‘Solomon e Da Immoy e Mad Rok ni Bod Feni Fel’ Yaan Reb e Pi N’ey
FLORAS ni yugu ma tugul ni bod e tin baaray ni yibe guy uroy e yug yima guy u tooben e kanawo’ u len i yimuch u Africa. Yima yog e cosmos ngay ni sum u Meriken ko gin ba gawel ni der ma aw e ayis riy. Pi floras ney nib fel’ yaan ni yugu yad ma tugul rorad e be puguran ngodad reb e n’en ni fil Jesus. Boor e girdi’ u fithik’ e piin ni baaram ni i non ngorad e yad ba gafgow, ma yug be magafan’rad ko pi n’en nib t’uf ko dowef rorad, ni aram e ggan nge mad.
“Murung’agen e mad,” e fith Jesus ni gaar, “mang fan ni be magafan’med? Mu filed ban’en ko floras ni yugu ma tugul u but’, u rogon ni yad be tugul; da ra maruwelgad, maku dara ma fal’eged e mad; machane nggog ngomed ni ki mus ngak Solomon nge urngin e pi fel’ rogon rok ma dariy e mad rok ni bod feni fel’ yaan reb e pi n’eney.”—Matthew 6:28, 29, NW.
Boor rogon ni ka nog ko ba miti mang floras ni yugu ma tugul e i lemnag Jesus. Machane, Jesus, e ma yan i taarebnag ko pan ni tin yugu ma tugul, me gaar: “Faanra, chiney, e Got e be pi’ e mad ko pan ni yugu be tugul u flang, ni bay u roy e dair me gabul mi nin’ nga stof ngan urfiy, me ere gathi ka baadag ni nge pi’ e mad ngomed ngam chuwgad ngay, rib achig e michan’ romed?”—Matthew 6:30, NW.
Yugu aram rogon ni cosmos e de sum u Israel, ma ri yad be ayuweg fare n’en ni i fil Jesus. Demtrug ko yibe guy u orel ara yibe guy nib chugur, ma rib fel’ yaan ma piin ni yad ba ta fek yaan ban’en e ri yad baadag nge piin yad ma yoloy yaan ban’en. Rib riyul’, Jesus e da i ga’nag i yog ni faani gaar, “ki mada’ ngak Solomon nge pi fel’ rogon rok ni dariy e mad rok ni bod reb e pi n’eney.”
Mang e n’en gad be fil e chiney? Piin ni yad be pigpig ku Got e rayog ni nge mudugilan’rad ni ra ayuwerad nge yog ngorad e tin nib t’uf ni ki mada’ ko ngiyal’ nib gel e mo’maw’ riy. I weliy Jesus ni gaar: “Um gayed gil’ilungun [Got], ma pi n’eney [ni aram e tin ba t’uf ni ggan nge mad] e ra pi’ ngomed.” (Luke 12:31, NW) Arrogon, tin riyul’ e felngin e ma yib ko baaray ni yibe gaweg Gil’ilungun Got. Machane gamanang ko mang e Gil’ilungun Got nge mang e ra rin’ ni fan ngak e girdi’? Pi Mich rok Jehovah e ri yad ra falfalan’ ni ngar ayuweged gur ngam pirieg e fulweg rom u lan e Bible.