Girdien e Baan Riyul’ e Teliw e Yad Ma T’ufeged Yad nge Boch e Girdi’
BE GAAR e Bible: “En nde t’uf Got rok nge girdi’ e be’ nde nang Got ni bochan e Got e ba t’uf e girdi’ rok.” (1 John 4:8) Ere, girdien e baan riyul’ e teliw e thingar ra t’ufeged yad nge boch e girdi’.
Boor raba’ e teliw ni yad ma ayuweg e piin nib m’ar, nge piin pilibthir nge piin gafgow. Yad ma pi’ e athamgil nga laniyan’ e girdi’ ni ngar folgad ko fonow ni pi’ apostal John ni gaar: “Faanra boor ban’en rok be’ ma be guy be’ ni walagen ni girdien Kristus ni ke gafgow nthingari yog ban’en ngak, me fek owchen rok, ma ra diin me gaar e ba t’uf Got rok? Pi fakag! Rogon nib t’uf Got nge girdi’ rodad e dabi par ni ke mus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad ni ma m’ug ko ngongol.”—1 John 3:17, 18.
Machane, mang e yad ma rin’ u nap’an e mahl? Gur, fare motochiyel rok Got ni nge “t’uf rom e en ni ir e mmigid ngom ni gowe gur” e ngan fol riy u nap’an ndanir mahl, min fek owchey riy u nap’an ni be cham reb e nam ngak reb e nam?—Matthew 22:39.
I gaar Jesus: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Nap’an ni ga be fulweg e pi deer ni baaray, mag fithem, ‘Ma t’ufeg girdien e ba’ ney e teliw e girdi’ ni gubin ngiyal’ ko thin nge ngongol rorad?’
MURUNG’AGEN E: Mahl.
N’EN NI BE FIL E BIBLE: I tay Jesus chilen ngak pi gachalpen ni gaar: “Nge t’uf romed e pi toogor romed, mu ngongliyed e tin nib fel’ ngak e piin ndaburad dakenmed.”—Luke 6:27.
Nap’an ni yib e salthaw ni ngar koled Jesus, me giringiy apostal Peter bangi sayden ni ke lemnag ni nge ayuweg Jesus. Machane, me gaar Jesus ngak: “Mu sulweg e sayden rom nga tafen ya urngin e piin ni yad ra giringiy e sayden e yira li’rad ko sayden ngar m’ad.”—Matthew 26:52.
I yoloy apostal John ni gaar: “Baaray e re n’en nib gagiyel nib thil u thilin e piin ni pi fak Got nge piin ni pi fak moonyan’: en nde rin’ e tin nib mat’aw ara de t’uf rok e en ni walagen ni girdien Kristus e gathi ir be’ ni fak Got. Ya thin rok Got ni kam rung’aged ko tabolngin e baaray rogon: thingari bagadad me t’uf rok bagadad. Thingar dab da boded Kain ni i par nib mil fan ngak Faanem nib Kireb, me li’ walagen ni pumoon nge yim’.”—1 John 3:10-12.
DEER: Yima pi’ e athamgil nga laniyan’ e girdi’ ko ba’ ney e teliw ni ngar uned ko mahl, fa?
MURUNG’AGEN E: Ngongol ko Am.
N’EN NI BE FIL E BIBLE: Nap’an ni guy boch e girdi’ e pi maang’ang ni ke ngongliy Jesus, mar adaged ni nge mang pilung rorad. Ere, mang e rin’? Ke “nang Jesus ni yad be n’en ni ngar bad ngak ngar feked ngar tiyed ni ir e nge mang pilung rorad, ndemtrug ko ba adag Jesus fa dabun; ma aram me pagrad nge yan nga daken e burey ni go ir.”—John 6:15.
Nap’an nni kol Jesus min togopuluw ngak ni yibe yog ni be n’igin ni ngi i togopuluw e girdi’ ko am, machane me gaar: “Gin nsuwog e dariy u roy u fayleng; faan mang e gin nsuwog e bay u roy u fayleng ma ra cham e tirog e girdi’ ni nge dabiyog nni koleg ngan pieg ngak piyu Israel. Gin nsuwog e dariy u roy u fayleng!”—John 18:36.
Nap’an ni yibilay Jesus pi gachalpen ngak Got me gaar: “Ku gog ngorad e thin rom ni mpi’ ngog ma ke fanenikayrad e girdi’ nu fayleng, ya gathi yad girdien e fayleng, ni bod gag ni gathi gag e girdi’ nu fayleng.”—John 17:14.
DEER: Ma folwok girdien e ba’ ney e teliw rok Jesus, ma darur uned nga ngongolen e am ni yugu aram rogon ni yira fanenikayrad ni bochan, fa?
MURUNG’AGEN E: Laniyan’.
N’EN NI BE FIL E BIBLE: Tomren ni mang boch e girdi’ ni gathi yad e Jew e Kristiano ma dawor ni maad’adnagrad, me gaar Peter: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”—Acts 10:34, 35.
Nap’an ni yol James ngak e pi Kristiano kakrom me gaar: “Pi walageg ni girdien Kristus, ngongol ni nguum tiyed nrogon e ngongol rok e piin ni ke michan’rad ngak e Somol rodad i Jesus Kristus ni Somol ko flaab e thingari dabi thil e ngongol romed ngak e girdi’ nib thilthil rogon, ni bochan yaarad nge rogon e mad ni ka ron’ed. Susun e er rogon me yib be’ nib moon nga lan e muulung romed, ni be’ ni boor ban’en rok ma ba’ e luwew nib gol u bugul i pa’ ma be yin’ e mad nib fel’, mi ki yib be’ nib moon nga lan e muulung romed, ni be’ nib—gafgow nib mogchoth e mad rok. Ma faan gimed ra ta’ fan fare moon ni ke yin’ e mad nib fel’ nge lungumed ngak, ‘Mpar ko bin baaray e chiya nib manigil,’ me lungumed ngak fare moon nib gafgow, ‘Mu sak’iy ara mpar ira’ nga but’ nga daken e faraf nga tooben e chiya rog,’ ma aram e ba kireb e romed ndamur taareb rogonniged e girdi’ ni gubin u wan’med, ma gimed be turguy ban’en u fithik’ e lem nib kireb.”—James 2:1-4.
DEER: Yima fil ko ba’ ney e teliw ni gubin e girdi’ ntaareb rogorad u wan’ Got, ma dab i yib lanin’uy ngak be’ ni bochan e nam ni yib riy ara bochan e ba gafgow ara ba fel’ rogon, fa?
[Blurb on page 7]
Baan ngan e teliw e yima fil ko girdi’ riy ndab ra uned nga ngongolen e am, nge laniyan’ ni aram e n’en ni be yurba’nag e girdi’?