Ngan Dag E Lem Rok Kristus

“Yibe athapeg ni Got ni ir e ma ayuweg be’ ni nge par nib gum’an’ ma ma fal’eg lanin’uy e ra ayuwegmed ni nge yog ngomed fare lem rok Kristus.”​—ROMA 15:5.

1. Uw rogon ni lem rok be’ ma ra thiliyeg e yafas rok?

LEM e baga’ ni ri ma thiliyeg rarogon e yafas. Fil ban’en ni dabni tiyan’uy ngay ara fil ban’en u fithik’ e pasig, nge lem ni positive ara negative, nge lem ni baadag e cham ara baadag ni ngan ayuweg, nge fare lem ni ma gun’gun’ ara lem ni ma pining e magar e ra suruy laniyan’ be’ ma ra m’ug u nap’an ni ra pithig be’ reb e magawon nge nap’an ni ra rin’ e girdi’ ban’en nbochan. Be’ nib fel’ e lem rok, e rayog ni nge par nib falfalan’ nyugu aram rogon ni keb e magawon nib gel ngak. En ni ba kireb e lem rok, e ma lem ni gowa dariy ban’en nib mat’aw, nyugu aram rogon​—nfaanra ngan lemnag ban’en nrogon nib thabthabel—​ma kab fel’ e par rok.

2. Uw rogon ni nge fil be’ rogon ni nge lemnag ban’en?

² Lem nib​—fel’ ara bkireb—​e rayog ni ngan fil. Ma riyul’, nib t’uf ni ngan fil e re n’ey ngan nang. Be weliy fare Collier’s Encyclopedia u murung’agen e bitir nkafin ni gargeleg me gaar: “Mang lem ara ngongol ni nge yog ngak nga m’on e ra yib ngak ara thingar ni fil ngak e re n’ey ni bod rogon ni thingar nog ngak ara ngan fil ngak reb e thin ara yugu boch e salap.” Uw rogon ni ngada filed rogon ni ngan lemnag ban’en? Boor ban’en nib l’ag ngay, machane tin ni yima guy ni bay u toobey e ereram e n’en ni ri ma suruy lanin’uy. Fare encyclopedia ni kan weliy kafram boch e be gaar: “Gad ra fil riy nra yan nga fithik’dad ni bod e osmosis, ni aram fare lem ko piin ni ri gad ma chag ngorad.” Bokum biyu’ e duw kakrom, i yog fare Bible ban’en ni taareb rogon ngay ni gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.”​—Proverbs 13:20; 1 Korinth 15:33.

Wok ni Kan Dag nib M’ag ko Lem nib Mat’aw

3. Mini’ e cha’ nem ni i dag nib fel’ e lem rok, ma uw rogon ni ngada folwokgad rok?

³ Taab rogon ko yugu boch ban’en, maku i dag Jesus Kristus rogon ni ma lemnag ban’en ni rib fel’ ni ngan fol riy. I gaar: “Ya kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni ka fini gu rin’ ngomed.” (John 13:15) Somm’on ma thingar da filed murung’agen Jesus ma aram rogon e rayog ni ngada boded ir.a Gad ra fil rarogon e yafas rok Jesus’ ni gad be nameg ni ngada rin’ed e n’en ni ke yog Peter ni apostal ni ngada rin’ed ni gaar: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) N’en ni gad ra nameg e aram e ngada athamgilgad nge yog ni ngada boded Jesus nrogon ni rayog rodad. Mab muun ngay ni ngada maruweliyed ni nge yog ngodad fre lem rok.

4, 5. Mang bang ko lem rok Jesus ni kan tamilangnag ko Roma 15:1-3, ma uw rogon ni nge folwok e piin Kristiano rok?

⁴ Ra nge yog ngak be’ fre lem rok Kristus Jesus ma mang e ba muun ngay? Guruy ni 15 ko fare babyor ni pi’ Paul ngak piyu Roma e ra ayuwegdad ni ngada fulweged e re deer nem. Boch e verse ni bay u m’on ko re guruy ney, e weliy Paul murung’agen e ngongol rok Jesus nrib fel’ u nap’an ni gaar: “Gadad e piin nib gel e michan’ rodad ngak Somol e susun ngad ayuweged e piin ni yad mmeewar ngad uned i fek gilbarad. Ma gathi gadad e nga darod nga lanin’dad. Machane nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol. Yi Kristus e de yan nga laniyan’, machane yan i aw ni bod ni ke yog e babyor nib thothup ni be gaar, ‘Thin nib kireb ni ke yog e piin ni ka rogned e thin nib kireb ngom e ke aw ngog.’ ”​—Roma 15:1-3.

