Um Felfelan’ I Fil E Thin Ku Got Ni Goo Gur Rom

“Ri gu ma fal’eg i lemnag urngin e maruwel rom, nge rogon ni ga ma rin’ ban’en ma ri gu ra tiyan’ug ngay.”​—PSALM 77:12 NW.

1, 2. (a) Mang fan ni thingarda ted e tayim ni fan ni ngad fal’eged i lemang ban’en? (b) Mang e be yip’ fan fare “fal’eg i lemnag”?

BOCHAN ni gadad pi gachalpen Jesus Kristus, ma ba t’uf e tha’ u thildad Got nge tapgin ni gad be pigpig ngak e aram e n’en ni nge ga’ fan u wan’dad. Machane, ngiyal’ ney, e baga’ ni girdi’ e boor pa’ u puluwrad ma dar dugliyed ba ngiyal’ ni nguur fal’eged i lemnag ban’en riy. Kar pied urngin e tayim rorad ko maruwel ni be ulul i yan ni fan ni nge yoor e chugum, min chuw’iy boch e chugum, ma yad ma gay e falfalan’ nib pag rogon. Uw rogon ni ngad pilo’gad ko re maruwel ney ndariyfan? Ni bod ni gubin e rran e gad ma ta’ e tayim ni fan ko tin baga’ fan, ni bod e abich nge mol, maku thingar da ted e tayim ni gubin e rran ni ngad fal’eged i lemnag e maruwel rok Jehovah nge tin ma rin’.​—Deuteronomy 8:3; Matthew 4:4.

² Kaam tal ba ngiyal’ ni fan ni ngam fal’eg i lemnag ban’en? Mang fan ni ngan fal’eg i lemnag ban’en? Reb e Jibikiy e be weliy fan fare thin ni “ngan tiyan’uy ko n’en ni be lemnag be’: ngan fal’eg i lemnag ara ngan lemnag ban’en nib elmirin.” Mang fan e re n’en ney ngodad?

3. Ngan mon’og ko tirok Got ban’en e ba peth ko mang?

³ Reb, e susun ni nge puguran ngodad e n’en ni yoloy Paul ni apostal ngak Timothy ni yow be pigpig u taabang ni gaar: “Chiney ni ke chuchugur ni nggub, ma nguum bieg boch e thin ngak e girdi’ ni yoor, mu umu fonownagrad, ma nguum fil ban’en ngorad. . . . Mu fal’eg i lemnag e pi n’en ney; ma ga tiyan’um ngay, nge yog ni guy e girdi’ ni gubin ni ga be mon’og i yan.” Arrogon, yibe athapeg ni nguun mon’og i yan, ma thin rok Paul e be dag ni nguun fal’eg i lemnag e tirok Got ban’en nge nguun mon’og e ba peth. Ku aram rogon e ngiyal’ ney. Gad ra mon’og ko tirok Got nrogon ni ke felan’dad ngay, e kub t’uf ni ngada “fal’eged i lemnag” ma ngad “tedandad” ko pi n’en nib peth ko Thin Rok Got.​—1 Timothy 4:13-15.

