Girdien e Baan Riyul’ e Teliw e Yad Ma Ta’ Fan e Bible
I TAY Jesus fan e Thin Rok Got ni aram e Bible. Rib gagiyel e re n’ey ko n’en ni yog ngak Moonyan’ u nap’an ni be gay rogon ni nge waliy Jesus nge denen. (Matthew 4:4-11) Ga be lemnag, ma mang e rin’ Jesus u nap’an ni yog Satan ngak ni nge non ko malang nge ngal’ ni flowa? I togopuluw ngak Satan me sul u daken fapi thin ni faan nthagthagnag ngak Moses ni bay ko Deuteronomy 8:3. Ma nap’an ni ki yog Moonyan’ ngak Jesus nra ragbug nga but’ nge tayfan ma ra pi’ e pi nam nu fayleng ngak ni nge gagiyegnag, ma mang e rin’ Jesus? I siyeg e n’en ni kan ognag ngak u daken reb i kenggin e motochiyel nu Bible ni bay ko Deuteronomy 6:13.
Am lemnag, yugu aram rogon ni Jesus e fak Got, ma thin ni i machibnag e gubin nib puluw ko Bible. Dariy ba ngiyal’ ni pag e Thin Rok Got nge fol ko yalen ko girdi’. (John 7:16-18) Machane, boor e tayugang’ ko teliw e ngiyal’ nem ni dariy fan e Thin Rok Got u wan’rad. Mang fan? Bochan e kab ga’ fan e yalen ko girdi’ u wan’rad ko Thin nu Bible. Aram fan nde magawon Jesus ni nge gaar ngorad: “Kam n’iged fan e thin rok Got kam folgad ko tin ni gimed e msunumiyed gimed be machibnag. Gimed e piin ni gimed ma dake modingniged gimed! Rib sorok Isaiah ni profet ni faani weliy murung’agmed ni gaar: I Got e gaar, ‘Pi girdi’ ney e yad be ta’ fag ko thin ni yad be yog, machane rib mal’af lanin’rad rog. Mm’ay fan e siro’ nge pigpig ni yad be tay ngog, ya pi motochiyel ni girdi’ e sunumiy e yad be machibnag ngak e girdi’ ni gowa pi motochiyel rok Got!’”—Matthew 15:6-9.
Boor raba’ e teliw u fayleng ni yad ma yog ni yad be tayfan e Bible. Machane, in raba’ e teliw e kam guy nder ma fol e girdi’ riy ko pi yalen ko girdi’ nib togopuluw ko n’en ni be yog e Bible? Am lemnag l’agruw ban’en.
MURUNG’AGEN E: Pi Liw ni Ma Fanay e Pi Yurba’ i Teliw.
N’EN NI BE FIL E BIBLE: I yog Jesus nib kireb e pi tayugang’ ko teliw kakrom ni bochan e yad baadag ni nge tolang e liw rorad ma nguun siro’ ngorad ma yibe ta’ farad. I yog Jesus ni pi girdi’ nem e “yad baadag e yungi n’en nth’abi fel’ ni yima par riy ko pi madnom ni yima tay nge chiya ni kan tay u lan tafen e muulung i yan nib mudugil e girdi’ ntagil’; yad baadag ni ngan siro’ ngorad min ta’ farad ko yungi n’en ni bay e market riy me pining e girdi’ e ‘Tamachib’ ngorad.” Aram fan ni yog ngak pi gachalpen ni gaar: “Thingari dab ni pining e ‘Tamachib’ ngomed, ya gimed gubin nra bigimed ma walagen bigimed, ma taareb e Tamachib romed ni ba’. Ma thingari dab mpininged be’ u roy u but’ ni ‘Chitamangiy’, ya ri taareb e Chitamangimed ni bay u tharmiy.”—Matthew 23:1-10.
DEER: Baadag e pi tayugang’ ko ba’ ney e teliw ni nguun pining boch e ngachal ngorad ni be dag nib tolang e liw rorad, mu un ta’ farad u lan binaw i yan, fa yad ma fol ko n’en ni tay Jesus chilen u murung’agen e re n’ey?
MURUNG’AGEN E: Liyos ni Ma Fanay Boch e Girdi’ ko Liyor Rorad.
N’EN NI BE FIL E BIBLE: “Dab mu ngongliy ba liyos ara yaan ban’en ni bay u tharmiy, ara bay u fayleng, ara bay u fithik’ e ran u tan e but’ ngam ta’ fan ara mmeybil ngay. Dab mu siro’ ko liyos ni ma meybil boch e girdi’ ngay ara mu ta’ fan fa mmeybil ngay.”—Exodus 20:4, 5.
I yol apostal Paul ngak e pi Kristiano kakrom ni gaar: “Mpired u urel ko ta’fan nge meybil ni yibe tay ngak e liyos.”—1 Korinth 10:14.
DEER: Ma fol e ba’ ney e teliw ko fare motochiyel nu Bible ni be yog ndab ni fanay e liyos ko pigpig ngak Got, fa?
Rayog ni Ngam Pirieg e Baan Riyul’ e Teliw
Yugu aram rogon ni ke yoor raba’ e teliw e ngiyal’ ney, ma rayog ni ngam pirieg e baan riyul’ nra pow’iyem i yan ko yafas ni manemus. Boor e pow ko bin “riyul’ e liyor” ngak Got. (James 1:27) Fapi thin nu Bible ni kan weliy ko pi thin ney e rayog ni nge ayuwegem ngam nang ko baan ngan e teliw e ba riyul’.
Mang ndab mog ko Pi Mich Rok Jehovah ngar pied e fulweg rorad ko fapi deer ni bay ko pi thin ney. Ma nap’an ni ka rogned e fulweg rorad, mag fol ko n’en ni rin’ e girdi’ nu Beroea kakrom ni faan “ur gayed u lan e babyor nib thothup ni ngar guyed ko riyul’ e tin ni ke yog Paul fa.” (Acts 17:11) Faan ga ra bod e pi girdi’ nem ni ngam ta’ fan e Bible mu um fil nib fel’ rogon, ma ga ra pirieg e baan riyul’ e teliw ni ir e ra pow’iyem i yan ko yafas ni manemus. Machane, gur e ga ra dugliy ko ngam rin’ e re n’ey fa danga’.
[Blurb on page 9]
Baan ngan e teliw e yima pi’ e athamgil nga laniyan’ e girdi’ riy ni ngar filed e Bible nib fel’ rogon nge yog nra guyed ko rriyul’ e n’en ni yad be fil fa danga’?