Fol Babyor Ni Gadad Rodad E Ra Salapnagdad Ni Gadad E Pi Sensey

“Mu Fal’eg i lemnag e pi n’en ney; ma ngarim tiyan’um ngay, nge yog ni guy e girdi’ ni gubin ni ga be mon’og i yan. Nguum ayuwegem nge rogon ni ga ma fil ban’en ngak e girdi’.”​—1 TIMOTHY 4:15, 16.

1. Mang e tin riyul’ u murung’agen e tayim nge fol babyor ni ma tay e girdi’ ni goo ir?

“BAY ba ngiyal’ ni kan dugliy ni fan ko urngin ban’en,” rogon ni yog e Bible ko Eklesiastes 3:1. Rib puluw e re n’en ney ko fol babyor ni ma tay e girdi’ ni goo ir. Boor e girdi’ e mo’maw’ ngorad ni ngar fal’eged i lemnag e tirok Got ban’en nfaanra de puluw e tayim nge gin’en ni bay riy. Ni bod ni, reb e rran u tomren e maruwel rom nib gel ma kam abich ni karim fas, ga baadag ni ngam fil ban’en, ni baga’ ni faanra ga be thig u chiya rom ni ri ga baadag u mit e TV? Baga’ ni danga’. Ere, mang e ngan rin’? Ba tamilang, ni susun ni ngad mel’eged ba ngiyal’ nge gin’en ni ngan fil ban’en riy ni gad be nameg ni ngari yib angin ngodad.

2. Baga’ ni mang e tayim nth’abi fel’ ni fan ko fol babyor ni goo gadad?

² Ke pirieg boor e girdi’ ni ri kakadabul ni kakadbul e ireray e ngiyal’ ni th’abi fel’ ni ngar filed ban’en ya kab pasigan’rad. Boch e girdi’ e yad ma fil ban’en nib ngoch nap’an ko misiw ko ngiyal’ ni yima toffan boch. Mu tiyan’um ko tayim ni weliy ni fan ko tin yima rin’ ni tirok Got ni yira dag e chiney. David ni Pilung nu Israel kakrom e i yoloy ni gaar: “Mu gagiyegnag ni nggu rung’ag murung’agen e t’ufeg rom nib yul’yul’ ni kakadabul, ya bochan e be pagan’ug ngom. Mu dag ngog e kanawo’ ni nggu wan riy, ya bochan ma ka gu chibiy e yaal rog ngom.” (Psalm 143:8, NW) Isaiah ni reb e profet e ku ke dag e lem ni aram rogon u nap’an ni yog ni gaar: “Somol ni Got e ke tay nga l’ugunag e thin ni nggog, ya nge yog ni gu pi’ e athamgil nga laniyan’ e piin ni ke mulan’rad. Gubin e kadbul ni ma gagiyegnageg nge pasigan’ug ni nggu motoyil ko n’en ni nge weliy ngog.” Tin baga’ fan riy e ba t’uf ni ngad filed ban’en ma ngad nonad ngak Jehovah u nap’an ni ba pasig lanin’dad, ndemtrug ngal’an.​—Isaiah 50:4, 5; Psalm 5:3; 88:13.

3. Mang boch ban’en ni ra ayuweg ni ngeb angin ko fol babyor?

³ Maku reb nra ayuwegey ni yib angin e fol babyor e thingar dabni par nga reb e chiya nrib fel’ rogon ara sofa. Gathi ireray e n’en ni ra ayuwegey ni ngan par nib pasig lanin’uy. Nap’an ni gad be fil ban’en, mab t’uf ni ngan pug e tafinay rodad, ma faanra ngan par ko gin’en ni kaygi fel’ rogon ma baga’ ni gathi aram rogon e n’en ni ra buch. Ra nge par ni dariy lingan nib gel ma dariy ban’en nra wageynag lanin’uy e ku ra ayuwegey u nap’an ni yibe fil ban’en ma yibe fal’eg i lemnag ban’en. Ga ra fil ban’en ni bay e radio, nge TV, ara boch e bitir ni be magawonnagem ma dabi yib angin ngom nrib fel. Nap’an ni baadag Jesus ni nge fal’eg i lemnag, me yan ko gin’en ni dariy lingan ban’en riy. Maku ke weliy feni ga’ fan ni ngan gay e gin’en ndariy e girdi’ riy ni ngan meybil.​—Matthew 6:6; 14:13; Mark 6:30-32.