4. Mang talin e maruwel e rayog ni ngam fanay ni nge ayuwegem ko fal’eg i lemnag e Thin rok Jehovah ni gubin ngiyal’?

⁴ Tin th’abi fel’ e tayim ni ngam fal’eg i lemnag ban’en e be yan u rogon e ngiyal’ nib m’ag ngom nge tin ma rin’ girdien e tabinaw rom. Boor e girdi’ ni ri ma fal’eg i lemnag e thin u Bible ni ri kakadabul u nap’an ni yad ra bieg fare babyor ni Examining the Scriptures Daily. Riyul’, ni sagonapan 20,000 e girdi’ ni ma maruwel u Bethel homes u ga’ngin e fayleng e yad ma tababnag e rran rorad ni ngar weliyed e thin u Bible ni fan ko urngin e rran u lan 15 e minit. Yugu aram rogon ni gubin e kakadabul ni kemus ni ri buchuw e girdi’ u Bethel family e rayog ni ngara weliyed boch e thin, ma yugu boch e girdi’ e yad ma fal’eg i lemnag e pi n’en ni kan weliy nge n’en ni kan bieg. Yugu boch e Pi Mich Rok Jehovah e yad ma fal’eg i lemnag e Thin rok Got u nap’an ni yad be yan ko maruwel rorad. Ma yad ma motoyil ko audiocassettes ko fare Bible nge fare Watchtower nge Awake! magazine ni aram e n’en ni kan fal’eg u boch e thin. Boor e piin leengiy e yad yodorom u nap’an ni yad ma rin’ ban’en u tabinaw. Tin riyul’ riy, e yad ma fol rok Asaph ni fare psalmist, ni ir e yoloy ni gaar: “Gu ma fal’eg i lemnag e maruwel ni i rin’ Jah; ya bochan ni nge dabgu pagtalin e tin ni kam rin’ kakrom ni yira ngat ngay. Ma ri nggu fal’eg i lemnag urngin ban’en ni kam rin’, nge rogon ni ga ma rin’ ban’en ngak be’ e ri gu ma tiyan’ug ngay.”​—Psalm 77:11, 12, NW.

Lem nib Mat’aw e Ra Yib Angin nib Fel’

5. Mang fan ni fol babyor ni goo gadad e susun nge mang ban’en nib ga’ fan ngodad?

⁵ Re tayim rodad ney ni yima fanay ko TV, nge video, nge computer, e baga’ ni girdi’ e kari lich e tayim ni ngar faned ko bieg babyor. Susun dabi buch ban’en ni aram rogon ko Pi Mich Rok Jehovah. Riyul’, ra nguun bieg e Bible ma bod ba gaf ni be pow’iydad ma be pethuydad ngak Jehovah. Bokum biyu’ e duw kakrom, me yan Joshua nga luwan Moses nge ayuweg piyu Israel. Rogon ni nge flaabnag Jehovah Joshua, e ba t’uf ni nge bieg e Thin rok Got. (Joshua 1:8; Psalm 1:1, 2) Ku aram e n’en ni susun ni ngan rin’ e ngiyal’ ney. Machane, bochan ni boch e girdi’ e de yog rorad ni ngar uned ko skul nib tolang ma mo’maw’ ngorad ni ngar bieged e babyor ara kar pirieged ni kaygi gel e re maruwel ney ngorad. Ere, mang e ra ayuwegdad ni ngada adaged ni ngad bieged e Thin rok Got? Fulweg riy e rayog ni ngan pirieg ko thin rok Solomon ni Pilung ni bay ko Proverbs 2:1-6. Wenig ngom ngam pithig e Bible rom ma ngam bieg e pi thin ney. Ma gad ra weliy u taabang.

6. Susun uw rogon e tamilangan’ u murung’agen Got u wan’dad?

⁶ Som’mon, gad ra pirieg e fonow ni be gaar: “Fakag, ra ngam fanay e pi thin ni ku gog ma ngam chaariy e motochiyel rog, ni fan ni ngam tiyan’um ko tin nib gonop ban’en mag ta’ telim, ma ga chugurnag gum’irchaem nga gelngin i nang fan ban’en; . . .” (Proverbs 2:1, 2) Mang e kad filed ko pi thin ney? Kad filed ni ra bagadad ma ke mil fan ngak ni nge fil e Thin rok Got. Mu lemnag e thin ni ka nog ni “faanra ngam fanay e thin rog.” Rib ga’ fan fare bugithin ni “faanra” ya bochan baga’ ni girdi’ e dar ma tiyan’ ko Thin rok Got. Rogon ni ngad filed e Thin rok Got ni ba felan’dad ngay, e susun ni nge m’agan’dad ngay ni ngad fanayed e thin rok Jehovah ma ngad ted nga lanin’dad ni ireray e n’en ni bod e machaf ni dabudad ni nge mul u pa’dad. Susun dabda paged ni ngari yoor e maruwel rodad ara ngada tababgad i lemnag ni Thin rok Got e gathi ban’en ni ri baga’ fan, ma ku ra maruwaran’dad ya bochan ni tin ni gad ma rin’ u gubin e rran e be warnag laniyan’dad.​—Roma 3:3, 4.

