Fare Ran ni Tharey e Fayleng​—Mini’ e Motoyil ngak Got, ma Mini’ e De Motoyil?

Yooren e girdi’ u nap’an Noah e ur rin’ed e kireb. Genesis 6:5

I fakay Adam nge Efa e bitir, ma aram me yoor e girdi’ u fayleng. Me munmun me un boch e engel ngak Satan ngar togopuluwgad ngak Got.

Ma aram mar bad nga fayleng ni kar fanayed downgin e girdi’, mar leengiyed boch e ppin nib pidorang. Me diyen e pi ppin nem ngar gargeleged bogi girdi’ ni tagiyet ma yad ba damumuw.

I sug e fayleng ko girdi’ ni kireb. Be gaar e Bible: “Kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb.”

I motoyil Noah ngak Got me toy ba arke. Genesis 6:13, 14, 18, 19, 22

Noah e be’ nib manigil. I yog Jehovah ngak ni bayi tharey e fayleng ko ran nge yim’ e girdi’ ni kireb.

Ki yog ngak ni nge toy ba arke, ngemu’ me fek chon e tabinaw rok nge urngin mit e gamanman nge tay nga langgin.

I yog Noah ko girdi’ ni bay yib e Ran nge tharey e fayleng, machane dar motoyilgad. Boch e girdi’ e ur minmingad ngak; ma boch e ur fanenikayed.

Nap’an ni m’ay fare arke, me fek Noah fapi gamanman nge tay nga langgin.