Ba Gel e Felfelan’ ni Gad Ma Tay ko Maruwel ni Gad Ma Rin’ Got u Taabang

1. Mang fan ni ma fek Jehovah boch e girdi’ ni ngar maruwelgad u taabang ni yugu aram rogon ni ir e En Th’abi Tolang?

JEHOVAH e ir e En Th’abi Tolang, ma ir e Ke Sunmiy urngin ban’en, ma ir e En th’abi gonop mab gel gelngin. Ma aram reb e ban’en ni tamilang u wan’ Job. Tomuren ni fith Jehovah boch e deer ngak Job u murung’agen e pi n’en ni Ke sunmiy, me fulweg Job ni gaar: “Gu manang ni gubin ma rayog rom; ni gubin e tin ni ga ra finey ma rayog rom ni ngam rin’.” (Job 42:2) Yugu aram rogon nrayog ni nge rin’ Jehovah urngin ban’en ni ke lemnag ni nge rin’ nde t’uf ni nge ayuweg be’, machane kab kakrom i yib ni i pi’ mat’awun boch e girdi’ ni ngar maruwelgad u taabang ya nge yag ni lebug e n’en nib m’agan’ ngay.

2. Mang maruwel e fek Jehovah Jesus ni ngar rin’ew?

² Fak Got ni kari maagirag rok e aram e en th’abi som’on ni sunmiy Got u fithik’ urngin ban’en. I pag Jehovah Fak ni nge un ngak ngar sunmiyew urngin ban’en ni tabab ko pi engel u tharmiy nge yib i mada’ ko pi n’en ni bay u fayleng. (John 1:1-3, 18) I weliy apostal Paul murung’agen Jesus ni gaar: “Pa’ Kristus e sunumeg Got urngin ban’en ngay ni bay u tharmiy ngu but’, ntin ni yibe guy nge tin ndanir guy, nib muun e pi kan ni be gagiyeg ngay, ni tin ni pilung nge tin ni yad be yog e thin, nge tin ni yad be tay murung’agen ban’en. Pa’ Kristus e sunumeg Got ngay e gin’en ni ba’ urngin ban’en u lan e lang riy nib muun e fayleng ngay, ni fan ngak Kristus.” (Kol. 1:15-17) Ere, i dag Jehovah ni be tayfan Fak ni aram e fek nge un ngak ngar sunmiyew urngin ban’en miki weliy ko girdi’ murung’agen e pi n’en ni ke rin’ Fak.

3. Mang e pi’ Jehovah mat’awun Adam ni nge rin’, ma mang fan?

³ Ki pi’ Jehovah mat’awun e girdi’ ni ngar maruwelgad u taabang. Bod ni, pag Adam ni nge tunguy fithingan e pi gamanman ni sunmiy. (Gen. 2:19, 20) Dariy e maruwar riy nrib gel e felfelan’ ni i tay Adam u nap’an ni i par nga i fal’eg i yaliy e pi gamanman nem, ma be fil boch ban’en u rarogorad, miki lemnag e re ngachal nib fel’ ni nge tunguy ngak bagayad nge bagayad! Rayog rok Jehovah ni nge tunguy fithingan e pi gamanman nem ya ir e ke sunmiyrad. Machane, bochan nrib t’uf Adam rok ma aram me pag ni nge mang ir e tunguy fithingrad. Ki pi’ Got mat’awun Adam ni nge ga’nag fare milay’ nu Eden nge yan i taw nga ga’ngin yang e fayleng. (Gen. 1:27, 28) Machane, rib gel e kireban’ riy ya tomur riy me dugliy Adam ndab kur maruwelgow Got u taabang, ma wenegan ni yib riy e fek e gafgow i yib ngorad pi fak.​—Gen. 3:17-19, 23.

