T’ufeg Rok Kristus e Ra K’aringdad ni Ngad Daged e T’ufeg
“Yigi i par ni yad ba t’uf rok [Jesus] nge yan i mada’ ko tomur.”—JOHN 13:1.
1, 2. (a) Uw rogon nib thil e t’ufeg ni dag Jesus? (b) Mang boch kanawoen e t’ufeg ni gad ra weliy u lan e re thin ney?
KE DAG Jesus e kanawo’ rib fel’ u rogon ni ngan dag e t’ufeg. Ke dag e t’ufeg ko ngongol rok nge nap’an ni i non, nge nap’an ni i machib, nge ngiyal’ ni pi’ e pogofan rok ni maligach. Ma ki dag e t’ufeg ngak e girdi’ ni i mada’nag maku ba ga’ ni i dag e t’ufeg ngak e pi gachalpen u nap’an e yafas rok u fayleng.
2 Ke dag Jesus e kanawo’ nrib fel’ ngak pi gachalpen ko uw rogon ni ngar daged e t’ufeg. Ma re n’ey e ma k’aringdad ni ngad daged e t’ufeg ngak e pi walagdad u lan e ulung nge ku boch e girdi’. U lan e re thin ney, e gad ra weliy ko mang e ra fil e piin ni piilal u lan e ulung rok Jesus u nap’an ni dag e t’ufeg ngak e piin ni kar rin’ed e kireb. Maku gad ra weliy ko uw rogon nra folwok e pi Kristiano ko t’ufeg ni dag Jesus u nap’an nra yib e magawon nge gafgow, nge m’ar ko girdi’.
3. Mang e ke rin’ Jesus ni yugu aram ni ke oloboch Peter?
3 Fare nep’ u m’on ni yim’ Jesus ma Peter ni reb i gachalpen e dalip yay ni yog ni de nang Jesus. (Mark 14:66-72) Ke n’ag Jesus fan e kireb ni ke rin’ Peter ma aram e ke mon’og Peter ma ke pi’ boch e maruwel ni nge mil fan ngak. (Luke 22:32; Acts 2:14; 8:14-17; 10:44, 45) Mang e gad ra fil ko t’ufeg ni ke dag Jesus u nap’an ni ke oloboch be’?
Mu Dag e T’ufeg Ngak e Piin ni Kar Olobochgad ni Bod ni Rin’ Kristus
4. Mang ngiyal’ e thingar ni dag e t’ufeg ni dag Kristus?
4 Ngad daged rogon e t’ufeg ni dag Kristus ni yugu aram rogon ni yu ngiyal’ ni kad dabuyed e kireb ni ke rin’ be’ ndemtrug ko ir be’ u lan e tabinaw fa lan e ulung. Chiney e kari gel e kireb ko re m’ag rok Satan ney, ya nifengin ere fayleng ney e ri be kirebnag e girdi’. Pi kireb u fayleng nge girdi’ ni darur lemnaged ban’en e rayog ni ngar kirebniged gadad ni dabkiyog ni ngad turguyed ko mang e mat’aw nge mang e kireb. U lan e bin som’on e chibog, boch e girdi’ e thingar ni chuweg ko ulung ko Kristiano ma boch e thingar ni fonownagrad. Maku ireray e n’en ni yima rin’ e ngiyal’ ney. (1 Kor. 5:11-13; 1 Tim. 5:20) Nap’an nra pi’ e piin piilal e fonow ni yad be fol ko t’ufeg ni dag Kristus ma rayog ni nge ayuweg e piin ni kar olobochgad.
