Keb Mat’awmed ni Ngam Marod ko Gin Nsuwon

“Ereray e mich riy nga rogon feni mat’aw ni ma gonopiy Got urngin ban’en, ya wenegan nra yib e ra fal’eg rogomed nge yib mat’awmed ni ngam marod ko gin nsuwon.”​—2 THESS. 1:5.

1, 2. Mange n’en nib m’agan’ Got ngay ni bay ni pufthinnag e girdi’ riy, ma mini’ era pufthin?

SAGONAP’AN e duw ni 50 C.E., ma immoy Paul u Athens. Bochan nike magawon laniyan’ ya liyor ko liyos eri yima rin’ u rom, me k’aring ere n’em ni nge machibnagrad nib fel’ rogon. Me museg e welthin rok u rebe thin nsana ke pug laniyan’ e girdi’ nib thil e got rorad ni ngar motoyilgad ngak. Yog ni gaar: “Machane chiney e be yog [Got] ngak e girdi’ u gubin yang ni ngar pied keru’rad ko kireb ni yad be rin’. Ya ke turguy reb e rran ni ir e nge pufthinnag riy e fayleng ni polo’ nrogon nib mat’aw, ni nge rin’ u daken be’ nib moon ni ir e ke dugliy; ni ke dag e mich ko re bugithin ney ngak urngin e girdi’, ni fan e ke faseg e re moon nem ko yam’!”​—Acts 17:30, 31.

² Ri bay fan ni ngan fal’eg i lemnag fare n’en ni ka nog nike dugliy Got rebe rran ni bayi pufthinnag e girdi’! Nap’ane welthin rok Paul u Athens ma de yog ko mini’ era pufthinnag e girdi’ ko re rran nem machane gad manang ni Jesus Kristus ni kan faseg ko yam’. Pufthin ni bayi ta’ Jesus ebe yip’ fan ni boche girdi’ e ngar fosgad ma boch e ngar m’ad.

3. Mang fan ni fal’eg Jehovah ba m’ag u thilrow Abraham, ma mini’ e baye n’en ni nge rin’ nge lebug ere n’em?

³ Re rran ko pufthin nem e 1,000 e duw n’umngin nap’an. U daken fithingan Jehovah e kan tay Jesus riy ni ire ga’ ko re rran nem ya ir fare Pilung ko Gil’ilungun, machane gathi goo ir. I mel’eg Jehovah boche girdi’ ni ngar uned ngak Jesus ko gagiyeg ma ngar manged tapuf oloboch u nap’an taab biyu’ e duw. (Mu taarebnag ko Luke 22:29, 30.) Ke chuchugur ko 4,000 e duw nike yan, me tay Jehovah e def ko re Rran ko Pufthin nem u nap’an ni fal’eg ba m’ag ni fan ngak Abraham ni tapigpig rok nib yul’yul’. (Mu beeg e Genesis 22:17, 18.) Ba tamilang nre m’ag nem eke tabab ko duw ni 1943 B.C.E. Riyul’ ni gathi rim nang Abraham ko mange ra rin’ fare m’ag ngak e girdi’. Machane gadad e ngiyal’ ney e rayog ni ngad guyed nrogon ni bayu lan fare m’ag, ni owchen Abraham e baye n’en ni nge rin’ ni fane nge lebguy e tin nib m’agan’ Got ngay ni nge pufthinnag e girdi’.

4, 5. (a) Mini’ faen nrebi owchen Abraham ni th’abi ga’ fan, ma mange ke yog u murung’agen Gil’ilungun? (b) Mingiyal’ eke mab fare athap ni ngan mang bang ko Gil’ilungun?