4. Uw rogon ni fek Got boch e girdi’ ni ngar maruwelgad u taabang ni ngar lebguyed e n’en nib m’agan’ ngay?

⁴ Boch nga tomuren, miki pi’ Got mat’awun boch e girdi’ ni ngar maruwelgad u taabang ya nge yag ni lebug e n’en nib m’agan’ ngay. I toy Noah ba arke ni ir e ayuwegrad chon e tabinaw rok ni nge dab ra m’ad u nap’an fare Ran ni Tharey e fayleng. Me ayuweg Moses fare nam nu Israel ni ngar chuwgad u Egypt. Me pow’iy Joshua fare nam nu Israel nga lan fare Nam ni Kan Micheg. Me toy Solomon fare tempel u Jerusalem. Me mang Maria e chitiningin Jesus. I fek Jehovah e pi girdi’ ney ni yad ba yul’yul’ nge ku boch e girdi’ ni ngar maruwelgad u taabang ni ngar lebguyed e n’en nib m’agan’ ngay.

5. Mang reb e maruwel nrayog ni ngad uned ngay? Ba t’uf ni nge fekdad Jehovah ni ngad uned i rin’ e re maruwel ney, fa? (Mu guy e sasing ni bay u tabolngin e re article ney.)

⁵ Ngiyal’ ney e ki pi’ Jehovah mat’awdad ni ngad maruwelgad u taabang ni ngad ayuweged Gil’ilungun fare Messiah. Ma boor e kanawo’ nrayog ni ngad pigpiggad riy ngak Got. Sana gathi gubin e pi maruwel ney nrayog ni nge rin’ urngin e Kristiano, machane gad gubin nrayog ni ngad uned ko fare maruwel ni ngan machibnag fare thin nib fel’ ni murung’agen Gil’ilungun Got. Riyul’ nde t’uf ni ngad uned i rin’ e re maruwel ney, ya rayog ni nge par Got u tharmiy me non ko girdi’ u fayleng. Ki yog Jesus nrayog rok Jehovah ni nge k’aring e pi malang ni nge non ni nge weliy murung’agen Gil’ilungun fare Messiah. (Luke 19:37-40) Yugu aram rogon, ma ke pagdad Jehovah ni ngad uned ngak ngad ‘maruwelgad’ u taabang. (1 Kor. 3:9) I yoloy apostal Paul ni gaar: “Gamad be maruwel Got u taabang ni gamad be wenig ngomed ni be lungumad: ke yog ngomed e tow’ath ni pi’ Got, ere thingar dab mpaged nge maadab.” (2 Kor. 6:1) Maruwel ni gad be tay Got u taabang e aram reb e tow’ath nrib manigil, ma rib gel e felfelan’ ni ma yibnag ngodad. Chiney e ngad weliyed boch i fan ni ma k’aring e re n’ey e felfelan’ ngodad.

BA GEL E FELFELAN’ NI GAD MA TAY KO MARUWEL NI GAD MA TAY GOT U TAABANG

6. Uw rogon ni weliy e bin nganni’ i Fak Got rogon laniyan’ u nap’an ni ur maruwelgow e Chitamangin u taabang?

⁶ Kab kakrom i yib nib gel e felfelan’ ni ma tay e pi tapigpig rok Jehovah ko maruwel ni yad ma tay Got u taabang. U m’on ni nge yib e bin nganni’ i Fak Got nga fayleng, me yog ni gaar: “Gag e som’on ni sunumiyeg Somol . . . Ug moy u tooben ni bod be’ nib salap i muruwliy ban’en, i par ni gubin e rran ni be felfelan’ ngog, ma gubin ngiyal’ ni gu be par rok ni gub felfelan’.” (Prov. 8:22, 30) Ba gel e felfelan’ ni i tay Jesus u nap’an ni ur maruwelgow e Chitamangin u taabang. Ya gathi kemus ni i felfelan’ ko pi n’en ni i yag ni nge rin’, ya ku manang ni be felfelan’ Jehovah ngak. Ma uw rogodad?