⁵ Ran fol u rogon ni ma lemnag Jesus ban’en, ma piin Kristiano e kan pi’ e athamgil nga lanin’rad ni ngar adaged ni ngar pigpiggad ngak yugu boch e girdi’ u fithik’ e sobut’an’ ko bin ni kemus ni nga ra falfalan’aged yad. Riyul’, ni fare ngongol ni sobut’ e yira adag ni ngan pigpig ku yugu boch e girdi’ e aram e pow ko “piin ni yad ba gel.” Jesus, ni ir e en th’abi gel ko tirok Got ko urngin e girdi’, e weliy murung’agen ni gaar: “Ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) Bochan ni gadad e piin ni Kristiano, e ku ngada athamgilgad ni ngada pigpiggad ngak yugu boch e girdi’, nib muun ngay e “piin ni dawori mudugil lanin’rad.”

6. Uw rogon ni ngada folwokgad rok Jesus ko n’en ni i rin’ u nap’an ni kan togopuluw ngak min dariyfannag?

⁶ Yugu reb e ngongol nib fel’ ni i dag Jesus e aram e lem rok nge rogon ni ma rin’ ban’en ni gubin ngiyal’ e ba mudugil. De pag ni lem ko girdi’ ni de mudugil e ra kirebnag e lem rok nib fel’ nrogon ni be pigpig ku Got; ere nga kud yodoromgad. Nap’an ni kan dariyfannag min togopuluw ngak, me par Jesus nib gum’an’ ma de gun’gun’. Manang ni fare togopuluw ni yib u fayleng ni de michan’rad e ra yib ngak e piin ni ma guy rogon ni ngara falfalan’aged e en ni buguli yoror rorad “ko n’en nib fel’ nra gelnag e cha’ nem.”

7. Uw rogon ni i dag Jesus ni ir be’ nib gum’an’, ma mang fan ni thingar da rin’ed e n’en ni i rin’?

⁷ I dag Jesus e ngongol rok nib fel’ u yugu boch e kanawo’. De yog e thin ni be dag ni ke chachalban ku Jehovah machane ke sonnag e tayim ni nge lebug e tin nib m’agan’ Jehovah ngay u fithik’ e gum’an’. (Psalm 110:1; Matthew 24:36; Acts 2:32-36; Hebrews 10:12, 13) Maku, i par Jesus nib gum’an’ u puluwon pi gachalpen. I non ngorad ni gaar: “Mu folwokgad rog”; ya bochan ir e en “nib munguy,” ma thin ni ma yog e ma gelnag e michan’ rorad ma ma fal’eg lanin’uy. Ma bochan ni ir e en nib “sobut’ laniyan’,” arfan ni der ma uf ara ma rin’ ban’en ni dan pi’ mat’awon. (Matthew 11:29) I pi’ Paul e athamgil nga lanin’dad ni ngad folwokgad ko re ngongol rok Jesus ney ko ngiyal’ ni gaar: “Rogon e lem nge pangin ni nge yog ngomed e fare lem nge fare pangin ni immoy rok Kristus Jesus ni baaray: Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’.”​—Filippi 2:5-7.

8, 9. (a) Mang fan ni thingar da maruweliyed ni nge yog ngodad e lem ni de siin? (b) Mang fan ni thingar dabi mulan’dad nfaanra dabiyog ni ngada folwokgad ko n’en ni i dag Jesus ni urngin, ma uw rogon ni i dag Paul ni ir be’ ni ri ma rin’ e re n’ey?

