Ba Ga’ Fan u Wan’um Rogon ni Ke Ayuwegem Jehovah?

“Ngad pininged e sorok ngak Somol, ni ir fare Got rok yu Israel! Ya ke yib ni nge ayuweg e girdi’ rok nge biyuliyrad.”​—LUKE 1:68.

1, 2. (a) Mang fanathin e rayog ni ngan taareb rogonnag nga rarogodad e ngiyal’ ney? (b) Ma mang deer e gadad ra weliy?

MU LEMNAG ni ga bay u aspital ni ka nin’em nga naun. Ma gubin e girdi’ ni bay u rom e taareb rogon e m’ar romed ma dawor ni nang ko gimed ra gol fa danga’. Faanra kam nang ni be athamgil fare togta ni nge gay e falay ni fan ko m’ar romed ma dabisiy ni ga ra felfelan’. Ma gab adag ni ngam nang ko ke pirieg fare togta e falay fa dawor. Ere reb e rran ma kam nang ni ke pirieg! Rib gel e maruwel ni ke tay fare togta, ere ra uw rogon u wan’um e n’en ni ke rin’? Dabisiy ni ga ra tayfan mag pining e magar ngak ya ke pirieg fare falay ni rayog ni nge golnag e m’ar romed.

² N’en ni kad weliyed e rayog ni ngan taareb rogonnag ko magawon rodad e chiney. Ra bagadad ma bod ni bay e m’ar rok ni kab gel ko n’en ni kad weliyed faram. Ma rib t’uf be’ ni nge ayuwegdad. (Mu beeg e Roma 7:24.) Boor ban’en ni ke rin’ Jehovah nge Jesus ni ngar ayuwegew gadad. Ere ngad weliyed e aningeg i deer ni baaray. Mang fan nib t’uf e ayuw rodad? Mang e rin’ Jesus ni nge ayuwegdad? Mang e rin’ Jehovah, ma uw rogon u wan’? Uw rogon ni ngam dag nib ga’ fan u wan’um fare ayuw ni ke pi’ Got?

Fan nib T’uf e Ayuw Rodad

3. Uw rogon ni ngan taareb rogonnag e denen nga reb e m’ar ni ke garer?

³ Dawori n’uw nap’an faram ma kan susunnag ni fare m’ar ni ke garer ko duw ni 1918 ni ka nog e misilpig ni Spanish ngay. Ma aram e bin th’abi gel e m’ar ya ke li’ bokum milyon e girdi’. Ku bay yugu boch e m’ar ni kub gel. Buchuuw e girdi’ ni keb e re m’ar ney ngorad machane ba ga’ ni yad ma yim’ riy.a Machane uw rogon ni ngad taareb rogonnaged e denen ko re m’ar ney? Mu lemnag e thin ni bay ko Roma 5:12 ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” Gubin e girdi’ ni ke af e denen ngorad ya dawor ra flontgad. (Mu beeg e Roma 3:23.) In e girdi’ ni ma yim’ ni bochan e denen? I yoloy Paul ni “urngin e girdi’.”

4. Uw rogon u wan’ Jehovah n’umngin nap’an e yafas rodad? (b) Uw rogon nib thil e re ney nga rogon ni ma lemnag e girdi’?

⁴ Boor e girdi’ e ngiyal’ ney e yad be lemnag ni denen nge yam’ e ban’en ni ku ma buch. Ma kireban’rad ni bochan e ma yim’ e girdi’ ni dawori pilibthir. Machane yad ma yog nra yim’ be’ ni ke pilibthir, e aram ban’en ni “ka ma buch.” Ba mom ni nge pag e girdi’ talin e n’en nib m’agan’ Jehovah ngay. De sunmiy e girdi’ ni nge par nib ngoch nap’an. Ya bin riyul’ riy e dariy be’ ni ke par nib fas u lan “taareb e rran” nrogon ko changar rok Jehovah. (2 Pet. 3:8) Thin rok Got e be yog ni yafas ko girdi’ e rib ngoch ni bod e pan nge ba wuch i nifeng. (Ps. 39:5; 1 Pet. 1:24) Ba t’uf ni dab da paged talin e re n’ey. Mang fan? Faanra ke tamilang u wan’dad fare magawon ni bod e “m’ar” nib gel ni keb ngodad ma aram e rayog ni ngad guyed feni rib ga’ fan fare “falay” ni aram e n’en nra chuwegdad ko gafgow.

