Ngan Dag E Gum’an’ U Nap’an Ni Yibe Son!

“Bay ug par ni ke l’agan’ug ngak Got ma gu be sonnag, yi ir e bayi ayuwegneg; Got rog e bayi rung’ag lungug.”​—MIKAH 7:7.

1, 2. (a) Uw rogon ni reb e lem nib kireb e kirebnag piyu Israel u nap’an ni ur moyed u daken e ted? (b) Mang e ra buch ku reb e Kristiano ni de maruweliy ni nge yog ngak e lem nib puluw?

BOOR ban’en ko yafas rodad ni rayog ni nga ni lemnag nra yib angin ara danga’ ni aram e n’en nbe yan u rogon e lem rodad. Nap’an piyu Israel ni ur moyed u daken e ted, ma kan pi’ e ggan ngorad ni mana u fithik’ e maangang. Susun yad ra sap ko binaw ni bay u toobrad ndabi tugul ban’en riy ma yad ra pining e magar ngak Jehovah ya ke pi’ e ggan ngorad. Ma re n’ey e be dag e lem nib fel’. Ma biney e danga’, ya ke yib nga lanin’rad e ggan u Egypt ni boor mit ma kar gun’gun’gad ni fare mana e de fel’ lamen. Ereram e lem ni de fel’!​—Numbers 11:4-6.

² Fare lem ku reb e Kristiano chiney e ku rayog ni nge k’aring ni ngeb e falfalan’ riy ngak ara nge kireban’. Reb e Kristiano ndariy rok e lem ni aram rogon e mmom ni nge m’ay e falfalan’ rok, ma aram e magawon nib gel ya taab rogon ko n’en ni i yog Nehemiah ni gaar: “Falfalan’ ni ma pi’ Somol ngodad e bay i pi’ gelngidad.” (Nehemiah 8:10) Fare lem nib falfalan’ e ra ayuwegdad ni ngad pared ni gad ba gel ma ra ayuweg ni ngeb e gapas ma ra taarebnag e girdi’ u lan e ulung.​—Roma 15:13; Filippi 1:25.

3. Uw rogon ni fare lem rok Jeremiah nib fel’ e ke ayuweg ko ngiyal’ nib mo’maw’?

³ Yugu aram rogon ni be par Jeremiah ko tayim nib mo’maw’, me dag e lem nib pasig mab falfalan’. Yugu aram rogon ni ke guy Jeremiah e tin kireb u nap’an ni kan thang Jerusalem ko duw ni 607 B.C.E., ku ke guy e tin nib fel’ riy. Dabi pag Jehovah talin yu Israel, ma ra magay fare nam. I yoloy Jeremiah fare ke babyor ni Lamentations ni gaar: “Bochan ni Jehovah e i dag e runguy rok ngodad ma arfan ni daworda m’ad, ya ba mudugil ni dabi m’ay e runguy rok. Yad ma par nib biech u gubin e kakadbul. Ri ga ma dag ni gab yul’yul’.” (Lamentations 3:22, 23, New World Translation) Kab kakrom i yib, ma pi tapigpig rok Got e ma athamgil ni nge yog ngorad e lem nib mudugil, mab falfalan’ ko ngiyal’ nib mo’maw e par rorad.​—2 Korinth 7:4; 1 Thessalonika 1:6; James 1:2.

4. Mang e lem ni immoy rok Jesus u gubin ngiyal’, ma uw rogon ni i ayuweg Jesus ko re n’em?

⁴ Ke yan nel’ miriay e duw nga tomren Jeremiah, me par Jesus nib gum’an’ nbochan e ba mudugil e lem rok. Be gaar: “Machane bochan e falfalan’ ni be sonnag [Jesus] ma daki tafinaynag e tamra’ nra tay ko yam’ ni nge tay u daken baley i gekiy, me ere chiney e ke par nga but’ u ba’ ni mat’aw rok Got u tagil’ Got.” (Hebrews 12:2) Demtrug e togopuluw nra yib ngak Jesus​—ni mus u nap’an e gafgow ni keb ngak u daken fare ley i gek’iy—​me par ni be lemnag “fare falfalan’ ni be sonnag.” Re falfalan’ nem e aram fare maruwel ni ngan n’uf Jehovah ni ir e Pilung ni th’abi tolang min thothupnag fithingan ma kub muun ngay fare n’en ni yibe sonnag ni ngan taw’athnag e girdi’ ni ma fol.