7. Ngiyal’ ni rayog rodad, ma mang fan ni ngad uned ko muulung ma ngad tedan’dad ko pi muulung rodad ni Kristiano?

⁷ Riyul’ ni gad ma “tedandad” ma gad ma motoyil nib fel’ rogon u nap’an ni yibe weliy e Thin rok Got ko muulung rodad ni Kristiano? (Efesus 4:20, 21) Gad ma ‘chugurnag fare gum’ircha’ ngay ni fan ni nge yog ngodad gelngin i nang fan ban’en? Sana facha’ ni be welthin e gathi rib salap ko welthin, machane nap’an ni be weliy e Thin rok Got ma bay fan ni ngarda tedandad ngak. Riyul’, rogon ni ngad tedandad ko gonop rok Jehovah, e thingarda uned ko muulung ko Kristiano nrogon ni rayog rodad. (Proverbs 18:1) Mu susunnag feni gel e kireban’ ko en de yog rok ni nge un ko muulung nni tay ko thal ni lang e naun u Jerusalem ko Pentekost 33 C.E.! Yugu aram rogon ni muulung rodad e de taareb rogon ko re muulung nem, ma fare Bible, e aram e babyor ni gad ma fil, ni ir e n’en un weliy riy. Ma arfan, ni urngin e muulung e ra mang taw’ath ngodad nfaanra ngad tedan’dad ngay ma ngad bieged u lan e Bible rodad e pi thin ni yibe weliy.​—Acts 2:1-4; Hebrews 10:24, 25.

8, 9. (a) Mang e n’en nib t’uf ni ngad rin’ed u nap’an ni gad be fil ban’en ni goo gadad? (b) Uw rogon ni ngam taareb rogonnag puluwon e gol ko ngan nang fan e tamilangan’ u murung’agen Got?

⁸ Bin migid e thin ni yog fare pilung nib gonop e be gaar: “Maku, faanra ngam pining e tamilangan’ ma ngam tolul nib ga’ lamam ni fan ni nge yog ngom gelngin i nang fan ban’en, . . .” (Proverbs 2:3) Mang ngongol ara lem ni be yog e pi thin ney ngodad? Riyul’, ni ireray e tafinay nib gel ni ngan nang fan e Thin rok Jehovah! Biney e be dag ni ri baadag ni nge fil ban’en ni fan ni nge yog gelngin i nang fan ban’en, min nang fan e tin nib m’agan’ Jehovah ngay. Riyul’ nib t’uf e maruwel nib gel, ma ra pow’iydad ko bin migid e thin rok Solomon nge fanathin rok.​—Efesus 5:15-17.

⁹ Me ulul ngay ni gaar: “Faanra nguum gay e re n’en ney [tamilangan’] ni bod e silber, nge bod machaf ni kan mithag ni nguum ulul i gay, . . .” (Proverbs 2:4) Ra k’aringdad ni ngad lemnaged e girdi’ ni ma ker e but’ ni be gay e machaf ni kar rin’ed e re n’en ney u lan boor e chibog ni yad be gay e tin ni ka nog e wasey nib tolang puluwon ngay ni silber nge gol. Girdi’ e kar lied yug boch e girdi’ nbochan e gol. Boch i yad e ka ra fanayed e yafas rorad ni polo’ ni fan ni yad be gay e gol. Machane, uw feni tolang puluwon e gol? Faanra kam malog u reb e binaw ni baga’ radan ndariy ban’en ni be tugul riy ma ke yib e belel ngom ni rib gel, ma bin ngan e ga ra mel’eg: bayang e gol ara reb e kap ni ke sug ko ran? Yugu aram rogon, ma ri baadag e girdi’ ni ngar gayed e gol ni yugu demtrug rogon puluwon ni be thilthil i yan!a Susun ni ngada daged ni kab gel e maruwel ni gad ra ta’ ni fan ni ngad fal’eged i gay e gonop, nge gelngin i nang fan ban’en, nge tamilangan’ u murung’agen Got nge tin nib m’agan’ ngay! Machane mang angin ni ra yib ko re magow nib gel ney?​—Psalm 19:7-10; Proverbs 3:13-18.

