Nge Taareban’mew Kristus

“Nguum folwokgad rok Kristus Jesus mi gimed par ni ke taareban’med.”​—ROM. 15:5.

1. Mang fan ni thingar da folgad u rogon ni i lem Kristus?

KE GAAR Jesus, “Mired ngog, mi gimed folwok rog, ya gub munguy ma gub sobut’an’; mi gimed pirieg e toffan.” (Matt. 11:28, 29) Re thin ney ni yog e be dag fene gel e t’ufeg rok. Dariy be’ ni ke rin’ ban’en ni bod rogon Jesus. Yugu aram rogon ni ir fak Got, ma ke dag e runguy nge sumunguy ngak e girdi’ nib ga’ ni piin ni ke gafgow.

2. Mang e pi fel’ngin Jesus ni gad ra fil?

² U lan e re thin ney nge gal ni ka bay e thin ni gad ra fil, e gad ra nang rogon ni ngad folgad ma gad maruweliy “laniyan’ Kristus” ni ba’ rodad. (1 Kor. 2:16) Gad ra fil lal ban’en ni dag Jesus ni aram e: sumunguy, sobut’an’, gol, ma fol rok Got, der ma rus, ma i dag e t’ufeg.

Ngad Filed Rogon ni i Sumunguy Kristus Ngak e Girdi’

3. (a) Mang reb e kanawo’ ni dag Jesus e sumunguy riy ngak pi gachalpen? (b) Mang e ke yog Jesus u murung’agen e meewar rok pi gachalpen?

³ Jesus e fak Got nib flont, ma baadag ni nge pi’ ir nge yib nga fayleng nge pigpig u fithik’ e girdi’ ni tadenen nib muun ngay e piin nra lied nge yim’. Machane ke t’ar laniyan’ ma ke par nib felfelan’. (1 Pet. 2:21-23) Faanra da ‘l’eged owchedad’ ko n’en ni i rin’ Jesus ma ra ayuwegdad ni ngad t’ared lanin’dad ko kireb ni be rin’ e girdi’ ngodad. (Heb. 12:2) Ke yog Jesus ngak pi gachalpen ni ngar ‘feked e mat’ rok ngar tiyed nga porad, mi yad folwok rok.’ (Matt. 11:29) Mang e yad ra fil rok? Yad ra fil ni ba sumunguy Jesus ma i gum’an’nag ir ko oloboch ni i tay e pi gachalpen. Fare nep’ u m’on ni yim’ Jesus, me luknag rifrifen ay pi gachalpen ni aram e be fil ngorad ‘fene sobut’an’’ ma dab ra paged talin e n’en ni ke rin’ ngorad. (Mu beeg e John 13:14-17.) Boch nga tomren ma de yog rok Peter, James nge John ni ngar ‘pired ni yad ba od,’ ma aram me non Jesus ngak Peter ni gaar, “Simon, mog, kam mol?” Ma ki gaar: “Um odgad nguum meybilgad ngak Got nge siy mpaged gimed ngak e pi n’en ni ma pingeg e girdi’ nge denen. Ya lanin’uy e ba adag, ma dowef e mmeewar.”​—Mark 14:32-38.

4, 5. Uw rogon nra ayuwegdad e n’en ni ke rin’ Jesus ni ngad ayuweged e pi walagdad ni kar olobochgad?

⁴ Uw rogon ni gad ra ayuweg be’ ni walagdad u lan e ulung ni dabun ni nge sobut’nag laniyan’, papey ni nge damumuw mab sagaal ni nge fol ko fonow ni be pi’ e piin piilal ara “fare tapigpig nib yul’yul’ ma ba gonop?” (Matt. 24:45-47) Ba ga’ ni kad nanged e ngongol ni ma rin’ e girdi’ ko re fayleng rok Satan ney, machane nap’an ni gad ra guy reb i walagdad ni ke rin’ e kireb ma sana mo’maw’ ni ngad paged talin. Ere faanra mom ni nge magawonnagdad e kireb ni ke rin’ be’, ma thingar da fithed gadad, ‘Uw rogon ni gu ra dag “laniyan’ Kristus”?’ Dab mu pag talin ni de puwan’ Jesus ngak pi gachalpen u nap’an ni de yog ni ngar folgad rok.