Fol Babyor nra Ayuwegdad Ngad Pied e Fulweg

4, 5. Mang boch e kanawo’ ni fare babyor ni Mang e Bat’uf e rayog ni nge ayuwegey riy?

⁴ Ra felan’dad ko fol babyor ni gad ma ta’ nfaanra nguuda fanayed boch e talin e maruwel nra ayuwegdad ni nge toar boch e tamilangan’ rodad ko reb e kenggin e machib u Bible, ni baga’ ni faanra kad rin’ed e n’en ni aram rogon ni fan ni ngad pied e fulweg ko boch e deer ni fith be’ u fithik’ e yul’yul’. (1 Timothy 1:4; 2 Timothy 2:23) Rogon ni ngan tababnag e fol babyor, boor e girdi’ e yad ma fil fare babyor ni Mang e Bat’uf ni Ngad Rin’ed Ku Got?,a ni chiney e kan thiliyeg ko 261 e thin. Ireray e babyor nib mom machane ba tamilang ma urngin e kan puluwnag ko Bible. Ra ayuweg e piin be bieg e re ke babyor ney ni nge nang e tin baadag Got ni ngan rin’ nib papey ni fan ko liyor nib riyul’. Machane, rogon ni kan ngongliy ra reb e kenggin e dabiyog ni ngan weliy urngin ban’en riy. Faanra fith boch e deer u fithik’ e yul’yul’ e en ni gimew be fil e Bible u murung’agen e n’en ni gimew be weliy, uw rogon ni ngam gay boch e tamilangan’ u Bible nra ayuweg nge pi’ e fulweg ko pi deer nem?

⁵ Piin ni bay e Watchtower Library rorad ko CD-ROM ko thin rorad, e rib mom ni ngan gay boor e babyor u computer nra pi’ e tamilangan’. Machane uw rogon e girdi’ ndariy e talin e maruwel rorad ni aram rogon? Ngad yaliyed l’agruw e kenggin e machib ni kan weliy ko fare babyor ni Mang e Bat’uf ni fan ni gad ra guy ko uw rogon ni ngad yoornaged e tamilangan’ rodad ma aram e rayog ni ngad pied e fulweg nib tamilang boch​—ni baga’ nfaanra bay be’ ni fith boch e deer ni, Mini’ Got, nge Jesus e bod e mang?​—Exodus 5:2; Luke 9:18-20; 1 Peter 3:15.

Mini’ Got?

6, 7. (a) Mang boch e deer e ke m’ug u murung’agen Got? (b) Mang e n’en ni fare tayugang ko teliw e de yog rok ni nge rin’ u nap’an ni be welthin?

⁶ Guruy ni 2 ko fare babyor ni Mang e Bat’uf e ra pi’ e fulweg ko deer nib ga’fan ni gaar, Mini’ Got? Ireray e n’en nrib ga’fan ya bochan dabiyog rok be’ ni nge liyor ku Got nib riyul’ nfaanra de nang ko mini’ ara be maruwaran’ ko bay Got fa dariy. (Roma 1:19, 20; Hebrews 11:6) Machane, girdi’ nu fayleng ni ga’ngin e ba thilthil e n’en ni yad be lemnag ko mini’ Got. (1 Korinth 8:4-6) Machib ko pi yuraba’ e teliw e ba thilthil rogon ni ma weliy ko mini’ Got. Pi yuraba’ e teliw ni yad ma yog ni yad e Kristiano e baga’ ni ma lemnag ni Got e reb e Trinitas. Reb e tayugang ko teliw nib gilbuguwan ni be’ nu U.S. e ke pi’ reb e welthin ni bay e kenggin ni “Ga Manang ko Mini’ Got?” machane dariy bayay ni yog fithingan Got, nyugu aram rogon ni boor yay ni ke yog boch e thin ni bay u Bible ni Hebrew Scriptures. Riyul’ ni, ke bieg fare Bible ni gathi rib tamilang ya ma fanay fare bugithin ni “Somol” ma gathi Jehovah ara Yahweh.

