Reb e Babyoren e Chur ni Yi Baadag

BA EXPLORER ni Richard E. Byrd lal yay ni chur nga Antarctic ko duw ni 1928 nge mada’ ko 1956. Bochan ni i yoloy salpen e chur rok u reb e rran nge reb nga bake babyor ni yima yoloy u barkow ara skoki ni gubin e rran ni rogon urngin e pi n’en ni be buch nib puluw ma ir nge piin chonggin e yog ni nga uri nanged rogon e mithmith ko nifeng, nge rogon i fal’eg e map, ma ra feked boch murung’agen bogi ban’en ko binem e nam nib ga’ nu Antarctica.

Pi milekag rok Byrd nem e dag feni ga’ fan ni nga uni yoloy e re babyor nem. U lan baken e pi babyor nem, kan yoloy ngay urngin nochi ban’en u murung’agen reb e chur u barkow ara skoki. Pi murng’ag ney e rayog ni taaboch mu uni fanay ngaun gay ko mang e n’en i buch ara i fal’eg i guy e pi n’en ba’ riy ni rayog ni ngan fanay ko tin ka bay nga m’on e chur.

Fare Bible e be pi’ reb e n’en ni ku yi baadag ni ngan nang ko fare ran ni tharey e fayleng u nap’an Noah. Re ran nem ni tharey e fayleng e par nib pag reb e duw. Baaray ni yibe fal’eg rogoy ni fan ko re ran ni tharey e fayleng nem, me Noah, nge leengin, nge dalip i pumoon ni fakrow nge pi leengirad e ra toyed ba arke ni 50 ara 60 e duw nap’an​—ba barkow ni rib ga’ ni ga’ngin lan e gonapan 1,400,000 cubic fit. Mang fan ere arke nem? Nge ayuweg ni dabi yim’ boch e girdi’ nge gamanman u nap’an fare ran ni tharey e fayleng.​—Genesis 7:1-3.

Ma n’en ni rin’, e fare ke babyor ko Bible ni Genesis e bay riy e pi n’en ni sana rayog i yog ni babyoren e chur u barkow ni i yoloy Noah ni pi n’en i buch ko som’mon ko fare ran ni tharey e fayleng nge mada’ ko ngiyal’ ni ra chuwgad gothon e tabinaw rok u lan fare arke. Ere bay ban’en riy nib ga’ fan ngodad e chiney fa?