“Gamad Baadag ni Nggu Uned Ngomed”

1, 2. (a) Mang e ke yog Jehovah nra buch ko ngiyal’ ney ni gad bay riy? (b) Mang boch e deer ni gad ra weliy e fulweg riy u lan e re article ney? (Mu guy e sasing ni bay u tabolngin e re article ney.)

I YIIYNAG Jehovah murung’agen e ngiyal’ ney ni gad bay riy ni gaar: “Ra taw ko re ngiyal’ i n’em ma ragag e pumoon u urngin mit e thin ko pi nam e yad ra kol e mad rok reb e pumoon nib Jew, me lungurad, ‘Gamad baadag ni nggu uned ngomed, ya kug rung’aged ni bay Got romed.’” (Zek. 8:23, NW) Piin ni yad be athapeg e par u fayleng e kar ‘koled e mad rok reb e pumoon nib Jew’ ni bod rogon fa ragag i pumoon ni kan weliy murung’agrad ko re thin nu Bible ney. Yad ba felfelan’ ngay ni yad be maruwel e piin ni kan dugliyrad u taabang ni bochan e yad manang ni be tow’athnag Jehovah e pi girdi’ nem ni kan dugliyrad.

² I yog Jesus nra par e girdi’ rok Got nib taareban’rad ni bod rogon e n’en ni yog Zekariah ni profet. I weliy Jesus murung’agen l’agruw ulung i girdi’. I weliy murung’agen fa “chi ulung” nge “yugu boch e saf,” machane ki yog ni “yad taab ran’ i saf” ma “taabe’ e be gafaliyrad.” (Luke 12:32; John 10:16) Machane, bochan e re n’ey ma rayog ni nge lemnag be’ e pi deer ni baaray ni gaar: (1) Gur, ba t’uf ni nge nang yugu boch e saf fithingan e piin ni kan dugliyrad ni ka yad bay e ngiyal’ ney? (2) Mang e susun ni nge lemnag e piin ni kan dugliyrad u rarogorad? (3) Mang e susun ni ngam rin’ ni faanra ke tabab reb e walag ko ulung rom ni nge kay e flowa me unum e wain u nap’an e Puguran? (4) Ma faanra ka be ulul ni nge yoor e piin ni yad be yog ni kan dugliyrad, ma gur, susun ni nge magafan’um ko re n’ey? Chiney e ngad weliyed e fulweg ko pi deer ney.

GUR, BA T’UF NI NGE NANG YUGU BOCH E SAF FITHINGAN E PIIN NI KAN DUGLIYRAD NI KA YAD BAY E NGIYAL’ NEY?

3. Mang fan ndabiyog ni ngad nanged ko ri mini’ e piin ni yad ba muun ko fare 144,000?

³ Ere gur, ba t’uf ni nge nang yugu boch e saf fithingan e piin ni kan dugliyrad ni ka yad bay e ngiyal’ ney? Danga’. Mang fan? Ya bochan ni faanra kan mel’eg be’ ni nge un ko yan nga tharmiy, ma kemus ni kan mel’eg, gathi aram e kari dugil nra yag e re tow’ath nem ngak. Aram fan ni ma k’aring Satan boch e ‘profet ni yigoo bogi ban’en . . . ni ngar bannaged e piin ni girdien Got ni Got e ke mel’egrad.’ (Matt. 24:24) Dariy be’ ni manang ni kari mudugil nra yan be’ ni kan dugliy nga tharmiy nge yan i taw ko ngiyal’ ni ke dugliy Jehovah ni bay rogon facha’ ni nge yag e re tow’ath nem ngak. Jehovah e ir e ra dugliy e re n’ey maku ir e ra tay e bin tomur e pow ngak u ba ngiyal’ u tomuren ni ke yim’ facha’ ara u ba ngiyal’ u m’on ni nge tabab fare “gafgow ni ba ga’.” (Rev. 2:10; 7:3, 14) Ere, de puluw ni nge dugliy e piin ni ka yad bay u fayleng ko mini’ e piin ni kan mel’egrad u fithik’ e pi tapigpig rok Got ni ngar manged bang ko fare 144,000.^[1]

4. Faanra dabiyog ni ngad nanged fithingan urngin e piin ni yad ba muun ko piin ni kan dugliyrad ni ka yad bay u fayleng e ngiyal’ ney, me ere uw rogon ni nga i ‘un’ yugu boch e saf ngorad ko gin ni yad be yan riy?