⁷ N’en nib ga’ fan e de tiyan’ facha’ ni reb e tayugang ko teliw u nap’an ni be fanay e thin ni bay ko Jeremiah 31:33, 34: “‘Ra bagayad e dabki fil ngak e en buguli yoror rok, nge ngak walagen, ni gaar, “Mu nang Somol” [Thin ni Hebrew, “Mu nang Jehovah”], ya yad gubin ni bay ra nanged Gag, ni mus rok e en nth’abi sobut’ nge mada’ ngak e en nth’abi tolang rorad,’ ireray e n’en ni yog fare Somol [Thin ni Hebrew, Jehovah].” Fare Bible ni i fanay e kan chuweg fithingan Got riy nib thothup, ni Jehovah.​—Psalm 103:1, 2.

8. Mang e be dag ni baga’ fan ni ngan fanay fithingan Got?

⁸ Fare Psalm 8:9 e be dag ko mang fan ni rib ga’ fan ni ngan fanay fithingan Jehovah: “Jehovah ni Somol romad, rogon feni tolang fithingam e kan guy u ga’ngin yang e fayleng!” Mu taareb rogonnag ko: “SOMOL, ni Somol Romad, uw feni fel’ fithingam u ga’ngin yang e fayleng!” (King James Version; ku mu guy fare The New American Bible, The Holy Bible​—New International Version, Tanakh—​The Holy Scriptures) Yugu aram rogon, ma rogon ni weliy fare article ni ke yan, e rayog ni nge yog ngodad “e tamilangan’ u murung’agen Got” ni faan gad ra pag nge tamilangnagdad e Thin rok. Machane mang e n’en nra ayuwegey ngan nang fan e Bible ni ngari pi’ e fulweg ko boch e deer rodad u murung’agen feni ga’ fan fithingan Got?​—Proverbs 2:1-6.

9. (a) Mang babyor e rayog ni nge ayuwegdad ni ngad weliyed nib ga’fan ni ngan fanay fithingan Got? (b) Uw rogon ni boor e piin ma thiliyeg e thin ni dar ted fan fithingan Got?

⁹ Rayog ni ngad fanayed fare babyor ni The Divine Name That Will Endure Forever, ni kan thiliyeg ko 69 e thin.b Fare guruy ni bay e kenggin ni “Fithingan Got​—Mang e Be Yip’ Fan Ma Uw Rogon ni Nga Nog” (pages 6-11) e be dag nib tamilang ni fare Hebrew Tetragrammaton (ni yib u Greek, ni be yip’ fan “aningeg e letter”) ni ke chuchugur ko 7,000 yay ni m’ug ko fapi Hebrew text kakrom. Yugu aram rogon, ma fapi tayugang nge piin ma thiliyeg e thin ko teliw ni Judaism nge Christendom e baga’ ni Bible ni kar thiliyeged e ka ra chuweged fithingan Got riy.c Uw rogon ni nga rogned ni kar nanged Got mab fel’ e tha’ u thilrad nfaanra daburad ni ngar pininged fithingan? Fithingan nib riyul’ e be bing e kanawo’ ni ngan nang e tin nib m’agan’ ngay nge ir mini’. Maku, ra aw nib m’ay fan boch e thin ni yog Jesus ni bang ko meybil ni tay ni gaar, “Chitamangimad ni ga bay u tharmiy, mu thothupnag fithingam” nfaanra dan fanay fithingan Got?​—Matthew 6:9; John 5:43; 17:6.

Mini’ Jesus Kristus?

10. Mang boch e kanawo’ ni rayog ni ngad nanged nib tamilang e yafas nge machib ni i tay Jesus?

¹⁰ Guruy ni 3 ko fare babyor ni Mang e Bat’uf e bay e kenggin ni “Mini’ Jesus Kristus?” U lan nel’ e paragraph, ma bay buchuw e thin u murung’agen Jesus, nge u uw e keb riy, ma mang fan ni keb nga fayleng. Machane, faanra ga baadag chepin e yafas rok ni polo’​—ni de un ngay fare Gospel u Bible—​ma dariy ban’en ni kab fel’ ko fare babyor ni The Greatest Man Who Ever Lived, ni kan thiliyeg ko 111 e thin.d Ken ney e bay riy e chep ni polo’ u murung’agen e yafas rok Kristus nge machib ni i tay ni kan yarmiy ni be yan u rogon e ngiyal’ ni buch, ni kan puluwnag ko fa aningeg i Gospels. Fa 133 e guruy e be weliy murung’agen e yafas rok Jesus nge machib ni i tay. Rayog ni ngam yaliy fare Insight, Volume 2, u tan e kenggin ni “Jesus Christ” ni aram e ken ni kan yarmiy u kanawoen ni ka nog e analytical ngay.”