7. Mang fan nib gel e felfelan’ ni gad ma tay ko fare maruwel ni machib ni gad ma un ngay?

⁷ I yog Jesus ni gad ma felfelan’ u nap’an ni gad ra pi’ ban’en ngak be’ ngu nap’an ni ke pi’ be’ ban’en ngodad. (Acts 20:35) Ba gel e felfelan’ nda ted u nap’an nda filed e tin riyul’, ma kub gel e felfelan’ ni gad ma tay u nap’an ni gad ra weliy e tin riyul’ ko girdi’. Nap’an ni gad ra weliy e tin riyul’ nu Bible ko girdi’, ma gad ma guy rogon gelngin e felfelan’ ni ma tay e piin ni yad baadag ni ngar nanged e tin riyul’ ni bochan e ke yag ni ngar nanged me ga’ fan Got u wan’rad nge tin riyul’ ni bay ko Thin rok. Kub gel e felfelan’ ni gad ma tay u nap’an ni gad ra guy e pi girdi’ ney ni kar thilyeged boch ban’en ko lem nge ngongol rorad. Gad manang ni fare maruwel ni ngan wereg fare thin nib fel’ ko girdi’ e aram e re maruwel nth’abi ga’ fan ni bay ni ngan rin’, ya ra bing e kanawo’ ngak e piin ni yad ra mang fager rok Got ni nge yag e yafas ndariy n’umngin nap’an ngorad. (2 Kor. 5:20) Dakuriy yugu reb e maruwel nga bang ni gad ra un ngay nra yibnag e felfelan’ ngodad ni aray rogon, ya kemus ni yigoo re maruwel ney ni gad be rin’ ni aram e gad be ayuweg e girdi’ ni ngar rin’ed e tin nib m’agan’ Got ngay me yag e yafas ndariy n’umngin nap’an ngorad.

8. Mang e ke yog boch e walag u murung’agen gelngin e felfelan’ ni yad ma tay ko maruwel ni yad ma tay Jehovah u taabang?

⁸ Yugu aram rogon ni gad ma felfelan’ u nap’an nra motoyil e girdi’ ko machib ni gad ma tay, machane ri kub gel e felfelan’ ni gad ma tay ni bochan e gad manang ni gad be rin’ e tin nib m’agan’ Jehovah ngay mab ga’ fan u wan’ e pigpig ni gad be tay ngak. (Mu beeg e 1 Korinth 15:58.) Marco ni ma par u Italy e yog ni gaar: “Rib gel e felfelan’ ni gu be tay ni bochan e gu manang ni gu be pi’ e tin th’abi fel’ rog ni fan ngak Jehovah, ma gathi ngak be’ nra munmun me pagtalin.” Franco ni ku ma pigpig ngak Got u Italy e ki yog ni gaar: “Ma fanay Jehovah e Thin rok nge ku boch ban’en ni nge puguran ngodad ni gubin e rran ni gad ba t’uf rok mab ga’ fan u wan’ urngin ban’en ni gad ma rin’ ni fan ngak ni yugu aram rogon nrayog ni ngad lemnaged nde ga’ fan. Aram fan ni gub felfelan’ ngay ni gamow ma maruwel Got u taabang maku ma yibnag fan e yafas rog.”

MARUWEL NI GAD MA TAY GOT U TAABANG E MA CHUGURNAGDAD NGAK NGE BOCH E GIRDI’

9. Uw rogon e tha’ u thilin Jehovah nge Jesus, ma mang fan?

⁹ Faanra ud maruwelgad e piin ni yad ba t’uf rodad u taabang, ma rayog ni ngad chugurgad ngorad ma gad nang rarogorad nge pi fel’ngirad. Gathi kemus ni gad ra nang e n’en ni yad baadag ni ngar rin’ed, ya ku gad ra nang rogon ni yad be lemnag ni ngar rin’ed e pi n’em. Bokum bilyon e duw ni i maruwel Jehovah nge Jesus u taabang, ma bochan e re n’ey ma aram fan nrib gel e t’ufeg u thilrow ma dariy ban’en nrayog ni nge kirebnag e tha’ u thilrow. I weliy Jesus rogon feni chugur e tha’ u thilrow Got ni gaar: “Chitamag nge gag e gamow ba taareb.” (John 10:30) Riyul’ nib taareb lanin’row, ma kub fel’ rogon e maruwel ni yow ma tay u taabang.