5. Mang e de yog ngodad ni bochan e denen?

⁵ Ra ngad nanged gelngin e gafgow ni gad be tay ni bochan e denen ma som’on e thingar da nanged e pi n’en ni ke mul u pa’dad. Som’on e sana ra mo’maw’ ni ngad nanged ni bochan e daworda guyed. Immoy Adam nge Efa ni yow ba flont ni rayog ni ngar gagiyegnagew e lem rorow nge ngongol rorow nib fel’ rogon. Ere ba puf rogorow ni rayog ni ngar mon’oggow ko tirok Got. Machane kar n’aged e re tow’ath nem ni yafas ni manemus ni baadag Jehovah ni nge pi’ ngorow. (Gen. 3:16-19) Wenegan e ngongol rorow e ki af ngodad ni bod fare “mar” ni kad weliyed faram. Ke pufthinnagrow Jehovah, machane ke pi’ e athap ngodad ni rayog ni ngad chuwgad ko gafgow.​—Ps. 103:10.

Magawon ni Yan Jesus u Fithik’ ni Nge Ayuwegdad

6, 7. (a) Uw rogon ni ke dag Jehovah nib t’uf ni ngan rin’ ban’en nib mo’maw’ ni fan ni nge ayuwegdad ko denen? (b) Mang e gadad ra fil ko pi maligach ni ke pi’ Abel nge boch e girdi’ kakrom u m’on ni kan pi’ fare motochiyel?

⁶ Manang Jehovah ni boor ban’en nib mo’maw’ ni ngan rin’ machane thingar ni rin’ ni fan e nge ayuweg pi fak Adam nge Efa. Thin ni bay ko Genesis 3:15, e be weliy murung’agen e re ayuw ney. Ra pi’ Jehovah “be’ nib moon ni fak fare pin” ni nge ayuweg e girdi’ ma ra thang Satan. Machane, ra maad’ad wurilen e rifrif u ay ni be yip’ fan ni bayi gafgow. Pi thin ney e ra magawonnag lanin’uy, machane mang e be yip’ fan? Ma mang gafgow e ra yib ngak e En ni Ke Mel’eg Jehovah?

⁷ Rogon ni ngan ayuweg e girdi’ e ba t’uf ni fa en ni ta ayuw e nge rin’ ban’en nge yog ni nge chuweg e denen rorad ngar fel’gad u wan’ Got. Mang e kub muun ngay? Kakrom e bay ban’en ni kan rin’ ni be dag nib t’uf ni ngan pi’ ba maligach. Nap’an ni pi’ Abel e gamanman ni maligach me felfelan’ Jehovah. Tomur riy e ku ke pi’ Noah, Abraham, Jakob, nge Job e maligach ni gamanman ma i felfelan’ Jehovah ngay. (Gen. 4:4; 8:20, 21; 22:13; 31:54; Job 1:5) Boor e duw nga tomren ma fare motochiyel nni pi’ ngak piyu Israel u daken Moses e ke ayuweg ni ngari nang e girdi’ murung’agen e maligach.

8. Mang e ma rin’ fare prist nib tolang u nap’an e Rran ko Biyul?

⁸ Pi maligach nib ga’ fan ni yog fare Motochiyel e aram e maligach ni yima pi’ ko yu duw u nap’an fare Rran ko Biyul. Re rran nem e boor ban’en ni ma rin’ fare prist nib tolang, som’on e ma pi’ e maligach ni fan ko prist, ma bin migid e ra pi’ e maligach ni fan ko pi ganong ni gathi yad e prist. Kemus ni fare prist nib tolang e ra yan nga lan fare singgil Nth’abi Thothup ni taab yay u gubin e duw. Ma ra atngiy rachaen e gamanman ni maligach nga mit fare kiwaren e m’ag. Ma yu ngiyal’ e ma yib i m’ug bangi manileng u daken fare kiwaren e m’ag ni be yip’ fan ni bay Jehovah u rom.​—Ex. 25:22; Lev. 16:1-30.

9. (a) Mini’ e be yip’ fan fare prist nib tolang u nap’an fare Rran ko Biyul, nge fapi maligach? (b) Mang e be yip’ fan e yan ni tay fare prist nib tolang nga lan fare singgil ni Th’abi Thothup?

⁹ Kan thagthagnag ngak Paul ni nge weliy fan e n’en ni yima rin’ u nap’an fare rran ko biyul. Ke yog ni fare prist nib tolang e be yip’ fan Jesus Kristus ma fapi maligach e be yip’ fan e yam’ nra tay. (Heb. 9:11-14) Re maligach ni pi’ Jesus nem e ra biyuliy l’agruw ulung i girdi’, reb e aram fare ulung i Kristiano ni kan dugliyrad ni yad 144,000 nge fare “yugu boch e saf.” (John 10:16) Nap’an nra yan fare prist nib tolang nga lan fare singgil ni Th’abi Thothup ma be yip’ fan Jesus nra yan nga tharmiy nga p’eowchen Jehovah ni fan ngodad.​—Heb. 9:24, 25.

