Nguum Pigpiggad Ni Ra Bigimed Ma Be Ayuweg Bigimed

“Baygu gagiyegnag ni nge thil e thin ko girdi’ nge mang reb e thin nib machalbog, ni fan ni ngara pininged fithingan Jehovah ni yad gubin, ma aram e rayog ni ngar pigpiggad ngak ni ra bagayad ma be ayuweg bagayad.”​—ZEPHANIAH 3:9, NW.

1. Mang e be buch ni be lebuguy e thin ni bay ko Zephaniah 3:9?

SAGONAPAN 6,000 e thin ni ma yog e girdi’ e chiney u fayleng ni ga’ngin. Ma, ka bay boor e thin nib thilthil, ara thin ni kemus ni girdien reb e binaw nib achichig e ma yog. Yugu demtrug e girdi’ ni ma yog e thin nib thilthil ni bod rogon e thin ni Arabic nge Zulu, machane, bay ban’en ni ke rin’ Got nrib thil. I gagiyegnag ni nge yog rok e girdi’ u gubin yang ni ngar filed nguur rogned taareb e thin ni karimus ni fare thin nib machalbog. Ireray e n’en ni be buch ni fan ni nge lebug e thin ni kan micheg u daken Zephaniah ni gaar: “Baygu [Jehovah Got] gagiyegnag ni nge thil e thin ko girdi’ nge mang reb e thin nib machalbog, ni fan ni ngara pininged fithingan Jehovah ni yad gubin, ma aram e rayog ni ngar pigpiggad ngak ni ra bagayad ma be ayuweg bagayad.”​—Zephaniah 3:9, NW.

2. Mang fare “thin nib machalbog,” mang e ke ayuweg ni nge yog i rin’?

² Fare “thin nib machalbog” e aram fare thin rok Got nriyul’ nrayog ni ngan pirieg ko Thin rok, ni fare Bible. Baga’ ni ireray e thin nriyul’ ni murung’agen Gil’ilungun Got, ni ra thothupnag fithingan Jehovah, ma ra gagiyelnag e gagiyeg rok nth’abi tolang, ma ra flaabnag e girdi’. (Matthew 6:9, 10) Bochan ni kemus ni ireray e thin nib spiritual mab biech u fayleng, ma arfan ni girdi’ ko urngin e nam nge raen dow e girdi’ e yad ra un i yog e re thin ney nib machalbog. Ireray e n’en ni ra ayuwegrad ni ngar pigpiggad ngak Jehovah ni “ra bagayad ma be ayuweg bagayad,” ma aram e yad ra pigpig ngak ni ke taareban’rad, ara “ke m’agan’rad ngay.”​—The New English Bible.

Dariy Tagil’ e Girdi’ Riy ni Ba Laniyan’

3. Mang e be ayuwegdad ni ngad pigpiggad ku Jehovah ni kad taarebgad?

³ Gadad e piin Kristiano, e gad be pining e magar ni ra bagadad ma be ayuweg bagadad ni yugu aram rogon nib thilthil e thin rodad. Yugu aram rogon ni gad ma machibnag e thin nib fel’ ni murung’agen Gil’ilungun ni gad ma fanay boor mit e thin, ma gad be pigpig ku Got ni ke taareban’dad. (Psalm 133:1) Rayog ni nge buch ban’en ni aram rogon ya bochan, demtrug e binaw ni gad ma par riy u fayleng, ma gad ma yog taareb e thin nib machalbog ni fan ni ngad pininged e sorok ngak Jehovah.

4. Mang fan ni thingari dariy e lem ni ba laniyan’ u fithik’ e girdi’ rok Got?

⁴ Thingari dariy e lem ni ba laniyan’ u fithik’ e girdi’ rok Got. Peter ni apostal e i tamilangnag e re n’em u nap’an ni be machib u tabinaw rok Kornelius ni en ga’ ko salthaw ni gathi be’ nu Israel ko duw ni 36 C.E. min k’aring ni nge yog ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) Bochan nriyul’ e re n’em, ere ulung ni Kristiano e dariy tagil’ e lem ni ba laniyan’ riy, ara yibe yooraba’ fa yibe adag daken boch e girdi’ ngak boch.