10. Mang e gad ra pirieg nfaan gad ra fil e Thin rok Got?

¹⁰ Me ulul Solomon ko welthin rok ni gaar: “Ra aram rogon ma ga ra nang fan madgun Jehovah, ma ga pirieg e tamilangan’ u murung’agen Got.” (Proverbs 2:5) N’en ni yira gin ngay​—ni gadad e girdi’ ni tadenen e gad ra pirieg e “tamilangan’ u murung’agen Got,” ni Jehovah, ni ir fare Somol ni Th’abi Tolang u Palpalthib! (Psalm 73:28; Acts 4:24) U lan boor e chibog ma piin ni ka nog e philosopher ngorad nge piin ni ka nog fapi pumoon nib gonop ngorad e ka ra guyed rogon ni ngar nanged fan e tin nib mith ko yafas nge fare palpalthib. Machane, de yog rorad ni ngar pirieged “fare tamilangan’ u murung’agen Got.” Mang fan? Yugu aram rogon nrayog ni ngan pirieg e re n’en ney ko Thin rok Got, ni fare Bible u lan bokum biyu’ e duw, ma ka ra dariyfannaged ni bod ban’en ni kaygi mom ma arfan ni de yog rorad ni ngar fanayed ma dar nanged fan.​—1 Korinth 1:18-21.

11. Mang boch angin nib fel’ ni ma yib ngak be’ ni ma fil ban’en ni goo ir?

¹¹ Ba’ reb e k’aringan’ ni kari weliy Solomon ni gaar: “Jehovah e ma pi’ e gonop; ma tamilangan’ nge gelngin i nang fan ban’en e ma yib u l’ugun.” (Proverbs 2:6) Ri ma pi’ Jehovah e gonop, nge tamilangan’, nge gelngin i nang fan ban’en ni lem rok ngak e en ni ke m’agan’ ngay ni nge fal’eg i gay e pi n’em. Mmutrug ni bay tapgin ni ngad adaged ni ngad filed e Thin rok Got, nyugu aram rogon nib t’uf riy e maruwel nib elmirin, nge ngan llowannagey, min pag e tin yib adag. Kad taw’athgad ya bay boor e Bible ni kan ngongliy ma de t’uf ni ngad abuweged nga bang, ni bod e n’en ni i rin’ boch e girdi’ kakrom!​—Deuteronomy 17:18, 19.

Nguun Yan ni Rogon ni Baadag Jehovah

12. Susun bochan e mang ni gad be gay e tamilangan u murung’agen Got?

¹² Susun bochan e mang ni nguud filed e babyor rodad ni goo gadad rodad? Ya bochan ni nge m’ug ni ka gadad ba salap ngak yugu boch e girdi’? Gad ra dag ni kab boor e tin gad manang ngak yugu boch e girdi’? Bochan gad baadag ni ngarda salapgad ko Bible? Danga’. Tin ni gad be nameg e ngad manged Kristiano ko thin nge ngongol, ni gubin ngiyal’ ni ba m’agan’dad ngay ni ngad ayuweged yugu boch e girdi’, u daken gelngin Kristus ni ma pasigan’nagey. (Matthew 11:28-30) I ginangey Paul ni apostal ni gaar: “Machane mit i tamilangan’ nem e ma gelnag e ufanthin ko girdi’; machane rogon ni nge be’ me t’uf be’ rok e ra yib wenegan nib fel’.” (1 Korinth 8:1) Ma arfan ni, ba t’uf ni ngad fanayed e lem nib sobut’ ni bod e n’en ni dag Moses u nap’an ni yog ngak Jehovah ni gaar: “Faanra gub fel’ u wun’um, me ere gu be wenig ngom ni ngam weliy ngog e tin ni kam lemnag ni ngam rin’, nge yog ni gu nang lanin’um, mu ug rin’ e tin nib m’agan’um ngay.” (Exodus 33:13) Arrogon, ba t’uf ni ngad maruweliyed nge yog ngodad e tamilangan’ ni fan ni ngad falfalan’naged Got, ma gathi girdi’. Gad baadag ni ngad manged tapigpig rok Got nib sobut’an’dad ma ngad ngongolgad nrogon ni baadag. Uw rogon ma rayog ni nge yog ngodad e pi n’en nem ni gad be nameg?