⁴ Ere, faanra dabiyog ni ngad nanged fithingan urngin e piin ni yad ba muun ko piin ni kan dugliyrad ni ka yad bay u fayleng e ngiyal’ ney, me ere uw rogon ni nga i ‘un’ yugu boch e saf ngorad ko gin ni yad be yan riy? Mu tay fanam i yan ko n’en ni yiiynag Zekariah u murung’agen fa ragag i pumoon. I yog ni yad ra “kol e mad rok reb e pumoon nib Jew, me lungurad, ‘Gamad baadag ni nggu uned ngomed, ya kug rung’aged ni bay Got romed.’” Yugu aram rogon ni taareb e Jew ni kan weliy murung’agen u roy, machane fa gal bugithin ni “ngomed” nge “romed” ni kan fanay u roy e be yip’ fan boor e girdi’. Faanra aray rogon, ma ere fare Jew ni kan weliy murung’agen e be yip’ fan ba ulung i girdi’, gathi taabe’! Ere, de t’uf ni nge nang yugu boch e saf fithingan urngin e piin ni yad ba muun ko re ulung nem mu ur leked yad. Manang yugu boch e saf e re n’ey, ma aram fan ni yad ma chagil ko re ulung nem ngar pigpiggad ngak Jehovah u taabang. Be yog e Bible ni Jesus e ir e En Tayog e Thin rodad, ere kemus ni yigoo ir e ngaud leked.​—Matt. 23:10.

MANG E SUSUN NI NGE LEMNAG E PIIN NI KAN DUGLIYRAD U RAROGORAD?

5. Mang ginang e ba t’uf ni nge fal’eg i lemnag e piin ni kan dugliyrad, ma mang fan?

⁵ Piin ni yad ma kay e flowa mar unumed e wain u nap’an e Puguran e susun ni ngar fal’eged i lemnag fare ginang ni kan pi’ ni bay ko 1 Korinth 11:27-29. (Mu beeg.) Mang e be tamilangnag apostal Paul? Faanra dabi guy reb e Kristiano ni kan dugliy rogon ni nge par e tha’ u thilrow Jehovah nib fel’, ma nap’an nra kay fare flowa me unum fare wain, ma aram e be darifannag e re yaram ney. (Heb. 6:4-6; 10:26-29) Re n’ey e ra ayuweg e pi Kristiano ni kan dugliyrad ni nge dab ra paged talin ndawor ni pi’ e tow’ath rorad ngorad. Ere, kab t’uf ni ngar athamgilgad ngar ‘milgad nib k’iy kanawo’erad i yan ko n’en ni yad be nameg ni bochan e nge yog puluwon ngorad, ni aram e pong ni ke ta’ Got ngorad u daken Kristus Jesus ni nga ranod ko yafos ni bay u tharmiy.’​—Fil. 3:13-16.