⁸ Mom ni nga dogned ni gad baadag ni ngada pigpiggad ngak yugu boch e girdi’ ma gad baadag ni ngad mon’eged e tin nib t’uf rorad ko tin nib t’uf rodad. Machane faan gad ra fal’eg i yaliy e lem rodad u fithik’ e yul’yul’ ma sana ra m’ug ni gathi ri aram rogon e n’en ni bay u lan gum’ercha’dad. Mang fan ni danga’? Ya Somm’on, e bochan ni ke af ngodad e ngongol rok Adam nge Efa nib siin; ma bin l’agruw, ya bochan ni gad be par ko fayleng ni ma m’oneg e lem nib siin. (Efesus 4:17, 18) Ran maruweliy ni nge yog ngodad e lem nde siin ma be yip fan ni ngada maruweliyed ni nge yog ngodad e lem nib togopuluw ko ngongol rodad ni ka nap’an ni kan gargelnagdad. Ma ba t’uf e lem nib mudugil nge athamgil.

⁹ Bochan nib tamilang ko ngongol rodad ni gadad e piin ni daworda flontgad, ma rib thil e re n’ey ko fare ngongol ni i dag Jesus, ya yu ngiyal’ e ma mulan’dad. Ma sana gad ra lemnag ndabiyog ni nge yog ngodad fare lem rok Jesus. Machane ngam lemnag e thin rok Paul ni ma gelnagey ni gaar: “Gu manang ni tin nib fel’ e der par u fithik’ag ni aram rarogog nrogon e girdi’. Ya yugu ra gu be yim’ ni bochan ni nggu rin’ e tin nib fel’, ma dabiyog rog ni gu rin’. Dagur rin’ e tin nib fel’ ni ir e gub adag ni nggu rin’; machane gu be rin’ e tin nib kireb ni ir e dabug ni nggu rin’. Lanin’ug e ri baadag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag​—⁠reb e motochiyel ni be togopuluw ko bin baaram e motochiyel ni baadag lanin’ug. Ir e ke tiyeg ni gag e kalbus ko tin ni baadag e denen ni ir e be maruwel u fithik’ i dowag.” (Roma 7:18, 19, 22, 23) Riyul’, ni thibngin Paul e be magawonnag biyay nge biyay ma arfan ni dabiyog ni nge rin’ e tin m’agan’ Got ngay nrogon ni baadag, machane lem rok​—ni ereram e kanawo’ ni be lemnag nge rogon ni be thamiy ban’en u murung’agen Jehovah nge motochiyel Rok—​e ffel’ ni ngan folwok riy. Maku rayog ni ngad yodoromgad.

Ngan Yal’uweg Fare Lem nib Oloboch

10. Mang lem ni i pi’ Paul e athamgil riy nga laniyan’ piyu Filipi ni nga ra maruweliyed?

¹⁰ Rayog rok boch e girdi’ ni ngara yal’uweged e lem rorad nib oloboch? Arrogon. Bay e mich riy nib tamilang ni aram e n’en ni i rin’ boch e Kristiano ko fa bin somm’on e chibog. U lan e babyor rok Paul ni fan ngak piyu Filipi, e ke weliy murung’agen rogon ni nge yog e lem nib mat’aw. I yoloy ni gaar: “Dagur yog ni ke yog ngog e re n’ey, ara kug taw ko n’en ni yibe nameg. Ku gu be yan ni gu be guy rogon ni nge yog ngog ni fan e ke mil fag ngak Kristus Jesus. Pi walageg, ri dagur finey ni kug taw ngay; machane re n’en ni kug rin’ e kug pag talin e n’en ni bay nga keruug, ma gu be athamgil ni nggu taw ko n’en ni ir e ba’ nga m’on rog. Ere gu be mil nib k’iy kanawoeg i yan ko n’en ni gu be nameg ni bochan e nge yog puluwon ngog, ni aram e pong ni ke ta’ Got ngodad u daken Kristus Jesus ni nga darod ko yafas ni bay u tharmiy. Gadad gubin e piin ni ke piilal e lem rodad nrogon ni ma ilal e lem rok girdien Kristus nge yan i mus nga rogon, e ara’ rogon e lem rodad ni ngi i par. Ma faanra ba’ boch i gimed nib thil e lem rorad, ma ra tamilangnag Got ngorad e re bugithin ney.”​—Filippi 3:12-15.

11, 12. Mang boch e kanawo’ ni ma dag Jehovah ngodad e lem nib puluw riy?