10. Mang fan ni ma k’aringdad fare maruwel ni machib ni ngad chugurgad ngak Got nge boch e girdi’?

¹⁰ Immoy bayay ni meybil Jesus me yog ngak Jehovah ni nge yoror rok pi gachalpen. Mang fan? I yog Jesus u lan e meybil rok ni gaar: “[Ya] nge yog nra pired ni kar taarebgad ni bod rogon gur nge gag ni gadow ba taareb.” (John 17:11) Nap’an ni gad ra fol ko pi motochiyel rok Got ma gad un ko fare maruwel ni machib, ma aram e rayog ni ngad nanged rarogon pi fel’ngin nib fel’ rogon. Ku rayog ni ngad nanged fan nib fel’ ni nge pagan’dad ngak ma gad fol u rogon ni be pow’iydad. Ma nap’an ni gad ra chugur ngak Got, ma aram e ku ra chugur ngodad. (Mu beeg e James 4:8.) Re n’ey e ku ma ayuwegdad ni ngad chugurgad ngak pi walagdad ni bochan e taareb rogon e re miti magawon ni gad ma yan u fithik’, nge pi n’en ni ma k’aring e felfelan’ ngodad, maku taab n’en e gad be nameg. Arrogon, gad ma maruwel u taabang, ma gad ma felfelan’ u taabang, ma gad ma athamgiliy e pi magawon rodad u taabang. Octavia ni ma par u Britain e yog ni gaar: “Maruwel ni gamow ma tay Jehovah u taabang e ma chugurnag e tha’ u thilmow nge tha’ u thilmad boch e girdi’.” Ki yog nriyul’ e re n’ey ni bochan ni piin nib fel’ e tha’ u thilrad e ‘taab n’en e yad be nameg ma taab n’en e be pow’iyrad.’ Dariy e maruwar riy ni ka gad baadag ni ngaud lemgad ni aray rogon. Ere, nap’an ni gad ra guy pi walagdad ni yad be athamgil ni ngar rin’ed e tin nib m’agan’ Jehovah ngay, ma ma chugur e tha’ u thildad.

11. Mang fan nra gel e chugur ko tha’ u thildad Jehovah nge pi walagdad u lan e bin nib beech e fayleng?

¹¹ Ba gel e t’ufeg u thildad Got nge pi walagdad e chiney, machane nap’an ni gad ra yan nga lan e bin nib beech e fayleng ma rra gel boch e t’ufeg u thildad. Am lemnag rogon e maruwel ni gad ra rin’ boch nga m’on! Gad ra mada’ bayay e piin ni yira fasegrad ko yam’ ma gad fil murung’agen Jehovah ngorad. Ku ra t’uf ni ngad fal’eged e re fayleng ney nge mang paradis. Dariy e maruwar riy nrib gel e felfelan’ ni gad ra tay u nap’an ni gad ra maruwel pi walagdad u taabang ma gad be flont i yan ni buchuuw ma buchuuw u tan Gil’ilungun fare Messiah! Gubin e girdi’ e ngiyal’ nem nra chugur e tha’ u thilrad mu kur pared ni yad ba chugur ngak Got ni ir e en nra pi’ urngin e tin nib t’uf ko girdi’ nge yan i aw ni ke “fel’ u wun’rad ni yad gubin e tin ni ke yog ngorad.”​—Ps. 145:16.