6. Mang e susun ni nge lemnag e piin ni kan dugliyrad u rarogorad?

⁶ Nni thagthagnag nga laniyan’ Paul ni nge yog ngak e pi Kristiano ni kan dugliyrad nib t’uf ni ‘ngi i par ngongolrad ko fare fol ni ke m’ay i tay rok Got ko fa ngiyal’ ni piningrad riy.’ Uw rogon ni ngar rin’ed e re n’ey? I yog Paul ni ngaur ‘pired nib sobut’an’rad, ma yad ba sumunguy, ma ba gum’an’rad ni gubin ngiyal’. Nge bagayad mi i ayuweg bagayad ko meewar rok u fithik’ e runguy. Mar athamgiliyed nguur pired ni yad taab girdi’’ ni gelngin Got nib thothup e ke pi’ ngorad u daken fare gapas ni ir e ke m’agrad nga taabang. (Efe. 4:1-3) Gelngin Jehovah nib thothup e ma ayuweg e pi tapigpig rok ni ngaur pared nib sobut’an’rad, ma dabi tolangan’rad. (Kol. 3:12) Machane, manang e piin ni kan dugliyrad ni gathi kab gel gelngin Got nib thothup ni ma pi’ ngak e piin ni yad be athapeg e yan nga tharmiy ko piin ni yad be athapeg e par u fayleng. Ku darur lemnaged ni ka boor e thin nu Bible nrayog ni nge tamilang u wan’rad nib thil ngak e tin ni ka bay e girdi’; ara ra lemnaged ni ka yad ba tolang ko tin ni ka bay e girdi’. Ku dariy ba ngiyal’ ni yad ra yog ngak be’ ni ke dugliy Got facha’, ere rayog ni nge tabab ni nge kay e flowa me unum e wain u nap’an e Puguran. Ya yad manang ni kemus ni yigoo Jehovah e ir e ma mel’eg e piin ni yad ra un ko yan nga tharmiy.

7, 8. Mang e der ma lemnag e pi Kristiano ni kan dugliyrad ni ngan rin’ ngorad, ma mang fan?

⁷ Yugu aram rogon ni piin ni kan mel’egrad ni ngar uned ko yan nga tharmiy e rib manigil e tow’ath ni ke yag ngorad, machane der ma lemnag e pi Kristiano ney ni susun e nge thil rogon ni nga i ngongol e tin ni ka bay e girdi’ ngorad. (Efe. 1:18, 19; mu beeg e Filippi 2:2, 3.) Gelngin Jehovah nib thothup e ir e ke micheg nga lanin’rad ni kan mel’egrad. Ma dawori weliy Jehovah e re n’ey ko girdi’ ni gubin ni ngar nanged. Ere, darur gingad ngay ni faanra bay boch e girdi’ nder mich u wan’rad nriyul’ ni kan dugliyrad nga gelngin Got nib thothup. Bin riyul’ riy e, yad manang ni be yog e Bible ni faanra bay be’ ni be yog ni ke pi’ Got reb e maruwel ngak ni yugu ba thil ma susun ni yug dab da gurgad nge mich e re n’ey u wan’dad. (Rev. 2:2) Maku reb e, bochan ndarur lemnaged ni nge n’ufrad yugu boch e girdi’ nga lang, ma aram fan nap’an ni yad ra mada’nag be’ ko yay nsom’on, ma daru rogned ngak ni yad bagayad e piin ni kan dugliyrad. Bin riyul’ riy e ba ga’ ndab rogned e re n’ey ngak be’; ara ur weliyed murung’agen e athap rorad u tharmiy ngak boch e girdi’ ni yad ba uf ngay.​—1 Kor. 1:28, 29; mu beeg e 1 Korinth 4:6-8.

⁸ Maku reb e, ku der ma lemnag e pi Kristiano ni kan dugliyrad ni yad boch i girdien reb e ulung nrib ga’ farad. Ku darur gayed yugu boch e walag ni kan dugliyrad ni ngaur chagilgad u taabang ara ra sunmiyed boch e ulung ngorad ni ngaur filed e Bible u taabang. (Gal. 1:15-17) Ya faan yad ra rin’ ni aray rogon, ma rayog ni ngar yurba’naged e girdi’ u lan e ulung mar rin’ed boch ban’en nib togopuluw nga gelngin Got nib thothup. Ma gad manang ni aram e re gelngin ni ma ayuweg e pi tapigpig rok Got ni ngar pared u fithik’ e gapas nge taareban’.​—Mu beeg e Roma 16:17, 18.

MANG E SUSUN NI NGAM RIN’?

9. Mang fan nib t’uf ni ngam kol ayuw u rogon e ngongol rom ngak e piin ni yad ma kay e flowa ma yad ma unum e wain u nap’an e Puguran? (Mu guy fare thin ni kenggin e “Be’ nib T’uf e Girdi’ Rok e ‘De Kireb Daken.’”)

