Tow’ath Rodad Nrib Th’abi Fel’ Ni Kan Pi’—Uw Rogon Ngom U Wan’um?
“Gimed e piin ni ke fal’eg e Chitamag waathmed: mired! Mired ngan pi’ e gin nsuwon Got ngomed, ni kan ngongliy rogon kan tay ni fan ngomed ni ka nap’an e ngiyal’ nsunmiy e fayleng riy.”—MATTHEW 25:34.
1. Mang boch ban’en ni ke yog ngak e girdi’ ni kan pi’ ngorad?
URNGIN e girdi’ e bay boch ban’en ni kan pi’ ngorad. Boch ban’en ni kan pi’ ngak yugu boch e girdi’ nib ba muun ngay e par nib fel’ rogon. Ma boch e girdi’ e aram e par nib gafgow. Yu ngiyal’, ma fapi mfen ni ke yan e kar pied ban’en ngak e girdi’ rorad ni aram e fanenikan nib gel ni fan ngak yugu boch e girdi’ nbochan e n’en ni ke buch ni kar rung’aged. Machane, gad gubin ni bay taa ban’en ni ke yog ngodad. Ke yog ngodad e denen rok fare moon ni somm’on, ni Adam. Munmun ma re n’ey e ra fekey iyan ko yam’.—Eklesiastes 9:2, 10; Roma 5:12.
2, 3. Mang e n’en ni yira pi’ ni ke fal’eg Jehovah rogon ke ta’ ko tabolngin ni fan ko piin owchen Adam nge Efa, ma mang fan ni de yog ngorad e re nem?
2 Jehovah ni ir e Chitamangidad nu tharmiy ni ma runguyey, e somm’on me ognag ban’en ngak e girdi’ ni yug ba thil—ni aram e yafas ni ndariy n’umngin nap’an ma ba flont u Paradis. Adam nge Efa ni yow e gal ga’ rodad ni somm’on, e kan pi’ ngorow e yafas nib flont ma dariy e denen rorow ko tabolngin. I pi’ Got ni Jehovah e Fayleng ngak e girdi’ nib taw’ath. (Psalm 115:16) I pi’ Got fare milay’ nu Eden ni fan e nge dag ko uw rogon yaan e fayleng ni polo’ nga m’on me pi’ ngak e gal ga’ rodad ni somm’on e maruwel nib fel’. Ba t’uf ni ngar diyengow nge yoor e bitir rorow, ma ra ayuweged fare fayleng nge urngin e woldug riy nge gamanman, ma nguur maruweliyed nge mang Paradis e fayleng ni polo’. (Genesis 1:28; 2:8, 9, 15) Ma ra un pi fakrow ko re maruwel n’ey. Ban’en nrib fel’ ni ferow nrayog ni nge yog ngorad!
3 Machane, rayog ni nge yog ngorad e re n’ey nfaan ra fel’ thilin Got nge Adam nge Efa nge pi bitir rorad. Ba t’uf ni nguur t’ufeged Jehovah ma ur folgad rok, machane de yog rok Adam nge Efa ni ngara tew fan e n’en ni ke pi’ Got ngorow mar th’abew e motochiyel ni ke pi’ ngorow. I mul fare Paradis u pa’row nge fare athap ni i fal’eg Got ni fan ngorow. Arfan ni dabiyog ni ngara piew e re n’ey ngak e pi bitir rorow.—Genesis 2:16, 17; 3:1-24.
