Fel’ngin e Tamilangan’ ni Yib Rok Got
“Urngin ban’en ma kug matheeg ngay ni kari yan i aw ni lus ni bochan e bin ni ka ba ga’ fan e nggu nang Kristus Jesus ni ir e Somol rog.”—FIL. 3:8.
1, 2. Mang e ke mel’eg boch e Kristiano, ma mang fan?
NAP’AN ni ke tabab Robert ni nge un nga skul ma kan guy nrib llowan’. Ere ngiyal’ ni gaman meruk e duw rok ma reb fapi sensey rok e ke yan nga tabinaw rok me yog ngak ni demtrug ko mang e baadag ni nge fil ma rayog, ma be athapeg nra mang reb e togta. Nap’an ni chuw u skul mi nog ngak ni rayog ni nge mel’eg ko bin ngan e skul nib tolang mab fel’ e ra un ngay u lan e nam rok. Machane de fol Robert ko n’en ni ke yog boch e girdi’ ngak ya ke dugliy ni nge un ko machib u yooren e tayim rok.
2 Bod Robert, ma boor e Kristiano ni demtrug yangaren e rayog ni nge yoor e salpiy rorad me gilbuguwrad e ngiyal’ ney. Machane boch i yad e dar uned ko skul nib tolang ya kar mel’eged ni ngar rin’ed e n’en ni kar micheged ni ngar pigpiggad ku Got. (1 Kor. 7:29-31) Mang e ke k’aring boch Kristiano ni ngar ted boor e tayim ni ngar uned ko machib? Bin som’on e bochan e ba t’uf Jehovah rorad, ma ku yad manang nra fel’ rogorad ni faan ra nge skulnagrad Jehovah. Ka am mu lemnag ko uw rarogon e yafas rom e chiney ni faan gomanga damu fil e tin nriyul’? Faanra da fal’eged i lemnag e tow’ath ni ke yib ngodad ma ra ayuwegdad ni nge par nib ga’ fan e tin nriyul’ u wan’dad, ma ra pasignagdad i machibnag e thin rok Got ngak boch e girdi’.
Rib Tow’ath e En ni Ke Fil Got Ban’en Ngak
3. Mang fan nrayog ni nge mich u wan’dad nrib adag Jehovah ni nge fil ban’en ngak e girdi’ ni dawori flont?
3 Bochan ni Jehovah e ir reb e Got nib fel’, rib adag ni nge skulnag e girdi’ ni dar flontgad. Isaiah 54:13 e be weliy murung’agen e pi Kristiano ni kan dugliyrad ni gaar: “I gag e bay gu machibnag e girdi’ rom, mu gu pi’ e fel’ rogon nge gapas ngorad.” Pi thin ney e ku fan ngak “yugu boch e saf.” (John 10:16) Ba tamilang e re n’ey u reb e yiiy ni ke lebug e ngiyal’ ney. Kan pilyeg e changar rok Isaiah me guy e girdi’ ni boor ni kar bad u urngin e nam ni ngar uned ko bin riyul’ e liyor ma ra bagayad ma be yog ngak bagayad ni be gaar: “Nga darod ko fare burey rok Somol, ko tempel rok fare Got nu Israel. Ya ngad filed e n’en ni ba adag ni ngad rin’ed; mu udarod ko yu pa’ i kanawo’ ni ke turguy ni nga darod riy.” (Isa. 2:1-3) Rib tow’ath e girdi’ ni ke fil Got ban’en ngorad!
4. Mang e baadag Jehovah ni nge rin’ e piin nra fil ban’en ngorad?
4 Mang e thingar da rin’ed me yog ni fil Jehovah ban’en ngodad? Ba t’uf ni nge sobut’an’uy. I yoloy David ni fare psalmist ni gaar: “Somol e mmat’aw ma ba fel’. . . . Piin nib sobut’an’rad e ma fekrad i yan u daken e bin nib mat’aw e wo’.” (Ps. 25:8, 9) Mi ki yog Jesus ni gaar: “Chitamag ni gur e Somol u tharmiy ngu but’! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul.” (Luke 10:21) Gur, gathi gab adag ni ngam chugur ngak fare Got ni “ma ayuweg e piin nib sobut’an’rad”?—1 Pet. 5:5.
