Girdien e Baan Riyul’ e Teliw e Yad Ma Fol ko Pi Kenggin e Motochiyel nu Bible u Murung’agen e Tin nib Fel’ nge Tin nib Kireb

BAAN riyul’ e teliw e ma fil e tin nib fel’ ko girdi’ maku ma ayuweg e girdi’ nge yog ni fel’ e ngongol rorad mu ur athamgilgad nguur rin’ed e tin nib mat’aw ban’en. Uw rogon ni kad nanged ni aram boch ban’en ni ma rin’ e baan riyul’ e teliw?

Mu tay fanam i yan ko thin ni yoloy apostal Paul nge yan ngak e pi Kristiano nu Korinth ni bay u Greece. Re nam nem e yigoo yi manangrad ni bochan e ngongol rorad nib kireb. I yog Paul ni gaar: “Girdi’ ni ma ngongliy e ngongol ko darngal, ara yad ma ta’ fan ma yad ma meybil ko liyos ni ma meybil boch e girdi’ ngay, ara yad ma par e piin ni gathi mabgol rorad, ara yad e pumoon ni ma darngalnag e pumoon, ara piin ni yad ma iring ban’en u fithik’ e yargel, ara yad ba chogow, ara yad ma balyang ko rrum, ara yad ma t’ar e thin nga daken boch e girdi’, ara yad ma th’ab e motochiyel​—dariy bagayad e mit i girdi’ ney nrayog ngorad e gin nsuwon Got. Ba’ boch i gimed ni immoy ni aram rogon. Machane ke n’ag Got fan e denen romed ke beechnagmed; ma ka ni pi’med ngak Got; ma ka ni mat’awnagmed ngak Got u daken fithingan Somol Jesus Kristus.” (1 Korinth 6:9-11) Ere, immoy boch e girdi’ kakrom nib kireb e ngongol rorad ni kar manged tapigpig rok Got ni bochan e kar uned ko baan riyul’ e teliw.

Be ginangey e Bible ni gaar: “Ba’ ba ngiyal’ ni bayi taw ngay me dabuy e girdi’ ni ngar motoyilgad ko bin nib riyul’ e machib, mi yad fol ko tin ni yad ba adag, ma bay u ranod nguur gayed i yan e piin ni nge machibnagrad ni yad e bay ra machibniged ngorad e tin ni ir e yad be yim’ ni bochan ni ngar rung’aged.”​—2 Timothy 4:3.

Uw rogon e pi yurba’ i teliw ni ga manang? Yad ma fol ko pi kenggin e motochiyel nu Bible u murung’agen e tin nib fel’ nge tin nib kireb? Fa yad ma darifannag e fonow nu Bible, mu u rogned ngak e girdi’ e tin ni ir e “yad be yim’ ni bochan ni ngar rung’aged”?

Mang ndab mu guy rogon ngam fulweg e pi deer ni baaray nga but’ ya nge yog nim nang ko bay barba’ e teliw ni bay e pi wom’engin fa ke gek’iy nib fel’ rorad fa.

MURUNG’AGEN E: Mabgol.

N’EN NI BE FIL E BIBLE: “Mabgol e urngin e girdi’ ni nge ta’ fan, ma pumoon nge ppin ni kar uned ko mabgol e thingari bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.”​—Hebrews 13:4.

DEER: Ra nge mang be’ reb i girdien e ba’ ney e teliw ma thingari fal’eg rogon babyoren e mabgol rok, fa?

MURUNG’AGEN E: Mabgol ni Be Dar.

N’EN NI BE FIL E BIBLE: Nap’an nni fith ngak Jesus ko ba puluw ni nge dar e mabgol fa danga’, me yog ni gaar: “En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.”​—Matthew 19:9.

DEER: Ma tay e ba’ ney e teliw fan e fonow rok Jesus, ma yad ma tay ni kemus ni ngiyal’ nrayog ni dar ba wu’ e mabgol ngki leay bagayow be’ e nap’an ni ke par bagayow fagal mabgol nge be’ ni gathi mabgol rok, fa?

MURUNG’AGEN E: Par ko Pumoon nge Ppin.

N’EN NI BE FIL E BIBLE: “Dab mu ngongliyed e ngongol ko darngal. Tin ni ka bay e denen nra ngongliy be’ e dariy ban’en nra rin’ nga downgin; machane cha’ nra ngongliy e ngongol ko darngal e ke denen nib togopuluw ko birok e dowef.”​—1 Korinth 6:18.

“Mus ngak e piin ni ppin ni kar chelgad ngorad yad be par ni gathi aram yalen. Ma ku er rogon e pumoon ni kar paged e bin ni mmat’aw e yalen ni ma par e ppin nge pumoon ke chel e pumoon be darngalnag e pumoon. Ere pumoon e be chel boch i yad ngak boch i yad, yad be ngongliy e tin ni yira tamra’ ngay, nge yib e gechig riy nga fithik’ i dowrad ni wenegan e kireb ni yad be ngongliy.”​—Roma 1:26, 27.

DEER: Ma machibnag e ba’ ney e teliw nib kireb e ngongol ndarngal nge par ko pumoon nge pumoon ara ppin nge ppin, fa?

MURUNG’AGEN E: Pi Kenggin e Motochiyel nu Bible ni Ngan Fol Riy.

N’EN NI BE FIL E BIBLE: “Dab um chaggad ngak be’ ni be yog ni ir reb i walagey ni girdien Kristus machane be ngongliy e ngongol ko darngal, ara ba chogow, ara ma ta’ fan ma ma meybil ngak e liyos ni ma meybil boch e girdi’ ngay, ara ma t’ar e thin nga daken e girdi’, ara be’ nib tamuun rrum, ara ma th’ab e motochiyel. Mus ni ngam par nga but’ ngam un ngak e mit i girdi’ nem ko abich ma dab mu rin’.” (1 Korinth 5:11) Mang e ngan rin’ ngak be’ ni be yog ni ir reb e Kristiano machane dar kalngan’ ko denen ni be rin’? Be gaar e Bible: “Mu chuweged e en nib kireb ngongolen u lan e ulung romed.”​—1 Korinth 5:13.

DEER: Ma tharbog e ba’ ney e teliw be’ ni ke denen nib togopuluw ko motochiyel rok Got u Bible ma de kalngan’, fa?

[Blurb on page 6]

Baan ngan e teliw e ri yad ma fol ko pi motochiyel nu Bible u murung’agen e ngongol nthingar un rin’?