⁴ En th’abi ga’ fan ni owchen Abraham e yibi m’ug ni Jesus, ma nap’an e duw ni 29 C.E. min dugliy ko kan ni thothup me mang Messiah, ara Kristus. (Gal. 3:16) Bin migid e dalipe duw nge baley e nge machibnag Jesus fare thin nib fel’ ko Gil’ilungun ngak piyu Jew. Tomren nni kol John ni Tataufe, me dag Jesus ni boche girdi’ e bayra manged bang ko re Gil’ilungun nem u nap’an ni yog ni gaar: “Ka nap’an e pi rran rok John ni Tataufe nge mada’ ko chiney ma fare gil’ilungun Got u tharmiy e ir e be nameg e girdi’, ma piin ni yad be athamgil nib gel e yad ra lag.”​—Matt. 11:12, NW.

⁵ De n’uw nap’an nga tomren nike weliy Jesus murung’agen e piin ni ngar ‘laged’ fare Gil’ilungun u tharmiy, me yog ni gaar: “Dab mpaged talin e re bugithin ney. John ni i taufe e ba ga’ ngak urngin e girdi’ ni kar pired u roy u fayleng. Machane en ni ir e th’abi sobut’ u fithik’ e gagiyeg nu tharmiy e ka ba ga’ ngak.” (Matt. 11:11) Mang fan ni aram rogon? Ya bochan ni fare athap ni ngan mang bang ko Gil’ilungun e dawori mab ni fan ngak e piin nib yul’yul’ nge yani taw ko ngiyal’ nni puog fare kan ni thothup ko Pentekost 33 C.E. Ma ngiyal’ nem, eke yim’ John ni Tataufe.​—Acts 2:1-4.

Piin Owchen Abraham e Kan Mat’awnagrad

6, 7. (a) Uw rogon ma piin owchen Abraham e yad “bod urngin e t’uf u lan e lang”? (b) Mang tow’ath e keb ngak Abraham, maku mang tow’ath era yib ngak e piin owchen?

⁶ Kanog ngak Abraham ni piin owchen era yoor nge “bod urngin e t’uf u lan e lang” ara urngin e yan’ ni bay u dap’e l’ay. (Gen. 13:16; 22:17) Fan ere n’ey, e nap’an Abraham mab mo’maw’ ni nge nang e girdi’ ko in e girdi’ ni yadra mang faen owchen. Machane, munmun min nog ko uw urngin e pi girdi’ ney. Piin nib chag ngak Jesus e yad 144,000 u gubin.​—Rev. 7:4; 14:1.

⁷ I yoge Thin rok Got murung’agen e michan’ rok Abraham ni gaar: “Me pagan’ [Abraham] ko tin ni ke yog Somol, ma aram me matheeg Somol ngak Abram ni be’ ni ke mat’aw.” (Gen. 15:5, 6) Riyul’, ndariye girdi’ nrib mat’aw. (Jas. 3:2) Yugu aram rogon, ma bochane michan’ rok Abraham nrib gel, me tay Jehovah nib mat’aw me yog ni fager rok. (Isa. 41:8) Piin ni yad owchen Abraham nib muun Jesus ngorad e ku kan mat’awnagrad ngak Got, ma boore tow’ath nra yib ngorad ko tow’ath ni keb ngak Abraham.

8. Mange pi tow’ath nike mab ngak e girdi’ ni yad owchen Abraham?

⁸ Piin Kristiano ni kan dugliyrad e kan mat’awnagrad ngak Got ya bochane kar maruweliyed e michan’ rorad ko biyul rok Jesus. (Rom. 3:24, 28) U owchen Jehovah, e kar chuwgad u fithik’ i gelngin e denen ma rayog ni ngan dugliyrad ko kan ni thothup ngar manged pi fak Got, nge pi walagen Jesus Kristus. (John 1:12, 13) Kar manged bang ko fare m’ag nib beech mi yad mang ba nam nib beech, ni “fare Israel rok Got.” (Gal. 6:16; Luke 22:20) Pi n’ey ebe dag nrib fel’ e tow’ath nra yog ngorad! Angin e n’en nike rin’ Got ni fan ngak e Kristiano ni kan dugliyrad e dabra pared u roy u fayleng ni manemus. Kar paged ere athap ney ni fan ko felfelan’ nrib gel ni ngar uned ngak Jesus u nap’an fare Rran ko pufthin mar uned ngak ngar gagiyeggad u tharmiy.​—Mu beeg e Roma 8:17.