5. Mini’ e ke ayuwegdad kad nanged e tamilangan’ u murung’agen Jehovah?
5 Gur, kad nanged e tin riyul’ ni bochan e salap rodad? Danga’, ya dabiyog ni ngad nanged e tamilangan’ u murung’agen Jehovah ni faanra dabi ayuwegdad. I gaar Jesus: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” (John 6:44) Be kunuy Jehovah e girdi’ ni yad bod e saf u daken gelngin nge fare machib ni yi be wereg ni aram e “pi n’en ni yi baadag u lan e pi nam e ra yib.” (Hag. 2:7, NW) Ri gadad be felfelan’ ni gadad bang ko girdi’ ni ke kunuyrad Jehovah.—Mu beeg e Jeremiah 9:23, 24.
Bay Gelngin e Thin rok Got ni nge Thilyeg Rarogon Be’
6. Mang angin ni ke yib ngak e girdi’ ni ke fil e “tamilangan’ u murung’agen Jehovah”?
6 Daken reb e fanathin me yiiynag Isaiah rogon ni ra thil e ngongol ko girdi’ e ngiyal’ ney. Girdi’ ni tacham e kar thilgad kar manged e girdi’ nib fel’. (Mu beeg e Isaiah 11:6-9) Piin ni ur chamgad kakrom ni bochan raen dowrad, nam rorad, ara ba thilthil e yalen rorad e kar taarebgad e chiney. Bod ni kar “pirdiiyed e pi sayden rorad ngar ngongliyed talin e maruwel riy ni ma gi’ e but’.” (Isa. 2:4) Ere mang fan ni ke thil e ngongol rorad? Kar filed e “tamilangan’ u murung’agen Jehovah” mar folgad riy. Yugu aram rogon ni dawori flont e pi tapigpig rok Jehovah u ga’ngin yang e fayleng, machane bay e bin nriyul’ e t’ufeg u fithik’rad. Boch e girdi’ ko pi nam e kar adaged fare thin nib fel’ ma ke yib angin ngorad, re n’ey e be micheg fel’ngin e thin rok Got.—Matt. 11:19.
7, 8. (a) Mang boch e “yungi n’en ni ke fal’eg moonyan’ ke par” ni thin rok Got e ke ayuweg e girdi’ kar gelgad ngay? (b) Mang e be dag ni thin rok Got e ra ayuwegey ngan pining e sorok ngak Jehovah?
7 Ke taareb rogonnag apostal Paul e girdi’ ni ma un ko mahl ngak e pi tapigpig rok Jehovah ni yad be machibnag e thin rok Got ngak e girdi’. I yoloy ni gaar: “Talin e cham ni gamad be maruwel ngay ko cham ni gamad be tay e gathi talin e cham nu roy u fayleng, ya talin e cham nib yargel ni yib rok Got, ni ir e ngan kirebnag ngay yungi n’en ni ke fal’eg e moonyan’ rogon ke par riy be cham ngodad. Gamad be kirebnag e thin nde riyul’ ni be togopuluwnag e girdi’ ngak Got; ma kug buthuged urngin e lem nib tolang ni yibe togopuluwnag ko tin ni kan nang ni murung’agen Got.” (2 Kor. 10:4, 5) Ere mang fare “yungi n’en ni ke fal’eg e moonyan’ rogon ke par” ni thin rok Got e ke chuweg? Boch riy e aram e machib ni googsur nge yalen ko girdi’ ni bay rogon nga ngongolen e moonyan’, nge llowan’ ko girdi’. (Kol. 2:8) Thin rok Got e ke ayuweg e girdi’ kar paged e pi ngongol ni kireb ney mar maruweliyed nge yog ngorad e pi fel’ngin nib fel’. (1 Kor. 6:9-11) Ma ku be ayuweg e tabinaw ma be ayuweg e girdi’ nge yog e bin nriyul’ e athap ngorad. Ireray e n’en nrib t’uf ko girdi’ e ngiyal’ ney.