5. Mang fan nib kireb ni ngan ayuweg ni nge sum e nochi ulung u lan e ulung?

⁵ Rogon ni weliy reb e ppin ni ma skul u college murung’agen ba ngiyal’ ni yan ni nge guy e Kingdom Hall e yog ni gaar: “Baga’ ni, yuraba’ i teliw e yad ma pining e girdi’ nib ga’ ni tin taareb raen dowrad ara ulung ko girdi’ ni taareb rogon e yalen rorad ni ke kakrom. . . . ma Pi Mich Rok Jehovah e yad be par nga taabang ma danir yoorraba’ ngan nochi ulung.” Machane, boch e girdi’ u lan e ulung nu Korinth kakrom e ka ra rin’ed ban’en ni ur yoor raba’gad. Bochan ni ka ra rin’ed ban’en ni nge kirebnag thilrad, ma aram kar togopuluwgad ko maruwel ko fare kan ni thothup rok Got, ni be ayuweg ni nge taareban’nag e girdi’ me aw e gapas u thilrad. (Galatia 5:22) Faanra gad be maruweliy ni ngad yoor raba’naged e ulung, ma aram e dada folgad ko fare kan ni thothup ni ir e be pow’iydad. Aram fan ni, ngad lemnaged e thin rok Paul ni apostal ngak piyu Korinth ni gaar: “Gu be wenig ngomed, pi walageg, ni Jesus Kristus ni ir Somol rodad e ke pi’ mat’awug ni be lungug: nge tareban’med ni gimed gubin ko tin ni gimed be weliy, ma aram e dabiyog ni ngam yoor raba’gad; mi gimed par ni gimed ba taareb ma taab pa’ lanin’med ma taa ban’en e gimed be nameg.” (1 Korinth 1:10) Maku kari weliy Paul murung’agen e taab girdi’ ko fare babyor ni yoloy ngak piyu Efesus.​—Efesus 4:1-6, 16.

6, 7. Mang fonow ni pi’ James u murung’agen e ngongol nib thil ngak e girdi’ nib thilthil rogon, ma uw rogon ni ngan fol ko thin ni yog?

⁶ Yima motochiyelnag ngak e piin Kristiano ni nguura taareb rogonniged e girdi’ u wan’rad. (Roma 2:11) Bochan ni boch e girdi’ u lan e ulung ko fa bin som’mon e chibog e kar daged ni ri yad ma ayuweg e girdi’ nib fel’ rogon, mi yoloy James ni gachalpen ni gaar: “Pi walageg ni girdien Kristus, ngongol ni nguum tiyed nrogon e ngongol rok e piin ni ke michan’rad ngak e Somol rodad i Jesus Kristus ni Somol ko flaab e thingari dabi thil e ngongol romed ngak e girdi’ nib thilthil rogon, ni bochan yaarad nge rogon e mad ni ka ron’ed. Susun e er rogon me yib be’ nib moon nga lan e muulung romed, ni be’ ni boor ban’en rok ma ba’ e luwew nib gol u buguli pa’ ma be yin’ e mad nib fel’, mi ki yib be’ nib moon nga lan e muulung romed, ni be’ nib gafgow nib mogchoth e mad rok. Ma faan gimed ra ta’ fan fare moon ni ke yin’ e mad nib fel’ nge lungumed ngak, “Mpar ko bin baaray e chiya nib manigil,” me lungumed ngak fare moon nib gafgow, “Mu sak’iy ara mpar ira’ nga but’ nga daken e fraf nga tooben e chiya rog,” ma aram e ba kireb e romed ndamur taareb rogonniged e girdi’ ni gubin u wun’med, ma gimed be turguy ban’en u fithik’ e lem nib kireb?”​—James 2:1-4.