Ngan Fanay Fare Lem ni Ngan Gum’an’ u Nap’an ni Yibe Sonnag Ban’en

5. Mang magawon e ra yib ma fare lem nib gum’an’ ni yibe sonnag ban’en e ra ayuwegdad nra par nib puluw e lem rodad u boch ban’en?

⁵ Faan gad ra maruweliy ni nge yog ngodad fare lem ni bod rogon Jesus, ma dabi m’ay e falfalan’ rodad ku Jehovah nyugu aram rogon ni gathi gubin ngiyal’ ni ma yib e n’en ni gad be sananag ni nge buch. I yog Mikah ni profet ni gaar: “Machane gag e gu be tor ngak Somol. Bay ug par ni ke l’agan’ug ngak Got ma gu be sonnag, yi ir e bayi ayuwegneg.” (Mikah 7:7; Lamentations 3:21) Ku arrogodad ni rayog ni ngad daged ni gad ba gum’an’ i sonnag ban’en. Uw rogon? Boor e kanawo’. Reb, e sana gad be lemnag ni reb e walag ni pumoon ni kan pi’ mat’awon e ke oloboch ma ba t’uf ni ngan yal’uweg nib papey. Fare lem nib gum’an’ u nap’an ni yibe sonnag ban’en e ra ayuwegdad ni gad ra lemnag e tin ni baaray ni, ‘Riyul’ ni ke oloboch e cha’ nem, ara gag e kug oloboch? Faanra riyul’ ni ke oloboch, ma gathi ke pag Jehovah ni nge par ni aram rogon ya bochan e manang ni ra thiliyeg e cha’ nem e lem rok ma de t’uf ni ngan pi’ e gechig ngak nib tomal?’

6. Uw rogon ni fare lem nib gum’an’ ni yibe sonnag ban’en e ra ayuweg be’ ni be chamnag reb e magawon ni keb ngak?

⁶ Fare lem nib gum’an’ u nap’an ni yibe sonnag ban’en e sana ba t’uf rodad nfaanra bay e magawon rok bagadad ni be magawonnag ara gad be athamgil ni ngad chamgad ko n’en ni gad ba meewar riy. Sana kada ninged e ayuw ku Jehovah, machane dawori m’ay fare magawon. Ma uw rogon? Thingar da ululgad i maruweliy e n’en nrayog rodad ni fan ni ngad pithiged fare magawon ma ngada pagedan’dad ko thin rok Jesus ni gaar: “Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed.” (Luke 11:9) Mu yibilay ban’en, ma ga sonnag Jehovah. Ma ra yib ngal’an nib puluw ma kub puluw ko birok e kanawo’, ma ra fulweg Jehovah taban e meybil rom.​—1 Thessalonika 5:17.

7. Mang e kanawo’ ni fare lem nib gum’an’ ni yibe sonnag ban’en e ra ayuwegdad u rogon ni gad ra lemnag e tamilangan’ nu Bible ni yibe biechnag iyan?

⁷ Nap’an ni be lebug e thin ni kan yiiynag u Bible, ma yibe machalbognag iyan e tamilangan’ rodad ko Thin nib Thothup. Machane yu ngiyal’, e sana gad ra lemnag ni reb e tamilangan’ e ke yib nib sowath. Faanra dabi yib e re n’ey ko ngiyal’ ni gad baadag ni ngeb, ma gad ra falfalan’ ni ngada sonniged? Dabmu pagtalin, ni ke guy Jehovah nib t’uf ni ngan dag ngan nang “fare n’en nib mith nib m’ag ngak Kristus” ni buchuw nge buchuw ma ke pag 4,000 e duw n’umngin nap’an. (Efesus 3:3-6) Ere bay tapgin ni nge war e gum’an’ rodad? Ke maruwaran’dad ni fare “tapigpig nib yul’yul’ mab gonop” ni kan dugliyrad ni ngar pied ngak girdien Jehovah e “ggan rorad ko ngiyal’ ni ngan pi’ riy”? (Matthew 24:45) Mang fan ni dabda uned ko falfalan’ ni yib rok Got ni bochan ni daworda nanged fan urngin ban’en? Dabmu pagtalin, ni Jehovah e ra dugliy ko wuin nge uw rogon ni nge dag ngan nang e ‘tin nib mith.’​—Amos 3:7.

