“Mu Daged Ni Gimed Be Pining E Magar”

“Mu paged e gapas rok Kristus nge gagiyegnag lanain’med mi gimed dag ni . . . Gimed be pining e magar.”​—KOLOSE 3:15.

1. Mang gadad ra guy nib thil u thilin e ulung ko Kristiano nge fare fayleng ni ba’ u tan e gagiyeg rok Satan?

ULAN FA 94,600 e ulung ko Pi Mich rok Jehovah u fayleng i yan, e gad ra pirieg ni bay e lem riy ni ngan pining e magar. Ra reb e muulung ma ma tabab me yan i mus ko meybil nib muun ngay ni yibe yog e magar ngak Jehovah. Baga’ ni gadad ma rungaag e “kammagar,” “dariy,” ara ban’en ni aram rogon yugu yima yog ni fel’ yangaren nge pillibthir maku arrogon e tin nib biech nge tin ke n’uw nap’an e Pi Mich u nap’an ni yad ra un ko liyor nge falfalan’ ko piin chon e ulung rorad. (Psalm 133:1) Uw fene rib thil e re ney ko lem ni siin ni ke garer u fithik’ e girdi’ ni yoor ‘ni dar nanged Jehovah ma dar ma folgad ko fare thin nib fel’’! (2 Thessalonika 1:8) Gadad be par u lan ba fayleng ni danir pining e magar riy. Dabni gin ko re ney u nap’an ni gad ra lemnag e ani ir e got ko re fayleng ney​—ni Satan ni fare Moonyan’, ni ir tha’bi gel ni ma dag e lem ni goo ir e be lemnag ir, nge lem rok ni tolang nge lem ni togopuluw ni ke garer ko girdi’!​—John 8:44; 2 Korinth 4:4; 1 John 5:19.

2. Mang e n’en ni yibe ginangdad riy nib t’uf ni ngad tayedan’dad ngay, ma mang e pi deer nib t’uf ni ngad lemniged?

² Bochan ni ke liyegdad e fayleng rok Satan, ma aram e rib t’uf ni ngarda kol ayuwgad ni nge dabi kirebnagdad ngongolen e fayleng. U lan e bin som’mon e chibog, me apostal Paul e puguran ngak e pi Kristiano nu Efesus ni gaar: “Re ngiyal’ i n’em e um marod u kanawoen e kireb nu fayleng; um folgad rok e en ni ir e pilung rok e pi kan nu lan e lang, ni fare kan ni ir e chiney e be gagiyegnag e piin ndarir folgad rok Got. Ma bin riyul’ riy e gadad gubin ni ud moyed ni gadad bod yad, maud pired ni gadad be ngongol nrogon e tin ni gadad be ar’arnag, ma gadad be rin’ e pi n’en ni ir e mm’agan’ dowdad nge lanin’dad ngay; maku arrogon ni ud pired ni ke mudugil ni ngad gafgowgad ko damumuw rok Got ni bod urngin e girdi’.” (Efesus 2:2, 3) Re n’em e kab riyul’ rok boor e girdi’ e chiney ni aram rogon. Ere, ba uw rogon ma rayog ni nga i par lanin’dad ni be pining e magar? Mang e ayuw ni ra pi’ Jehovah? Mang e pi n’en ni rayog ni ngad daged riy ni riyul’ nri gadad be pining e magar?