13. Mang e ba t’uf ni faanra ngan mang tapigpig ni baadag Got?

¹³ I fonownag Paul Timothy ko uw rogon ni ngan falfalan’nag Got, me yog ni gaar: “Mu athamgiliy u rogon nrayog rom ni ngam dagem ngak Got nrogon ni gab fel’ u wan’, ni bod rogon be’ ni girdien e maruwel nder tamra’ ko maruwel rok, ni be fanay e thin riyul’ nrogon.” (2 Timothy 2:15, NW) Fare bugithin ni “be fanay . . . nrogon” e i yib ko thin ni Greek ni som’mon e be yip’ fan e “ngan th’ab nib k’iy.” (Kingdom Interlinear) Rogon ni yog boch e girdi nib llowan’, biney e be dag rogon ni ma th’ab e en ma wup mad tabon e mad ni be fol ko pattern ko mad, nge tamilay’ ni be gi’ e but’ ni be fol ko fare fol ni kan ker ni bay riy, nge yugu boch ban’en. Demtrug rogon, ma ra yan i aw ni ba yaluw mab k’iy. Kenggin e n’en ni yibe weliy murung’agen e Timothy e rogon ni nge mang tapigpig ni baadag Got, e thingari ‘rin’ e tin th’abi fel’ ni nge mudugil ni rogon ni ma fil ban’en ngak e girdi’ nge ngongol rok e bpuluw ko thin riyul’.​—1 Timothy 4:16.

14. Mang e ra rin’ e fol babyor ni goo gadad ni gad ma ta’ ko tin gad ra rin’ nge n’en ni gad ra yog?

¹⁴ Miki weliy Paul e re n’en ney u nap’an ni be fonownag e pi walag ni Kristiano u Kolose ni “ur ngongolgad nrogon ni baadag Jehovah ni fan ni ngari felan’ Got ngorad” ya nge “yib wom’engin urngin e maruwel rorad nib fel’ mi yad mon’og ko tamilangan’ rorad nib puluw u murung’agen Got.” (Kolose 1:10) U roy e pethuy Paul e ngan ngongol nrogon ni baadag Jehovah ko “nge yib wom’engin urngin e maruwel nib fel’” ma ku fare n’en ni ngan “mon’og ko tamilang nib puluw nga murung’agen Got.” Fan e re ney, e tin baga’ fan u wan’ Jehovah e gathi kemus ni feni gel ni gad ma tayfan e tamilangan’, ya ku uw feni chuchugur ni gad be fol ko Thin rok Got ko tin ni gad ma rin’ nge thin ni gad ma yog. (Roma 2:21, 22) Biney e be yip’ fan ni fol babyor ni goo gadad ni gad ma ta’ e susun ni nge gagiyegnag lanin’dad nge ngongol rodad nfaanra gad baadag ni ngad falfalan’naged Got.