8. Uw rogon ni ke fel’ rogon boor e girdi’ ko fare gum’an’ ni dag Jehovah?

⁸ Boch e girdi’ e ke mulan’rad ya bochan ni yad be lemnag ni tomren boor e duw ni kar pigpiggad u fithik’ e yul’yul’ ku Got, ma sana yad ra yim’ u m’on ni dabra guyed “fare Rran rok Somol, ni reb e rran ni baga’ ma ba gel e gafgow nra fek i yib.” (Joel 2:30, 31) Machane, ku yad ra par nib falfalan’ nfaan yad ra guy e tin nib fel’ riy. I pi’ Peter e fonow ni gaar: “Mu lemniged e gum’an’ rok Somol rodad ni aram e tayim ni be pi’ ngomed ni ngam guyed rogon ngkam thapgad ngak.” (2 Peter 3:15) Gum’an’ rok Jehovah e ke ayuweg bokum milyon e girdi’ nib mat’aw ni ngara filed e tin riyul’. Gathi aram e n’en nrib fel’? Maku, faanra dag Jehovah e gum’an’ rok nib n’uw nap’an, ma aram e bay boor e tayim rodad ni “ngada ululgad i maruweliy ban’en ni ngeb madgun Got u wan’dad ma nguud t’ongad ni fan ni [ngad] thapgad ngak Got u fithik’ e marus.”​—Filippi 2:12, NW; 2 Peter 3:11, 12.

9. Faanra ke mudugil oren e tin gad ra rin’ ko pigpig ku Jehovah, ma uw rogon ni nge ayuwegdad fare lem nib gum’an’ i sonnag ban’en ni ngada gum’an’gad riy?

⁹ Fare lem ni ngan sonnag ban’en u fithik’ e gum’an’ e ra ayuwegdad ni nge dabi mulan’dad u nap’an ni ra yib ngodad e togopuluw, nge m’ar, nge pilibthir iyan, ara yugu boch e magawon nra talegdad i machibnag e thin ko Gil’ilungun Got. Baadag Jehovah ni ngada pigpiggad ngak u polo’ i gum’ercha’dad. (Roma 12:1) Machane, Jesus ni Fak Got e ma “runguy e piin nib sobut’ nge piin nib gafgow,” ma der ma ning ban’en ngodad ndabiyog ni ngada pied ngak; ma ku arrogon Jehovah. (Psalm 72:13) Arfan, ni kan pi’ e athamgil nga lanin’dad ni ngada rin’ed e tin rayog rodad, ma ngada sonnaged ni nge thil e par rodad​—ndemtrug ko ra yib e re n’ey ko re m’ag ney ara bay fini yib nga m’on. Dabmu pagtalin: “Gathi bayi pag Got talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.”​—Hebrews 6:10.

10. Mang ngongol nib kireb ni en ni bay e lem rok nib gum’an’ i sonnag ban’en e rayog ni nge palog riy? Mu weliy fan.

¹⁰ Fare lem nib gum’an’ e ku ra ayuwegdad ni dabda rin’ed ban’en ni dan pi’ mat’awdad. Boch e girdi’ ni ke mang apostate e de yog ni ngara sonnaged ban’en. Sana ka ra lemnaged ni bay boch ban’en ni ba t’uf ni ngan thiliyeg, ni susun aram ban’en u lan e Bible ara boch ban’en u lan e ulung. Yugu aram rogon, ma dar nanged ni kan ni thothup rok Jehovah e ke k’aring fare tapigpig nib yul’yul’ mab gonop ni ngar yal’uweged boch ban’en nrogon nib m’ag ko tayim Rok ma dabi yan u rogon e tayim ni gad be lemnag. Ma thingar ni thiliyeg ban’en nrogon nib m’agan’ Jehovah ngay, ma gathi lem rodad. Piin ni apostate e kar paged ni lem rorad nib fonowan’ e ke kirebnag e lem rorad ke mulan’rad. Machane faan goma nga kar folgad ko lem rok Kristus, ma sana ka yad be par nib falfalan’ ma ka yad be par u fithik’ e girdi’ rok Jehovah.​—Filippi 2:5-8.