4. Uw rogon ni nge yog ngodad fare n’en ni kan pi’ ngak Adam ni ke adbey?
4 Bochan ni Jehovah e ir Got ni ta runguyey, ma aram e pi’ ban’en ni fan e nge ayuweg pifak Adam nge Efa ni nge yog ngorad fare n’en ni de yog ngak Adam. Uw rogon? Yani taw ngal’an ni ke dugliy Got, ma aram mi pi’ Jesus Kristus ni Fak e yafas rok nib flont ni fan ngak pifak Adam. Ni aram e ke chuwiyrad Kristus ni yad urngin. Machane, dabi pi’ ngorad fare f’oth ni faanra dariy ban’en ni ngan rin’. Ba t’uf ni nge fel’ thilrad Got, ma rayog ni nge yog ngorad e re n’ey nfaanra ke michan’rad nga felngin e maligach ni pi’ Jesus ni ma upunguy e denen mar folgad rok. (John 3:16, 36; 1 Timothy 2:5, 6; Hebrews 2:9; 5:9) Be m’ug ko yafas rom ni kam falfalan’ ko re taw’ath ney?
Ban’en ni Kan Pi’ u Daken Abraham
5. Uw rogon ni i dag Abraham nib ga’ fan u wan’ nra par nib fel’ thilrow Jehovah?
5 Nap’an ni i lebuguy e tin nib m’agan’ ngay ni fan ko fayleng, ma aram me fanay Jehovah Abraham ni fan e nge rin’ ban’en nib thil. I tay chilen ngak fare pumoon nib yul’yul’ ni nge chuw ko nam rok me yan nga reb e binaw ni Got e ir e ra dag ngak. Ma kari fol Abraham nib m’agan’ ngay. Tomren ni ke taw Abraham ngaram, ma aram ke yog Jehovah ni pifak Abraham, e yira pi’ ngorad fare binaw nge mang taferrad ma gathi Abraham. (Genesis 12:1, 2, 7) Ma mang e rin’ Abraham? Baadag ni nge pigpig ku Jehovah ndemtrug e binaw ni nge yan nga’ ma demtrug ko mang e ra yog Got ngak ni nge rin’ ma ra fol ya aram e kanawo’ nrayog ni nge yog ngak pifak fare n’en ni ka nog ni yira pi’ ngorad. I pigpig Abraham ngak Jehovah u lan 100 e duw u bbinaw ni gathi tafen nge mada’ ko ngiyal’ ni ke yim’. (Genesis 12:4; 25:8-10) Rayog ni ngam rin’ e re n’em, fa? I yog Jehovah ni Abraham e ir e “fager” rok.—Isaiah 41:8.
6. (a) Bochan ni de maruwaran’ Abraham ni nge pi’ fak ni maligach ma mang e i dag Abraham yaan? (b) Mang e n’en nib tolang puluwon ni kan pi’nrayog ngak Abraham ni ra pi’ ngak e piin ni owchen?
6 I son Abraham ni nge yog ngak reb e bitir ni pumoon, ni aram Isak, nrib t’uf rok. Nap’an ni kari fel’ yangaren fak, ma aram me yog Jehovah ngak Abraham ni nge fek fak nge pi’ ni maligach ngak. De nang Abraham ni nge yodorom ni be dag rogon e n’en nra rin’ Got u nap’an nra pi’ Fak ni maligach; machane, ke fol ma nap’an ni be n’en ni nge pi’ Isak ni maligach ma aram me yib fare engel rok Jehovah i taleg. (Genesis 22:9-14) U m’on riy ma i yog Jehovah ni fapi n’en ni ke micheg ngak Abraham e yira lebuguy u daken Isak. Arfan, nib tamilang ni ke mich u wan’ Abraham, nfaanra ba t’uf ni ngan rin’, ma rayog rok Got ni nge faseg Isak ko yam’, ni yugu aram rogon ni dawori buch ban’en ni aram rogon biid. (Genesis 17:15-18; Hebrews 11:17-19) Bochan ni mus nga fak Abraham ma de tel rok Got, ma aram me yog Jehovah ni gaar: “Ma urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem.” (Genesis 22:15-18) Re n’ey e be micheg ni fare Owchen ni kan weliy ko Genesis 3:15, ni fare Messiah ni ta ayuw, e ra yib u daken e tabinaw rok Abraham. Aram fare n’en ni kan pi’ nib tolang puluwon ni yira wereg ngak e girdi’!