¹¹ Thin rok Paul e be dag ni urngin e piin ni be lemnag ni nge mang reb e Kristiano, ma de t’uf ni nge maruweliy ni nge mon’og ko tirok Got e ba oloboch ko n’en ni be lemnag. De yog ni nge fol ko lem rok Kristus. (Hebrews 4:11; 2 Peter 1:10; 3:14) Ere girdi’ ni aram rogon e lem rok dakuriy e athap rok, fa? Ri danga’. Faanra riyul’ ni gad baadag ni ngad thiliyeg e lem rodad ma Got e ra ayuwegdad. I ulul Paul ko thin rok ni gaar: “Ma faanra ba’ boch i gimed nib thil e lem rorad, ma ra tamilangnag Got ngorad e re bugithin ney.”​—Filippi 3:15.

¹² Yugu demtrug rogon, ma faanra gad baadag ni nge dag Jehovah ngodad e lem nib puluw, ma thingar da maruweliyed e gi rodad. Ngan fil e Thin rok Got u fithik’ e meybil u daken e ayuw ko pi babyor ni “fare tapigpig nib yul’yul’ mab gonop e ke ngongliy” ma aram piin ni “bay e lem rorad nib togopuluw” e rayog ni ngar maruweliyed ni nge yog ngorad e lem nib puluw. (Matthew 24:45) Piin ni piilal ni kan dugliyrad ko kan ni thothup “ni ngar ayuweged fare galesiya rok Got,” e yad ba falfalan’ ni ngar pied e ayuw. (Acts 20:28) Ri gad be falfalan’ ya ma lemnag Jehovah ndaworda flontgad ma ma pi’ e ayuw ngodad u fithik’ e t’ufeg! Nguuda folgad riy.

Ngan Fil Ban’en ko N’en ni I rin’ Boch e Girdi’

13. Mang e gad ra fil u murung’agen e lem nib puluw ko thin nu Bible ni be weliy murung’agen Job?

¹³ U Roma guruy ni 15, e be dag Paul ni ngan fal’eg i lemnag e n’en ni ke buch kakrom ma ra ayuwegdad ni ngada puluwnaged ko lem rodad. Ke yol ni gaar: “Ya urngin ban’en nni yoloy nga lan e babyor nib thothup e ni yoloy ni nge fonownagdad, nbochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Roma 15:4) Boch ko piin ni tapigpig rok Jehovah kakrom nib yul’yul’ e ba t’uf ni ngan yal’uweg boch ban’en ko lem rorad. Ni bod Job, ra ngan yaliy rogon, mab fel’ e lem rok. De lemnag ni Jehovah e i n’igin ni nge buch e tin nib kireb, ma de pag e gafgow ni nge warnag e pagan’ rok ku Got. (Job 1:8, 21, 22) Yugu aram rogon, ma ke guy rogon ni yog ni ir be’ nib mat’aw. I l’og Jehovah Elihu ni nge ayuweg Job i yal’uweg e re lem rok nem. De lemnag ni kan dariyfannag nbochan, ya ke motoyil ko n’en ni ka nog ni ba t’uf ni ngan thiliyeg e lem rok u fithik’ e sobut’an’ ma chi ngiyal’ nem me tababnag i rin’ e re nem.​—Job 42:1-6.

14. Uw rogon ni ngada boded Job nfaara kan fonownagdad u murung’agen e lem rodad?

¹⁴ Gad ra rin’ e n’en ni i rin’ Job nfaanra reb e Kristiano ni walagdad e ke non ngodad u fithik’ e sobut’an’ ni gad be dag ko n’en ni gad be rin’ ni lem rodad e de puluw? Taab rogon ku Job, sana “dabdon’ed e kireb riy nga daken Got.” (Job 1:22) Faanra ke yib e gafgow ngodad ni yugu aram rogon ni dad rin’ed e tin kireb, ma yibe athapeg ni dabda gun’gun’gad ara nga dogned ni Jehovah e ir e ke yibnag e gafgow ngodad. Yibe athapeg ni dabda guyed rogon ni nga dogned ni gad ba mat’aw, ma dabda paged talin ni demtrug ko mang e maruwel ko pigpig ku Jehovah ni kan pi’ ngodad, ma ka gad be par ni gadad “bogi tapigpig.”​—Luke 17:10.

15. (a) Mang lem ni de puluw ni i dag e pi gachalpen Jesus? (b) Uw rogon ni i dag Peter e lem rok nib fel’?