⁹ Mang e susun ni ngam rin’ ni faanra ke tabab be’ ni nga i kay e flowa ma be unum e wain u nap’an e Puguran? I yog Jesus ngak pi gachalpen ni gaar: “Gimed gubin nra bigimed ma walagen bigimed.” Miki ulul ngay ni gaar: “En nra tolangnag ir e yira sobut’nag nge sobut’an’, ma en nra sobut’nag ir e yira tolangnag.” (Matt. 23:8-12) Ere, de fel’ ni ngaud n’ufed boch e girdi’ nga lang, ni kub muun ngay pi walagen Kristus ni kan dugliyrad. Nap’an ni be weliy e Bible murung’agen e piin piilal ni Kristiano, me yog ni ngad folwokgad ko michan’ rok e piin ni yad ma yog e thin rodad, machane dariy bang riy ni ke yog ni ngaud n’ufed be’ nga lang ni nge yan i par ni ir e en tayog e thin rodad. (Heb. 13:7) Riyul’ ni be yog e Bible ni bay boch e girdi’ ni bay rogon ni ngan “tafinaynag ni ba’ rogorad ni nge bagayad min pi’ puluwon ni ke l’agruw yay.” Machane, fan e re n’ey e bochan nib “fel’ e maruwel ni yad be tay” ma rib “gel e machib ni yad [ma] tay nge thin rok Got ni yad [ma] fil ngak e girdi’,” ma gathi bochan e yad boch e piin ni kan dugliyrad. (1 Tim. 5:17) Ere, de fel’ ni ngaud n’ufed e pi walag ney nga lang nib pag rogon ni bochan e rayog ni ngad k’aringed e tamra’ ngorad. Maku reb e, faanra ud ngongolgad ngorad ni aray rogon, ma rayog ni nge mo’maw’ ngorad ni ngar pared nib sobut’an’rad. (Rom. 12:3) Ba mudugil ndariy bagadad ni baadag ni nge k’aring reb i walagen Kristus ni nge rin’ ban’en nib kireb!​—Luke 17:2.

10. Uw rogon ni ngaum tayfan e piin ni ke mel’egrad Jehovah ni ngar uned ko yan nga tharmiy?

¹⁰ Uw rogon ni ngaud ted fan e piin ni ke mel’egrad Jehovah ni ngar uned ko yan nga tharmiy? Ba mudugil ndab ud fithed ngorad ko uw rogon ni kan dugliyrad. Ya re n’ey e dariy rogon ngodad, ma susun e dab ud guyed rogon ni ngad nanged boch ban’en ndariy rogon ngodad. (1 Thess. 4:11; 2 Thess. 3:11) Susun ndab ud lemnaged ni faanra kan dugliy reb e walag ma aram e ku bay be’ u lan e tabinaw rok ni kun dugliy ni bod rogon e gallabthir rok, ara en mabgol rok, ara yugu reb i girdien e tabinaw rok. Ya re n’ey e dariy rogon ko biney e yaram rok Got. (1 Thess. 2:12) Maku reb e, susun ndab dogned ngak e en mabgol rok faen ni kan dugliy ni nge weliy ko uw rogon u wan’ e ngiyal’ ni baaram nra par u Paradis u fayleng ndariy n’umngin nap’an ndaki moy e en mabgol rok. Ba ga’ fan ni nge pagan’dad nib gaman urngin ban’en nra pi’ Jehovah ngak urngin e girdi’ “nge yan i aw ni ke fel’ u wun’rad” ko bin ni ngaud fithed boch e deer ngak e pi walag ney nra kirebnag lanin’rad.​—Ps. 145:16.