⁷ Faanra girdi’ nde michan’rad ni be fanay e luwew nib gol ma be yin’ e mad nib fel’ e keb ni nge un ko muulung ko Kristiano ma ku en de michan’ nib gafgow mab alit e mad rok e keb ko muulung, ma yira pi’ e ayuw ngak e en nib fel’ rogon ni kab fel’ boch ko en nib gafgow. Kan pi’ e chiya’ ngorad “ko gin nib fel’,” machane ka nog ngak e en nib gafgow ni nge sak’iy ara nge par nga but’ u tooben ay be’. Machane ke pi’ Got e biyul rok ni Jesus ni fan ko piin nib fel’ rogorad nge piin nib gafgow. (Job 34:19; 2 Korinth 5:14) Ere faanra gad baadag ni ngad falfalan’niged Jehovah ma ngad pigpiggad ngak ni ra bagadad ma be ayuweg bagadad, thingar dabda daged ni de taareb rogon e girdi’ u wan’dad ara ‘nga u dogned nib fel’ wokan boch e girdi’ ni fan ni nge fel’ rogodad riy.’​—Jude 4, 16.

Dab Umu Gun’gun’

8. Mang e ke buch rok piyu Israel ya ur gun’gun’gad?

⁸ Gad ra par ni ke taareban’dad ma gad ra fel’ u wan’ Got, e re thingarda folgad ko fonow ni pi’ Paul ni gaar: “Um rin’ed urngin ban’en ndab um gun’gun’gad.” (Filippi 2:14, 15) Piyu Israel nib war e michan’ rorad ni kan ayuwegrad ndabkura manged sib rok piyu Egypt e kar gun’gun’naged Moses nge Aaron ma ku arrogon Jehovah Got. Bochan e re n’ey, ma urngin e pumoon ni ke 20 e duw rorad nga lang, nde un Joshua ngay nge Caleb nge piyu Levite ni yad ba yul’yul’, e de yog rorad ni nga ranod nga lan fare Binaw ni kan Micheg machane kar m’ad u nap’an e milekag ni tay piyu Israel u daken e ted ni ke gaman 40 e duw n’umngin nap’an. (Numbers 14:2, 3, 26-30; 1 Korinth 10:10) Bochan e kar gun’gun’gad ma rib tolang puluwon ni kar pied!

9. Mang e ke buch rok Miriam ya bochan e i gun’gun’?

⁹ Biney e be dag ko mang e ra buch rok girdien e nam ni urngin ni ma gun’gun’. Ma uw rogon e girdi’ ni be’ nge be’ ni ma gun’gun’? Walagen Moses ni Miriam fithingan, nge walagen ni pumoon ni Aaron, e kar gun’gun’gow ni lungrow: “Gur ke mus nu l’ugun Moses e ke non Somol riy? Gathi ku er rogodow ni ke yib i non u l’ugundow?” Be ulul fare chep ni gaar: “Me rung’ag Somol e n’en ni ka rognew.” (Numbers 12:1, 2) Ma angin nib riy? I Miriam, e ir e ba tamilang ni ir e ke k’aring ni ngar gun’gun’gow, i rin’ Got ban’en ni nge sobut’nag laniyan’. Uw rogon? I gagiyegnag ni ngeb e m’ar ngak ni daraw ma thingari par u wuru’ fare camp u lan medlip e rran nge mada’ ko ngiyal’ ni kan biechnag biyay.​—Numbers 12:9-15.

10, 11. Ra dabni taleg be’ ni be gun’gun’ ma mang e ra buch rok? Mu susunnag rogon.

¹⁰ Ngan gun’gun’ e gathi ke mus ni yibe yog murung’agen boch ban’en ni kan rin’ nib oloboch. Girdi’ ni ma gun’gun’ ni gubin ngiyal’ e ri yad be lemnag e n’en ni yad be thamiy ara liw rorad, ma be k’aring e girdi’ ni ngar sapgad ngorad ko bin ni ngar sapgad ngak Got. Faanra dabni taleg, ma ra m’ug e magawon u fithik’ e pi walag ma ra warnagan’rad ma dabkuura pigpiggad ni ra bagayad ma be ayuweg bagayad. Riyul’ ni aram rogon ya bochan e piin ni ma gun’gun’ e ma nonnon ni gubin ngiyal’ ndariy e maruwar riy ni be athapeg ni ra fol boch e girdi’ ngorad.

