Maruwelni Ke Mon’og Rogon Pangiy nib Fel’
Tungun e duw ni 2001, ma piin ura motoyilgad ko Radio broadcast ko nam nu Mozambique e kar rung’aged e re thin ney ni ka nog ni:
“Fare president ko Republic e yan i guy fare branch facilities ko Pi Mich Rok Jehovah u Maputo. Me ta’ ir ko re ulung ko Pi Mich Rok Jehovah ney ni ngar gelnaged yad i mon’ognag rogon e gafarig nib fel’ u lan e pi tabinaw nge rogon ni yibe fil ban’en ko piilal u daken e pi program rorad ni yad ma fil rogon ko girdi’ ni ngar nanged e yol. Gonapan 10,000 e girdi’ ni keb angin e pi program ney ngorad. Rogon ni yog President Chissano, e pi n’ey ni aray rogon e nga unog e fel’ ngay ya bogi ban’en nib ga’ fan, ni yibe pi’ ko binaw ni nge fal’eg rogon e pi magawon ni ba’ ko skul ni ka be pirieg e re nam ney.”
Re welthin nem e ki ulul e tin baaray ngay nni fek ko welthin rok fare president ni gaar: “Ri ma yib e athamgil nga lanin’dad ni faan gad ra guy ni boor e girdi’ ni ke adag ni nge nang e yol. Be dag ngodad ni girdien e nam e ngar ayuweged gadad nge yoor e girdi’ ni nang e yol. Arfan, ni gu baadag ni nga gu pi’ e athamgil nga laniyan’ e Pi Mich Rok Jehovah ni ngar gelgad ko pi program rorad ni baaram ni yad be fil rogon e yol ko girdi’, ni yugu demtrug ko mang thin. N’en ni riyul’ nib ga’ fan e bay e skul ko yol ni aram e girdi’ e ke yog rorad ni ngaur nonad ma ke mom ni ngar nanged fan e n’en ni yad be yog ma bayi gabul nge langlath ma ke yog ni ngaur uned nga boch ban’en ko skul.”
Pi Mich Rok Jehovah u Mozambique e ku yad ma pi’ e skul ko fol yol nge rogon i bieg u 850 yang u gaangin e re nam nem nib bochan ni nge yog ko girdi’ ni nge be’ me yog rok ni nge bieg e Thin rok Got. Ma kub muun ngay, gonapan 50,000 e fol Bible ni yad ma tay ko pi tabinaw i yan u lan reb e wik ni dariy puluwon. Urngin e pi n’eney e bayang ko program ko fol Bible u gaangin yang e fayleng ni chiney e ke taw nga 235 e nam. (Matthew 24:14) Ku arrogon gur ni ku rayog ni nge yib angin ngom ere program ney. Wenig ngom dab mu magawon ni ngam non ko Pi Mich Rok Jehovah ko gin ga ba’ riy.