7. Uw rogon ni dag Abraham, nge Isak, nge Jakob ni kar ted fan e n’en ni yira pi’ ngorad?
7 De nang Abraham fan e n’en ni be rin’ Jehovah ko ngiyal’ nem; maku arrogon Isak ni fak nge Jakob ni fak Isak, ni yow ra “un ngak ko re n’en nem ni kan micheg ngorad” ni dar nanged. Machane ke pagan’rad ku Jehovah. Dar uned ko pi am nu fayleng ya kar sapgad nga m’on ko yugu reb am ara mach ni kab fel’ boch ni aram—“fare mach ni bay e def riy nib riyul’, ma Got e ke toy e re n’ey.” (Hebrews 11:8-10, 13-16, New World Translation) Machane, gathi urngin e piin ni owchen Abraham e be lemnag nib tolang puluwon fare n’en ni yira pi’ ngorad u daken Abraham.
Boch i Yad e Kara Dariyfannaged e N’en ni Yira Pi’ Ngorad
8. Uw rogon ni dag Esau ni dariyfan u wan’ e n’en ni yira pi’ ngak nib tolang puluwon?
8 Esau, ni ir fak Isak ni bin nganni, e de tayfan mat’awun ni ir e bin somm’on i fak. De tayfan e pi n’en nib thothup. Ere reb e rran u nap’an ni ke yib e bilig ngak Esau, me pi’ mat’awun ni chuway ni ir e bin nganni ngak Jakob ni walagen. Ko mang? Ni fan ni nge yog ngak boch e flowa nge sup ko mame! (Genesis 25:29-34; Hebrews 12:14-17) Fare nam ni ke micheg Got ngak Abraham e ra m’ug ko tabinaw rok Jakob, ma ke thiliyeg Got fithingan ni Israel. Mang kanawo’ e mab ngorad ni bochan fare n’en ni kan pi’ ngorad?
9. Bochan e n’en ni yira pi’ ngak e piin ni owchen Jakob ara Israel ni aram fare binaw nib spiritual, ma mang e ayuw ni yib ngorad?
9 Nap’an ni yib e uyungol ngorad, ma aram me yan Jakob nge tabinaw rok nga Egypt. Ma ke yoor i yoor e bitir rorad u rom, machane ku kara manged sib u rom. Yugu aram rogon, ma de pag talin Jehovah fare m’ag ni ke fal’eg u thilrow Abraham. Bay ngal’an ni ke dugliy Got, ni nge ayuweg pifak Israel ni nge dabkuura pared ni yad e sib me yog ngak ni ra fekrad nga ranod nga ba “binaw nib yong’ol e but’ riy,” ni ereram fare binaw ni ke micheg ngak Abraham.—Exodus 3:7, 8; Genesis 15:18-21.
10. Mang e ke buch u daken fare Burey ni Sinai, nib thil nib l’ag rogon ko n’en ni yira pi’ ngorad?
10 Nap’an ni ka be yan pifak Israel u kanawo’ ni yan ko fare Binaw ni kan Micheg, me ulunguyrad Jehovah nga daken fare Burey ni Sinai. Me non ngorad u rom ni gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mu mpired ni gimed e girdi’ ni kug mel’egmed ni ngam manged girdi’eg. Bay mpired ni gimed girdien ba nam ni gimed be pigpig ngog ni kam manged pi prist, ma ke mus ni gag e ke mil suwmed ngog. Ereray e n’en nthingar mog ngak piyu Israel.” (Exodus 19:5, 6) Tomren ni ke taareban’ e girdi’ ni ngar folgad ko re thin nem, me tabab Jehovah i pi’ ngorad e Motochiyel rok—ni aram e n’en ndawori rin’ ngak yugu boch e girdi’.—Psalm 147:19, 20.