¹¹ Ni bod ni, sana bay be’ nra gathibthibnag rogon ni ma pi’ reb e piilal e welthin u lan e ulung ara rogon ni ma rin’ e maruwel rok. Faan gad ra motoyil ko cha’ nem ni be gun’gun’, ma rayog ni ngad tababgad ko lem ni bod ir. U m’on ni dawori mit e lem ni aram rogon nga lanin’dad, e sana tin ma rin’ e re piilal nem e der magawonnagdad, machane chiney e be magawonnagdad. Boch nga ram, ma urngin ban’en ni ma rin’ fare piilal e de mat’aw rogon ni gad ma sap ngay, ma rayog ni ku gadad ra tabab i gun’gun’nag. Re ngongol ney e dabi m’ag nga reb e ulung ko girdi’ rok Jehovah.

12. Ra nguuda gun’gun’gad ma mang e ra buch ko tha’ u thildad Got?

¹² Ran gun’gun’nag fapi pumoon ni maruwel rorad e ma gafaliy e ulung rok Got ma rayog ni nge aw ni yibe gathibthib. Re gun’gun’ ney ara ngan t’ar e thin nga daken be’ e ra kirebnag thildad Jehovah. (Exodus 22:28) Piin ni tagathibthib ni dabra kalgadngan’rad e dabiyog ngorad Gil’ilungun Got. (1 Korinth 5:11; 6:10) I Jude ni reb i gachalpen e i yoloy murung’agen e piin ma gun’gun’ ni ma “dariyfannag somol ma yad be gathibthibnag e piin ba flaab,” ara fapi pumoon ni ke mil fan ngorad ni ngar ayuweged e ulung. (Jude 8) Ke dabuy Got e pi cha’ nem ni ma gun’gun’, ma ngad gonopgad ni dabda uned ko ngongol rorad nib kireb.

13. Mang fan ni gathi urngin mit e gun’gun’ e ba kireb?

¹³ Machane, gathi urngin e gun’gun’ e dabun Got. De fek owchen ko “fapi thin nib kireb ni ka nog” u murung’agen yu Sodom nge Gomorrah machane ke gothey e gali mach nem nib kireb. (Genesis 18:20, 21; 19:24, 25) U Jerusalem, de n’uw nap’an u tomren Pentekost 33 C.E., “me gun’gun’nag piyu Israel ni piin ni yad ma non ni thin ni Greek ni fan ngak piyu Israel ni ma non ni thin ni Hebrew, ya bochan piin ni ppin rorad ni kem’ figirngiyrad e kan pagtalin ni ngan pi’ e foth rorad u gubin e rran.” Ma aram, ma “fa ragag nge l’agruw” i apostal e ka ra pithiged e re magawon nem ma kar dugliyed “medlip i pumoon” ni ngar rin’ed “fare maruwel” ni ngan wereg e ggan. (Acts 6:1-6) Piin piilal ko ngiyal’ ney e thingar dabra ‘ninged telrad’ ko gun’gun’ nib mat’aw. (Proverbs 21:13) Ma dabni gathibthibnag e pi walag, ya piin piilal e susun nguura rin’ed ban’en nra pi’ e athamgil nga laniyan’ e girdi’ ma ra gelnagrad.​—1 Korinth 8:1.

14. Yira siyeg ni dabkun gun’gun’, ma mang felngin ni rib t’uf?

¹⁴ Gadad gubin e thingar dabda gun’gun’gad, ya gun’gun’ ni gubin ngiyal’ e ma kirebnag e tirok Got. Pangiy ni aram rogon e ra kirebnag thildad ni ke taareban’dad. Tin ni ngad rin’ed, e ngad paged ni kan ni thothup ni nge yibnag e t’ufeg nga fithik’dad. (Galatia 5:22) Ngan fol ko ‘fare motochiyel ko t’ufeg ni pi’ fare pilung’ ma ra ayuwegdad ni nguuda pigpiggad ku Jehovah ni ra bagadad ma be ayuweg bagadad.​—James 2:8; 1 Korinth 13:4-8; 1 Peter 4:8.