GAD RA MARUWEL GOT U TAABANG MA RA AYUWEGDAD U BOCH BAN’EN

12. Uw rogon nrayog ni nge ayuwegdad fare maruwel ni machib ko pi n’en nrayog ni nge magawonnag e michan’ rodad?

¹² Ba t’uf ni ngad ayuweged e tha’ u thildad Got. Ma bochan ni gad be par u ba fayleng ni ke suwey Satan ni Moonyan’ nge ku bochan ndawor da flontgad, mab mom ni nge af e lem nge ngongol ko re fayleng ney ngodad. Rayog ni ngan taarebrogonnag e lem ko re fayleng ney ko gireng u maday ni be girngiydad nga bang ni dubdad ni nga darod ngay. Ere, faanra dubdad ni ngad uned ko re gireng nem ma thingar da nonggad ngad paloggad riy. Ku arrogon nib t’uf ni ngad athamgilgad ni ngad pared ni gad ba mudugil ya nge dabi gagiyegnagdad e lem ko re fayleng rok Satan ney. Ere, nap’an ni gad ra machib, ma aram e gad be lemnag boch ban’en nib ga’ fan ma ra yib angin ko girdi’, ma gathi pi n’en nra warnag e michan’ rodad. (Fil. 4:8) Machib ni gad ma tay e ma gelnag e michan’ rodad ni bochan e ma puguran ngodad murung’agen e pi n’en ni ke micheg Got ngodad nge pi motochiyel rok ni bay e t’ufeg riy. Ku ma ayuwegdad ni nge yag nda togopuluwgad ngak Satan.​—Mu beeg e Efesus 6:14-17.

13. Uw rogon fare maruwel ni machib u wan’ reb e Pi Mich Rok Jehovah ni ma par u Australia?

¹³ Faan gad ra fanay e tayim rodad ni fan ko fare maruwel ni machib nge ku boch ban’en ni gad ma rin’ ni fan ko tirok Got ban’en, ma aram e dabi yib e tayim rodad ni ngaud pared ni gad be lemnag e pi magawon rodad. Ma re n’ey e ra ayuwegdad. I yog be’ ni ka nog Joel ngak ni ma par u Australia ni gaar: “Fare maruwel ni machib e ma ayuwegeg ni nge riyul’ u wan’ug e pi n’en ni be buch e ngiyal’ ney. Ma puguran ngog murung’agen e pi magawon ni be mada’nag e girdi’ e ngiyal’ ney nge rogon ni ke ayuwegeg e pi kenggin e motochiyel u Bible. Fare maruwel ni machib e ma ayuwegeg ni ngaug par nib sobut’an’ug; maku ma ayuwegeg ni ngaug taga’ ngak Jehovah nge pi walageg.”

14. Mang fan ni be m’ug ni bay gelngin Got nib thothup ni be ayuwegdad ni ngad athamgilgad ni ngad ululgad ko fare maruwel ni machib?

¹⁴ Ku ma ayuwegdad fare maruwel ni machib ni nge pagan’dad nra ayuwegdad gelngin Got nib thothup. Baaray rogon nrayog ni ngan susunnag e re n’ey: Susun e kan pi’ reb e maruwel ngom ni ngam wereg bogi flowa ko girdi’ ko binaw rom nib fel’ nga fithik’ i dowey. Ma re maruwel nem ni ngam rin’ e dab ni pi’ puluwom riy maku dab ni sulweg ngom e salpiy ni kam fanay ni fan ko pi n’en nib t’uf rom u nap’an ni ga be rin’ e re maruwel nem. Maku reb e, munmun mag nang ni yooren e girdi’ ko binaw rom e dubrad fare flowa maku bay boch i yad ni kar dabuyed dakenam ni bochan e re n’em ni ga be rin’. Ere, uw n’umngin nap’an ni ga ra ulul i rin’ e re maruwel ney? Ba mudugil nra munmun ma ra mulan’um mag tal ndab kum rin’ e re maruwel nem. Machane, yooren i gadad e ke yoor e duw ni be athamgil ni nge ulul i rin’ fare maruwel ni machib, maku gad be fanay e tayim nge salpiy rodad ni fan ko re maruwel ney ni yugu aram rogon ni boor e girdi’ ni ma moningnagdad ma yad be damumuw ngodad. Ere, re n’ey e be dag ni bay gelngin Got nib thothup ni be ayuwegdad.