11. Mang boch ban’en ni rib fel’ nib muun nga lan fare n’en nib spiritual nib spiritual ni yira pi’ ngak pifak Israel?
11 Uw feni fel’ fare n’en nib spiritual ni kan pi’ ngak fare nam nib biech! Kara pigpiggad ko bin nriyul’ e Got. Ir e i ayuwegrad ngar chuwgad u Egypt ma kara guyed e n’en ni ke buch u daken e Burey ni Sinai ni gin e girdi’ ngay u nap’an ni kan pi’ ngorad fare Motochiyel. Fare n’en ni yira pi’ ngorad e ke gel e fel’ riy u nap’an ni yib ngorad e “pi thin ni yog Got ngorad” u daken fapi profet. (Roma 3:1, 2) I dugliyrad Jehovah ngar manged e pi mich rok. (Isaiah 43:10-12) Fare Owchen ni ir e ra mang Messiah e ra yib ko nam rorad. Be weliy fare Motochiyel murung’agen, ma ra ayuweg ni ngan nang, ma ra ayuwegrad ni ngar nanged ni rib t’uf rorad fare Messiah. (Galatia 3:19, 24) Maku, kan bing e kanawo’ ngorad ni ngara uned ngak fare Owchen ni ir fare Messiah ko pigpig ni yad e prist nge ba nam nib thothup.—Roma 9:4, 5.
12. Yugu aram rogon ni ke taw piyu Israel ko fare Binaw ni kan Micheg, ma mang e n’en ni de yog ngorad? Ma mang fan?
12 I lebuguy Jehovah e n’en ni ke micheg ma aram me pow’iy piyu Israel ngar tawgad ko fare Binaw ni kan Micheg. Machane rogon ni weliy Paul ni apostal nga tomren, e bochan ni ba war e michan’ rorad, ma re binaw nem e de yog ni nge mang “gin ni ngan toffan riy.” De yog rorad ni ngar uned ko “toffan rok Got” ya bochan ni de yog rorad ma dar rin’ed e tin nib puluw ko tin nib m’agan’ Got ngay ko birok e rran ko toffan, ni i tabab u tomren ni kan sunmiy Adam nge Efa.—Hebrews 4:3-10.
13. Bochan ni de yog rok fare nam nu Israel ni ngar ted fan fare f’oth rorad, ma mang e n’en ke mul u pa’rad?
13 Fare nam nu Israel e susun rayog ni ngar gamaneged oren fapi girdi’ ni yad ra un ngak fare Messiah nga tharmiy ngar manged gil’ilungun e pi prist ma ngar manged fare nam nib thothup. Machane dar ted fan fare n’en ni yira pi’ ngorad nib tolang Puluwon. Kemus ni ri buchuw ko girdi’ nu Israel eb fel’ fare Messiah u wan’rad u nap’an ni ke yib nga fayleng. Wenegan ni yib riy, kemus ni buchuw u fithik’rad e kan unegrad ko n’en ni ka nog gil’ilungun e pi prist ngay. Fare Gil’ilungun e kan chuweg rok fare nam nu Israel min “pi’ ngak girdien reb e nam ni yad e bay yib wom’engirad nib fel’.” (Matthew 21:43) Mang nam e re n’em?
Fare N’en ni Kan Pi’ ni Bay u Tharmiy
14, 15. (a) Tomren e yam’ ni tay Jesus, uw rogon ni i tabab e pi nam ni ngar taw’athnaged yad u daken fare “owchen” Abraham? (b) Mang e n’en ni ke yog ngak e piin ni yad bang ko “fare Israel rok Got” ni ni birorad e f’oth?