10. Mang e be yog e pi profet u murung’agen e n’en ni yira rin’ ngak Kristus?

¹⁰ Ba tamilang ni rogon ni ngan ayuweg pifak Adam nge Efa e ba t’uf ni ngan rin’ ban’en nib mo’maw’ ya thingari pi’ Kristus e yafas rok! I weliy e pi profet nib tamilang murung’agen e n’en nra rin’ Jesus. Ni bod ni yog Daniel ni profet ni “bay ni thang e pogofan rok e en ni Got e ke turguy nge gagiyeg” ni fan ni nge “n’ag Got fan e denen.” (Dan. 9:24-26) I yiiynag Isaiah ni yira darifannag min gafgownag Kristus min li’ ngem’ ni bochan e denen ko girdi’.​—Isa. 53:4, 5, 7.

11. Uw rogon ni dag Jesus nib m’agan’ ngay ni nge pi’ e yafas rok ni fan e nge ayuwegdad?

¹¹ M’on ni yib Jesus nga fayleng ma ke nang nra gafgow min li’ ngem’. Gur, nap’an ni yog e chitamangin ngak e n’en nra buch rok me togopuluw? Danga’, ya ke m’agan’ ngay ni nge fol ko n’en ni yog e Chitamangin ngak. (Isa. 50:4-6) Ma ku er rogon u nap’an ni immoy u fayleng ya i fol rok e Chitamangin. Mang fan? I yog nib ‘t’uf rok e en ni Chitamangiy.’ Mi ki yog ni gaar: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 14:31; 15:13) Ere t’ufeg e ke k’aring Jesus ni nge ayuwegdad. Yugu aram rogon ni manang nra yim’ machane ke rin’ ya baadag ni nge ayuwegdad.

N’en Nthingari Rin’ Jehovah ni Nge Ayuwegdad

12. Mini’ e ke pi’ fare biyul, ma mang fan?

¹² Gathi Jesus e ke dugliy ni ngan pi’ fare maligach ya Jehovah. Ke yog Paul ni fare altar u lan e tempel ni yima tay e maligach nga daken e be yip’ fan e tin ba m’agan’ Jehovah ngay. (Heb. 10:10) Ere som’on e ngad pininged e magar ngak Jehovah ni bochan e ayuw ni ke pi’ ngodad u daken e maligach ni ke pi’ Kristus. (Luke 1:68) I rin’ e re n’em ni bochan e rib t’uf e girdi’ rok.​—Mu beeg e John 3:16.

13, 14. Uw rogon ni n’en ni rin’ Abraham e ra ayuwegdad ngad nanged fan e n’en ni rin’ Jehovah?

¹³ Uw rogon e lem rok Jehovah u nap’an ni ke pi’ Jesus ni ba maligach ni fan ngodad? Ba mo’maw’ ni ngad nanged fan. Machane bay e thin nu Bible nra tamilangnag fan. Ke yog Jehovah ngak Abraham ni nge rin’ ban’en nrib mo’maw’ ni aram e nge pi’ Isak ni fak ni maligach. Abraham e ir reb e matam ni ma t’ufegey. I yog Jehovah ngak Abraham ni Isak e “kari maagirag rok, ma ba t’uf rok.” (Gen. 22:2) Ri kab ga’ fan u wan’ Abraham ni nge fol rok Jehovah ko rogon nib t’uf Isak rok. Ere ke rin’ e n’en ni yog Jehovah ngak. Machane de pag Jehovah ni nge pi’ Abraham Isak ni maligach ni aray e n’en nra rin’ ngak Jesus boch nga m’on. Ya l’og Jehovah reb e engel ni nge taleg Abraham ni dabi li’ Isak. De maruwaran’ Abraham ni nge fol rok Got ni yugu aram rogon ni manang ni faan ra yim’ Isak ma athap rok ni nge guy bayay e kemus ni nap’an ni bay ni faseg e yam’. Machane ka ri mudugil u wan’ nra faseg Got Isak. Ere yog Paul ni “yan i aw ni susun e fos Isak ko yam’ nge sul ngak Abraham.”​—Heb. 11:19.

¹⁴ Ba mo’maw’ ni ngad nanged rogon e gafgow ni ke tay laniyan’ Abraham u nap’an ni be fal’eg rogon ni nge pi’ fak ni maligach. N’en ni ke buch rok Abraham e be dag rogon e n’en nra rin’ Jehovah u nap’an nra pi’ fak ni maligach ‘nib t’uf rok.’ (Matt. 3:17) Machane dab mu pag talin ni kab gel e gafgow ni tay laniyan’ Jehovah ngak fak ya sana bochan e bokum bilyon e duw ni ur pirew u taabang. I felfelan’ Jesus u nap’an ni ur maruwelgow e chitamangin u taabang “ni bod be’ nib salap i maruweliy ban’en” ma ir Mit e Thin rok Got ara “fare Thin.” (Prov. 8:22, 30, 31; John 1:1) Gafgow ni tay laniyan’ Jehovah u nap’an ni kan gathibthibnag fak min li’ ni bod be’ nib kireb, e ba mo’maw’ ni ngad nanged fan. Rib mo’maw’ e n’en ni rin’ Jehovah ni nge ayuwegdad! Uw rogon ni ngad daged nib ga’ fan u wan’dad?