Pi N’en Nfan ni Ngan Pining e Magar

3. Bochan e mang ni gadad be pining e magar ngak Jehovah?

³ I Jehovah Got, ni ir e Sunmiydad ma en Ta Pi’ e Yafas, ni aram e ani ngaud pininged e magar ngak, ni rib ga’ ni gaad ra lemnag oren e pi taw’ath ni ke pi’ og nga dakendad. (James 1:17) Gubin e rran, ma ngad pininged e magar ngak Jehovah ni bochan ni ka gadad ba fas. (Psalm 36:9) Ke liyegdad, ni gadad be guy bokum e mich ko pi n’en ni i maruweliy Jehovah nga pa’, ni bod e yal, nge pul, nge t’uf. Soko ko re fayleng rodad ney nib sug ko pi yongo’olen e but’ ni ma ayuweg e yafas, nge rarogon e nifeng riy nge rogon e pi n’en ni ma chel ngaki sul biyay nga daken e n’en ni ka ma rin’ ni rib mo’maw’ rogon nni ngongliy e urngin ni be micheg fare malfith rodad ngak e Chitamangidad nu tharmiy ni rib tarunguyey. I tang David ni Pilung ni gaar, “Somol ni Got rog, pire’ ban’en ni yira ngat ngay ni kam ngongliy ni fan ngomad, dariy be ni bod gur Boor ban’en nib fel’ ni ke m’ay i lemnag rom ni fan ngomad. Ra nggu weliy murung’agen ni gubin ma ra yan i aw ndabiyog rog ya kaygi pire’.”​—Psalm 40:5.

4. Mang fan ni thingar dogned e magar ngak Jehovah nib bochan ni gad ma falfalan’ ni gadad ma chag ngaud falfalan’gad u lan e ulung rodad?

⁴ Yugu aram rogon ni dad pired ko paradis ni yira guy, ma pi tapigpig rok Jehovah e chiney e yad be falfalan’ ni yad be par u lan ba paradis nib spiritual. U lan e pi Tagil e Muulung rodad nge pi muulung rodad nib gagang, e gad be pirieg riy wom’engin e kan ni thothup rok ni be maruwel u fithik’ e piin gadad nga taab mich. Rriyul’, nap’an ni yibe machibnag e girdi’ ni buchuw ara dariy ban’en u murung’agen e teliw ni yad manang, ma boch e Pi Mich e yad ma yog ni ngan guy e n’en ni weliy Paul u lan e babyor rok ni pi’ ngak e girdi’ nu Galatia. Som’mon ma yad ma yog ni ngan guy rogon e “maruwel ko dowef” mar fithed e piin ni yad be motoyil ko mang e kar nanged. (Galatia 5:19-23) Oren e girdi’ e ma taareban’rad ngay ni re n’ey e ke aram rogon e par ko girdi’ e chiney. Ma nap’an ni yira dag rarogon fare wom’engin e kan ni thothup rok Got ngorad nge ngiyal’ ni kan piningrad nga tagil e muulung ko gin yad be par riy ni nge mang yad ra guyed e mich ko re ney, ma boor yad e ba pey ni ma yog ni gaar: “Rriyul’ ni ba’ Got u fithik’med.” (1 Korinth 14:25) Ma re n’ey e gathi kemus ni yira pirieg ko pi tagil e muulung ko gin yibe par riy. Demtrug e gini ga ra milekag ngay, ma nap’an ni ga ra mada’nag reb fa pi Mich rok Jehovah ni ke pag e nel million urngirad, maku fare lem nib falfalan’ e ka ga ra pirieg. Rriyul’, re chagil ney ni be ubung ma be pi’ gelngiy e aram fan ni ngan pining e magar ngak Jehovah, ni faen ni be pi’ gelngin ngay ni nge yog.​—Zephaniah 3:9; Efesus 3:20, 21.

5, 6. Uw rogon ni ngad daged ni gadad be pining e magar ko fare taw’ath rok Got ni tha’bi ga’, ni aram fare biyul?

⁵ Bin tha’bi ga’ e taw’ath, nge bin tha’bi dariy thibngin e taw’ath ni ke pi’ Jehovah, e bin baaram ni Fak ni pumoon, ni Jesus, ni ir e ni pi’ ni biyul. I yoloy apostal John ni gaar, “Pi tafager rog ni gimed ba t’uf rog, faanra ereray rogon ni gadad ba t’uf rok Got, me ere susun e nge bagadad me t’uf rok bagadad.” (1 John 4:11) Arrogon, gad be dag ni gadad be pining e magar ngak Jehovah ya nga kud tayed e yafas rodad u reb e kanawo’ ni be m’ug riy e t’ufeg ngak boch e girdi’.​—Matthew 22:37-39.