14 Fare nam ni ir e kan pi’ ngak fare Gil’ilungun e aram “fare Israel rok Got,” ni Israel ni spiritual, ni bay 144,000 e girdi’ ni yad e pi gachalpen Jesus Kristus ni ke fakayrad e kan ni thothup. (Galatia 6:16; Revelation 5:9, 10; 14:1-3) Boch ko fa 144,000 e yad e girdi nu Israel, machane boor i yad e yad bang ko pi nam ni gathi yad piyu Israel. Ma ereram e kanawo’ ni fare n’en ni ke micheg Jehovah ngak Abraham, ni yira taw’athnag urngin e pi nam u daken “owchen” e ke tabab ni nge lebug. (Acts 3:25, 26; Galatia 3:8, 9) Bochan ni ke lebug e re n’ey ko yay ni somm’on, ma aram girdien e pi nam e kan dugliyrad ko Kan ni thothup ma ke fakayrad Jehovah ngar manged pifak ni spiritual, nge pi walagen Jesus Kristus. Arfan, ni ku kar manged bang ko fare “owchen” ni fa bin migid.”—Galatia 3:28, 29.
15 U m’on ni dawori yim’ Jesus, me weliy murung’agen ngak piyu Jew ni yad e piin ni bay e athap rorad ni ngar manged bang ko fare nam nib biech ni aram fare m’ag, ni racha’en Jesus e ra gelnag. Bochan e michan’ rorad ko re maligach nem, ma piin ni ra mang bang ko re m’ag ney e yira ayuwegrad ni ngara “flontgad ndariy n’umngin nap’an.” (Hebrews 10:14-18) Ma kan “mat’awnagrad ngak Got” min n’agfan e denen rorad. (1 Korinth 6:11) Arfan, ni bochan e re n’ey ma yad ra bod Adam u nap’an ni dawori denen. Machane, pi cha’ ney e dabra pared u paradis u fayleng. I yog Jesus ngorad ni yad ra yan nga tharmiy ni nge ngongliy tagil’rad u tharmiy. (John 14:2, 3) Kar paged e flaab rorad u fayleng ya aram rogon ma rayog ni nge yog ngorad ‘fare n’en ni yira pi’ ngorad u tharmiy.’ (1 Peter 1:4) Mang e yad ra rin’ u rom? I weliy Jesus ni gaar: “Nggu fal’eg reb e m’ag u thildad . . . ni fan ko fare gil’ilungun.”—Luke 22:29.
16. Mang maruwel nib fel’ e yira pi’ ngak e piin Kristiano ni kan dugliyrad ni bay nga m’on?
16 Nap’an ni yad bay u tharmiy ni piin ni ra un ngak Kristus ko gagiyeg, ma reb e maruwel ni yad ra rin’ e aram e yad ma thirif u but’ urngin e pi togopuluw u fayleng ni yima tay nga gelngin. (Revelation 2:26, 27) Ma tin migid e piin piin owchen Abraham nib spiritual, e yad ra un ko maruwel ni ngan taw’athnag e girdi’ ko pi nam ni fan ni nge yog ngorad e yafas ni manemus. (Roma 8:17-21) Rib tolang puluwon e n’en ni yira pi’ ngorad!—Efesus 1:16-18.
17. Mang bang ko n’en ni yira pi’ ngak e piin Kristiano ni kan dugliyrad ara f’oth rorad u nap’an ni ka yad bay u fayleng?