11. Uw rogon ni nguuda fanayed e tayim u nap’an ni yibe sonnag ban’en nra yib angin ngodad, ma faan gad ra yodor ma gad be fol rok mini’?

¹¹ Ba mutrug, ni ra nge par fare lem nib gum’an’ i sonnag ban’en u laniyan’ be’ ma da gathi be yip fan nib malmal e cha’ nem. Bay boch ban’en ni gad ra rin’. Ni bod e tin ni baaray ni, thingar da fanayed e tayim rodad ko fol Bible ni goo gadad ma aram rogon e gad be dag ni ri gad baadag e tirok Got ban’en ni dag fapi profet nib yul’yul’ nib muun e pi engel ngay. Nap’an ni be weliy Peter ban’en nib m’ag ngay, me gaar: “Fapi profet e kara maruweliyed nib elmerin u fithik’ e yul’yul’ ni fan ni ngara nanged murung’agen e re athap ney . . . Pi n’en ney e baadag e pi engel ni ngar sapgad ngay.” (1 Peter 1:10-12) Gathi kemus ni fol babyor e ba t’uf ni ngan rin’ ya ku arrogon ni ngaun ni un ko muulung nge meybil. (James 4:8) Piin ni yad ma lemnag nib t’uf rorad e tirok Got e arfan ni yad ma kay e ggan nib spiritual u gubin ngiyal’ ma yad ma chag ngak e pi walagrad e yad be dag ni ke af ngorad e lem rok Kristus.​—Matthew 5:3.

Ngan Lemnag Ban’en Nrogon nib Puluw

12. (a) Ri mang puf rogon e i gay Adam nge Efa? (b) Mang wenegan ni ke yib nbochan ni ke fol e girdi’ ko kanawo’ rok Adam nge Efa?

¹² Nap’an ni ke sunmiy Got fa wu’ i mabgol, nsomm’on ma bay mat’awon ni nge fal’eg boch e motochiyel ko tin nib mat’aw nge tin nib kireb. (Genesis 2:16, 17) Baadag Adam nge Efa ni nge puf rogorow ma dabkuura parew u tan e motochiyel rok Got, ma wenegen ni yib riy e aram e n’en ni be buch u fayleng nrayog ni ngada guyed u toobdad e chiney. I gaar Paul ni apostal: “Denen e yib nga fayleng u daken taa be’, ma denen ni ngongliy e fek e yam’ i yib. Wenegen ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Ke yan nel i biyu’ e duw ni ka nap’an Adam ma kan dag ni riyul’ e pi thin ney ni ke yog Jeremiah ni gaar: “O Jehovah, ri gu ma nang ni girdi’ nu fayleng e de mil fan kanawo’rad ngorad. Dabiyog ku be’ ni nge yan rok ni goo ir maku dabiyog rok ni nge yal’uweg rogon ni nge yif’.” (Jeremiah 10:23, NW) Kan nang ni riyul’ e thin ni ke yog Jeremiah ya ke dag ni kada lusgad. Ereray e tin riyul’. Ya kan weliy e re n’ey ko tini buch ni kab kakrom i yib u nap’an ni “girdi’ e gagiyegnag e girdi’ ma keb e kireb riy” ya bochan ni girdi’ e kar gagiyegnaged e girdi’ nib dar ku Got.​—Eklesiastes 8:9.