⁶ Ku rayog ni ngad filed boch rogon ni ngad daged ni yibe pining e magar ni ngad lemniged rogon e n’en i rin’ Jehovah nga Israel kakrom. Bochan fare Motochiyel, ni faani pi’ ko fare nam u daken Moses, e boor ban’en riy ni fil Jehovah ngak e girdi’. U daken “kenggin fare tamilangan’ nge tin riyul’ u lan fare Motochiyel,” ma boor ban’en ni gad ra fil ni ra ayuwegdad ngad leked e fonow rok Paul ni gaar: “Mu daged ni gimed be pining e magar.”​—Roma 2:20; Kolose 3:15.

Dalip Ban’en ni Yira Fil ko fare Motochiyel Rok Moses

7. Uw rogon fare yaram ni ngan pi’ taab guruy u ragag guruy ko tini kan thognag e bungnag rogon yu Israel ni ngar daged ni yad be pining e magar ngak Jehovah?

⁷ U lan fare Motochiyel rok Moses, e dag Jehovah dalip e kanawo’ ni rayog ni nge dag piyu Israel ni rriyul’ ni yad be pining e magar nga felngin. Bin som’mon, e immoy fan ni ngan pi’ taab guruy u ragag guruy ko n’en ni kan thognag. Taab guruy u ragag guruy ko n’en ni yib ko but’, nge chag nga “taab guruy u ragag guruy ko gamanman ni yima chuguliy nge yu ran’ i gamanman,” e nge par “nib n’en nib thothup ngak Jehovah.” (Leviticus 27:30-32) Nap’an ni ra fol yu Israel riy, ma boor e taw’ath ni ra pi’ Jehovah ngorad. I gaar, “‘Mfeked i yib nga tempel taab guruy u ragag guruy e tin ni ba’ romed nrogon, nge yib e ggan ngaram. Mu skengniged gag, mi gimed guy ni bay gu bing mban e tharmiy mu gu puog nga dakenmed e pi n’en nib fel’ nge pag e fol riy.’”​—Malaki 3:10.

8. Mang e ba thil ko maligach ni pi’ ban’en ni rogon ni ke sum u laniyan’ be’ nge pi’ taab guruy u ragag guruy ko tin kan thognag?

⁸ Bin l’agruw, ban’en ni kub muun ko ba t’uf ni ngan pi’ taab guruy u ragag guruy ko tin kan thognag, e yarmiy Jehovah ni fan ngak yu Israel ni ngaur pied ban’en ni ra be’ ma ir e ke sum u laniyan’ ni nge rin’. Me yog ngak Moses ni nge yog ngak piyu Israel ni gaar: “Gimed ra yib nga lan fare binaw ni gin gu be fekmed i yan ngay, ma thingari bi m’ug u nap’an ni gimed ra kay yugu demtrug reb e pi flowa ko re binaw nem, ma thingar mu pied e foth rok Jehovah.” Boch e tin som’mon i wom’engin e woldug ni “flowa ni de fel i bilig ni bod e cake nib tololobuy” rorad e ngan pi’ boch “ni aram e kan pi’ ngak Jehovah” ni n’umngin nap’an e pi mfen rorad. Mu tiyan’um ngay ni pi wom’engin e woldug ni som’mon ney e de mudugil urngin ni ngan pi’. (Numbers 15:18-21) Machane nap’an ni ra pi’ piyu Israel ban’en ni kar pied ni yad be pining e magar, ma kan dugliy ngorad ba taw’ath ni ra pi’ Jehovah. Ba yaram ni kub chugur ni nge aray rogon e ni guy nib chag ko fare tempel ni faani piliyeg e changar rok Ezekiel nge gu’. Gad ra poy ni gaar: “Tin som’mon ko urngin ko tin som’mon i wom’engin e woldug ni ke lol ko urngin ban’en nge urngin e n’en ni gimed ma pi’ ko urngin e pi n’en ni gimed ma pi’​—ko fapi prist e bayi mil fan ngak; nge tin som’mon i wom’engin e woldug ko ggan romed ni de fel’ i blig e thingar mu pied ko prist, ni bochan ni nge k’aring reb e taw’ath nge par u daken e naun romed.”​—Ezekiel 44:30, NW.