MARUWEL NI GAD MA TAY GOT U TAABANG E MA M’UG RIY NIB T’UF GOT NGE GIRDI’ RODAD

15. Uw rogon nib peth fare maruwel ni machib ko n’en nib m’agan’ Got ngay ni fan ko girdi’?

¹⁵ Am lemnag rogon nib peth fare maruwel ni machib ko n’en nib m’agan’ Jehovah ngay ni fan ko girdi’. Ba m’agan’ ngay aram ko tabolngin ni nge par e girdi’ u fayleng ndab ra m’ad. Ere, yugu aram rogon ni denen Adam, ma de thilyeg Jehovah e n’en ni Ke lemnag ni nge rin’. (Isa. 55:11) Ya rin’ boch ban’en ya nge yag ni chuw e girdi’ u tan gelngin e denen nge yam’. Ere, aram fan ni yib Jesus nga fayleng me pi’ e yafas rok ni maligach ni fan ko piin ni yad ba yul’yul’. Machane, faanra nge yib angin e re maligach nem ko pi girdi’ ney ma thingar ra nanged e n’en nib m’agan’ Got ngay. Ere, ku aram fan ni i fil Jesus ko girdi’ e n’en nib m’agan’ Got ngay, miki tay chilen ngak pi gachalpen ni ngkur rin’ed ni aram rogon. Nap’an ni gad ra ayuweg e girdi’ ni ngar manged fager rok Got ma aram e gad be maruwel Got u taabang ni gad be ayuweg e girdi’ ni ngar chuwgad u tan gelngin e denen nge yam’.

16. Mang rogon fare maruwel ni machib ni gad ma tay ko fa gal nth’abi ga’ e motochiyel rok Got ni bay?

¹⁶ Gad ra ayuweg e girdi’ ni ngar leked fare pa’ i kanawo’ ni be sor i yan ko yafas ndariy n’umngin nap’an ma aram e be m’ug riy nib t’uf Jehovah nge girdi’ rodad, ya gad manang ni baadag Got ni nge thap urngin e girdi’ ngak mar “nanged e tin nib riyul’.” (1 Tim. 2:4) Nap’an ni fith be’ ngak Jesus ko bin ngan e motochiyel e ir e th’abi ga’ u fithik’ fapi motochiyel nni pi’ ko fare nam nu Israel, me fulweg Jesus ni gaar: “‘Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.’ Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, ‘Gin’en ni ga ba’ riy e thingari t’uf rom e en ni ir e mmigid ngom ni gowe gur.’” (Matt. 22:37-39) Nap’an ni gad ra un ko fare maruwel ni machib, ma aram e be m’ug riy ni gad be fol ko gal motochiyel ney.​—Mu beeg e Acts 10:42.

17. Uw rogon u wan’um fare tow’ath ni kan pi’ ngodad ni aram e ngad machibnaged fare thin nib fel’?

¹⁷ Ri gad ba tow’ath, ya ke pi’ Jehovah reb e maruwel ni ngad rin’ed nib gel e felfelan’ riy, maku ma ayuwegdad ni ngad chugurgad ngak miki chugur e tha’ u thildad boch e girdi’, maku ma ayuwegdad ko tirok Got ban’en. Ku ma ayuwegdad e re maruwel ney ni ngad daged nib t’uf Got nge girdi’ rodad. Ba thilthil rarogon e pi tapigpig rok Got u ga’ngin yang e fayleng. Machane demtrug ko ka gad bbitir fa kad ilalgad, ara ba fel’ rogodad ara gad ba gafgow, ara ka gad ba gel ara ke meewar fithik’ i dowdad, ma gad be athamgil u rogon nrayog rodad ni ngad weliyed ko girdi’ murung’agen e pi n’en ni ke michan’dad ngay. Dabisiy nib puluw u wan’um e n’en ni yog be’ ni ka nog Chantel ngak ni ma par u France ni gaar: “En th’abi gel gelngin ni bay u palpalth’ib, ni ir e Ke Sunmiy urngin ban’en, ma ir fare Got nib felfelan’ e be gaar ngog: ‘Mman! Mu weliy e pi n’ey! Mman mu weliy ni paag, mag weliy nrogon ni ke yib u gum’irchaem. Gu ra pi’ gelngig ngom, nge Thin rog u Bible, mu kug pi’ e pi engel u tharmiy nge pi walagem u fayleng ni ngar ayuweged gur, mu kug skulnagem, mu kug weliy ngom rogon ni ngam rin’ e re maruwel nir ko ngiyal’ nib puluw ni nggu rin’ riy.’ Ri gad ba tow’ath ni ngad rin’ed e n’en ni be yog Jehovah ni ngad rin’ed ma gad maruwel e Got rodad u taabang!”