⁵ Am lemnag e n’en ni buch rok apostal Peter. Nap’an ni yog Jesus ngak ni nge chuw u bowoch nge yib Ngak u daken e ran, me yog rok ni nge yan u daken e ran machane de n’uw nap’an. Nap’an ni guy Peter ni ke gel e nifeng me rus ma aram me tabab ni nge yan nga ar. Ere mang e ke yog Jesus ngak? Ke damumuw Jesus ngak? Danga’! “Ka chingiyal’ nem me k’iyag Jesus pa’ nge kol me gaar ngak, ‘Rib achig e michan’ rom ngak Got. Mang fan ni be maruwar Got u wun’um?’” (Matt. 14:28-31) Ere bod rogon e n’en ni ke rin’ Jesus ni ke k’eyag pa’ ke ayuweg Peter, e aram rogon e n’en ni rayog ni ngad rin’ed ngad ayuweged reb i walagdad nib t’uf ni ngan pi’ e athamgil nga laniyan’. Rayog ni ngad filed ban’en u rogon ni ke ayuweg Jesus Peter u fithik’ e sumunguy.

6. Mang e ke fil Jesus ngak pi gachalpen u nap’an ni yad be guy ko mini’ e ba tolang u fithik’rad?

⁶ Peter e ki un ngak e pi apostal ko maluagthin ko mini’ e ba tolang u fithik’rad. James nge John e yow baadag ni nge par bagayow nga ba’ nib mat’aw rok Jesus ma bagayow e nge par nga ba’ ni gilay’ rok u Gil’ilungun. Ma nap’an ni rung’ag Peter nge tin ka bay e apostal mi yad damumuw. Ke nang Jesus ni kar lemgad ni aram rogon ni bochan e kar ilalgad u fithik’ e lem nib tolangan’. Ere ke gaar ngorad: “Gimed manang ni pi pilung e ba ga’ lungurad u puluwon e girdi’, ma piin ni yad be yog e thin rorad e yad be gagiyegnagrad. Machane gimed e gathi ereram rogon e n’en ni ngam rin’ed. Faanra ba adag bigimed ni nge mang ir e ba tolang, ma ir e thingari mang tapigpig romed ni gimed gubin; ma faanra ba adag bigimed ni ir e nge m’on, me ir e thingari mang sib romed.” Ma aram ma ki gaar: “Ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.”​—Matt. 20:20-28.

7. Uw rogon ni ngad ayuweged gadad ngad taarebgad u lan e ulung?

⁷ Ngad fal’eged i lemnag e sobut’an’ ni tay Jesus ma ra ayuwegdad ni ngad sobut’niged gadad u fithik’ e pi walagdad u lan e ulung. (Luke 9:46-48) Gad ra rin’ ni aray rogon ma rayog ni ngad pared u taabang. Jehovah e bod ba matam u reb e tabinaw, ma baadag e bitir rok ni ngar pared u taabang “nib taareb lungurad.” (Ps. 133:1) Ke meybil Jesus ngak e Chitamangin ni nge urngin e tin riyul’ e Kristiano mi yad par u taabang. Ke gaar, ya nge “nang e girdi’ nu fayleng ni gur e kam l’ugeg ku gub ma yad ba t’uf rom ni bod rogon ni gub t’uf rom.” (John 17:23) Faan gad ra par ni gad ba taareb ma aram e ra nang e girdi’ ni gadad pi gachalpen Kristus. Ra ngad felfelan’gad ni kad taarebgad, ma aram e thingar da ayuweged e girdi’ ni bod rogon ni rin’ Kristus. I n’ag Jesus fan e kireb, ma ke fil ngodad ni faan gad ra n’ag fan e kireb rok boch e girdi’ ma ra n’ag Got fan e kireb rodad.​—Mu beeg e Matthew 6:14, 15.