9. Mang e ke fil Jehovah u rogon e yaram ko ngan kunuy e tin ni ka magey e woldug?

⁹ Bin dalip, e ke yarmiy Jehovah rogon ni nga uni kunuy e tin baaray i wom’engin e woldug ni ke magey u tomuren ni kan mu’ i tar’ ni som’mon. I pow’iy Got rogon ni gaar, “Faan gimed ra kunuy e tin ni ke yib ko woldug romed ma dabmu feked nge mada’ nga mirichilen e ni bay ko woldug romed, ma dabmu sulod ngam kunuyed e tin ni ke magey u but’. Ma dab kum sulod nga fithik’ e woldug romed ni grapes ngam kunuyed e grapes nda ni guy ngan t’ar ara mfeked e tin ni mul nga but’, ya ngam paged nge kay e girdi’ ni gafgow nge girdi’ u yugu boch e nam ni be par u fithik’med, yi gag e Somol ni Got romed.” (Leviticus 19:9, 10) Kub yay, ku dariy ba fol ni kan dugliy. Ra be’ u Israel ma ke mil fan ngak ko uw oren e nge pag fan ngak e piin ni gafgow. Solomon ni Pilung nib gonop e ki weliy ni aram rogon ni gaar: “En ni be dag e runguy ngak e ani gafgow e be pi’ ngak Jehovah, ma Ir era pi’ puluwon ngak.” (Proverbs 19:17, NW) Aray rogon ni fil Jehovah rogon e runguy nge rogon ni ngaun lemnag boch e girdi’ ni fan ngak e piin ni yad ba gafgow.

10. Mang boch angin ni yib ngak e girdi’ nu Israel u nap’an ni dakur daged ni yad be pining e magar?

¹⁰ I fal’eg Jehovah waathan piyu Israel u nap’an ni u ra folgad ngaur feked i yib taab guruy u ragag guruy ko pi n’en ni yad be thognag, mu ur pied ban’en ni yad be sum ko lem rorad, mu ur pied ban’en ni fan ngak e piin ni gafgow. Machane nap’an ni daki dag e girdi’ nu Israel ni yad be pining e magar, ma aram ma daki ur fel’gad u owchen Jehovah. Re n’ey e fekrad i yan ko gafgow nib gel me munmun min fekrad nga reb e nam ni kalbus. (2 Chronicles 36:17-21) Ere, mang e pi n’en ni ngad filed riy?

Rogon ni Gad ma Pining e Magar

11. Mang kenggin i kanawoen ni rayog ni ngad daged ni gadad be pining e magar ngak Jehovah?

¹¹ Kenggin i kanawoen ni rayog ni nga dogned e sorok ngak Jehovah nge ngad pininged e magar ngak e kub chagil ko “maligach.” Riyul’, ya bod gadad e Kristiano, e da kud moyed u tan fare Motochiyel rok Moses, ni dabisiy ni ngaur pied e maligach ni gamanman ara woldug. (Kolose 2:14) Ma yugu aram rogon, me Paul ni apostal e i ta’ ir ngak e piin Kristiano nu Hebrew ni gaar: “Nga uda pied e maligach ngak Got ni gad be yog e sorok ngak, ni aram e, wom’engin i dapi’ luguney ni ir e be wereg fithingan.” (Hebrews 13:15, NW) Ra udi fanayed gelngidad nge tin ba’ rodad ngaud pied e maligach ni gadad be pining e sorok ngak Jehovah, ni demtrug ko ngiyal’ ni yibe machibnag e girdi’ ni yoor ara “muulung ko yoor” ko piin ni Kristiano, ma rayog ni ngada pininged e magar ni yib u gum’irchadad ngak e Chitamangin nu tharmiy ni ma t’ufegey, ni Jehovah Got. (Psalm 26:12) Gad ra rin’ ni aram rogon, ma mang e gad ra fil ko pi kanawo’ ni i pining piyu Israel e magar riy ngak Jehovah?