5. Uw rogon ni nge folwok e piin piilal rok Kristus?
5 Thingari fol e piin piilal ko motochiyel rok Jehovah u gubin ngiyal’ ni bod ni i rin’ Jesus. Faanra yad ra rin’ ma rayog ni ngar daged e sumunguy, gol, nge t’ufeg rok Jehovah. Nap’an nra dag be’ ni ke kalngan’, ma “ke m’ingan’” fa “ke kireban’” ni bochan e kireb rok, de mo’maw’ ko piin piilal ni ngar ‘guyed rogon faanem nge sul nga rogon nge par ni ke mat’aw bayay; machane thingar rin’ed u fithik’ e sumunguy.’ (Ps. 34:18; Gal. 6:1) Machane uw rogon ni ngan ayuweg be’ ni mo’maw’ ni nge fol fa kalngan’?
6. (a) Mang e thingar dabi rin’ e piin piilal u nap’an ni yad be ayuweg e piin kar olobochgad? (b) Mang fan?
6 Ra dabi fol be’ ni ke oloboch ko fonow ni kan pi’ ngak ara yon’ e kireb riy nga daken yugu boch e girdi’, ma rayog ni nge damumuw e piin piilal ara yugu boch e girdi’. Bochan ni kar nanged wenegan e kireb ko cha’ nem ma rayog ni nga rogned boch e thin nib togopuluw ko n’en ni ke rin’. Machane, damumuw e ba ga’ ni ma yibnag e magawon ma de puluw e re n’ey nga rogon “laniyan’ Kristus.” (1 Kor. 2:16; mu beeg e James 1:19, 20.) I fanay Jesus e thin nib tamilang u nap’an ni i fonownag boch e girdi’ kakrom, machane de yog e thin nib kireb ara thin nra gafgownag e girdi’. (1 Pet. 2:23) N’en ni ke rin’ e ke bing e kanawo’ ngak e girdi’ ni ngar kalgadngan’rad ngar fel’gad u wan’ Jehovah. Riyul’ ni reb i fan ni yib Jesus nga fayleng e nge ayuweg e “pi tadenen.”—1 Tim. 1:15.
7, 8. Mang e ra pow’iy e piin piilal u nap’an nra sum e magawon u lan e ulung nib t’uf dalip e piilal ni ngar pithiged?
7 Uw rogon ni nge ayuwegdad e kanawo’ ni ke dag Jesus ko ngongol rodad ngak e girdi’ u lan e ulung nib t’uf ni ngan fonownagrad? Dab mu pag talin ni n’en ni be yog e Bible u murung’agen e yaram ni dalip e piilal e nge ayuweg e piin kar olobochgad. Ma re n’ey e rayog ni nge ayuweg e piin ni kar olobochgad ngar kalgadngan’rad. (2 Kor. 2:6-8) Riyul’ ni bay boch e girdi’ ni kar olobochgad ma dubrad ni ngar kalgadngan’rad mab t’uf ni ngan tharbograd ko ulung. Machane gad ba felfelan’ ni boor i yad e kar sulod ko ulung rok Jehovah. Piin piilal ni ma fol rok Kristus e ma ayuweg e girdi’ ni nge thil e lem rok me mon’og ko tirok Got bayay. Boch e girdi’ ni kan fonownagrad e sana dabki yib ngan’rad urngin e fonow ni kan pi’ ngorad, machane dabisiy nra yib ngan’rad e tayfan nge t’ufeg ni ke dag e piin piilal ngorad.
8 Ere piin piilal e thingar ra daged “fel’ngin gelngin Got nib thothup,” ni bod rogon ni ma t’ufegey Kristus. (Gal. 5:22, 23) Thingar dabra gurgad ni ngar chuweged ko ulung e en ke oloboch. Thingar ra daged ni yad baadag ni nge sul ngak Jehovah. Arfan ni tomuren ni ke kalngan’ be’ ma ra pining e magar ngak Jehovah nge “piin pumoon ni yad ba tow’ath” ko ulung ya kar ayuweged ni nge sul ko ulung.—Efe. 4:8, 11, 12.
