Mmotoyil Ko Thin Ni Be Yog Fare Kan Ni Thothup!

“Faanra ba’ telim me ere mmotoyil ko n’en ni be yog fare kan ni thothup ngak e pi ulung.”​—REVELATION 3:22, NW.

1, 2. Mang fonow e ka nog ni boor yay u murung’agen e thin ni yog Jesus ngak fa medlip i ulung ni bay ko Revelation?

PI TAPIGPIG rok Jehovah e thingara tiyan’rad ko thin rok Jesus Kristus ni fare kan ni thothup e ke thagthagnag ni fan ngak fa medlip i ulung ni kan weliy ko fare babyor u Bible ni Revelation. Riyul’ ni, ra reb ko pi thin ney ma bay e fonow riy ni be gaar: “Faanra ba’ telim me ere mmotoyil ko n’en ni be yog fare kan ni thothup ngak e pi ulung.”​—Revelation 2:7, 11, 17, 29; 3:6, 13, 22.

² Kad weliyed murung’agen e thin rok Jesus ni fan ko pi engel, ara piin ni ma ayuweg e ulung, nu Efesus, nge Smyrna, nge Pergamum. Uw rogon ni ra fel’ rogodad ko n’en ni yog fare kan ni thothup ngak fa aningeg i ulung?

Ngak fare Engel nu Thyatira

3. Thyatira e immoy u uw, ma mang e n’en ni ri yimanangrad ni bochan?

³ “Faanem ni Fak Got” e ke yog e thin nib fel’ u murung’agen e ulung nu Thyatira miki fonownagrad nib gel. (Mu bieg e Revelation 2:18-29.) Thyatira (ni aram e Akhisar e chiney) e kan toy u tooben ba lul’ ni ir e gin ma yib e ran riy nge yan ko Lul’ ni Gediz fithingan (ni aram fare Hermus kakrom) ni immoy u ngal u Asia Minor. Fare mach e ri yimanang nbochan e boor ban’en riy ni kan ngongliy nga paey. Piin ni ma ngongliy e ma’chaw e yad ma fanay likngin e gekiy ni madder ni ir e ma yib riy e raen ni ri yibaadag ni aram e scarlet, ara purple. Lydia, ni facha’ ni ke mang Kristiano u nap’an ni yib Paul i guy piyu Filippi u Greece, ma “ma folchuway’ ko mad nib purple ramaen, ma ir be’ ko mach nu Thyatira.”​—Acts 16:12-15.

4. Bochan e mang ni ka nog e thin nib fel’ u murung’agen e ulung nu Thyatira?

⁴ Ke yog Jesus e thin nib fel’ u murung’agen e ulung nu Thyatira nbochan e tin nib fel’ ni kar rin’ed, ni bod e t’ufeg, nge michan’, nge gum’an’, nge fare maruwel ni machib. Riyul’ ni, ‘ke fel’ e maruwel rorad e chiney ko som’mon.’ Machane, yugu aram rogon ni ffel’ e tin kad rin’ed ko som’mon, ma thingar kuda koled ayuwngidad u rogon pangidad.

5-7. (a) Mini’ e “re ppin nem ni Jezebel,” ma mang e susun ni ngan rin’ nga gelngin nib gel? (b) Thin rok Kristus ngak e ulung nu Thyatira e ra ayuweg e piin ni bay madgun Got u wan’rad ni ngar rin’ed e mang?

⁵ Fare ulung nu Thyatira e kar paged ke yib ngorad e pigpig ko got ni googsur, nge machib ni googsur, nge ngongolen e darngal. Immoy u fithik’rad e “re ppin nem i Jezebel”​—ni sana e be yip’ fan ba ulung i ppin ni bay e ngongol rorad ni bod rogon Jezebel nib kireb ni leengin e pilung ko fa ragag nem e ganong nu Israel. Boch e girdi’ ni scholars e ka rogned ni ‘fapi profet ni ppin’ ni ur moyed u Thyatira e kar guyed rogon ni ngar wawliyed e piin Kristiano ngar liyorgad ko pi got ni pumoon nge ppin mar uned ko madenom ni yima pi’ e ggan riy ni maligach ko liyos. Dabni pag nge yib be’ ni ppin ni ir e ke duguliy ir ni ir reb e profet ni be gay rogon ni nge gagiyegnag yugu boch e girdi’ u lan e ulung ko Kristiano e ngiyal’ ney!