8 Reb ko pi fel’ngin ni be ayuweg Jehovah e girdi’ ni ngar maruweliyed e aram e yul’yul’, aram e n’en ni gadad ra guy ni rin’ be’. (Heb. 13:18) Reb e ppin nu India e ke un ko fol Bible, munmun me yog ni nge un ko machib u mit e tabinaw. Reb e rran ni be sul nga tabinaw rok u nap’an ni ke mu’ ko maruwel u Kingdom Hall, me pirieg reb e churuwo’ ni gol ni meruk miriay e dolla puluwon nib chugur ko gin ni ma tal e bus riy. Yu gu aram rogon ni ba gafgow machane ke fek fare churuwo’ nga tafen e police ni ngan gay ko mini’ e fen. Ka ri gin e en ni ga’ ko police! Me fith bagayad fapi police fare pin ko, “Mang fan ni ke sulweg fare churuwo’ ni gol?” Me fulweg ni gaar: “Bochan e kug fil e Bible ma kug mang be’ nib yul’yul’ e chiney.” Ere yog fare police ngak fare piilal ni un ngak fare pin ni gaar: “Bay 38 milyon e girdi’ ni ma par u lan e re binaw ney. Faanra rayog ni ngam ayuweg ragag i yad ngar boded e re pin ney ma rib ga’ angin.” Gad ra lemnag ni bokum milyon e girdi’ ni kar thilyeged e ngongol rorad ni bochan e thin rok Got, gathi ra k’aringdad ni ngad pininged e sorok ngak Jehovah?
9. Uw rogon me yog ni ngari thilyeg e girdi’ e ngongol rorad?
9 Gelngin e thin rok Got nge ayuw ni ma pi’ Jehovah u daken gelngin nib thothup, e ma ayuweg e girdi’ ngar thilyeged e ngongol rorad. (Rom. 12:2; Gal. 5:22, 23) Be yog e Kolose 3:10 ni gaar: “Ma bin nib beech i gimed e ka mon’ed nga dakenmed. Ireray e bin nib beech i gimed, ni Got ni ir e sunumiy e yugu be beechnag i yan ni nge yan i par ni bod ir, me fal’eg rogomed ngar mu nanged ir.” Thin rok Got u Bible e bay gelngin ni rayog ni nge gagiyelnag e bin riyul’ i rarogon be’, ma ku rayog ni nge thilyeg rogon ni ma lemnag ban’en. (Mu beeg e Hebrews 4:12.) Ra nge tamilang u wan’ be’ e thin rok Jehovah me fol riy, ma aram e ra mang fager rok Got me yog e athap ngak ko yafas ni manemus.
Be Ayuwegdad Jehovah ni Ngad Fal’eged Rogodad
10. (a) Mang fan ni kari mus ni Jehovah e rayog ni nge ayuwegdad ngad fal’eged rogodad ni fan ko pi n’en ni bay buch nga m’on? (b) Mang e ke chugur ni nge thil u ga’ngin e fayleng?
10 Kari mus ni Jehovah e rayog ni nge ayuwegdad ni ngad fal’eged rogodad, ya manang ko mang e n’en ni bayi buch nga m’on, ya ir e ke turguy. (Isa. 46:9, 10) Thin ni kan yiiynag u Bible e be dag ni fare “rran ni bayi par Somol nga tagil’ e pufthin e be chugur nrib pey.” (Zef. 1:14) Ma ra riyul’ fare thin ko Proverbs 11:4 (BT) ni gaar: “Flaab rom u fayleng e dariy angin ngom e rofen nra taw e yam’ ngom, machane yul’yul’ e rayog ni ayuweg e yafos rom.” Ra taw ko ngiyal’ nra pufthinnag Jehovah e fayleng rok Satan, ma n’en nib ga’ fan e rogon thildad Jehovah ma gathi salpiy. Be gaar Ezekiel 7:19 (BT): “Bay ron’ed e gol nge silber rorad nga lan e yu pa’ i kanawo’ ni bod e dow, ni bochan e silber nge gol e dabiyog ni nge ayuwegrad u nap’an nra puog Somol e damumuw rok.” Re tamilangan’ ney e ra ayuwegdad ngad fanayed tayim rodad ko tin ba ga’ fan.