13. Mang e lem nib yul’yul’ ni bay ko Pi Mich rok Jehovah u murung’agen e n’en nrayog ni nge rin’ e girdi’?

¹³ Bochan ni aram rogon e par ko girdi’, ma manang e Pi Mich rok Jehovah ni kemus ni buchuw angin nra yib ko maruwel nra ta’ e re m’ag n’ey. Fare lem nib mudugil ara positive e rayog ni nge ayuwegdad nge par ni gad ba falfalan’, machane gathi aram e n’en ni ra pithig urngin e magawon. Somm’on ko fare duw ni 1950, ma aram reb e tayugang nu Meriken e ke yoloy reb e babyor ni fithingan e The Power of Positive Thinking. Fare babyor e ke weliy ni boor e magawon e rayog ni ngan pithig nfaanra ni guy rogon ni ngan rin’ boch ban’en ni ke mudugil lanin’uy. Ba mudugil nib fel’ fare lem nib mudugil. Machane yibe dag ko n’en ni be buch ni tamilangan’, nge salap, nge chugum, nge yugu boch ban’en ni boor e aram e n’en ni be magawonnagdad ma ke mus ni buchuw e pi n’en nrayog ni ngada rin’ed nbochan. Ma u ga’ngin yang e fayleng, e kaygi gel e pi magawon ni bay riy ma arfan ni dabiyog ko girdi’ ni ngar pithiged e pi magawon ney​—ndemtrug feni be mudugil e lem rorad!

14. Pi Mich rok Jehovah e bay e lem rorad nde mudugil fa? Mu weliy.

¹⁴ Bochan ni Pi Mich rok Jehovah e yad ma lemnag ban’en u fithik’ e yul’yul’, ma boch e girdi’ e ma yog ni bay e lem rorad ni de mudugil. Machane, yad baadag ni nga rogned ngak e girdi’ u murung’agen fa En ni ir e ra ayuweg ni nge fel’ e par ko girdi’ ni dariy n’umngin nap’an. Maku bochan e re n’ey ma aram e yad be folwok ko lem rok Kristus. (Roma 15:2) Ma boor pa’ u puluwrad ni ngara ayuweged e girdi’ ni nge fel’ thilrad Got. Yad manang ni tomur riy, ma ri ra yib angin ngorad.​—Matthew 28:19, 20; 1 Timothy 4:16.

15. Uw rogon ni fare maruwel ni ma tay e Pi Mich rok Jehovah e ke ayuweg boch e girdi’?

¹⁵ Pi Mich rok Jehovah e gathi girdi’ ni ma fek owchen ko magawon ko girdi’​—ma ri baga’ ni tin ni baaray e ngongol nib kireb mab togopuluw ko thin nu Bible—​ni bay u toobrad. U m’on ni ke adag be’ ni nge mang reb e Pi Mich rok Jehovah ma nge thilyeg boch ban’en, ya nge yog ni gel ko tin ba togopuluw ni ke mecham ngay ndabun Got. (1 Korinth 6:9-11) Arfan ni Pi Mich rok Jehovah e kara ayuweged boch e girdi’ ni ke gel ni dabkuura chingnaged, ara un fek e drug, nge ngongol ni darngal, nge gambling. Pi cha’ nem ni kara thiliyeged pangirad e kara nanged rogon ni nga ra ayuweged e tabinaw rorad nrogon u fithik’ e yul’yul’. (1 Timothy 5:8) Faanra kan ayuweg e girdi’ nge pi tabinaw ni aray rogon, ma ra buchuw e magawon ko binaw​—ma ra buchuw e piin ni kar mechamgad ko drug, ma ra buchuw e cham u tabinaw, nge yugu boch ban’en. Faanra kar manged e piin ni ma fol ko motochiyel ma ma ayuweg yugu boch e girdi’ ni ngar thiliyeged e par rorad ni nge fel’, ma Pi Mich rok Jehovah e kara lichnaged e maruwel ko fapi agency ni aram fare maruwel rorad ni yad ma ayuweg ni nga ra pithiged boch e magawon ko girdi’.