9, 10. (a) Mingiyal’ e som’on ni kan dugliy e Kristiano ko kan ni thothup, ma mange bay yib ngorad? (b) Mang ayuw e kan pi’ ngak e Kristiano ni kan dugliyrad?

⁹ Nap’an e Pentekost ko duw ni 33 C.E., ma ba ulung i girdi’ ni yad ba yul’yul’ e mab e kanawo’ ngorad ni ngar uned ko piin nra un ngak Jesus ko gagiyeg u nap’an fare Rran ko Pufthin. Sogonap’an 120 ko pi gachalpen Jesus e ni taufenagrad ko kan ni thothup ere yad e tin som’on e Kristiano ni kan dugliyrad. Machane, binem e kemus ni tabolngin e tow’ath ni yira pi’ ngorad. Ka nap’an ere ngiyal’ i nem, nthingar ra daged e yul’yul’ rorad ngak Jehovah ndemtrug e skeng nra fek Satan iyib ngorad. Thingar ra yul’yul’gad nge mada’ ko yam’ ni fane ngeyog ngorad e yafas u tharmiy.​—Rev. 2:10.

¹⁰ Bochane re n’ey, ma ma pi’ Jehovah e athamgil nga laniyan’ e Kristiano ni kan dugliyrad u daken e Thin rok ngu daken e ulung ko Kristiano. Ni bode, n’en ni yoloy Paul ngak e Kristiano ni kan dugliyrad u Thessalonika ni gaar: “Bod e n’en ni ma rin’ ba matam ngak e bitir rok, gamad ma fonownagmed ni be’ nge be’, ma gamad ma fal’eg lanin’med ma gamad ma machibnagmed, nge mada’ ko tomur ni fan ni nguum ngongolgad nib puluw u wan’ Got ni be piningmed ni ngam uned nga gil’ilungun nge flaab.”​—1 Thess. 2:11, 12, NW.

11. Mange thin nike lemnag Jehovah ni ngan yoloy ni fan ngak girdien “fare Israel rok Got”?

¹¹ U lane pi duw u tomren ni kan mel’eg e tin som’on i gothon fare ulung ko piin Kristiano ni kan dugliyrad, meguy Jehovah nib puluw ni ngan yoloy murung’agen e machib ni tay Jesus u fayleng nge rogon ni ayuweg me fonownag e Kristiano ni kan dugliyrad ko fabin som’on e chibog. Ere ke puthuy Jehovah fare Christian Greek Scriptures ko fare Hebrew Scriptures ni kan yoloy u m’on riy. Fare Hebrew Scriptures e kan yoloy ko som’on ni fan ngak piyu Israel u nap’an ni kab fel’ fare nam u wan’ Got. Fare Christian Greek Scriptures e ni yoloy nib ga’ ni fan ko “fare Israel rok Got,” ni yade piin ni kan dugliyrad ma kar manged walagen Kristus ma kar manged pifak Got. Riyul’ nre n’em e gathi be yip’ fan ni girdi’ ni gathi yu Israel e yad ra fil e Hebrew Scriptures ma dabi yib angin ngorad nib ga’. Maku arrogon e Kristiano ndan dugliyrad ko kan ni thothup nfaanra ngar filed ma ngar folgad ko fonow ni bay ko fare Christian Greek Scriptures ma ra fel’ rogorad riy.​—Mu beeg e 2 Timothy 3:15-17.