Ngan Kol Ayuw ko Gathibthib

15. Uw rogon ma ga pirieg e thil u thilin e dugdugthin nge un t’ar e thin nga daken e girdi’?

¹⁵ Bochan ni gun’gun’ e ra yan ni yan ko dugdugthin, me ere thingarda koled ayuwngidad ko n’en ni nga dogned. Dugdug thin e ireray e sabathin ni dariyfan u murung’agen e girdi’ nge tin ma rin’. Machane, ngan t’ar e thin nga daken be’, e aram e thin de riyul’ ni ka nog ni fan ni ngan kirebnag thin yugu be’. Ireray e sabethin nib kireb ma de puluw ko lem rok Got. Arfan ni yog Got ngak piyu Israel ni gaar: “Dab um man i yan ko girdi’ rom ni fan ni ngam t’ar e thin nga daken be’.”​—Leviticus 19:16, NW.

16. Mang e ke yog Paul u murung’agen boch e girdi’ ni ma dugdugthin, ma uw rogon ni nge ayuwegdad e fonow rok?

¹⁶ Bochan ni sabethin ni dariyfan e rayog ni nge pow’iyey nga un t’ar e thin nga daken be’, ere i puwan’ Paul nib gel ngak boch e piin ma dugdugthin. Tomren ni weliy murung’agen e piin ni ppin ni bay rogorad ni nge yog ngorad boch e ayuw ko ulung, miki weliy murung’agen e piin ppin ni ke “fil rogon ni ngar adbeyed e tayim rorad ko yan yan u mit e tabinaw; machane gathi kemus i ray, ku yad ma fil rogon e dugdugthin ma yad be yan ra magawonniged e maruwel rok boch e girdi’, ni yad be weliy murung’agen bogi ban’en nsusun e dab ra weliyed murung’agen.” (1 Timothy 5:11-15) Faanra ke naab reb e ppin ni Kristiano ngay ni rayog ni nge un ko sabethin ni ra pow’iyey i yan ko ngan t’ar e thin nga daken be’ ya ba meewar, ma thingari fol ko fonow ni pi’ Paul ni nge par nib “fel’ pangin, ma der ma t’ar e thin nga daken be’.” (1 Timothy 3:11) Riyul’, ni piin pumoon ni Kristiano e thingara koled ayuwngirad ndabra uned ko dugdugthin nib kireb.​—Proverbs 10:19.

Dabkun Turguy e Kireb Nga Dakeney!

17, 18. (a) Mang e ke yog Jesus u murung’agen e ngan turguy e kireb nga daken walagdad? (b) Uw rogon ni ngad folgad ko thin rok Jesus u rogon i nga un turguy e kireb nga daken e girdi’?

¹⁷ Yugu aram rogon ni dabda t’ared e thin nga daken be’, e sana ba t’uf ni ngarda athamgilgad ni dabda manged e piin ni ma turguy e kireb nga daken yugu boch e girdi’. I yog Jesus e thin nib gel nib togopuluw ko re ngongol ney u nap’an ni yog ni gaar: “Dab mu turguyed e kireb nga daken e girdi’, nge dabi turguy Got e kireb nga dakenmed - yi Got e ra turguy e kireb nga dakenmed nrogon ni kam turguyed e kireb nga daken e girdi’, nrogon nga gelngin ni mrin’ed ngorad. Ere mang fan ni ga be sap ngab tabyu’ ni bay u lan mit walagem, ma damur tiyan’um nga baley i gek’iy ni bay u lan owchem? Gur e cha’ ni ga be dake modingnigem! Som’mon e ngam chuweg fare ley i gek’iy u lan owchem, nge mu’ ma aram me yog ni mu guy ban’en ngam chuweg fare tabyu’ u lan mit walagem.”​—Matthew 7:1-5.