11. (a) Uw rogon nib thil e tin ke michan’ e Pi Mich rok Jehovah ngay u murung’agen Jesus? (b) Mang boch e thin u Bible nib tamilang ni be warnag fare machib ko Trinitas, ma mang babyor e rayog ni nge ayuwegey?

¹¹ U lan fapi teliw ni Christendom ma n’en ni ri yibe maluagthinnag u murung’agen Jesus ko ir “e Fak Got” ma ku ir e “Got ni Fak”​—ni aram e maluagthin u murung’agen e n’en ni fare Catechism of the Catholic Church e ma yog e “kenggin e tin nib mith ko michan’ ko Kristiano,” ni aram e Trinitas. Bathil ko pi yuraba’ i teliw ni Christendom, ba mich u wan’ e Pi Mich Rok Jehovah ni Got e sunmiy Jesus machane gathi ir e Got. Re kenggin ney e kan weliy nib tamilang ko fare babyor ni bay e kenggin ni Should You Believe in the Trinity?, ni kan thiliyeg ko 95 e thin.e Fapi thin u Bible ni kan fanay ni fan ni nge warnag fare machib ni Trinitas e ba muun e Mark 13:32 nge 1 Korinth 15:24, 28 ngay.

12. Mang boch e deer ni kub t’uf ni ngad tedan’dad ngay?

¹² Tin ni kan weliy u lang u murung’agen Got nge Jesus Kristus e be dag boch e kanawo’ nrayog ni ngad filed ban’en riy ni fan ni ngad ayuweged e piin ni dawora nanged e thin riyul’ u Bible nge yog ngorad e tamilangan’ nib puluw. (John 17:3) Machane, uw rogon e girdi’ ni kar uned ko ulung ni Kristiano u lan boor e duw? Yugu aram rogon ni ke yoor e tamilangan’ rorad ko Bible, ma kub t’uf ni ngar tiyan’rad ngar filed e Thin rok Jehovah ni goo yad rorad?

Mang Fan ni “Ngan Tiyan’uy ni Gubin Ngiyal’”?

13. Uw rogon ni be lemnag boch e girdi’ u murung’agen e fol babyor ni goo yad nde puluw?

¹³ Boch e girdi’ ni kar manged bang ko ulung u lan boor e duw e rayog ni nge aw ni kemus ni ngar taga’gad nga daken e tamilangan’ ni kar filed u Bible ko in som’mon e duw ni kar manged Pi Mich Rok Jehovah. Mom ni nga nog ni gaar: “De t’uf ni nggu fil e Bible nib elmirin ni taareb rogon ko piin ni kefin ra uned ko tin riyul’. Mu lemnag ko in yay ni kug bieg fare Bible nge boch e babyor ni kan fek u Bible u lan e pi duw ni ke yan.” Re n’en ney e ba taareb rogon ko nga nog ni ngan gaar: “De t’uf ni nggu tiyan’ug ko uwfeni yoor e ggan ni gu ma ka’ e chiney, ya am lemnag feni yoor e ggan ni kug wa’ kakrom i yib.” Gad manang ni gubin ngiyal’ ma dowef e ba t’uf rok e ggan nib fel’ ma kan lith nib fel’ rogon ni fan ni nge par nib gel mab pasig. Ma rib riyul’ ni aram rogon u rogon ni ngan ayuweg gelngidad ko tirok Got ban’en!​—Hebrews 5:12-14.

14. Mang fan nib t’uf ni nguuda ayuweged gadad u gubin ngiyal’?

¹⁴ Ere, gad gubin, ndemtrug ko kad filed e Bible nib n’uw nap’an fa danga’, thingarda folgad ko fonow ni pi’ Paul ngak Timothy, ni ngiyal’ nem e ke ilal ko tirok Got, me mang piilal ni be tiyan’ ko maruwel rok ni gaar: “Um rin’ e pi n’ey mag tiyan’um ngay, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:15, 16) Mang fan ni ngad tedan’dad ko fonow ni pi’ Paul? Mu lemnag, ni Paul e ku ke yog ni bay e cham ni aram e “pi ban rok fare Moonyan’” [maruwel rok u fithik’ e sasalap] nge “gelngin e kan nib kireb ni bay u lan e lang.” Me Peter ni apostal e ke ginangey ni fare Moonyan’ e “be gayiy be’ ni nge longuy,” ma “be’” ni be yog murung’agen e rayog ni nge aw ni bagadad. Lem rodad ni kad gamangad e aram e n’en ni be gayiy.​—Efesus 6:11, 12; 1 Peter 5:8.