⁶ Kristus e be n’en ni nge ‘yin’ fare ppin ni Jezebel nga bet ko m’ar, nge piin ni kar uned ngak ko ngongol ni darngal ngar gafgowgad nib gel, ni faanra dabra kalgadngan’rad ko tin kireb ni kar rin’ed.’ Piin ma ayuweg e ulung e susun dabra uned ko pi machib rorad ney nib kireb nge rogon ni yad ma pingeg laniyan’ e girdi’, ma dariy e Kristiano ni nge un ko ngongol ni darngal nib spiritual fa ngongol ni darngal nib riyul’ ara nge un ko liyor ko liyos ni fan ni nge nang ni “tirok Satan nib mith fan” e rib kireb. Faanra ngada folgad ko thin rok Jesus ni be ginangey, ‘ma ngad chichiiyed pa’dad ko n’en ni bay rodad,’ ma dabi gagiyegnagdad e denen rodad. Bochan nkar dabuyed e ngongol nib kireb, nge arar nib kireb, nge tin yad be nameg, ma piin ni kan dugliyrad ni kan fasegrad ko yam’ e yira pi’ ngorad “mat’awrad ni ngar gagiyegnaged e pi nam” ma ra uned ngak Kristus ngar bilbileged yad ngar nochiyanggad. Pi ulung e ngiyal’ ney e bay e pi t’uf rorad ni be yip’ fan ban’en, ma piin ni kan dugliyrad e bay ni pi’ ngorad fare “fasuran ni ba ga’ ramaen,” ni fare Moon ni nge mabgol, ni Jesus Kristus, u nap’an ni ran fasegrad ko yam’ mi yad yan nga tharmiy.​—Revelation 22:16.

⁷ Fare ulung nu Thyatira e kan ginangrad ni dabra paged e piin ppin ni kar digeyed e tin riyul’ ngar gagiyegnaged yad ngar uned ko kireb. Thin rok Kristus ni kan ni thothup e ke thagthagnag e ra ayuweg e piin ni ppin ni bay madgun Got u wan’rad ni ngar rin’ed e maruwel ni ke pi’ Got ngorad e ngiyal’ ney. Dar ma guy rogon ni ngar gagiyegnaged e piin pumoon ma dabra wawliyed e pi walag ngar uned ko ngongol ni darngal nib spiritual ara ri ngongol ni darngal. (1 Timothy 2:12) N’en ni susun ni ngar rin’ed, e yad ra dag rogon e maruwel nib fel’ nge pigpig ku Got ni yira pining e sorok ngak. (Psalm 68:11; 1 Peter 3:1-6) Faanra ayuweg fare ulung e tin ni bay rok​—ni aram e machib nib machalbog nge ngongol rok nge pigpig ni fan ko Gil’ilungun nib ga’ fan—​ma bay yib Kristus ni nge pi’ ngorad e puluwon, ma gathi magothgoth.

Ngak fare Engel nu Sardis

8. (a) Sardis e immoy u uw, ma mang boch ban’en ni kan weliy nib tamilang u murung’agen? (b) Mang fan ni fare ulung nu Sardis e ba t’uf e ayuw riy?

⁸ Fare ulung nu Sardis e ba t’uf rorad e ayuw ni ngan pi’ ngorad nib papey ya bochan ni kar m’ad ko tirok Got. (Mu bieg e Revelation 3:1-6.) Sardis e immoy ni 30 e mile ko yimuch u Thyatira, Sardis e ba mach nib fel’ rogon. Fol chuway, nge but’ riy nib yong’ol, nge mngongol mad ni bunuen e gamanman nge fapi carpet e ir e pi n’en ni ke ayuweg ni nge fel’ rogon e re mach nem ni sogonapan 50,000 e girdi’ ni i par riy kakrom. Rogon ni yog Josephus ni reb e Historian, e yu Sardis e immoy boor e girdi’ riy ni piyu Jew ko fa bin som’mon e chibog B.C.E. U fithik’ e pi n’en ni ke kireb ko re mach nem e bay reb e tafen e muulung riy nge reb e tempel ko fare got rok piyu Efesus ni ppin ni Artemis fithingan.