¹⁸ Dab dogned ngak walagdad ni ngad chuweged ba “tabyu’” ni bay u lan owchen ko ngiyal’ ni bay gelngidad ni ngad turguyed ban’en nbochan e “baley e gek’iy” ni be yip’ fan ban’en e be magawonnagdad.” Riyul’, ni faanra kari tamilang feni gel e runguy rok Got, ma dabda adaged ni ngad turguyed e kireb nga daken e pi walagdad ni pumoon nge ppin u lan e ulung. Uw rogon ni ngad changargad ngorad ni bod ni be changar e Chitamangiy nu tharmiy ngorad? Arfan ni i ginangdad Jesus ni ‘dab kuuda turguyed e kireb nga daken e girdi’ nge dabni turguy e kireb nga dakendad’! Ngan lemnag u fithik’ e yul’yul’ e gin ni gad ba meewar riy me ere susun nge talegdad ni dabda turguyed e kireb nga daken be’ ya ireray e n’en ni de mat’aw u wan’ Got.

Ba War Machane Yima Ta’fan

19. Susun nge uw rogon e pi walagdad u wan’dad?

¹⁹ Faanra ke mudugil lanin’dad ni gadad walag ni nguud pigpiggad ku Got ni ra bagadad ma be ayuweg bagadad, ma gathi kemus ni ngad siyeged ni dabda turguyed e kireb nga daken e girdi’. Gad ra dag ngorad rogon ni gad be tay farad. (Roma 12:10) Riyul’, ngad gayed e tin ni nge fel’ rogorad riy, ma gathi gadad, ma ngad falfalan’gad ni ngad rin’ed e maruwel nib sobut’ ni fan ngorad. (John 13:12-17; 1 Korinth 10:24) Uw rogon ma rayog ni ngad daged pangidad nib fel’ ni gubin ngiyal’? Gad ra lemnag ni urngin e girdi’ ni ke michan’rad ni be’ nge be’ e ba tu’f rok Jehovah ma ra bagadad mab t’uf ni nge ayuweg bagadad, ni bod urngin yang ko dowef ni ra bayang ma be tor nga daken bayang.​—1 Korinth 12:14-27.

20, 21. Mang fan ngodad fare thin ni bay ko 2 Timothy 2:20, 21?

²⁰ Riyul’, ni piin Kristiano e ba meewar ni bod ba rume’ ni but’ ni kan pag fan ngorad e chugum ni flaab ni ngan wereg e machib. (2 Korinth 4:7) Faanra nguuda ululgad ko re maruwel ney nib thothup ni fan ni ngan pining e sorok ngak Jehovah, ma thingari par ni gadad ba fel’ u wan’ nge Fak. Kemus nfaan gad ra par ni gadad ba machalbog u pangidad nge tirok Got ban’en ma rayog ni ngad pared ni bod ba rume’ ni yima ta’ fan ni rayog ni nge fanaydad Got. Murung’agen e re n’en ney ni yoloy Paul e gaar: “U lan ba naun ni baga’ e bay e rume’ riy ni gathi kemus ni kan ngongliy ko gol nge silber ya bay boch ni kan ngongliy ko ren nge but’, ma boch e fan ko tin nib fel’ ma boch e fan ko tin de fel’. Ere, faanra fal’eg be’ rogon nge gilaf nga orel ko pi kireb ney ni gubin, ma ra mang ba rume’ ni yima ta’ fan ni fan ko maruwel nib fel’, ma kan thothupnag, ma baga’fan ko masta rok ma ke bung rogon ni nge rin’ urngin e maruwel nib fel’.”​—2 Timothy 2:20, 21.