15. Uw rogon ni ngad ayuweged ma gad gagiyegnag e lem rodad nge tafinay rodad?

¹⁵ Ngiyal’ n’ey, e ke mudugilan’ Satan ni nge kirebnag e tirok Got ni bay rodad ma aram fan ni ma m’oneg e cham ni fan nga lanin’uy. (Roma 7:14-25) Ere, thingarda ayuweged ma ngad gagiyegnaged e lem nge tafinay rodad ni fan ni nge mich ni gad ba fel’ u wan’ e Got rodad, ni Jehovah. Talin e cham ni bay rodad e aram “fare tamilangan’ u murung’agen Got,” ni bay rogon ni nge “gagiyegnag urngin e lem ni ngad folgad rok Kristus.” Ireray tapgin ntha’bi fel’ ko mang fan ni ngarda tedan’dad ko fol Bible ni gubin e rran, ya gad baadag ni ngad chuweged u lanin’dad e lem nib kireb ni ba siin.​—2 Korinth 10:5.

Ayuw ni Ngan Nangfan Ban’en

16. Uw rogon ni ngeb angin ngodad u nap’an ni be fil Jehovah ban’en ngodad?

¹⁶ Pi n’en ni ma fil Jehovah ban’en e ma yib angin ko tirok Got nge dowef. Gathi ireray e skul ndabi pug e tafinay rok e girdi’ ma dariyfan. Ma arfan ni gad ra bieg e thin ni gaar: “I gag Jehovah, ni Got rom, ma gag e En ni be fil ban’en ngom ni nge fel’ rogom riy, ma gag e En ni be gagiyegnagem ni ngam man u kanawo’ ni ireray fare kanawo’ ni thingar mman riy.” (Isaiah 48:17, NW) Uw rogon ni ma gagiyegnagdad Jehovah ni nga darod ko kanawo’ rok nib fel’? Som’mon, e ba’ rodad e Thin rok ni kan thagthagnag, ni fare Bible nib Thothup. Ireray e babyor ni ri gad ma fanay ni gubin ngiyal’. Aram fan ni ffel’ ni ngan tiyan’uy ko tin ni yibe weliy u nap’an e muulung ni Kristiano ni bay e Bible ni kan pithig. Angin ni yib nfaanra ngan rin’ e n’en ni aram rogon e rayog ni ngan guy ko chepin be’ nu Ethiopian ni eunuch, ni bay ko Acts guruy ni 8.

17. Mang e ke buch rok be’ nu Ethiopia nib eunuch, ma mang e re n’en ney?

¹⁷ Cha’ nem ni be’ nu Ethiopia ni eunuch e kan pingeg ko teliw ni Judaism. En ni kari mich Got u wan’, ma ma fil fare Thin rok Got. Nap’an ni be milekag ko karrow rok, ni be bieg e thin ni bay ko Isaias ko ngiyal’ ni be mil Filip u tooben ni be fith ni gaar: “Mog, ga be nang fan e pi n’ir ni ga be bieg?” Uw rogon ni i fulweg fa cha’ nib eunuch? I yog ni gaar, “‘Uw rogon mu gu nang fan ni faanra dabi weliy be’ fan ngog?’ Me yog ngak Filip ni nge yib ngak nga lang nge par nga tooben u daken e karrow.” Me Filip, ni kan ni thothup e be ayuweg, e ki ayuweg facha’ nib eunuch ni nge nang fan fare yiiy rok Isaiah. (Acts 8:27-35) Mang e be dag e re n’en ney? Biney e be dag ni bieg Bible ni gad ma ta’ e de gaman. Jehovah, u daken e kan ni thothup rok, e be fanay fare tapigpig nib yul’yul’ mab gonop ni nge ayuwegdad ngad nanged fan e Thin rok ko tayim nib puluw. Uw rogon ni kan rin’ e re n’en ney?​—Matthew 24:45-47; Luke 12:42.