11. Faanra dab ud ‘pied boch e girdi’ nga lang ko thin,’ ma uw rogon ni ka gad be ayuweged gadad?

¹¹ Faanra ud ngongolgad ngak e pi Kristiano ni kan dugliyrad u kanawoen nthingar da rin’ed, ma aram e ku gad be ayuweged gadad u reb e kanawo’. Ni uw rogon? Be yog e Bible nrayog ni nge yib boch e girdi’ nga lan e ulung “ni yad be dake yad pi walagdad.” (Gal. 2:4, 5; 1 John 2:19) Rayog ni ngki ban e pi girdi’ ney nga u rogned ni yad boch e piin ni kan dugliyrad. Maku reb e, bay boch e Kristiano ni kan dugliyrad nrayog ni nge dab kur pared ni yad ba yul’yul’. (Matt. 25:10-12; 2 Pet. 2:20, 21) Ere, faanra dab ud ‘pied boch e girdi’ nga lang ko thin’ ma aram e ra ayuwegdad ni nge dab da paged be’ ni nge warnag e michan’ rodad. Maku reb e, faanra mul bagayad e pi walag ney ni kan dugliyrad ko tin riyul’ ni bochan e daki par nib yul’yul’, ma dabi magawon e michan’ rodad.​—Jude 16.

GUR, BA T’UF NI NGE MAGAFAN’DAD NGA URNGIN E PI GIRDI’ NEY?

12, 13. Mang fan nde t’uf ni nge magafan’dad nga urngin e piin ni yad ma kay e flowa mar unumed e wain u nap’an e Puguran?

¹² Nap’an fapi duw ni ka fini yan, ma kad guyed ni ke yoor e piin ni yad be kay e flowa mar unumed e wain u nap’an e Puguran ko yam’ ni tay Kristus. Ma re n’ey e ke thil ya kafram e gubin e duw ma be lich urngin e pi girdi’ ney. Ere gur, bay rogon ni nge magafan’dad ko re n’ey? Danga’. Baaray boch i fan.

¹³ “I Somol e manang e piin ni yad girdien.” (2 Tim. 2:19) Piin ni yad ma thieg urngin e girdi’ ni kar bad ko Puguran e susun ndab ur dugliyed u wan’rad ko mini’ e piin nriyul’ ni kan dugliyrad ni ngar uned ko yan nga tharmiy. Ya bay boch e girdi’ ni yad ma kay e flowa mar unumed e wain u nap’an e Puguran ni yad be lemnag ni kan dugliyrad, machane bin riyul’ riy e danga’. Ku bay boch e girdi’ ni ur rin’ed e re n’ey kafram, me boch nga tomuren mar talgad. Ku bay boch e girdi’ ni be sikirkireb lolugen ara bay e magawon rorad u rogon ni yad ma lem, ma aram mar lemnaged ni yad boch e piin ni kan dugliyrad ni ngar uned ngak Kristus ko gagiyeg u tharmiy. Ere, aram fan ndabiyog ni ngad nanged urngin e piin ni kan dugliyrad ni ka yad bay u fayleng e ngiyal’ ney.

14. Mang e be yog e Bible u murung’agen urngin e piin ni kan dugliyrad ni yad ra moy u fayleng u nap’an nra tabab fare gafgow nib ga’?

¹⁴ Boor e nam u fayleng nra moy e piin ni kan dugliyrad riy u nap’an nra yib Jesus i kunuyrad ni nga ranod nga tharmiy. Be yog e Bible murung’agen e n’en nra rin’ Jesus ko re ngiyal’ i n’em ni gaar: “Fare rappa ni ba ga’ lungun e bay non, ma aram e bayi l’og e engel rok ko fa aningeg yangi n’en u fayleng ni ma thow e nifeng riy, ma aram mi yad kunuy e girdi’ rok ni ke mel’egrad u baraba’ e fayleng nge yan i mada’ nga baraba’.” (Matt. 24:31) Be yog e Bible ni kemus nri in e pi girdi’ nem ni kan dugliyrad e yad ra magey u fayleng u nap’an e tin tomuren e rran. (Rev. 12:17) Machane, der yog e Bible ko uw urngin ko pi girdi’ ney e ra moy u nap’an nra tabab fare gafgow nib ga’.

15, 16. Mang e ba t’uf ni nge tamilang u wan’dad u rarogon fare 144,000 e girdi’ ni ke mel’egrad Jehovah?