9. Mang e susun ni ngan rin’ nfaanra pigpig ni gad ma ta’ e ke aw ni yugu dariy fan u wan’dad?

⁹ I yog Kristus ngak fare engel ko galesiya nu Sardis ni gaar: “Gu manang e pi n’en ni ga ma rin’, ni aram e yibe lemnag ni ka gab fas, machane ga be par ni gab yam’.” Uw rogon ni faanra yibe lemnag ni gadad ba od ko tirok Got machane baga’ ni gad ma dariyfannag e maruwel ko Kristiano ma maruwel ni gad ma ta’ e yugu dariyfan u wan’dad ma aram e gad be “dongongoy ni ngad m’ad ko tirok Got”? Ere ba t’uf ni ‘nguuda lemnaged ko uw rogon ni ke yog ngodad nge uw rogon ni kad rung’aged’ fare thin ko Gil’ilungun, ma thingar kuda gelnaged biyay e athamgil ni gad be tay ni fan ko pigpig nib thothup. Ba t’uf ni ngad tababgad ni ngad uned ko pi n’en ni yima rin’ u nap’an e muulung ko Kristiano u polo’ i gum’irchadad. (Hebrews 10:24, 25) I ginang Kristus e ulung nu Sardis ni gaar: “Ya faanra dab mu od ma bay gub ngom ni bod be’ nib moro’ro’, ya dab mu nang e re awa ni gu ra taw riy.” Ma uw rogon e re ngiyal’ rodad ney? Dabki n’uw nap’an ma gad ra weliy e tin kad rin’ed.

10. Yugu ra bay e magawon ni taareb rogon ko ulung nu Sardis, ma uw rarogon in e Kristiano ni ba’ riy?

¹⁰ Ki mada’ nga fithik’ e magawon ni taareb rogon ko ulung nu Sardis, ma sana bay in e girdi’ ni ‘dar alitnaged e mad rorad ma rayog ni ngar uned ngak Kristus nga ranod ni ka ron’ed e mad nib wechwech ya bay rogorad ni ngar rin’ed.’ Kar pared ko pow rorad ni yad e Kristiano, kar pared nib klin, ma dar alitnaged yad ko ngongol nge pi yuraba’ i teliw ko re fayleng ney. (James 1:27) Ma arfan ni, dariy e nen ra rin’ me chuweg Jesus ‘fithingrad u lan fare ke babyor ko yafas, machane ra micheg u p’eowchen e Chitamangin nge pi engel ni yad e girdi’ rok.’ Yira weliy ngan nang ni bay rogorad ni nga uranod Kristus u taabang, ma piin ni kan dugliyrad ni bod e ppin ni kan ta’ ni nge mabgol e ra yon’ e mad ni be galgal ramaen, mab biech, nge linen nib fel’ ni be yip’ fan e ngongol nib mat’aw rok e piin nib thothup rok Got. (Revelation 19:8) Fare maruwel ko pigpig nib fel’ ni yira pi’ ngorad u tharmiy e ke pi’ e athamgil nga lanin’rad ngar gelgad ko fayleng. Boch e flaab e ku kan fal’eg rogon ni fan ko piin ni bay e athap rorad ni nge yog ngorad e yafas ni dariy n’umngin nap’an. Fithingrad e ku kan yoloy ko fa ke babyoren e yafas.

11. Mang e ngada rin’ed nfaanra keb e chuchuw ngodad ko tirok Got?

¹¹ Dariy bagadad ni baadag ni nge yib e magawon ko tirok Got ngak ni taareb rogon ko ulung nu Sardis. Machane uw rogon nfaanra kada naabgad ni ke yib e chuchuw ko tirok Got ngodad? Thingarda gurgurgad i rin’ ban’en ni ra fel’ rogodad riy. Susun kan girngiydad ni ngad uned ko ngongol nib kireb ara gathi ri ka gad be un ko muulung ma ku arrogon fare maruwel rodad ko machib. Ngada ninged e ayuw rok Got u daken e meybil rodad u fithik’ e yul’yul’. (Filippi 4:6, 7, 13) Ngan bieg ma ngan fil e Thin nu Bible nge boch e babyor ni “fare tapigpig nib yul’yul’” e ke ngongliy e ra ayuwegey ni nguun par nib od ko tirok Got. (Luke 12:42-44) Ngemu’ ma gad ra taareb rogon ko girdi’ nu Sardis ni yad ba fel’ u wan’ Kristus, ma gad ra mang ba taw’ath ngak e pi walag.