18. Uw rogon ni be ayuwegdad fare tapigpig nib yul’yul’ mab gonop?

¹⁸ Yugu aram rogon ni ka nog ni fare tapigpig e ba “yul’yul’ mab gonop,” ma de yog Jesus ndabi oloboch. Re ulung ney ko pi walag ni kan dugliyrad mab yul’yul’ e yad e Kristiano ndawora flontgad. Yugu aram feni fel’ e tin yad be lemnag, maku rayog ni ngar olobochgad, ni bod ni yu ngiyal’ ma ke oloboch e piin pumoon ni Kristiano ko fa bin som’mon e chibog. (Acts 10:9-15; Galatia 2:8, 11-14) Machane, tin ni yad be lemnag e ba machalbog, ma ma fanayrad Jehovah ni fan ni nge pi’ ngodad e ayuw ko fol Bible ni nge gel e michan’ rodad ko Thin rok Got nge tin ni ke micheg. Tin som’mon e talin e maruwel ni pi’ ngodad fare tapigpig ni fan ko fol babyor ni goo gadad e aram fare New World Translation of the Holy Scriptures. Chiney e rayog ni ngan fanay e re Bible ney, ni boch e kan ngongliy ni polo’ ma boch e kemus ni bang riy, ni kan ngongliy ko 42 e thin, ma bay 114 million ken ni kan afuweg ni boor. Uw rogon ni ngad fanayed e re n’en ney ko fol babyor ni goo gadad ni ba’ angin?​—2 Timothy 3:14-17.

19. Mang boch ban’en ni bay ko fare New World Translation​—With References nra ayuwegdad ko fol babyor ni goo gadad?

¹⁹ Mu lemnag fare New World Translation of the Holy Scriptures​—With References. Bay bang riy ni ka nog e cross-references ngay, nge footnotes, nge miniconcordance ni bod yaan e “Bible Words Indexed” nge fare “Footnote Words Indexed,” nge fare Appendix ni bay 43 e kenggin riy, mab l’ag ngay e pi yaan e nam nge chart. Ku ka ba’ fare “Introduction,” ni be weliy murung’agen boch ban’en ni kan fanay ko re Bible ney ni rib fel’. Faanra kan thiliyeg e re n’en n’ey ko thin ni ga manang fan, mu athamgil ni ngam nang e pi n’en ney ma ngam fanay. Demtrug rogon, ma fare Bible e ir e tabolngin e fol babyor ni gad ma ta’, ma fare New World Translation, e ireray e version ni ri be dag fithingan Got ma be weliy murung’agen e gagiyeg ni tay fare Gil’ilungun Got.​—Psalm 149:1-9; Daniel 2:44; Matthew 6:9, 10.

20. Mang boch e deer u murung’agen e fol babyor ni goo gadad nib t’uf e fulweg?

²⁰ Chiney, sana gad ra fith ni: ‘Mang ayuw ni kub t’uf rodad ni ngad nanged fan fare Bible? Uw rogon ma rayog ni ngad ted e tayim ni fan ko fol babyor ni goo gadad? Uw rogon ma rayog ni ngad filed ban’en ni baga’ boch angin? Uw rogon ma fol babyor ni gad ma ta’ e nge rin’ ban’en ngak yugu boch e girdi’?’ Bin migid e article e ra weliy e pi n’en ney nib ga’ fan ni fan ni nguuda mon’oggad ni gadad e Kristiano.

[Footnote]

Ka Ga Manang?

• Mang e be yip’ fan e ngan “fal’eg i lemnag”?

• Susun uw rogon u wan’dad ni ngan fil e Thin rok Got?

• Susun uw rogon u wan’dad e fol babyor ni goo gadad?

• Mang boch e ayuw ni ngan nang fan e Bible ni bay rodad?

[Picture on page 23]

Girdi’ ni ma par u Bethel e kar pirieged ni ngan tababnag e rran rorad ni urngin ko beeg reb e Thin nu Bible e ra gelnagrad ko tirok Got

[Pictures on page 23]

Ra ngan motoyil ko Bible tapes u nap’an ni yibe milekag ma rayog ni ngan fanay e tayim nib ga’ fan

[Picture on page 24]

Girdi’ e ma maruwel nib elmirin ni fan e nge yog ngorad e gol. Uw feni gel e maruwel ni ga ma ta’ ni fan ni ngam fil e Thin rok Got?

[Credit Line]

Courtesy of California State Parks, 2002

[Pictures on page 25]

Fare Bible e ba machaf nra pow’iyey ko yafas ni manemus