow bbitir. U nap’an ni ra mu’nagew e skul, ma fagali athlog e ra mangew pioneer. I lemnag gelngin e felfelan’ ni thamiy ni bochan, me yoloy fare matam ni gaar: “Dawori rin’ e gali pagal ney ban’en ni nge kirebnag lanin’mow. Rayog ni nggogew u fithik’ e magar ni, ‘Bitir e ba tow’ath ni ma pi’ Somol.’” (Psalm 127:3) Uw rogon ni ma fel’ rogon e pi bitir ni ma nameg ni nge un ko machib ni polo’ e tayim rorad? Chitiningin lal e bitir e yog ni gaar: “Machib ni polo’ e tayim e ke ayuweg gubin e bitir rog ni ngar chugurgad ku Jehovah, ke mon’ognag e fol Bible ni yad ma tay, ma ke ayuwegrad ni ngar filed rogon ni ngar fanayed e tayim rorad nib fel’ rogon, maku ke ayuwegrad ni ngar ted e tirok Got ban’en nib m’on u lan e yafas rorad. Yugu aram rogon ni yad gubin mab t’uf ni ngar thiliyeged boch ban’en u lan e yafas rorad, machane dariy bagayad ni ke kalngan’ ko wo’ ni ke mel’eg ni nge fol riy.”
19. Mang boch ban’en ni fan ko gabul nge langlath nib fel’ ni ngari fal’eg i lemnag e piin nib fel’ yangaren?
19 Piin fel’ yangaren, mang e gimed be lemnag ni fan ko gabul nge langlath? Ga be athamgiliy ni nge yog reb e maruwel ngom nib fel’? Fa ga be maruweliy ni nge yog ngom fare maruwel ni ngan machib u polo’ e tayim? I yog Paul ni gaar: “Ere um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop urngin yay nra mab e kanawo’ ngomed ma ngam maruwelgad ngay ni fan ko tin nib fel’, ya tiney e rran e mo’maw’.” Miki ul’ul ngay ni gaar: “Ere dab mpired ni gimed e balyang, ya ngam guyed rogon ngam nanged e n’en nib m’agan’ Somol ngay ni ngam rin’ed.”—Efesus 5:15-17.
Ngan Yul’yul’
20, 21. Mang kanawo’ e i dag Jesus riy nib yul’yul’, ma uw rogon ni gad ra folwok u rogon e yul’yul’ ni i dag?
20 Faanra ngada ngongolgad ni bodrogon ni i rin’ Jesus mab t’uf ni ngad folwokgad u rogon ni i par nib yul’yul’. Be yog e Bible murung’agen e yul’yul’ ni i tay Jesus ni be gaar: “Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Mi i par nib sobut’an’ ma be fol rok Got nge yan i mada’ ko ngiyal’ ni yim’ riy ni yam’ ni tay u daken baley i gek’iy.” I Jesus e ayuweg ni nge par nib tolang e liw rok Jehovah ni aram e ke fol ko tin nib m’agan’ Got ngay ni nge rin’. I par nib yul’yul’ ni mus ko ngiyal’ ni gafgow me yim’ u daken baley i gek’iy. Thingar da chaariyed e re “lem nge pangin” ney ma gad rin’ e tin nib m’agan’ Got ngay u fithik’ e yul’yul’.—Filippi 2:5-8.
21 Ku i dag Jesus nib yul’yul’ ngak e pi apostal rok nib yul’yul’. Yugu aram rogon ni yad ba meewar ma dawor ra flontgad, ma ke t’ufegrad Jesus “nge yan i mada’ ko tomur.” (John 13:1) Maku arrogodad, ni thingar dab da paged e meewar ko pi walagdad ni nge k’aringdad ni ngad gathibthibgad.
Ngan Fol ko N’en ni Ke Tay Jesus
22, 23. Mang angin ni ra yib riy ni faan gad ra fol ko pi n’en ni ke tay Jesus?
22 Arrogon, gadad e girdi’ ni dawor da flontgad, e dabiyog ni ngauda ngongolgad ni ri bod rogon ni i rin’ Jesus nib flont. Machane, rayog ni ngad gayed rogon nge chuchugur boch rogon ni ngad leked luwan ay. Faanra ngad rin’ed ni aray rogon ma ba t’uf ni ngad nanged fan mad folgad u rogon ni ma pow’iydad Jesus ma gad fol ko n’en ni ke tay.
23 Ngan folwok ku Jesus e ma yibnag boor e tow’ath. Ba ga’ fan mab fel’ u wan’dad e yafas rodad ni bochan e gad be rin’ e tin nib m’agan’ Got ngay ma gathi tin ni gad baadag. (John 5:30; 6:38) Biech e nangan’ rodad. Rogon e ngongol rodad e ra mang ban’en nib manigil ni ngan folwok riy. I pining Jesus gubin e piin ni ke aw parowrad i fek e n’en nib tomal nge pi’ e toffan ngorad. (Matthew 11:28-30) Nap’an ni gad ra fol ko n’en ni i rin’ Jesus, maku arrogon gadad ni gad ra pi’ e toffan ngak yugu boch e girdi’ ni bochan ni gad be chag u taabang. Ere, nga yug uda ngongolgad ni bod rogon ni i rin’ Jesus.
Ka Ga Manang?
• Uw rogon ni ma pow’iy Jesus pi gachalpen e ngiyal’ ney?
• Uw rogon ni rayog ni nge folwok e piin piilal rok Jesus u rogon ni ngar fanayed mat’awrad ni ke pi’ Got?
• Uw rogon ni rayog ni ngad folgad ko n’en ni rin’ Jesus u nap’an ni gad be ngongol ni fan ngak boch e girdi’ ni bochan e meewar rorad?
• Uw rogon ni nge m’on u wan’ e piin nib fel’ yangaren fare Gil’ilungun?
[Picture on page 21]
Piin piilal ni Kristiano e yad ma ayuwegdad ni ngad folgad ko pi n’en ni ke tay Jesus
[Pictures on page 22, 23]
Piin nib fel’ yangaren, mang e n’en ni gimed be lemnag ni ngam rin’ed ya nge yog ngomed e yafas ko Kristiano ni bay fan?