Ngak fare Engel nu Philadelphia

12. Uw rogon ni ngam weliy murung’agen rarogon piyu Philadelphia kakrom ko tirok Got?

¹² I yog Jesus e thin nib fel’ ni fan ko ulung nu Philadelphia. (Mu bieg e Revelation 3:7-13.) Philadelphia (ni aram e Alasehir e chiney) ni reb e binaw nib fel’ rogon ma yima ngongliy e wain riy ni immoy u bang ko ngal u Asia Minor. Ma riyul’ ya, got rorad nrib ga’ fan u wan’rad e Dionysus, ni ir fare got ko wine. Ba tamilang ni, piyu Jew ni ur moyed u Philadelphia e de yog rorad ni ngar wawliyed e Kristiano ni piyu Jew ni ngar folgad ko fare Motochiyel rok Moses ara ngar sulod ngay.

13. Uw rogon ni i fanay Kristus “fare kiy rok David”?

¹³ Ba’ rok Kristus “fare kiy rok David,” ma kan pag fan ngak urngin ban’en ni bay rogon ko Gil’ilungun ma ir e ra ayuweg fare tabinaw ko michan’. (Isaiah 22:22; Luke 1:32) I fanay Jesus e re kiy nem ni nge bing e mab ngak e piin Kristiano u Philadelphia kakrom nge yugu boch e binaw nge yog ngorad boch e taw’ath nge maruwel ni bay rogon ko Gil’ilungun. Ka nap’an e duw ni 1919 ma ke ta’ nga p’eowchen “fare tapigpig nib yul’yul’” ba “mab nib ga’” ni sor ko machib ni fan ko Gil’ilungun ni dariy reb e tatogopuluw ni rayog ni nge ning. (1 Korinth 16:9; Kolose 4:2-4) Er rogon, fare mab ni fan ko fapi taw’ath ko Gil’ilungun e kan ning ngak e piin ni bang ko “fare ulung nib mil farad ku Satan,” ya gathi yad e Israel nib spiritual.

14. (a) Mang e n’en ni ke micheg Jesus ngak e ulung nu Philadelphia? (b) Uw rogon ma dabda thaygad u nap’an “fare awa ko skeng”?

¹⁴ I micheg Jesus ngak e Kristiano u Philadelphia kakrom ni gaar: “Ya bochan kam ayuweg e thin u murung’agen e gum’an’ ni kug tay, ma ku gu ra ayuwegem u nap’an ni ra yib e skeng ngom, nra taw nga fayleng ni polo’.” Ra ngani un i wereg e machib ma ba t’uf e gum’an’ ni dag Jesus. De yan nga laniyan’ e toogor rok ya i par ni be rin’ e tin nib m’agan’ e Chitamangin ngay. Ma aram fan ni kan faseg Kristus ko yam’ me yog ngak e yafas u tharmiy ni dabi ki yim’ biid. Faanra ngada pared ni gad ba mudugil ko n’en ni kad turguyed ni nguud liyorgad ngak Jehovah ma ngada machibnaged fare thin nib fel’ ya gad be pi’ e ayuw ko fare Gil’ilungun, ma aram dabda thaygad u nap’an ni yib e skeng, ni “fare awa ko skeng.” Gad ra ‘ayuweg e n’en ni ba’ rodad’ ni yib rok Kristus ma aram e ngada athamgilgad ni ngada yoornaged e tin bay rogon ko Gil’ilungun. Ngan rin’ e n’en ni aram rogon ma ra yibnag e teeliyaw nu tharmiy ni fan ko piin ni kan dugliyrad nge yafas ni manemus u fayleng ni fan ko piin nib yul’yul’ nib chag ngorad.

15. Mang e ba t’uf ni nge rin’ e piin ni yad ra mang ‘fapi duga’ ko tempel rok Got’?

¹⁵ Me ulul Kristus ngay ni gaar: “En nra gel nde pag ir ko kireb e ra gu tay ni ir reb e duga’ u lan e tempel rok e Got rog, . . . Ma bay gu yoloy fithingan e Got rog nga daken, nge fithingan fare binaw rok e Got rog, ni fa bin nib biech e Jerusalem ni bay yib rok e Got rog u tharmiy nga but’. Ma bay ku gu yoloy fithingag nib biech nga daken.” Piin ni kan dugliyrad ni ma ayuweg e ulung e thingara n’ufed e bin riyul’ e liyor. Thingara ayuwgad ngar pared ni bay rogorad ni ngar uned ko “fa bin nib biech e Jerusalem” ma aram e nguura machibnaged murung’agen Gil’ilungun Got mar pared ni yad ba klin ko tirok Got. Ba t’uf ni ngar yodoromgad nfaanra yad baadag ni ngar manged fapi duga’ ko fare tempel nu tharmiy ni faan yad ra fek fithingan fare mach rok Got ya yad e girdi’ nu tharmiy ma ku yad be fek fithingan Kristus ni bod reb e ppin ni ngar mabgolgow. Ma, riyul’ ni, thingara “motoyilgad ko thin ni be yog fare kan ni thothup ngak e pi ulung.”