Ngan Dag e T’ufeg rok Kristus e Ngiyal’ Ney ko Tomur
9. Mu weliy rogon ni ke dag Jesus e t’ufeg ngak pi gachalpen.
9 I yoloy Luke u murung’agen e t’ufeg ni dag Jesus kakrom. Manang Jesus ni dabki n’uw nap’an ma pi salthaw nu Roma e bay ra longobiyed fare mach nu Jerusalem ni nge dabkiyog ni nge mil e girdi’. I ginangrad Jesus ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag.” Mang e thingar ra rin’ed? I weliy Jesus ngorad nib tamilang e n’en ni thingar ra rin’ed ni gaar: “Ma aram e piin ni yad bay u lan yu Judea e thingar ra milgad nga daken e pi burey; ma piin ni yad bay u lan e binaw e thingar ra chuwgad riy, ma piin ni yad bay u wuru’ e binaw e thingar dab ranod nga lan binaw. Ya ereray e ‘Pi Rran ko gechig,’ ya nge yib i dag nib riyul’ urngin e tin ni ke yog e babyor nib thothup.” (Luke 21:20-22) Tomren ni ke longobiy e pi salthaw nu Roma Jerusalem ko duw 66 u tomren Kristus, ma piin nib yul’yul’ e kar folgad ko thin ni yog.
10, 11. Uw rogon nra ayuwegdad murung’agen e pi Kristiano ni kar milgad u Jerusalem ni ngad fal’eged rogodad ko fare ‘gafgow nib gel’ ni bay yib?
10 Nap’an ni chuw e pi Kristiano u Jerusalem ma ba t’uf ni ngar daged e t’ufeg ngorad ni bod rogon ni rin’ Kristus ngorad. Mab t’uf ni ngar pied e pi n’en ni bay rorad ngorad. Machane yiiy rok Jesus e gathi kemus ni be weliy murung’agen e magothgoth u Jerusalem. Ya ke gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matt. 24:17, 18, 21) U m’on nge nap’an fare ‘gafgow nib gel’ ma gad ra mada’nag boor e magawon. Faanra bay e t’ufeg rok Jesus rodad, ma rayog ni nge ayuwegdad ko pi magawon nra yib ngodad.
11 Ngiyal’ nem e ba t’uf ni ngad daged e t’ufeg rok Kristus. Ki yog Paul e thin ni ngad folgad riy ni gaar: “Machane nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol. Yi Kristus e de yan nga laniyan’. . . . I Got ni ir e ma yib e gum’an’ nge athamgil laniyan’ rok ngodad e nge ayuwegmed nguum folwokgad rok Kristus Jesus mi gimed par ni ke taareban’med.”—Rom. 15:2, 3, 5.
12. Mit i mang e t’ufeg e thingari yog ngodad, ma mang fan?
12 Peter e bay e t’ufeg ku Jesus rok e re ki yog ngak e pi Kristiano nib ga’ fan ni ‘ngar pired nrib t’uf rorad e piin ni ke mich Kristus u wan’rad’ ma ngar “folgad ko tin nib riyul’.” Ma ra bagayad ma ‘ngari t’uf rok bagayad u polo’ i laniyan’.’ (1 Pet. 1:22) Ngiyal’ ney e ri t’uf nge yog ngodad e t’ufeg ni immoy rok Kristus. Be gel e gafgow ni be tay e girdi’ rok Got. Machane dabda taga’gad ko pi n’en ni bay ko re fayleng ney, ya gad manang ko mang e be buch ko re fayleng ney nge pi n’en ni bay riy. (Mu beeg e 1 John 2:15-17.) Ke chugur ni nge m’ay e re m’ag ney e re ba t’uf ni ngad chugurgad ngak Jehovah ma nge fel’ thildad e girdi’ nib ga’ ni ngad daged e t’ufeg ngak e girdi’ u lan e ulung. Ke gaar Paul: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.” (Rom. 12:10) Ma ki yog Peter ni gaar: “Ma re n’en ni ir e th’abi ga’ fan u fithik’ urngin ban’en e ngari bigimed me t’uf rok bigimed, ya rogon nib t’uf be’ rok be’ e ra upunguy boor e denen.”—1 Pet. 4:8.