12. Mange ke puguran Paul ngak e Kristiano ni kan dugliyrad?

¹² Kristiano ko fabin som’on e chibog e kan mat’awnagrad ngak Got min dugliyrad ko kan ni thothup ngeyog ni ngar pared u tharmiy. Ni dugliyrad ma gathi kar manged pilung rok pi walagrad ni kan dugliyrad ko kan ni thothup ni ka yad bayu fayleng. Ba tamilang, ni boche Kristiano kakrom e kar paged talin ere n’ey mar ngongolgad ni yad bode pilung ngak boch pi walagrad u lane ulung. Re n’ey eke k’aring Paul nge yog ni gaar: “Urngin e tin ni nge yog ngomed e goo ke yog ngomed! Yigoo ke yoor ban’en romed! Ku gum’ ni bochan ni gomanga er rogon ma rriyul’ ni kam manged bogi pilung, nge yog ni gu unew ngomed ko pilung.” (1 Kor. 4:8) Ere puguran Paul ngak e piin ni kan dugliyrad ko ngiyal’ nem ni gaar: “Gathi gamad be guy rogon ni nggogned ngomed e n’en ni ir e thingari mich u wun’med, ya ke mudugil u wun’med e n’en ni ke michan’med ngay. Machane gamad be ayuwegmed ni fan ko felfelan’ romed.”​—2 Kor. 1:24.

Ngan Gamaneg Oren ni Kan Yiiynag

13. Tomren e duw ni 33 C.E., ma uw rogon fare n’en ni yibe mel’eg e piin ni kan dugliyrad?

¹³ Gathi urngin e Kristiano ni yad bang ko fare 144,000 ni kan dugliyrad e ni mel’egrad ko bin som’on e chibog. Ni mel’egrad u nap’an e pi apostal me tomur riy me buchuuw i yan. Machane, i ul’ul i yan ni gubin e chibog ke mada’ ko chiney. (Matt. 28:20) Tomren nike tabab Jesus ko gagiyeg ko duw ni 1914, me mon’og boch ban’en nib papey.

14, 15. Uw rogon fare maruwel ni yibe mel’eg e piin ni kan dugliyrad e ngiyal’ ney?

¹⁴ Som’on, me chuweg Jesus u tharmiy e tin nib togopuluw ko gagiyeg rok Got. (Mu beeg e Revelation 12:10, 12.) Ma aram me tabab ni nge kunuy e tin ni kaba’ ko girdi’ ni yad bang ko Gil’ilungun ni nge gaman fare 144,000. U lukngun e duw ni 1930, make gagiyel nike chuchugur ni nge m’ay i mel’eg, ma boor ko piin ni kar adaged e machib e dar adaged ni nga ranod nga tharmiy. Fare kan ni thothup ede yog ngorad ni yad pfak Got. (Mu taarebnag ko Roma 8:16.) Danga’, ya kar daged ni yad bang ko fare “yugu boch e saf,” ni athap rorad e par u paradis u fayleng. (John 10:16) Arfan, ni tomren e duw ni 1935 me tabab e mokun girdi’ ni yad bang ko ‘fare ulung ni ba ga’,’ ni yad e piin ni guyrad apostal John u nap’an ni pig e changar rok ni yadra magey nib fos u nap’an “fare gafgow ni ba ga’.”​—Rev. 7:9, 10, 14.

¹⁵ Machane, ka nap’an e pi duw ko 1930, make buchuuw e girdi’ ni yibe mel’egrad ni nga ranod nga tharmiy. Mang fan? Ya ku bochan ni yad be yan nga lone piin ni kan mel’egrad ma dar pared ni yad ba yul’yul’. (Mu taarebnag ko Revelation 3:16.) I weliy Paul murung’agen be’ ni manang ni ke pag e tin riyul’. (Fil. 3:17-19) Mini’ era tay Jehovah ni nge yan nga lon? Riyul’ ni ire ra dugliy. Machane, ba puluw ni nge mel’eg e girdi’ ni gathi ka feni mich Got u wan’, machane girdi’​—ni kar daged ni yad ba yul’yul’ nike n’uw nap’an ni bod rogone n’en ni yog Jesus u nap’an ni tababnag fare—​madnom ko Puguran ko yam’ ni tay.a​—Luke 22:28.