8. Mang e gad ra fil ko pi n’en ni rin’ boch e tapigpig rok Got kakrom?

⁸ Ku rayog ni ngad filed boch ban’en rok e girdi’ ni ur folwokgad rok Jesus u lan boor e duw. Pi tapigpig rok Got ney e yad manang fan e meewar rok boch e girdi’. Kar daged rogon e runguy ni immoy rok Kristus e gathi kemus ni ngad ayuweged e “piin ni yad mmeewar” machane ngar taarebgad. Maku be pi’ e athamgil ko girdien e ulung ni ngar daged rogon ni i lem Kristus. Yad baadag ni nge yog e lem rok Kristus ngak pi walagrad ni bod rogon apostal Paul ni baadag e pi Kristiano u Roma ni “Got ni ir e ma yib e gum’an’ nge athamgil laniyan’ rok ngodad e nge ayuwegmed nguum folwokgad rok Kristus Jesus mi gimed par ni ke taareban’med, ni fan e gimed gubin ni nge taareban’med nga mogned e sorok ngak Got ni ir e Chitamangin e Somol rodad i Jesus Kristus.” (Rom. 15:1, 5, 6) Gad ma n’uf Jehovah ko liyor ni gad ma tay u taabang.

9. Mang fan nib t’uf gelngin Got nib thothup ni faanra ngad folgad rok Jesus?

⁹ Jesus e “ba sobut’an’” mab sumunguy, ni aram reb i fel’ngin Gelngin Got nib thothup ni bay rok. Ere faanra ngad folgad ko n’en ni ke rin’ Jesus mab t’uf ni nge yog gelngin Jehovah nib thothup ngodad. Thingar da yibilayed fel’ngin gelngin Got nib thothup ma gad athamgil ni ngad maruweliyed e pi fel’ngin nem ni aram e “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Gal. 5:22, 23) Ere faan gad ra fol u rogon e sobut’an’ nge sumunguy ni dag Jesus ma rayog ni ngad felan’naged Jehovah.

I Gol Jesus Ngak Boch e Girdi’

10. Uw rogon ni gol Jesus ngak e girdi’?

¹⁰ Ngan gol e aram reb i fel’ngin gelngin Got nib thothup. I gol Jesus ngak e girdi’ ni gubin ngiyal’. Gubin e girdi’ ni baadag ni nge un ngak Jesus e “pagrad ngar pired rok.” (Mu beeg e Luke 9:11.) Mang e gad ra fil u rogon ni i gol Jesus ngak e girdi’? Be’ nib gol e ba fel’ e thin rok, ma runguyey mab sumunguy. Jesus e be’ ni aram rogon. Ke kireban’ ngak e girdi’ “ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.”​—Matt. 9:35, 36.

11, 12. (a) Mu weliy reb e kanawo’ ni i dag Jesus e runguy rok ngak be’. (b) Mang e kad filed ko n’en ni kad weliyed?

¹¹ Maku ke dag Jesus e runguy rok ko ngongol rok. Baaray reb e n’en ni rin’ Jesus. Immoy reb e ppin ni ke gaman 12 e duw nib m’ar nib molul. Manang fare pin ni fare Motochiyel ni kan pi’ ngak Moses e be yog ni girdi’ nra math ngak be’ nib molul e ke alit mab t’uf ni nge par in e rran ma fin rayog ni nge un ko maruwel ni fan ku Got. (Lev. 15:25-27) Machane, n’en ni ke nang u murung’agen Jesus e ke k’aring ni ngari pagan’ ngak nrayog ni nge golnag e m’ar rok. Ma i gaar u wan’, “Yugu ra gu math ko mad rok, ma ke mutrug ni nguug gol.” Me gelnag laniyan’, ma aram e ke math ko mad rok Jesus ma ka chingiyal’ nem me thamiy ni ke gol ko m’ar rok.