13-15. Uw rogon ni ke dag boch e walag e t’ufeg rok Kristus u tomren ni ke yib e yoko’?
13 U fayleng i yan e yimanang rogon e t’ufeg rok Kristus ni ma dag e Pi Mich rok Jehovah. Rayog ni ngam nang rogon nra daged e t’ufeg u nap’an ni nra pied e ayuw u tomren reb e yoko’ nrib gel ni aw ko yimuch u Meriken ko duw ni 2005. Ur folgad u rogon ni dag Jesus e t’ufeg, ya ba pag 20,000 e girdi’ nra paged taferad nge maruwel rorad ni bochan e ngar pied e ayuw ngak e pi walagrad ni ke yib e gafgow ngorad.
14 U bang e yib e ran riy nga daken e binaw ni gonap’an 50 e mayel ma tolngin e ran riy e 30 fit. Nap’an ni chuw e ran u daken e binaw ma boor e naun ni ke kireb. Ke yib boch e Pi Mich u boor e nam ni ngar pied e ayuw ni mus ko talin e maruwel ni fan ko naun ni kar feked i yib. Bay l’agruw e ppin ni yow walag ni kar fal’egew rogorow mar tew e chugum rorow nga karrow me yow milekag ni 2,000 mayel ni ngar piew e ayuw. En nib bitir rorow e ke par u rom ma ka be un ko maruwel maku ka be un ko machib ni gubin ngiyal’.
15 Ba pag 5,600 e tabinaw ko Pi Mich nge ku boch e girdi’ ni kan fal’eg rogon ma kan toy bayay. Mang e ke yog e Pi Mich u tomren ni kan dag e t’ufeg ngorad? Bay reb e walag ni ppin ni be par u lan bochi naun ni be lul’ ya ke puth e naun rok. Ke yib boch e walag ma kar toyed reb e naun nib fel’ boch nrayog ni nge par riy. Ke yib i sak’iy nga mit e naun rok ni kari felfelan’ ma ke yib e lu’ u owchen ni bochan e felfelan’ ma ke pining e magar ngak Jehovah nge pi walagen ni Kristiano. Ma boch e pi walag e ur pired ko pi naun ni fan ko girdi’ ni ke kirebnag e yoko’ taferad nib pag reb e duw ni yugu aram rogon ni ke m’ay i toy e naun rorad. Mang fan? Ya nge yog ni par girdien e maruwel ko naun rorad. Ireray reb e kanawo’ nrib fel’ ni kar daged e t’ufeg rok Kristus.
Ngan Dag e T’ufeg rok Kristus Ngak e Piin nib M’ar
16, 17. Mang boch e kanawo’ ni ngad daged e t’ufeg rok Kristus ngak e piin nib m’ar?
16 Sana boch i gadad e ke nang e magawon u nap’an e yoko’. Machane gubin e girdi’ nrayog ni nge yib e m’ar ngorad fa ngak girdien e tabinaw rorad. Rayog ni ngad folwokgad u rogon ni dag Jesus e t’ufeg ngak e piin nib m’ar. Bochan e t’ufeg rok ma aram ma ri kireban’ ngorad. Nap’an ni fek e girdi’ e m’ar rorad i yib ngak “me golnag urngin e piin ni yad mm’ar.”—Matt. 8:16; 14:14.
17 Ngiyal’ ney e dariy gelngin e pi Kristiano ni ngar fal’eged e maang’ang ni ngar golnaged e girdi’ ni bod Jesus machane yad ma runguy e piin nib m’ar ni bod rogon Jesus. Uw rogon ni kar daged? Boch e piilal e kar folgad rok Kristus ya kar yarmiyed boch e tayim rorad ni ngar ayuweged e piin nib m’ar u lan e ulung ma yad be fol ko fare motochiyel ni bay u Matthew 25:29, 40. (Mu beeg.)