16. Rogone piin ni kan dugliyrad, mang ni gad be pining e magar, ma mange n’en ni kari mich u wun’dad?

¹⁶ Machane, be m’ug ni gowa gathi urngin e girdi’ ni kan mel’egrad ni nga ranod nga tharmiy u nap’an e pi duw ni 1930 e ka ranod nga lone piin ni kan chuwegrad. Ba mudugil nike dugliy Jehovah nra par boche piin ni kan dugliyrad rodad nge mada’ nga tomren ere m’ag ney nge mada’ ko ngiyal’ nran gothey fare “Babylon nib Gilbuguwan.”b (Rev. 17:5) Rayog ni nge mudugil u wun’dad nra gaman fare 144,000 u nap’an nra taw ngal’an u wan’ Jehovah ma yadra un ko gagiyeg u Gil’ilungun. Makura mich u wun’dad fare Thin ko yiiy ni fare ulung nib ga’ nibe yoor i yan e yadra par nib yul’yul’. Daki n’uw nap’an mar ‘mageygad nib fas ko fare gafgow nib ga’’ ni fan ko fayleng rok Satan ma ranod u fithik’ e felfelan’ ko birok Got e fayleng nib beech.

Am ku Got u Tharmiy eke Chugur ni Ngemu’ i Ngongliy!

17. Rogon ni yog ko 1 Thessalonika 4:15-17 nge Revelation 6:9-11, mange ke buch rok e piin ni kan dugliyrad ni kar m’ad ni yad ba yul’yul’?

¹⁷ Ka nap’an e duw ni 33 C.E., ma bokum biyu’ e Kristiano ni kan dugliyrad ni kar daged e michan’ nib gel ma kar yul’yul’gad nge mada’ ko yam’. Pi cha’nem e kan mat’awnagrad ni nge yog ngorad fare Gil’ilungun mab​—mudugil ni tabab nde n’uw nap’an nga tomren ni ke gagiyeg Kristus—​min pi’ ngorad ere tow’ath ney.​—Mu beeg e 1 Thessalonika 4:15-17; Revelation 6:9-11.

18. (a) Piin ni kan dugliyrad ni kaba’ e ba pagan’rad ko mang? (b) Uw rogon u wan’ e girdi’ ni yad boch fare yugu boche saf e pi walagrad ni kan dugliyrad?

¹⁸ Piin ni kan dugliyrad ni ka yad bayu fayleng e rib mudugil u wun’rad ni faan yad ra par nib yul’yul’, ma dabki n’uw nap’an ma ranod nga tharmiy. Bokum milyon e piin ni yugu boche saf, e yadra fal’egi lemnag e michan’ rok pi walagrad ni kan dugliyrad, mara fel’ u wun’rad e thin rok apostal Paul, ni murung’agen e piin ni kan dugliyrad u Thessalonika ni gaar: “Ereray e mich riy nga rogon feni mat’aw ni ma gonopiy Got urngin ban’en, ya wenegan nra yib e ra fal’eg rogomed nge yib mat’awmed ni ngam marod ko gin nsuwon, ni ir e gimed be gafgow ni bochan.” (2 Thess. 1:3-5) Nap’an nra yim’ e bin tomur e Kristiano ko piin ni kan dugliyrad, ma kari gaman ni polo’ fare Gil’ilungun Got u tharmiy. Ngiyal’ nem marib gel e felfelan’ nra yib​—u tharmiy ngu fayleng!

[Footnotes]

Rayog ni Ngam Weliy?

• Mange ke yog Got ku Abraham ni bay rogon ko Rran ko Pufthin?

• Mang fan ni kan mat’awnag Abraham ngak Got?

• Piin ni yad bochi owchen Abraham ni kan mat’awnagrad ngak Got e mang tow’ath era yog ngorad?

• Urngin e Kristiano ebe pagan’rad ko mang?

[Picture on page 20]

Ke pi’ Jesus e athamgil nga laniyan’ pi gachalpen ni ngar athamgilgad ngeyog ngorad fare Gil’ilungun

[Picture on page 21]

Nap’ane Pentekost 33 C.E., e tabab Jehovah ni nge mel’eg ba ulung i girdi’ ni ku yadra mang bochi owchen Abraham

[Pictures on page 23]

Fare yugu boche saf e yad ma pining e magar ya Kristiano ni kan dugliyrad e ka yad be chag ngorad ko tin tomren e rran