¹⁵ Jehovah e ir e ra dugliy e ngiyal’ ni nge mel’eg e piin ni ngar uned ko yan nga tharmiy. (Rom. 8:28-30) I tabab Jehovah i mel’eg e piin ni nga ranod nga tharmiy u tomuren nni faseg Jesus ko yam’, ma be m’ug riy nib dake urngin e piin ni ur moyed u lan e ulung ni Kristiano ko bin som’on e chibog e goo yad ba muun ko re ulung ney. Nap’an e bin som’on e chibog nge yan i mada’ nga tabolngin e ngiyal’ ni ke tabab e tin tomuren e rran, ma yooren e piin ni u rogned ni yad boch i gachalpen Kristus e goo yad boch e Kristiano ni googsur ara piin ni taareb rogonnagrad Jesus ko “pan.” Yugu aram rogon ma ka i mel’eg Jehovah boch e girdi’ u fithik’ e piin ni ur pared ni yad ba yul’yul’ ngak ko re ngiyal’ i n’em, ma pi girdi’ nem e yog Jesus ni yad bod e “wheat.” (Matt. 13:24-30) Nap’an e tin tomuren e rran ma ka be ulul Jehovah i mel’eg e piin ni yad ba muun ko fare 144,000 e girdi’ ni kan dugliyrad.^[2] Mus ni faanra dugliy Jehovah ni nge son nge taw ko ngiyal’ ni kari chugur ko tomur mfini mel’eg boch e piin ni ngar uned ko re ulung ney, ma dariy rogon ni nge maruwar u wan’dad ko rib puluw e n’en ni ke rin’ fa danga’. (Isa. 45:9; Dan. 4:35; mu beeg e Roma 9:11, 16.)^[3] Thingar da kol ayuwgad ndab da boded fapi girdien e maruwel ni bay murung’agrad u Bible ni faan ra gun’gun’gad ni bochan e n’en ni ke rin’ e masta rorad ni fan ngak e tin baaram i girdien e maruwel nra bad ko maruwel ni yad ba tomur.​—Mu beeg e Matthew 20:8-15.

¹⁶ Gathi urngin e piin ni yad ra un ko yan nga tharmiy ni yad bang ko “fare tapigpig nib yul’yul’ ma ba gonop.” (Matt. 24:45-47) Ngiyal’ ney e be pi’ Jehovah nge Jesus e tin nib t’uf ko pi tapigpig rok Got u daken in e girdi’ ni bod rogon ni ur rin’ew u nap’an e bin som’on e chibog. Ngiyal’ nem e kemus nri in e pi Kristiano ni kan dugliyrad e ni fanayrad ni ngar yoloyed e Pi Babyor ko Bible nni Yoloy Nsom’on ni Thin ni Greek. Ere, ku arrogon e ngiyal’ ney ni kemus nri in u fithik’ e pi Kristiano ni kan dugliyrad e kan tayrad ni ngar pied e tin nib t’uf ko tin ni ka bay e tapigpig ko ngiyal’ “ni yima pi’ riy.”

17. Mang e kam fil ko re article ney?

¹⁷ Ere, mang e kad filed ko n’en ni kad weliyed? Kad filed ni ke dugliy Jehovah ni nge pi’ e yafas ndariy n’umngin nap’an u fayleng ngak yooren e pi tapigpig rok, me pi’ e yafas ndariy n’umngin nap’an u tharmiy ngak e piin ni ke mel’egrad ni ngar uned ngak Jesus ko gagiyeg. Yugu aram rogon, ma baadag ni nge par e gal ulung i girdi’ ney ni yad ba yul’yul’ ngak. Maku yad gubin nthingar ra pared nib sobut’an’rad, mab taareban’rad, ma ngaur guyed rogon ni nga i par e ulung rodad nib gapas. Ere, chiney nri gad be chugur i yan nga tungun e re m’ag ney e ngad athamgilgad ni gad gubin ni ngad pigpiggad ngak Got nib taareban’dad ni taabe’ e be gafaliydad, ni aram Kristus.