18. (a) Uw rogon ni ke dag l’agruw e walag ni ppin e t’ufeg ngak be’ nib m’ar? (b) Mang angin nib fel’ ni ke yib riy?
18 Gathi nge mang be’ reb e piilal ma aram e fin rayog ni nge rin’ ban’en nib fel’ ngak boch e girdi’. Am lemnag rogon e ayuw ni kan pi’ ngak Charlene ni 44 e duw rok, ni bay e cancer rok ma ka nog ngak ni ragag e rran ni nge par me yim’. Bay l’agruw e ppin ni walag ni Sharon nge Nicolette ni kar guyew nib t’uf e ayuw rok Charlene ma ki gafgow e pumoon rok ni be ayuweg, e re kar piew e ayuw ni gubin ngiyal’ nge mada’ ko ngiyal’ ni ke yim’. Ere gathi ragag e rran nra ayuwegew ya nel’ e wik. Ke gaar Sharon, “rib mo’maw’ ni ga be ayuweg be’ ni ga manang ni bayi yim’. Machane ke ayuwegmow Jehovah ni nggu pirew ni gamow ba gel ni gamow be ayuweg Charlene nge pumoon rok.” Ke gaar e pumoon ku Charlene: “Dabiyog ni nggu pagtalin e gol nge rogon e ayuw ni i pi’ fagali walag ni ppin. Ngongol nge lem rorow ni ur ayuwegew Charlene e ki pi’ e ayuw ngog. Dab gu pagtalin e t’ufeg ni kar dagew. N’en ni kar rin’ e kar gelnag e michan’ rog ngak Jehovah nge t’ufeg rog ngak e girdi’ u lan e ulung.”
19, 20. (a) Mang lal ban’en u rogon ni dag Jesus e t’ufeg ni kad weliyed? (b) Mang e kam dugliy ni ngam rin’?
19 U lan e re dalip i article fa thin ni kad filed, e kad weliyed lal ban’en ko t’ufeg ni i dag Jesus nge rogon ni ngad folwokgad rok. Ere ngad boded Jesus ni ba ‘munguy mab sobut’an’.’ (Matt. 11:29) Ere ngad athamgilgad ni ngad golgad ngak e girdi’, ni yugu aram rogon ni dar flontgad ma gad ma guy thibngirad. Ngad guyed rogon ni ngad folgad ko urngin ban’en nib m’agan’ Jehovah ngay ni mus ko ngiyal’ ni ma yib e skeng ngodad.
20 Ere thingar daged e t’ufeg rok Kristus ngak gubin e pi walagdad ni bod rogon ni i rin’ Kristus “nge yan i mada’ ko tomur.” T’ufeg e ra micheg ni gadad e tin riyul’ i gachalpen Jesus. (John 13:1, 34, 35) Ere ngad folgad ko thin rok Paul ni gaar, “Um pired ni ra bigimed ma ba t’uf bigimed rok nrogon e walag ni ma par u fithik’ Kristus.” (Heb. 13:1) Dabi maruwaran’um ni ngaum pining e sorok ngak Jehovah ma nga um ayuweg boch e girdi’! Ra tow’athnagem ko athamgil ni ga be tay.
Rayog ni Ngam Weliy?
• Uw rogon ni nge t’ufeg e piin piilal e piin ke oloboch ni bod rogon Kristus?
• Mang fan nib ga’ fan ni ngan fol u rogon ni dag Kristus e t’ufeg e ngiyal’ ney ko tomur?
• Uw rogon ni rayog ni ngad daged e t’ufeg rok Kristus ngak e piin nib m’ar?
[Picture on page 20]
Baadag e piin piilal ni nge sul e piin ke oloboch ngak Jehovah
[Picture on page 21]
Uw rogon ni chuw e pi Kristiano u Jerusalem e be dag rogon e t’ufeg rok Kristus?
[Picture on page 22]
Yi manang e Pi Mich Rok Jehovah ko t’ufeg rok Jesus ni be m’ug ko ngongol rorad