16. Mang fan ni Pi Mich rok Jehovah e dabra uned ko fare ulung ni secular reform movements?

¹⁶ Ere, ke thiliyeg e Pi Mich rok Jehovah e gafarig ko girdi’ nu fayleng, fa? U lan fa ragag e duw ni ke yan, ma ke yoor oren e Pi Mich rok Jehovah nib pasig ni somm’on e ke chuchugur ko 3,800,000 ma tomur riy me ke taw ko 6,000,000. Ma sagonapan 2,200,000, e girdi’ ni kan uneg ngorad ni boor i yad e kara paged e ngongol nib kireb ko ngiyal’ ni kara manged Kristiano. Kan thiliyeg e yafas ko girdi’ ni boor! Machane, re namba ney e kaygi lich nfaanra ngan taarebnag oren ko girdi’ nu fayleng ko pi duw nem ni immoy 875,000,000 ni kan uneg ngay! Manang e Pi Mich rok Jehovah ni ma yib e falfalan’ riy ni ngan ayuweg e girdi’ ni ma fol, nyugu aram rogon ni yad manang ni kemus ni buchuw u fithik’ e girdi’ e ra yan ko kanawo’ ni yan ko yafas. (Matthew 7:13, 14) Nap’an ni be sonnag e Pi Mich rok Jehovah e tayim ni nge thil rogon e par ko girdi’ u ga’ngin yang u fayleng nge fel’ boch ma re n’ey e goo Got e bay rogon ni nge rin’, ma darur uned ko ulung ni secular reform movements ni ma athamgil ni ngara thiliyeged boch, ni baga’ ni ma tabab ko lem nib fel’ machane ma ra tomur riy ma cham.​—2 Peter 3:13.

17. Mang e i rin’ Jesus ni fan ni nge ayuweg e piin ni ur moyed u tooben, machane mang e n’en ni de rin’?

¹⁷ Ra ngan fol ko re kanawo’ ney, ma be dag e Pi Mich rok Jehovah e pagan’ ni ma ta’ Jesus ngak Jehovah u nap’an ni immoy u fayleng. Nap’an fa bin somm’on e chibog, ma aram i fal’eg Jesus e maangang ni i golnag e m’ar. (Luke 6:17-19) Miki faseg e yam’. (Luke 7:11-15; 8:49-56) Machane de chuweg fare magawon ko m’ar ara ngan thang fare toogor ni yam’. Manang ni dawori taw nga nap’an ni kan duguliy ni nge rin’ e re n’ey. Bochan ni bay gelngin Jesus nib gel ya ir be’ nib flont, ni sana bay boor ban’en nrayog ni nge rin’ ni nge pithig e magawon nib gel ni political nge pi magawon ko girdi’. Boch e girdi’ ko ngiyal’ nem e gowa yad baadag ni ngar fanayed gelngirad ni ngar rin’ed e re n’ey, machane dabun Jesus. Rayog ni ngada bieged boch e thin ni gaar: “Ma girdi’ ni yad bay u rom e ra guyed e pi maangang nem ni ke ngongliy Jesus, me lungurad, “Riyul’ ni ireray fare profet ni faani ir e nge yib ngaray nga fayleng!” Me nang Jesus ni yad be n’en ni ngar bad ngak ngar feked ngar tiyed ni ir e nge mang pilung rorad, ma aram me pagrad nge yan nga daken e burey ni goo ir.”​—John 6:14, 15.

18. (a) Uw rogon ni ma dag Jesus e lem nib gum’an’ ko son u gubin ngiyal’? (b) Uw rogon ni ke thil e maruwel rok Jesus ni ka nap’an e 1914?

¹⁸ Dabun Jesus ni nge un ko politics ara kemus ni nge un ko maruwel ni lungun e am ni ngan ayuweg e girdi’ ya bochan ni manang ni dawori taw ko ngiyal’ ni nge yog ngak gelngin e pilung nra golnag urngin e m’ar u gubin yang. Tomren ni ke yan nga tharmiy me mang reb e kan, ma kub fel’ u wan’ ni nge sonnag ngal’an ni ke dugliy Jehovah ma mfini tabab i rin’ ban’en. (Psalm 110:1; Acts 2:34, 35) Machane, ka nap’an 1914 ni aram e duw ni ke tabab ko maruwel ni ir e Pilung ko Gil’ilungun Got, ni be yan nga m’on nrogon be’ ni ba “gel ni nge yan ko mahl nge gel.” (Revelation 6:2; 12:10) Uw feni gel e falfalan’ rodad ni ngad pared u tan e gagiyeg rok, ma boch e girdi’ ni ma yog ni yad e Kristiano e ka ra mel’eged ni ngar pared ni yad e piin ndariy ban’en ni manang ko thin nu Bible nib m’ag ko Gil’ilungun!

Son​—Ma Yib e Chalban Riy ara Falfalan’?