¹⁵ U nap’an fa bin somm’on e chibog, ma boch e girdi’ ni kar motoyilgad ku Jesus e kara daged e lem ni de puluw. Ba’ biyay, ni i yog Jesus boch ban’en nib mo’maw’ ni ngan nang fan. Bochan e re n’em, ma nap’an ni kara rung’aged e re thin n’em ma “boor u fithik’ e pi gachalpen e karogned nra gaargad: ‘Re machib ney e kaygi mo’maw’. Mini’ e ra motoyil ko tiney e thin?’ ” Piin ni ka rogned e thin ni aray rogon e ba tamilang ni de puluw e lem rorad. Ma bochan ni de puluw e lem rorad ma arfan ni kar talgad i motoyil ku Jesus. Miki gaar e babyor: “Bochan e re bugithin ney ni yog Jesus, ma aram boor e pi gachalpen nra paged nge dakur uned ngak.” Yad gubin ma bay e lem rorad ni de puluw, fa? Danga’. Me ulul fare babyor ngay ni gaar: “Ma aram me gaar Jesus ngak fa ragag nge l’agruw i gachalpen, ‘Ma gimed - gimed ba adag ni ngkum paged gag ngam marod’?’ Me fulweg Simon Peter ni gaar: ‘Somol, i mini’ e gimed ra yan ngak?’ ” Me fulweg Peter e deer rok ni gaar: “Yi gur e bay fapi thin rom ni ir e ma pi’ e yafas ndariy n’umngin nap’an ngak e girdi’.” (John 6:60, 66-68) Rib fel’ e lem rok! Faan kada guyed e thin ni be weliy ban’en ara thin ni be dag ni kan thiliyeg boch e n’en ni kada filed kafram u murung’agen e pi thin nu Bible ni sana ban’en ni dawori tamilang u wan’um, gathi ba fel’ ni ngan dag e lem ni taab rogon ko n’en ni i dag Peter? N’en ni de gonop e faanra ngan tal ko pigpig ku Jehovah ara nga nog boch ban’en nib togopuluw ko “fapi thin nib riyul’” ni karimus nbochan e bay boch ban’en nib mo’maw’ ni ngan nang fan ko somm’on!​—2 Timothy 1:13.

16. Mang lem ni i dag e pi tayugang ko teliw ko piyu Jew ni ma gin e girdi’ ngay u nap’an ni immoy Jesus?

¹⁶ Piin tayugang ko teliw ni piyu Jew ko fa bin somm’on e chibog e de yog rorad ni ur daged fare lem rok Jesus. Lem rorad e ke mudugil nda ur motoyilgad ku Jesus ya ke m’ug u nap’an ni ke faseg Lazarus ko yam. Urngin e girdi’ ni bay e lem rorad nib puluw, e yad ma nang ni re maangang nem e dariy e maruwar riy ni be micheg ni Got e ke l’og Jesus. Yugu aram rogon, ma rayog ni ngad bieged e thin ni be gaar: “Ma aram me yan fapi Farise nge pi tolang ko prist ngar puruygad girdien e muulung rorad me lungurad, Mang e ngada rin’ed? Ya ke yoor e maang’ang ni ke ngongliy e re moon nem! Faanra da paged ngi i yodorom ma urngin e girdi’ ni bayi mich e cha’ nem u wan’rad, ma aram me pig i chel e am nu Roma ngar kirebniged e tempel nge nam rodad.’ ” Mang e n’en ni kar rin’ed? “Ka re rran nem i yan nga m’on e kar dugliyed ni ngar li’ed Jesus ngem’.” Gathi kemus ni kar makathgad ni ngar li’ed Jesus, ya ku yad be nameg ni ngar thanged e mich riy nib fas ni ir be’ ni ta ngongliy e maangang. “Ma aram me puruynag e pi tolang ko prist rogon e n’en nra rin’ mu kun li’ Lazarus ngem’.” (John 11:47, 48, 53; 12:9-11) Kaygi kireb nfaanra ngada paged ni nge gel e lem rodad ni aram rogon ma gad ra damumuw ko pi n’en ni susun ni ra falfalan’dad ngay! Arrogon, uw feni gel e riya’ riy!

