Pi’ Ban’en Nge Taw ko Ngiyal’ ni Kam Gafgow Riy

“RAYOG ni nga mog ni gag be’ ni gub taman; ma dab gu dabuy. Gu be man ni fen Jesus.” Aram e thin rok ba tamachib ko Protestant ni be ta’ gelngin ba maluagthin ni i chel u murung’agen rogon e salpiy ko teliw. Ba dake faanra nge fel’ rogon e teliw ma ba t’uf ni nge yog e salpiy ni boor ni nge ayuweg ma aram e rayog ni fel’ rogon. Ba’ puluwon e girdi’ nib t’uf ni ngan pi’, nge tempel nib t’uf ni ngan toy ma uni tay ni yibe fal’eg rogon nga i par nib fel’, nge machib ni yibe tay i yan ni kub t’uf ni ngan fanay e salpiy ngay. Uw rogon min pirieg e re salpiy nem nib t’uf?

Boor e galesiya, e aram e taab guruy u ragag guruy ko n’en ni kan thognag ni yibe pi’ ko galesiya e ir e fulweg riy.a I yog Norman Robertson ni reb e tamachib ni gaar, “Taab guruy u ragag guruy ko n’en ni kan thognag ni yima pi’ ko galesiya e aram e kanawo’ rok Got ni ma yognag e salpiy ko am rok u fayleng.” “Aram rogon kanawoen ni ke ngongliy ni nge bung rogon fare Gospel ni ngan machibnag.” Der ma tamra’ ni nge puguran ngak e piin ni yad be fol rok e maruwel rorad ni ngar pied ban’en, i ta’ ir ngay ni gaar: ‘Pi’ ba guruy u ragag guruy ko tin kam thognag ko galesiya e gathi ban’en ni ngam rin’ ni bochan e rayog puluwon rom ni ngam rin’. Ya ban’en ni ga be rin’ ni aram e ga be fol. Faanra damur pi’ ba guruy u ragag guruy ko tin kam thognag ko galesiya ma aram e rib tamilang ni aram e kam th’ab e motochiyel rok Got. Taareb rogon ko kam fek e salpiy kam fanay ko tirom ban’en ni de fel’ ya salpiy nib mil suwon ku be’.’​—Tithing—​God’s Financial Plan.

Baga’ ni ra taareban’um ngay ni pi’ ban’en e thingari mang bang ko liyor ko Kristiano. Machane, kam pirieg ni gelfen i ning e salpiy e machalbey ngay, fa ku ra mang ban’en ni dabum fa? Be’ nu Brazil ni ba tamachibnag e tirok Got ni Inácio Strieder e yog nib kireb e rok e pi galesiya ni yad be fanay fare taab guruy u ragag guruy ko n’en ni yibe pi’ ko galesiya ni aram e n’en ni ba yib ban’en ni ngaur “fanayed ko tini yad be magawon riy” ma aram e ke ta’rad ni “yad be ngongol ni de puluw ko motochiyel, ma ba gel e thin rorad, ma kar th’abed e motochiyel rok Got.” Me yog, ni angin, e aram e “piin dariy e maruwel rorad, nge piin ni kem’ figirngirad, nge piin ni ma par ko yungi n’en ni ma par e girdi’ ni gafgow riy, e piin dara lemgad nib puluw e kar turguyed u wan’rad ni ke pagrad Got ma yibe tawasariyrad ni ba’ oren e n’en ni ngar pied ngak e ‘ani tamachib’ me par e tabinaw rorad ngar m’ad ko bilig.”

Rayog ni maruwar u wan’um ni nge lugum: ‘Gur pi galesiya ni be tay gelngin e nga uni pi’ ba guruy u taab guruy ko tin kan thognag ko galesiya e ba puluw rogon ni yad be rin’ nrogon u Bible? Fa rayog ni boch e teliw e yad be fanay madgun e gechig rok Got ni bochan ni ngar feked e salpiy ko girdien e galesiya rorad ni urngin u fithik’ e tawasar? Gur ri riyul’ ni Got e be lemnag ni ngad pied ban’en nge taw ko ngiyal’ ni dakuriy ban’en rodad, ni bod ni ma yog boch e girdi’?’

[Footnote]