11. Mang reb e kanawo’ ni thin rok Got e be ayuwegdad ni ngad fal’eged rogodad ni fan ko pi n’en ni bay nga m’on?
11 Ra ayuwegdad e thin rok Got ni ngaud rin’ed e tin ba ga’ fan u m’on ni nge taw fare rran rok Jehovah. I yoloy apostal Paul ngak Timothy ni gaar: “Mog ngak e piin ni boor ban’en rorad ko biney e tamilang ndab ra ufanthingad, ma dabi l’agan’rad ko pi n’em nde mudugil, ni aram e pi n’en ni ma fel’ rogoy riy ko biney e tamilang, machane nge l’agan’rad ngak Got.” Rayog ni nge fel’ rogodad ko re fonow ney ni yib rok Got ni yugu aram rogon ni de yoor e salpiy rodad. Mang e be yip’ e re fonow ney fan? Dab da yoornaged e chugum rodad ya thingar da athamgilgad ni ngad ‘ngongliyed e tin nib fel’ ma ngongol nib fel’ e nge yoor ni ngad ngongliyed.’ Gad ra tay nib m’on e pigpig ngak Jehovah ko yafas rodad ma aram e ‘gadad be kunuy e flaab ni fan ngodad ni ir e bay mang def ngodad.’ (1 Tim. 6:17-19) Gadad ba gonop ni faanra ngad rin’ed ni aram rogon ya gaar Jesus, “Be mang e ra fel’ rogon be’ riy ni faanra yog ngak e re fayleng ni polo’, machane me thay e bin riyul’ e yafos u pa’?” (Matt. 16:26, 27) Bochan ni kari chugur fare rran rok Jehovah ma thingar gu lemnag ko: ‘Mang flaab e gu be kunuy? Rayog ni nggu mang e tapigpig rok Got nge tapigpig ko salpiy, fa?’—Matt. 6:19, 20, 24.
12. Mang fan ni dabi mulan’dad ni faanra be darifannag boch e girdi’ e machib ni gad be tay?
12 Bin th’abi ga’ fan ko ‘tin ba fel’’ ni be yog e thin nu Bible ni ngad rin’ed e ngad machibniged murung’agen Gil’ilungun ma gad ayuweg e girdi’ ngar manged pi gachalpen Jesus. (Matt. 24:14; 28:19, 20) Boch e girdi’ e ma darifannag e machib ni gad ma tay ni bod kakrom. (Mu beeg e 1 Korinth 1:18-21.) Machane yugu aram rogon, ma re n’ey e dabi achignag fan fare machib ni gad be tay maku be bing e kanawo’ ngak urngin e girdi’ ni ngar folgad riy u m’on ni nge sagaal. (Rom. 10:13, 14) Gad ra rin’ e re maruwel ney ma boor e tow’ath nra yib ngodad.
Ma Tow’athnag Jehovah e Pi Tapigpig Rok ni Kar Paged Farad
13. Mang e pi n’en ni ke digey apostal Paul ni bochan fare thin nib fel’?
13 U m’on ni mang Paul reb e Kristiano, ma kan skulnag ko machib rok piyu Jew. Dawori gaman 13 e duw rok me chuw u Tarsus nge yan i par nga Jerusalem, ma Gamaliel ni ir reb sensey ko motochiyel ni yima tayfan e i fil ban’en ngak. (Acts 22:3) Munmun, me yan i m’ug ni ir e ba m’on u fithik’ urngin e piin ni yad taab yangar ma faan gomanga de tal ma rayog ni ngan tolangnag. (Gal. 1:13, 14) Nap’an ni ke fil e thin nib fel’, me m’agan’ ngay ni nge pag e pi’ nem. Gur, ke kalngan’ Paul ko n’en ni ke dugliy? Danga’. I yoloy ni gaar: “Urngin ban’en ma kug matheeg ngay ni kari yan i aw ni lus ni bochan e bin ni ka ba ga’ fan e nggu nang Kristus Jesus ni ir e Somol rog. Bochan Kristus ma aram fan ni kug n’ag urngin ban’en; ya kug finey ni goo chubung.”—Fil. 3:8.