Ngan Lek e Lem Rok Kristus nib Fel’

17. (a) Mang e magawon ni i yib ngak Daniel ni i dag riy ni der ma rus? (b) Uw rogon ni dag Jesus ni ir be’ ni der ma rus?

¹⁷ Pi tapigpig rok Jehovah e bay e lem rorad nib mudugil u gubin ngiyal’. Nap’an ni pi toogor rok Daniel e kar makathgad ni nge sum reb e motochiyel ni be taleg e girdi’ ni dabra meybilgad ko yugu reb e got ara girdi’ u lan 30 e rran ya kemus ni fare pilung rorad, ma manang Daniel ni re n’ey e ra kirebnag thilrow Jehovah. Ra tal Daniel ko meybil ku Got u lan 30 rran, fa? Danga’, ya de rus ni nge meybil ku Jehovah ni dalip yay u gubin e rran, ya aram e n’en ni ma rin’. (Daniel 6:6-17) Ku arrogon Jesus e de rus ko pi toogor rok. Reb e rran ko Toffan, me pirieg be’ nib marwoth barba’ i pa’. Manang Jesus ni boor e girdi’ ni bay u rom ni piyu Jew nra damumuw nfaan ra golnag be’ u nap’an e rran ko Toffan. I ning ngorad nib tamilang ni ngar weliyed ban’en u murung’agen e re n’em. Ma ngiyal’ ni ke guyrad Jesus ni da rogned ban’en, ma aram me golnag fare pumoon. (Mark 3:1-6) De tal Jesus i rin’ e maruwel rok nfaanra ke guy ni aram e tayim nib puluw.

18. Mang fan ni boch e girdi’ e ma togopuluw ngodad, machane mang e thingar da rin’ed ko re ngongol rorad ney?

¹⁸ Pi Mich rok Jehovah e chiney e yad manang ni ku thingar dabra rusgad ko tin nra rin’ e piin tatogopuluw. Ya faan yad ra rus, ma dabiyog ni ngara daged e lem rok Jesus. Boor e girdi’ ni ma togopuluw ko Pi Mich rok Jehovah, ya boch i yad e bochan ndawori tamilang u wan’rad ban’en u murung’agrad ma boch e bochan kar fanenikayed e Pi Mich nge fare machib rorad. Machane dabda paged ni fare ngongol rorad ni kar dabuyed gadad e ra kirebnag e lem rodad nib mudugil. Dabda paged ni yugu boch e girdi’ e nge yog ngodad rogon ni ngada pigpiggad.

19. Uw rogon ni ngada daged e lem ni taab rogon ku Jesus Kristus?

¹⁹ Gubin ngiyal’ ma ma dag Jesus e lem nib mudugil ngak pi gachalpen nge fare yaram rok Got, ni yugu aram rogon ni ba mo’maw’ ni ngan rin’ e re n’em. (Matthew 23:2, 3) Ba t’uf ni ngada folwokgad ko n’en ni i rin’. Riyul’, ni pi walagdad e dawor ra flontgad, machane ku arrogodad. Ma u uw e rayog ni ngada pirieged riy e piin ni kab fel’ ni ngada chaggad ngorad nge piin ni riyul’ ni yad e fager rodad ko piin ni walagdad u ga’ngin yang u fayleng? Dawori pi’ Jehovah e tamilangan’ ngodad ko urngin e thin rok ni kan yoloy, machane mang teliw e ka boor e tamilangan’ ni karnanged? Ngad paged ni ra par rodad e lem nib puluw ni taabrogon ko lem ni immoy rok Jesus Kristus. Boor e lem nib fel’, mab muun ngay ni ngad nanged rogon ni ngada sonniged Jehovah, ma aram e n’en ni gad ra weliy ko bin migid e article.

[Footnote]

Rayog ni Ngam Weliy?

• Uw rogon nib m’ag e lem rodad ko yafas?

• Ngam weliy rogon e lem rok Jesus Kristus.

• Mang e gad ra fil ko lem rok Job?

• Mang e lem nib puluw ni ngada daged u nap’an ni ke yib e togopuluw ngodad?

[Picture on page 17]

En Kristiano ni bay e lem rok nib puluw e ma athamgil ni nge ayuweg yugu boch e girdi’

[Picture on page 19]

Ngan fil e Thin rok Got ma ra ayuwegdad ni ngada folgad ko lem rok Kristus