“Um Pininged e Magar Ngak Got u Lanin’med”
1 Nap’an ni golnag Jesus ragag e pumoon ni bay e daraw rorad ma kemus ni taab bagayad e sul nge pining e magar ngak. Me fith Jesus ni gaar: “Ragag e pumoon ni kan chuweg e daraw rorad; me ere ba uw mereb i yad? (Luke 17:11-19) Rib ga’ fan ni ngad pininged e magar ngak Jehovah Got ni Chitamangidad ni fan nga urngin e tow’ath nrib manigil ni be pi’ ngodad!—Kol. 3:15; Jas. 1:17.
2 Mang boch ban’en ni ngad pininged e magar riy? Gad ma tay fan fare biyul’ ni aram e bin th’abi ga’ e tow’ath ni ke pi’ Got ko girdi’. (John 3:16) Ku gad ma pining e magar ngak Jehovah ni bochan e ke ayuwegdad ke yog nda chuchugurgad ngak. (John 6:44) Taareban’ ni bay u thildad e pi Kristiano e ku aram ban’en ni gad ma pining e magar riy. (Ps. 133:1-3) Dariy e maruwar riy ni ku boor e tow’ath ni ke pi’ Jehovah nrayog ni ngam lemnag. Dubdad ni ngad boded piyu Israel nra paged talin e pi n’en ni rin’ Jehovah ni fan ngorad!—Ps. 106:12, 13.
3 Ngam Dag ni Gabe Pining e Magar: Yugu aram rogon ni gubin fapi pumoon nra felfelan’gad ko n’en ni rin’ Jesus ngorad, machane kemus ni taab bagayad e dag ni be pining e magar ngak. (Luke 17:15) Taareb rogon ya ku gad be dag ni gad be pining e magar ni faan gad ra un ko machib u fithik’ e pasig. Faanra rriyul’ ni gad be pining e magar u gubin ban’en ni ke rin’ e Chitamangidad nu tharmiy ni fan ngodad ma ra k’aringdad ni ngad folwokgad rok u rogon ni ma dag e t’ufeg nge gol ni aram e ngad weliyed murung’agen ngak e girdi’. (Luke 6:45) Maku faan gad ra weliy ngak e girdi’ murung’agen e pi ‘n’en ni yira ngat ngay ni ke ngongliy Jehovah ni fan ngodad’ ma ra gel e t’ufeg nge tayfan rodad ngak.—Ps. 40:5.
4 Ngan Ayuweg e Girdi’ Nge Yog ni Kur Pininged e Magar Ngak Got: Susun ni ngad tedan’dad ngad ayuweged pi fakdad nge piin gad be fil e Bible ngorad ngar ted fan Got. Boor e kanawo’ nrayog ni nge rin’ e pi gallabthir e re n’ey riy, ni bod rogon e ngiyal’ ni yad be yaliy pi fakrad e pi n’en ni ke sunmiy Jehovah. (Rom. 1:20) Nap’an ni gad be fil e Bible ngak be’ ma rayog nda fithed ngak ni nge lungudad, “Mang e be fil ere n’ey ngodad u murung’agen Jehovah?” Nap’an ni be gel iyan rogon ni be pining facha’ e magar ngak Got, ma aram e ku ra ga’ e t’ufeg rok ni fan ngak Got me rin’ e tin nib m’agan’ ngay.
5 Ngiyal’ ney ko tin tomren e rran e boor e girdi’ ndariy fan Got u wan’rad ma dakurur pininged e magar ngak. (2 Tim. 3:1, 2) Rra felan’ Jehovah ni nge guy e pi tapigpig rok ni yad be pining e magar ngak ma yad ba pasig ko machib!—Jas. 1:22-25.