²¹ Girdi’ ni ngongol rorad e de puluw ko tin baadag Got ni ngan rin’ e ‘bod e rume’ ndabiyog i ta’ fan.’ Machane, gad ra fol ko kanawo’ rok Got ma rayog ni ngad manged ‘rume’ ni yima ta’ fan ko maruwel nib fel’, ma kan thothupnag, ara kan kieg, ni fan ko pigpig ku Jehovah ma ke bung rogorad ni ngar rin’ed urngin e maruwel nib fel’.’ Ere fel’ ni ngad fithed gadad nib fel’ rogon: ‘I gag “reb e rume’ ni yima ta’ fan ni fan ko maruwel nib fel’”? Tin gu ma rin’ e ma ayuweg e pi walageg ngar mon’oggad boch ko tin nib fel’? I gag bang ko ulung ni gu ma un ko pi walag ko maruwel ni ra bagamad ma be ayuweg bagamad?’

Mu Ulul ko Pigpig ni Ra Be’ Ma Nge Ayuweg Be’

22. Rayog ni ngan taarebnag e ulung ni Kristiano ko mang?

²² Fare ulung ni Kristiano e bod reb e tabinaw. Bay e t’ufeg u lan e tabinaw, nra bagayad ma be ayuweg bagayad, mab fel’ thilrad nfaanra urngin e girdi’ riy e be pigpig ku Jehovah. Reb e tabinaw e sana bay e girdi’ riy nib thilthil e wok rorad, machane yad urngin e bay tagil’rad ni yima tay fan. Ku aram rogon u lan e ulung. Yugu aram rogon ni gadad gubin e gad ba thilthil​—ma daworda flontgad—​me Got e gagiyegnag ma gad chuchugur ngak u daken Kristus. (John 6:44; 14:6) Jehovah nge Jesus e gadad ba t’uf rorow, ma bod e tabinaw ni ke taareban’rad, ma rib t’uf ni ngad t’ufeged gadad.​—1 John 4:7-11.

23. Mang e susun ni nguuda lemnaged nge tin ni kad turguyed ni ngad rin’ed?

²³ Fare ulung ni Kristiano ni bod e tabinaw e ku ireray e gin’en nrayog ni ngad pirieged e yul’yul’ riy. I yoloy Paul ni apostal ni gaar: “Gu be athapeg ni u urngin yang ma piin ni pumoon e nge maybil riy, ni yad be p’ug paarad nib yul’yul’ nga lang, ndariy e damumuw nge maluagthin u fithik’rad.” (1 Timothy 2:8, NW) Ere i chagiy Paul e yul’yul’ ko meybil u fithik’ e yoor “u gubin yang” ni ma muulung e Kristiano ngay u taabang. Kemus ni fapi pumoon nib yul’yul’ e susun ni ngara feked e meybil u fithik’ e girdi’ ni yoor ni fan ko ulung. Riyul’, ni be athapeg Got ni gadad gubin e ngad pared nib yul’yul’ ngak nra bagadad ma nge yul’yul’ ngak bagadad. (Eklesiastes 12:13, 14) Ere nge mudugil lanin’dad ni ngad ayuweged gadad ni ke taareban’dad ngay, ni bod yuyang u downgin e girdi’. Yibe athapeg ni ngku uda pigpiggad ni ke taareban’dad ni gadad bang ko tabinaw ko pi tapigpig rok Jehovah. Ma n’en ni th’abi ga’fan, e nguuda lemnaged ni ra bagadad mab t’uf e ayuw rok ma gad ra fel’ u wan’ Got me flaabnagdad nfaanra nguuda pigpiggad ngak Jehovah ni ra bagadad ma be ayuweg bagadad.

Uw Rogon ni Ngam Pi’ e Fulweg?

• Mang e be ayuweg e girdi’ rok Jehovah ni ngar pipiggad ngak ni ra bagayad ma be ayuweg bagayad?

• Mang fan ni piin Kristiano e ngar siyeged e ngongol ni ba laniyan’?

• Rogon ni ga be lemnag, mang e ba kireb ko gun’gun’?

• Mang fan ni thingarda ted fan e pi walagdad?

[Picture on page 15]

I guy Peter ni “Got e de laniyan’”

[Picture on page 16]

Ga Manang ko Mang fan ni i tamra’nag Got Miriam?

[Picture on page 18]

Fapi Kristiano nib yul’yul’ e yad be pippig ku Jehovah ni ra bagayad ma be ayuweg bagayad