12. Ere rogon e maruwel rodad ni ran i aw ni gadad e piin Kristiano, mang e n’en ni gad ra fil ko yaram ko fare ngan pi’ taab guruy u ragag guruy ko n’en kam yognag?

¹² Bin tha’bi som’mon, ni bod kad weliyed, fare taab guruy u ragag guruy ko n’en kam yognag e gathi ra be’ ma ir rok ko nge rin’ fa danga’; ra be’ nu Israel ma ngari rin’ e re n’ey. Ma gadad ni Kistiano, e bay e maruwel rodad ni nga uda uned ko pi muulung. Tiney e ngongol e gathi ban’en ni ngam guy ko ngam rin’ fa danga’. U lan e bin ga’ e yiiy rok Jesus u murung’agen e ngiyal’ ko tomur, me yog nib mudugil ni gaar: “Re thin nib fel’ ney ni murung’agen fare gil’ilungun i yira machibnag u ga’ngin yang e fayleng ni nge urngin e nam; me nang fini yib e tomur.” (Matthew 24:14; 28:19, 20, NW) Ma rogon murung’agen e pi muulung ko Kristiano, e ni thagthagnag ngak apostal Paul nge yoloy ni gaar: “Ere nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndabda paged e muulung rodad, ni bod rogon ni be rin’ boch e girdi’. Ma nge bagadad me pi’ athamgil nga laniyan’ bagadad, ngari gel ni fan gimed be guy chirofen ni bay yib Somol riy e be chugur.” (Hebrews 10:24, 25) Gad ra dag ni gadad be pining e magar nib gel ngak Jehovah u nap’an ni faan gad ra falfalan’ ngad adaged e maruwel rodad ni ngaud machibgad ma gad be skulnag e girdi’ maku arrogon ni gad be chag ngak pi walagdad ni gubin ngiyal’ ko pi muulung ko ulung, ma gad be sap ko re n’enem nib taw’ath ma ba tay fan.

13. Mang e n’en ni yira fil ni ke yib ko yaram ko pi ban’en ni sum u lanin’um nge mokun woldug ni ke magey?

¹³ Makub chag ngay, ni ku ra yib felngin ngodad ni gad ra lemnag fa gal ni baaram e yaram ni faani piyu Israel e yad ra dag ni yad be falfalan’ ngay​—ni aram e pi’ ban’en ni yad e be sum ko lem rorad nge mokun woldug ni ke magey. Ni rogon ni ba thil ko pi taab guruy u ragag guruy ko tin kan thognag, ni ban’en ni ngan rin’ ni dabisiy ni kan tamilangnag kan dugliy, ma yaram ko ngan pi’ ban’en ni sum ko lem ni ngan pi’ nge mokun woldug ni magey e dariy oren nib mudugil. Rogon riy, e ke pag rogon toarngin feni fel’ u wan reb e tapigpig rok Jehovah ni ba’ u lan i gum’irchaen ni nge k’aring nge ngongliy. Reb e kanawo’ ni rayog i taarebnag ngay, e yugu aram rogon ri gadad manang ni ngaun i un ko machib nge ma un ko muulung ko pi Kristiano e bogi n’en ni rib ga’ fan ko maruwel rok urngin e pi tapigpig rok Jehovah, ere gad ma un ko pi n’em u polo’ i gum’irchadad nge lanin’dad ni ri gad baadag fa? Gad be sap ko pi n’enem ni ba puf rogon ni keb ngodad ni nga dogned e falfalan’ rodad ni keb u gum’irchadad nga urngin e pi n’en ni ke rin’ Jehovah ni fan ngodad fa? Gad be un ko pi maruwel ney ni rogon ni ngan rin’, ngeni taw nga rogon ni ra bagadad ma rayog rok ni nge rin’ fa? Ara gad be sap nga urngin e pi n’eney ni kemus ni yibe rin’ ni bochan ni ka nog ni thingar ni rin’? Pi n’eney, e riyul’, ni aray e pi deer ni thingari bagadad mang e fulweg ni ir rok. Apostal Paul e rogon ni yog e ni gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge falfalan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.”​—Galatia 6:4.