15. Mang e n’en ni be ayuwegdad ko tirok Got, ma uw rogon ni nguuda ayuweged?

¹⁵ Ere, mang e n’en nra ayuwegdad? Paul ni apostal e be puguran ngodad ni gaar: “Mu feked talin e cham ni yib rok Got, ma aram e rayog ni ngam togopuluwgad ko fare rran nib kireb ma, tomren ni kam rin’ed urngin ban’en nib fel’ rogon, me ere kam pared nib mudugil.” (Efesus 6:13) Rogon ni ngeb angin ko re talin e cham ney e gathi kemus ni ma tor nga daken feni fel’ ni kan ngongliy ya kub t’uf ni ngan ayuweg ni gubin ngiyal’. Ere, re talin e cham nem ni polo’ ni yib rok Got e ba muun ngay e tamilangan’ ko Thin rok Got nib puluw ngal’an. Biney e be dag feni ga’ fan ni ngad puluwnaged e tamilangan’ rodad ko tin riyul’ nrogon ni be dag Jehovah u daken e Thin rok ngu daken fare tapigpig nib yul’yul’ mab gonop. Ngan fil e Bible ni goo gadad rodad nge fapi babyor ni kan fek u Bible e baga’ fan ni fan ni ngad ayuweged talin e cham rodad nib spiritual.​—Matthew 24:45-47; Efesus 6:14, 15.

16. Mang e rayog ni ngad rin’ed ni nge mudugil lanin’dad ni “fa gin’en ni yima mith nga fon ko cham” ni aram e michan’ rodad e ka ba fel’?

¹⁶ Kari weliy Paul murung’agen “fa gin’en ni yima mith nga fon ko cham” ni aram e michan ni bang ko talin e cham nib ga’fan yi ir e rayog ni ngad piliged ngay urngin gan e gat’ing ni be yik’ ni be pag Satan ni aram e thin nib kireb nde riyul’ ni kan wereg u murung’agdad nge fapi machib nib togopuluw ngodad. (Efesus 6:16) Ere baga’ fan ni ngad fal’eged i guy feni gel fa gin’en ni yima mith nga fon ko cham ni aram e michan’ rodad ma mang boch ban’en ni gad ma rin’ ni ngad ayuweged ma ngad gelgad. Ni bod ni, rayog ni ngam fith reb e deer ni: ‘Uw rogon ni gu ma fal’eg rogog ni fan ko fol Bible u gubin e wik ni gu ma fanay fare The Watchtower? Kug fil ban’en nib fel’ rogon ma rayog ni nggu pi’ e “athamgil nga laniyan’uy ni ngan dag e t’ufeg ma ngan mon’og ko maruwel nib fel” ya gu ma pi’ e fulweg u nap’an e muulung ni kug fal’eg rogog nib fel’ rogon? Gu ma pithig e Bible ni nggu bieg e thin nu Bible ni goo kan ta’ e guruy nge verse ngay ma dan yoloy e thin riy nga paragraph? Gu ma pi’ e athamgil nga laniyan’ yugu boch e girdi’ ya gu ma un ko tin yima rin’ u nap’an e muulung u fithik’ e pasig?’ Ggan rodad nib spiritual e ba el el, mab t’uf ni ngan yengyeng nib fel’ rogon ni fan ni ngari fel’ rogodad riy.​—Hebrews 5:14; 10:24.

17. (a) Mang yub ni be fanay Satan ni nge kirebnagdad ko tirok Got? (b) Mang e n’en ni ra warnag e yub rok Satan?