¹² Ke nang Jesus ni bay be’ ni ke math ngak, me chachangar nga tooben ni nge nang ko mini’. Ke rus fare pin ya be lemnag nra puwan’ Jesus ngak nib gel ya manang ni ke th’ab e Motochiyel ma aram ke lumel nga but’ ni be da’da’ me yog e n’en ni ke rin’. Gur, ke puwan’ Jesus ngak? Danga’! Ya ke gaar ngak: “Fakag, michan’ rom ngak Got e ke golnigem. Mman ni ke pagan’um, ya kam gol ko m’ar rom.” (Mark 5:25-34) Dabisiy ni ke felfelan’ fare pin u nap’an ni ke rung’ag e pi thin ney ni ke yog Jesus.

13. (a) Uw rogon nib thil Jesus ngak e pi Farise? (b) Mang e ke rin’ ngak e pi bitir?

¹³ Ba thil e n’en ni ke rin’ Kristus ngak e pi Farise ya de fanay e liw rok ni nge gafgownag e girdi’. (Matt. 23:4) I fil kanawoen Jehovah ngak e girdi’ u fithik’ e gol nge gum’an’. Ma runguy Jesus pi gachalpen ma gubin ngiyal’ ni ma dag e t’ufeg me gol ngorad. (Prov. 17:17; John 15:11-15) Baadag e pi bitir ni ngar uned ngak Jesus, ma de chalban Jesus ngorad ya i ayuwegrad. Immoy ba ngiyal’ ni ke taleg pi gachalpen e girdi’ ni dabkur feked e bitir rorad i yib ngak Jesus, ni bochan e ka bay e lem ko pi tayugang’ ko teliw rorad. De felfelan’ Jesus ko n’en ni ke rin’ pi gachalpen. I gaar ngorad: “Mpaged e pi bitir nir ngar bad ngog! Dab mu taleged yad, ya gagiyeg rok Got e fan ngak e piin ni bod e pi bitir ney.” Me fil ban’en ngorad ni gaar: “Mu ted fanmed i yan ko re bugithin ney! En ndabi bodnag ir bochi tir nge pag ir nga pa’ Got nge mang Got e i gagiyegnag e dabiyog nra yan ko gin nsuwon Got.”​—Mark 10:13-15.

14. Uw rogon nra fel’ rogon e pi bitir ni kan dag e t’ufeg ngorad?

¹⁴ Mu lemnag u nap’an ni ke ilal e pi bitir nem nfaanra boch i yad e ke yib ngan’rad ni ke ‘kunuyrad Jesus me tay pa’ nga dakenrad me yibilayrad.’ (Mark 10:16) Maku arrogon e pi bitir e ngiyal’ ney ni piin ni piilal nge boch e girdi’ e ur golgad ngorad, rayog ni nge felan’rad u nap’an nra yib ngan’rad e t’ufeg ni kan dag ngorad. Pi bitir ni kan dag e t’ufeg u lan e ulung ngorad e yad ra nang ni gelngin Jehovah nib thothup e bay u daken e girdi’ rok.

Mu Gol Ngak e Girdi’ ni Darur Golgad

15. Mang fan ni dabda gingad ngay ni boor e girdi’ ni darur golgad e ngiyal’ n’ey?

¹⁵ Boor e girdi’ e ngiyal’ ney e yad be lemnag ni dariy e tayim rorad ni ngar golgad ngak e girdi’. Ere gubin ngiyal’ ni yima rin’ e ngongol nib kireb ngak e girdi’ rok Jehovah u skul, nge tabon e maruwel, ara u nap’an ni yad be milekag, nge nap’an ni yad be machib. Rayog ni nge chalbadad ko ngongol rok boch e girdi’ nib kireb, machane dabda gingad ngay. I thagthagnag Jehovah ngak Paul me ginangdad ni ngiyal’ ney ni “tin tomren e rran” e rayog ni nge mada’nag e tin riyul’ e Kristiano e piin ni “ke mus ni yad e yad be lemnagrad . . . ma bay dab kur golgad.”​—2 Tim. 3:1-3.