14. Mang e n’en ni be finey Jehovah ngodad ko pigpig ni gad be ta’ ngak?

¹⁴ Jehovah Got e ri manang rogodad. Manang rogon e yugu ni gad ma mus riy. Ma ta’ fan e pi maligach, nib ga’ ara ba achig, ni ma pi’ e tapigpig rok ni m’agan’rad ngay. Der ma finey ni nge gadad gubin ma gad pi’ ni taareb oren, maku dabiyog ni ngad rin’ed ni aram rogon. Nap’an ni yibe weliy murung’agen i pi’ e tin u fayleng ban’en, me yog apostal Paul ngak e pi Kristiano nu Korinth ni gaar: “Ya faanra ba pasigan’med ngay ni ngam pied ban’en, ma ra fek Got e tin ni kam pied nib taw’ath nrogon e tin nrayog ni ngam pied, ma gathi tin ndariy romed.” (2 Korinth 8:12) Re kenggin e motochiyel ney e taareb rogon u gubin e pigpig rodad ngak Got. N’en ni ma fal’eg e pigpig rodad nge fel’ u wan’ Jehovah e yima dugliy, ni gathi be yan u rogon ni gad be rin’​—u fithik’ e falfalan’ nge polo’ i gum’irchadad.​—Psalm 100:1-5; Kolose 3:23.

Mu Gelnag Me Par Rom e Lem ko Pioneer

15, 16. (a) Mang e peth ni ba’ u thilin e machib ko pioneer nge pining e magar? (b) Uw rogon e piin baaram ni dabiyog ni ngar uned ko pioneer ni ngar daged e lem ko pioneer?

¹⁵ Reb e kanawo’ ni ba’ puluwon ni ngad daged ni gad be pining e magar ngak Jehovah e ngad uned ko machib ni nge polo’ e tayim rodad. T’ufeg ngak Jehovah nge gelngin e falfalan’ ko runguy rok ni dariy n’umngin nap’an e ke k’aring boor e tapigpig ni kar ogniged yad ka ra thiliyeged rogon e par rorad nib gel ni nge yog ni yoor e tayim ni ngar pigpiggad ngak Jehovah. Bochi yad e ke bung rogon ni nge mang regular pioneer, ni aram oren e awa ni nge thognag e 70 u reb e pul ni be machibnag fare thin nib fel’ ma be fil ko girdi’ e tin riyul’. Ma boch e girdi’, ni yu ngiyal’ ma boor ban’en ni dabiyog ni ngar rin’ed, e yu ngiyal’ ma yad ma guy rogon ni ngar thognaged 50 e awa u reb e pul ko machib ni ba pioneer ni ayuw.

¹⁶ Machne uw rogon fa tin baaram e tapigpig rok Jehovah ni yad boor ni dabiyog ni ngar pigpiggad ni regular pioneer ara pioneer ni ayuw? Rayog ni ngar daged ni yad be pining e magar ni aram e ngar gelniged me par rorad e lem ko pioneer. Uw rogon? Aram e ngaur pied e athamgil nga laniyan’ e piin ni be yog ni yad be pioneer, nge ngaur tayed nga laniyan’ pi fakrad ni ngar adaged ni ngar nameged nge yog ngorad e binem e maruwel ni ngar pigpiggad ni polo’ e tayim, nge ngar athamgilgad ngar uned i wereg e machib ni rogon ni rayog rorad. Pi n’en ni gad ma pi’ ko machib ni gad ma tay e baga’ ni ma yan u rogon feni toar nga lan i gum’irchadad ni gadad be pining e magar ni fan ko pi n’en ni ke rin’ Jehovah, nge tin ni ka be rin’, nge tin ka ba’ ni bay fini rin’ ni fan ngodad.

Ngad Daged Rogon I Pining e Magar ko “Tin nib Ga’ fan ni Ba’ Rodad”

17, 18. (a) Uw rogon ni gad ra dag rogon ni gad be pining e magar u daken “pi n’en nib ga’ fan ni ba’ rodad”? (b) Uw rogon u laniyan’ Jesus e n’en ni ke pi’ fare pin ni kem’ e pumoon rok, ma mang fan?