¹⁷ Manang Satan e tin ni ba war e girdi’ ni dawori flont riy, mab gel e ban rok. Reb ko fapi kanawo’ ni ma fanay ni fan ni nge yoor e girdi’ ni nge un ko ngongol nib kireb e ke gagiyegnag ni ngari mom ni ngan guy fare pornography u TV, nge Internet, nge pi video, nge boch e babyor. Boch e Kristiano e kar paged ni nge kirebnagrad e re yub ney, ma bochan e re n’en ney e kan talegrad u boch e maruwel rorad u lan e ulung ara yib wenegan ngorad ni kab gel e kireb riy. (Efesus 4:17-19) Mang e n’en ni ra warnag e yub rok Satan nib spiritual? Thingar dabda dariyfannaged e fol Bible ni goo gadad, nge muulung rodad ni Kristiano, nge fare talin e cham rodad ni yib rok Got. Urngin e pi’ n’en ney, e be pi’ gelngidad ni ngad nanged e thil u thilin e tin nib mat’aw nge tin nib kireb ma gad ra fanenikay e tin ni be fanenikay Got.​—Psalm 97:10; Roma 12:9.

18. Uw rogon ni nge ayuwegdad “fare sayden ko kan ni thothup” ko cham nib spiritual ni gad be un ngay?

¹⁸ Faanra gad ma fil e Bible ni gubin ngiyal’, gathi kemus ni bay gelngidad nib gel ni ngad ayuweged gadad ko ngiyal’ ni keb e n’en ni ma magawonnagdad nbochan e tamilangan’ nib puluw ko Thin rok Got ya ku rayog ni ngada chamgad ngay ni ba’ angin u daken “fare sayden ko kan ni thothup ni aram e thin rok Got.” Thin rok Got e “kab m’uth nga bangi sayden ni ruw raba’ ma mm’uth ma ra yan nga thilin e yaal nge gelngin e yafas, nge fapi ulul nge n’en ni bay u lan e yil, ma bay gelngin ni nge nang e tin ni yibe lemnag nge tin ni be nameg fare gum’ircha’.” (Efesus 6:17; Hebrews 4:12, NW) Faanra kad salapgad ni ngad fanayed e re “sayden” nem, ma aram e ngiyal’ ni bay ban’en ni be wawliydad ko kireb, nrayog ni ngad guyed nib tamilang e n’en ni gowa dabi kirebnagey, ara fel’ yaan u owchey, ma nga dogned ngak e girdi’ ni ireray e wup rok faanem nib kireb ni ma yim’ e girdi’ riy. Tamilangan’ ko Bible ni kad kunuyed e ra ayuwegdad ni ngad n’aged e tin nib kireb ma ngad rin’ed e tin nib fel’. Ere gadad gubin mab t’uf ni ngad fithed gadad ni: ‘Ba m’uth e sayden rog fa ke t’ay? Kug pirieg ni ke mo’maw’ ni ngeb ngan’ug boch e thin u Bible ko ngiyal’ ni gu be weliy ban’en ngak e girdi’?’ Nguuda ayuweged nge i par nib fel’ rogon ni gad ma fil e Bible ni goo gadad rodad ma aram e rayog ni ngad togopuluwgad ngak fare Moonyan’.​—Efesus 4:22-24.

19. Mang taw’ath e nge yog ngodad nfaanra ngada uned ko fol babyor ni goo gadad nib elmirin?

¹⁹ I yoloy Paul ni gaar: “Ya urngin e thin ni bay u lan e babyor nib thothup e Got i yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” Faanra ngada tedandad ko thin ni yog Paul ngak Timothy, ma rayog ni ngad gelnaged gadad ko tirok Got ma aram e rayog ni ngad machibgad ni ba’ angin nib gel. Piin piilal nge ministerial servant ni kar ilalgad ko tirok Got e yad e taw’ath nge ayuw ko ulung, ma rayog ni nguud pared nib mudugil e michan’ rodad.​—2 Timothy 3:16, 17; Matthew 7:24-27.

[Footnotes]

Ka Ga Manang?

• Mang boch ban’en ni ra ayuweg be’ ko fol babyor ni goo ir meb angin?

• Mang oloboch e rin’ e piin ma thiliyeg e Bible u murung’agen fithingan Got?

• Mang thin nu Bible e ga ra fanay ni nge micheg ni de riyul’ e machib ko fare Trinitas?

• Mang e thingarda rin’ed ni fan ni ngada ayuweged gadad ko ban rok Satan, ni yugu aram rogon ni gadad e tin riyul’ e Kristiano u lan boor e duw?

[Pictures on page 27]

Rogon ni ngeb angin e fol babyor ni goo gur, e ba t’uf ni ngam par u bang nib fel’ ndariy lingan ban’en riy nra magawonnagem

[Pictures on page 30]

Ba m’uth e “sayden” rom fa ke t’ay?