19. Mang ngiyal’ e k’aring e mason e ‘m’ar ko gum’ircha’’ ma wuin e ra yib e falfalan’ riy?

¹⁹ Manang Solomon ni yira chalban u nap’an ni yibe son. Me yol ni gaar: “Faanra i l’agan’uy nga ban’en me kireb fare n’em, me mulan’uy.” (Proverbs 13:12) Ba tamilang, nfaanra be sonnag be’ ban’en ndawori mudugil, ma ra yog ni m’ar gum’ercha’en ko kireban’. Machane, ra ngan sonnag ban’en ni bay e falfalan’ riy​—ni sana bod e magpa’, nge yira gargelnag reb e bitir, ara reb e muulung ko piin nib t’uf rodad—​ma ra yibnag e falfalan’ ngodad nib n’uw nap’an u m’on ni nge taw ko re rran nem me lebug. Ma ra gel e falfalan’ riy nfaan gad ra fanay e tayim ni ngad sonnaged ban’en u fithik’ e gonop, ni thingar da fal’eged rogodad ni fan ko n’en nra yib.

20. (a) Mang e n’en ni ra buch nga m’on ni ma gin e girdi’ ngay ni ri gad be sonnag ni ngad guyed? (b) Uw rogon ni ngeb e falfalan’ ngodad u nap’an ni gad be sonnag nra riyul’ e tin nib m’agan’ Jehovah ngay?

²⁰ Faanra riyul’ ni ke l’agan’dad ngay nra lebug urngin ban’en ni gad be sonnag​—nyugu aram rogon ni daworda nanged ko wuin e ra yib i m’ug nib riyul’—​ma fare tayim ni gad be sonnag e dabi ‘kireban’dad ngay.’ Pi tapigpig ku Got nib yul’yul’ e yad manang ni fare Gagiyeg rok Kristus u lan Taareb e Biyu’ e Duw e ke chuchugur. Ke pagan’rad nrayog ni ngar guyed e tayim nra m’ay e yam’ nge m’ar. Yad be sonnag e tayim ni yira faseg bokum billion e girdi’ ni kar m’ad, mab muun ngay e piin nib t’uf rorad. (Revelation 20:1-3, 6; 21:3, 4) Ngiyal’ ney ni ke wagey e ecology rodad, ma ri yad be sonnag e tayim nrayog ni ngar guyed fare Paradis ni yira fal’eg u roy u fayleng. (Isaiah 35:1, 2, 7) Ere uw fene fel’, ni ngan fanay e tayim ni ngan sonnag ban’en u fithik’ e gonop, ni “Gubin ngiyal’ ma nguum maruweliyed e maruwel romed ni fan ngak Somol”! (1 Korinth 15:58) Nga um ko’ e ggan nib spiritual. Ngam maruweliy ni ngari fel’ thilmew Jehovah. Mu gay yugu boch e girdi’ ni gum’ercha’rad e ke k’aringrad ko pigpig ku Jehovah. Ngam pi’ e athamgil nga laniyan’ pi walagem. Ngam fanay e tayim ni ke pi’ Jehovah ni nge mus rogom riy. Ma aram rogon, ni rayog ni ngam sonnag Jehovah ni dabi war lnin’um.’ Ya, ra yib e falfalan’ riy ngom ni boor!

Rayog ni Ngam Weliy?

• Uw rogon ni i dag Jesus e lem nib gum’an’ u nap’an ni yibe sonnag ban’en?

• Mang pi magawon ko piin Kristiano e ba t’uf ni ngara daged e lem nib gum’an’ riy u nap’n ni yad be sonnag ban’en?

• Mang fan ni Pi Mich rok Jehovah e yad ba falfalan’ ni yad be sonnag Jehovah?

• Uw rogon ni ra ngan sonnag Jehovah ma aram tabolngin e falfalan’ nib ga’?

[Pictures on page 22]

I k’adan’ Jesus nbochan fare falfalan’ ni be sonnag

[Picture on page 23]

Tomren ni ke yan boor e duw ko pigpig ku Got, ma rayog ni nguuda pared ni gad ba falfalan’

[Pictures on page 25]

Bokum milyon e girdi’ ni ke manigil e par rorad u tomren ni kar manged Pi Mich rok Jehovah