¹⁷ “Mu ta’ fan Jehovah ko tin nib ga’ fan ni ba’ rom,” ara’ rogon ko Proverbs 3:9, miki gaar, “nge tin som’mon i wom’engin urngin e tin ga be ngongliy.” Pi tapigpig rok Jehovah e daki t’uf ni ngar pied taab guruy u ragag guruy ko tin kar thognagniged. Ya rogon riy, e yoloy Paul nge yan ngak e ulung nu Korinth ni gaar: “Ere ra be’ ma nge pi’ ban’en nrogon ni ir e ke dugliy u laniyan’, ndabi kireban’ ngay ni ke pi’ fa reb e finey ni ban’en nthingari rin; yi Got e ba t’uf rok e en ni pi’ ban’en u fithik’ e falfalan’.” (2 Korinth 9:7) Ra ud pied paadad ko salpiy ni fan ko maruwel ni machib ni fan ko Gil’ilungun maku be dag ni gadad be pining e magar. Falfalan’ ni be yib u gum’irchadad e ra k’aringdad ni ngaud rin’ed ere n’eney ni gubin ngiyal’, ni sana rayog ni nge gubin e wik ma gad fal nga bang reb e salpiy, ni bod ni i rin’ e tin som’mon e Kristiano.​—1 Korinth 16:1, 2.

¹⁸ Gathi urngin e n’en ni kad pied e be dag rogon ni gadad be pining e magar ngak Jehovah. Ya rogon riy, e rogon e lem rodad ni kad pied. Aray e n’en ni guy Jesus u nap’an ni faan be yaliy e girdi’ ni yad be yib ron’ed e taw’ath rorad nga lan fare kahol ni tafen e salpiy u tempel. Nap’an ni guy Jesus be’ ni ppin nib gafgow ni ke yim’ e pumoon rok ni be yin’ “l’agruw chi salpiy ni wasey ni rib sobut’,” me gaar: “Nggog ngomed, nre ppin ney nib gafgow ya ke yim’ figirgnin, e ir e boor e salpiy ni ke yin’ ko tin ni ke yin’ urngin e girdi’. Ya yad e kar pied e salpiy ni kar feked ko salpiy ni ba’ rorad ni pire’, machane ir e aram feni gafgow ma ke pi’ urngin e chi salpiy ni ba’ rok ni ir e nge abich riy.”​—Luke 21:1-4.

19. Mang fan nib fel’ ni nga kuud fal’eged i guy rarogon kanawoen ni gad ma dag ni gad be pining e magar?

¹⁹ Re n’ey ni kad filed u rogon ni nguu daged ni gadad be pining e magar e manga yigi gurnagdad ngad fal’eged i yaliy rarogon kanawoen ni gad ma pining e magar. Gur sana ku rayog ni ngada gelniged boch e maligach rodad ni gad be tolangnag Jehovah maku arrogon e ayuw ni gad be pi’ ni tin u fayleng ban’en ko fare maruwel ko fayleng? Gin kemus rogodad riy, ma ri rayog ni nge mich u wan’dad ni Chitamangidad ni rib gol ma tufegey ni, Jehovah, e ri ra falfalan’ ni gadad be dag ni gadad be pining e magar.

Ka Be Yib Ngan’um?

• Mang boch i fan ni thingar ud pininged e magar ngak Jehovah?

• Mang e n’en kad filed ko ngan pi’ taab guruy u ragag guruy ko tin kan thognag, nge pi’ ban’en ni gur e lem rom, nge woldug ni ke magey?

• Uw rogon ni ngad gelniged e lem ni pioneer?

• Uw rogon ni ngad fanayed e “tin nib ga’ fan ni ba’ rodad” ni ngan pining e magar ngak Jehovah?

[Picture on page 27]

“Urngin e pi taw’ath nib fel’ nge urngin e tin ni rib fel’ e yib u lang”

[Pictures on page 28]

Mang dalip ban’en ni ngan fil ko fare Motochiyel ni kan dag u roy?

[Pictures on page 30]

Mang maligach e rayog ni ngad fal’eged?