17 Machane pi n’en ni ngan pi’ ngak pi gachalpen Jesus e gathi urngin e tin ni bay fini yib nga’ m’on. I ayuweg Jesus pi gachalpen ni ngara nanged Jehovah ni karimus ni ir e Got nib riyul’ u daken reb e kanawo’ ni goo ir e rayog rok. (Matthew 11:27; John 17:3, 26) I welthin Jesus ma be fanay e fanathin ni nga i dag boch ban’en ngorad ni fan ni nge skulnagrad ma ngar nanged ko mang fan e ‘l’agan’ ngak Jehovah’ ma ra ngan fol ku Jehovah ma ba muun ngay e mang. (Hebrews 2:13; 5:7-9) I pag Jesus fan ngorad fare tamilangan’ ko thin riyul’ u murung’agen e tin nib m’agan’ Got ngay me micheg ngorad ni fare kan ni thothup e ra ayuwegrad nge tamilang u wan’rad urngin ban’en. (John 14:24-26) I tay nga lanin’rad nge gum’ercha’rad feni ga’ fan fare Gil’ilungun Got. (Matthew 6:10, 33) Maku i pag Jesus fan ngorad fare maruwel ni ngan wereg e machib min pingeg e girdi’ nu Jerusalem, nge Judea, nge Samaria, nge yan i mada’ ko yungi n’en ni yan i mus e fayleng ngay.—Matthew 24:14; 28:19, 20; Acts 1:8.
N’en ni Yira Pi’ Ngak fare Ulung ni Baga’ nib Tolang Puluwon
18. Uw rogon ni ke lebug e chiney e n’en ni ke micheg Jehovah ngak e pi nam ni urngin ni ngar taw’athnaged yad u daken “owchen” Abraham?
18 Sana, kan mu’ i mel’eg e piin ni yad bang ko fare Israel nib spiritual, ma ir “fachi ulung” ni yad bang ko fare Gil’ilungun. (Luke 12:32) Kakrom mi yib ke mada’ ko chiney, ma aram ke tay Jehovah ni ngan tiyan’uy ko maruwel ni ngan kunuy fare ulung ni baga’ ni ra bad u urngin e nam. Arfan, ni n’en ni ke micheg Jehovah ngak Abraham nu daken “owchen” ma yira taw’athnag e pi nam ni urngin e kari lebug e chiney. Pi cha’ nem ni kan taw’athnagrad e ku yad be pigpig ku Jehovah u fithik’ e falfalan’ ma yad manang ni yad ra thap ngak Got ni be yan u rogon e michan’ rorad ko fare Saf rok Got, i Jesus Kristus. (Revelation 7:9, 10) Kam fol ko pong ni ta’ Jehovah ni fan ko girdi’ ni yad ra mang bang ko re ulung nem nib falfalan’?
19. Mang f’oth rorad ara n’en ni yira pi’ ngak e pi nam ni kan taw’athnagrad e chiney ni yad be sap ngay?
19 Mang fare n’en nib tolang puluwon ni be ognag Jehovah ni ra pi’ ngak e piin ni gathi yad bang ko girdi’en fachi ulung? Danga’, ya gathi fare n’en ni kan pi’ e ba’ u tharmiy. Ereray fare n’en ni susun nge pi’ Adam ngak e piin ni owchen—ni aram fare athap ko yafas ni manemus mab flont u paradis ni ra munmun me garer u fayleng iyan. Ya ereram fare fayleng ni yibe weliy murung’agen ni “dab ku unim’, ma dab ki i kireban’uy, ma dabku un yor, ma dabku un amith.” (Revelation 21:4) Ere be yog e Thin rok Got ngom ni kan thagthagnag ni gaar: “Um par ni Somol e ke pagan’um ngak, mu um rin’ e tin nib fel’; mu um par u daken e nam rom u fithik’ e gapas. Ngar mu t’ufeg Jehovah me fel’ u wun’um, me pi’ ngom e tin ni ir e kari t’uf rom. Dabki n’uw nap’an me yan e piin nib kireb nga bayang . . . Machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba falfalan’.”—Psalm 37:3, 4, 10, 11, 29.