14, 15. Mang e tow’ath ni ma yib ngodad ni bochan e ‘gadad be maruwel Got u taabang’?
14 Pi Kristiano e ngiyal’ ney e yad ma pag farad ni bochan e ngar machibnaged fare thin nib fel’ ni bod e n’en ni rin’ Paul. (Mark 10:29, 30) Gur, kar gafgowgad ni bochan e kar paged farad? Robert ni kad weliyed faram e ke yog ni gaar: “Dawori kalngan’ug, ya machib ni kug tay ni gubin ngiyal’ e ke yibnag e felfelan’ ngog ma ‘kug guy ni Jehovah e rib fel’.’ Nap’an ni kug pag boch ban’en ni fan e nggu pigpig ku Jehovah, ma kug guy ni ka boor e flaab ni ke pi’ ngog. Ere gowa dariy ban’en ni kug pag.”—Ps. 34:8; Prov. 10:22.
15 Ere faanra kam un ko machib ni ke n’uw boch nap’an ma dabisiy ni kam guy nrib fel’ Jehovah. Kam guy ni ke ayuwegem gelngin Got nib thothup u nap’an ni ga be machibnag fare thin nib fel’, fa? Ma kam guy ni ke felfelan’ boch e girdi’ u nap’an ga be machibnagrad ya ke tamilangnag Jehovah lanin’rad kar motoyilgad ngom? (Acts 16:14) Ke ayuwegem Jehovah ni nge yog ni ngam yoornag e tayim rom ko machib? Ke ayuwegem Jehovah u nap’an ni ke yib e magawon ngom nib gel, ma ke yog ni nguum pigpig ngak ni yugu aram rogon ni ke aw parwom? (Fil. 4:13) Faanra kad guyed e ayuw ni ke pi’ Jehovah ngodad u nap’an ni gadad be machib ma ra gel e michan’ rodad ngak me fel’ thildad. (Isa. 41:10) Ri gadad ba tow’ath ya ‘gadad be maruwel Got u taabang’ ni gadad be fil e thin rok ngak e girdi’.—1 Kor. 3:9.
16. Uw rogon u wan’um ni ngam pag boch ban’en ya nge yog ni ngam fil ngak boch e girdi’ murung’agen Jehovah?
16 Boor e girdi’ ni yad be athapeg ni rayog ni ngar rin’ed boch ban’en ni dab ni pagtalin. Gadad ma guy ni ki mada’ nga ban’en nrib fel’ ni kan rin’ e ngiyal’ ney ma ba mom ni ngan pag talin. Machane fare maruwel rok Jehovah ni yibe rin’ e chiney ni yibe thothupnag fithingan e dab ni pagtalin. (Prov. 10:7; Heb 6:10) Manga yugu da ted fan e maruwel rodad ni gadad be fil ngak boch e girdi’ murung’agen Jehovah ni aram e maruwel ni dab ni pagtalin.
Uw Rogon ni Ga Ra Fulweg?
• Mang e baadag Jehovah ni nge rin’ e piin nra fil ban’en ngorad?
• Uw rogon ni thin rok Got e ra thilyeg e ngongol ko girdi’?
• Uw rogon ni gadad ba tow’ath ni bochan e gadad be ayuweg e girdi’ ngar nanged murung’agen Jehovah?
[Picture on page 25]
Piin ni ke fil Jehovah boch ban’en ngorad e kar manged ba ulung i walag u ga’ngin e fayleng
[Picture on page 26]
Gathi reb e tow’ath ni rayog ni ngad “maruwelgad Got u taabang”?