16. Uw rogon ni ngaud golgad u lan e ulung ni bod Kristus?

¹⁶ Maku, ulung ko tin riyul’ e Kristiano e yad ba gol ya dar boded e girdi’ nu fayleng ni darur golgad. Ma rayog ni ngad ayuweged ni nge par ni bay e gapas u fithik’dad ni faanra ngad folwokgad rok Jesus. Uw rogon? Boor e girdi’ u lan e ulung rodad nib t’uf rorad e ayuw ya ke yib e m’ar ngorad ara ku boch e magawon. Ke yoor e magawon ni aram rogon machane gathi pi n’en ni kafin ni sum. Pi Kristiano kakrom e ki yib e magawon ngorad ni aram rogon. Maku ba puluw ni ngan ayuweg e Kristiano ni keb e magawon ngorad ni bod kakrom. Ni bod ni i fonownag Paul e Kristiano ni ngar pied e ‘athamgil ngak e piin ni yad be rus, mi yad ayuweg e piin ni yad mmeewar, mu ur pired nib gum’an’rad rok urngin e girdi’.’ (1 Thess. 5:14) Re n’ey e be yip’ fan ni ngan gol ni bod Kristus.

17, 18. Mang boch e kanawo’ nrayog ni ngad folwokgad rok Jesus u rogon ni i gol?

¹⁷ Pi Kristiano e ‘thingar ra ayuweged e pi walagrad,’ ni bod ni i rin’ Jesus, ngaud runguyed e pi walagdad ni kad nanged yad u lan boor e duw nge pi walagdad ni daworda guyed yad. (3 John 5-8) Thingar da gayed e kanawo’ ni ngaud runguyed e girdi’ ma ngaud golgad ngorad ni bod Jesus.​—Isa. 32:2; Matt. 11:28-30.

¹⁸ Ra bagadad ma rayog ni nge gol ngak e girdi’ ni faanra ri ma guy rogon ni nge ayuwegrad. Mu gay e kanawo’ ni nguum rin’ ni aram rogon. I fonownagdad Paul ni gaar: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.” (Rom. 12:10) Re n’ey e be yip’ fan ni ngaud folgad rok Kristus, ngaud golgad ngak e girdi’, ngaud daged “nriyul’ nib t’uf e girdi’” rodad. (2 Kor. 6:6) I weliy Paul murung’agen e re t’ufeg rok Kristus ney ni gaar: “En nib t’uf Got rok nge girdi’ e ba gum’an’ ma ba gol; ma en nib t’uf Got rok nge girdi’ e der ma awan’, ma de uf, ma de tolangan’.” (1 Kor. 13:4) Dabda fanenikayed e pi walagdad ya ngad folgad ko fare fonow rok Paul ni gaar: “Um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.”​—Efe. 4:32.

19. Gad ra gol ni bod Jesus ma mang angin?

¹⁹ Ra yib e tow’ath ngodad ni boor ni faanra ngad athamgilgad ni ngaud golgad ngak e girdi’ ni gubin ngiyal’ ni bod Kristus. Ma gelngin Jehovah nib thothup e ra maruwel u lan e ulung ma ra ayuweg e girdi’ ni ngar daged fel’ngin gelngin Got nib thothup. Maku, faanra ngaud folgad ko n’en ni rin’ Jesus ma ngad ayuweged e pi walagdad ni ngar rin’ed ni aram rogon ma ra felfelan’ Got. Ere ngaud athamgilgad ni ngaud runguyed e girdi’ ma ud golgad ngorad ni bod Jesus.

Rayog ni Ngam Weliy?

• Uw rogon ni dag Jesus nib ‘sumunguy mab sobut’an’’?

• Uw rogon ni i gol Jesus?

• Mang boch e kanawo’ ni ngaud sumunguygad mad golgad ni bod Kristus e ngiyal’ ney ni dawori flont e girdi’?

[Picture on page 11]

Nap’an nra war e michan’ rok reb e walag ni bod e n’en ni buch rok Peter, rayog ni ngad ayuweg, fa?

[Picture on page 12]

Uw rogon ni ngam ayuweg girdien e ulung ni ngaur golgad ngorad?