20. Uw rogon ni ke yog ngak “yugu boch e saf” fare f’oth nib spiritual ni fan ko piin Kristiano ni kan dugliyrad?
20 “Yugu boch e saf” rok Jesus e yad ra par u fayleng u tan fare Gil’ilungun e tharmiy. (John 10:16a) Yugu aram rogon ni dab ra pared u tharmiy, ma boor ban’en nib spiritual ni yira pi’ ngak e piin ni kan dugliyrad e ku yira pi’ boch ngorad u fayleng. Ke tamilang u wan’ e piin ni ka nog yugu boch e saf ngorad e tin nib fel’ ni kan micheg ni bay ko Thin rok Got u daken e piin ni kan dugliyrad, ni aram “fare tapigpig nib yul’yul’ mab gonop”. (Matthew 24:45-47; 25:34) Piin ni kan dugliyrad nge yugu boch e saf e yad manang ma yad be pigpig ku Jehovah u taabang ni kari mus ni ir fare Got nib riyul’. (John 17:20, 21) Yad be pining e magar ngak Got u taabang nbochan puluwon e maligach ni pi’ Jesus ni ma upunguy e denen. Yad be pigpig u taabang u lan taareb e ulung u tan pa’ fare Tachugol saf, i Jesus Kristus. (John 10:16b) Yad urngin e yad bang ko reb e ulung u ga’ngin yang u fayleng ni yad walag ma bay e t’ufeg u fithik’rad. Yad urngin e yad be un ko maruwel ni yad e Pi Mich rok Jehovah nge Gil’ilungun. Arrogon, faanra ga be pigpig ku Jehovah ni kam ognagem min taufenagem, ma urngin e pi n’en ney e ba l’ag ko pi n’en nib spiritual ni yira pi’ ngom.
21, 22. Uw rogon ni ngada daged ni gadad gubin nib t’uf rodad fare f’oth rodad nib spiritual?
21 Uw feni ga’ fan e tin spiritual ni yira pi’ ngom? Rib ga’fan e fol ko tin nib m’agan’ Got ngay u wan’um nbochan nib t’uf rom fare n’en ni yira pi’ ngom, fa? Ga be fol ko fonow ni bay ko Thin rok nge ulung rok ni ngan un ko muulung ni gubin ngiyal’ u lan e ulung ko piin Kristiano ya re n’ey e be micheg ni ba t’uf rom e re n’em, fa? (Hebrews 10:24, 25) Riyul’ nib t’uf rom e n’en ni yira pi’ ngom ma aram rogon ni ga ra ulul ko pigpig ku Got nyugu demtrug rogon feni mo’maw’? Bochan nrib t’uf rom e re n’em ma bay gelngim ni ngam togopuluw ko tin nra wawliy lanin’um ni ngam fol ko kanawo’ nib kireb ma dabkiyog ni nge yog ngom e pi taw’ath nem?
22 Yibe athapeg ni nge t’uf rodad e pi n’en nib spiritual ni ke pi’ God ngodad. Nap’an ni ri gad be sap ko Paradis ni bay nga m’on, ma aram e ngada uned ko fare maruwel ni ke pi’ Jehovah ngodad e chiney. Ra ngada maruweliyed ni ngari fel’ thildad Jehovah, ma aram e gad be dag nib tamilang nrib t’uf fare n’en ni ra pi’ Got ngodad. Yibe athapeg ni gad bang ko piin ni karogned nra gaargad: “Got rog ma pilung rog, bay ug weliy rogon feni sorom ngan nang; bay ug pining e magar ngom ndariy n’umngin nap’an.”—Psalm 145:1.
Uw Rogon ni Ngam Weliy?
• Faanra ke par Adam nib yul’yul’ ku Got, ma mang f’oth nrayog ni nge pi’ ngodad?
• Uw rogon u wan’ e piin owchen Abraham fare f’oth ni yira pi’ ngorad?
• Mang e ba l’ag ko fare f’oth ni yira pi’ ngak pi gachalpen Kristus ni kan dugliyrad?
• Mang e fare f’oth ni fan ko ulung ni baga’, ma uw rogon ni ngara daged ni riyul’ nib baga’ fan e re n’ey u wan’rad?
[Pictures on page 30]
Ga be tayfan fare f’oth rom nib spiritual?