Uw Rogon ni Ngam Dag nib Ga’ Fan u Wan’um fare Ayuw?

15. Uw rogon ni ke lebguy Jesus e maruwel rok ni ke biyuliy e girdi’, ma mang angin?

¹⁵ Ke lebug e maruwel rok Jesus ni aram e ke biyuliy e girdi’ u tomren ni fas ko yam’ me yan nga tharmiy, ke sul ngak e chitamangin ni ke fek fel’ngin fare maligach. Ba ga’ angin ya kan n’ag fan e denen rok e pi walagen Kristus ni kan dugliyrad nge “urngin e girdi’.” Bochan e re maligach nem ma urngin e girdi’ ni kar kalgadngan’rad mi yad mang gachalpen Jesus e ke fel’ e tha’ u thilrad Got. (1 John 2:2) Mang fan e re n’ey ngom?

16. Mang fanathin e be dag ni thingar da pininged e magar ngak Jehovah ko ayuw ni ke pi’ ngodad?

¹⁶ Ngad sulod ko fare fanathin ni kad weliyed ko som’on. Faanra yib fare togta ni ke pirieg fare falay ni fan ko m’ar, me yog ni gaar: Aromed nra fanay fare falay e nge fol u rogon ni ngan fek ma aram e rayog ni nge gol. Machane uw rogon ni faanra boor i gimed e dabun ni nge fol ko n’en ni ke yog fare togta, ya kaygi mo’maw’? Ga ra fol rorad, ni yugu aram rogon ni ga manang ni ga ra gol ko fare falay? Danga’! Dabisiy ni ga ra pining e magar ngak fare togta ma ga fol ko urngin ban’en ni ke yog, ma ku mog ngak boch e girdi’ ngar folgad riy. Thingari m’ug nib ga’ fan u wan’dad e ayuw ni ke pi’ Jehovah u daken fare biyul ni ke pi’ Fak.​—Mu beeg e Roma 6:17, 18.

17. Uw rogon ni ngam dag nib ga’ fan u wan’um e ayuw ni ke pi’ Jehovah?

¹⁷ Faanra gadad be felfelan’ ya ke ayuwegdad Jehovah nge Jesus ko denen nge yam’ ma thingari m’ug ko ngongol rodad. (1 John 5:3) Ngad gayed rogon nguud gelgad ko pi n’en ni gadad ba meewar riy. Ma dab da lemnaged ni rayog ni nguud denengad mu ud ngongolgad ni gowa dariy ban’en ni gad be rin’ nib kireb. Ya ngongol ni aray rogon e be dag ni gadad be darifannag fare biyul. Ere ngad athamgilgad ni nge par nib fel’ e tha’ u thildad Jehovah. (2 Pet. 3:14) Reb e n’en nrayog ni ngad rin’ed e ngad weliyed ngak boch e girdi’ murung’agen e athap rodad ko yafas ni manemus ma rayog ni nge fel’ thilrad Got. (1 Tim. 4:16) Ba mutrug ni Jehovah nge Jesus e bay rogorow ni ngarda pininged sorok ngorow! (Mark 12:28-30) Amu lemnag rogon e par rodad boch nga m’on ni dakuriy e denen. Gadad ra par ni gad ba flont ni manemus ni bochan e ayuw ni ke pi’ Jehovah ngodad!​—Rom. 8:21.

[Footnote]

Uw Rogon ni Ga Ra Fulweg?

• Mang fan nrib t’uf e ayuw ku Jehovah ngom e ngiyal’ ney?

• Mang angin nra yib ngom ni bochan e ke pag Jesus fan?

• Uw rogon u wan’um fare biyul ni ke pi’ Jehovah?

• Mang e ga baadag ni ngam rin’ ni bochan e ayuw ni ke pi’ Jehovah?

[Picture on page 29]

N’en ni ma rin’ e prist nib tolang u Israel e be dag yaan e n’en nra rin’ Kristus

[Picture on page 30]

Rogon nib m’agan’ Abraham ngay ni nge pi’ fak ni maligach e ra ayuwegdad ni ngad nanged fan rogon feni rib mo’maw’ e n’en ni rin’ Jehovah ni fan ngodad