Ngak fare Engel nu Laodicea

16. Mang boch ban’en nib riyul’ u murung’agen Laodicea?

¹⁶ I pi’ Kristus e fonow nib gel ngak e ulung nu Laodicea ni ke lemnag ni tin bay rok e ke gaman. (Mu bieg e Revelation 3:14-22.) Immoy u bang ko ngek u Efesus ni sogonapan 90 e mile palgin ma immoy ko gin ni gak fapi kanawo’ ngay ni ma yan e piin ta fol chuway riy u lan fare loway nib yong’ol ko fare Lul’ ni Lycus, ma Laodicea e reb e mach nrib fel’ rogon ma yima chaariy nge yima fek e salpiy riy. Fapi mad ni kan ngongliy ko wool ni talumor ko re binaw nem e goo yimanang murung’agen. Bochan kan toy u rom fare skul nib gilbuguwan ni fan ko tafalay, ma sana Laodicea e ma ngongliy fare falay ko lan owchey ni yima nang fithingan ni Phrygian powder. Asclepius, ni fare got ko falay, e reb e got nrib ga’ fan u wan’rad. Be m’ug ni Laodicea e immoy boor e girdi riy ni piyu Jew, ma boch i yad e rib fel’ rogorad.

17. Mang fan ni kan pi’ e fonow nib gel ngak piyu Laodicea?

¹⁷ Be non Jesus ngak e ulung nu Laodicea u daken e “engel”, me non ni bay mat’awun ya ir “fare mich nib yul’yul’ mab riyul’, ma som’mon ni sunmiy Got.” (Kolose 1:13-16) Piyu Laodicea e kan fonownagrad nib gel ya ur pared ni “dar garbebgad ma dar gowelgad” ko tirok Got. Bochan ni aram rogorad ma aram e ra thuwegrad Kristus ngar chuwgad u lan l’ugun. Susun de mo’maw’ rorad ni ngara nanged fan e re n’em. Gin’en nib chuchugur ko Hierapolis e immoy boch e lul’ nib gawel riy, ma u Kolose e immoy e ran riy nib garbeb. Machane bochan e ba t’uf ni ngan fanay e pipe nge taw e ran nga Laodicea ni ba palog, ma aram e baga’ ni ra taw nga lan fare mach ni gathi ri kab gowel ma gathi rib garbeb. U m’on ni nge taw nga Laodicea, ma ra yan nga reb e lra’. Nap’an ni ke chuchugur nga Laodicea, ma ra yan nga fithik’ e malang ni kan ta’ ni ba’ thilin ma kan simennag nga taabang.

18, 19. Uw rogon ni ngan ayuweg e piin Kristiano ko ngiyal’ ney ni taareb rogon ko piyu Laodicea?

¹⁸ Girdi’ e chiney ni taareb rogon ngak piyu Laodicea e bay gowelngin ni dabiyog ni nge pasignagey ma ku de garbeb nib fel’ rogon. Taareb rogon ko ran ni gathi rib gowel ma gathi rib garbeb ni yira thuwag! Dabun Jesus ni ngar manged piin ta yog e thin rok ngak e girdi’, ni ngar manged e pi “ambassadors ni nga ranod nga luwan Kristus” ni kan dugliyrad. (2 Korinth 5:20) Faanra dabra kalgadngan’rad, ma ra mul u pa’rad e taw’ath rorad ni yad e pi tamachib ko Gil’ilungun. Piyu Laodicea e kar nameged ni nge yog ngorad e chugum nu fayleng ma ‘dara nanged ni rib gel e gafgow rorad, ma rib t’uf e ayuw rorad, ma yad ba gafgow, ma yad ba malmit, ma dakuriy e mad u dakenrad.’ Rogon ni ngan chuwegrad ko magawon ni yad ba gafgow, ma yad ba malmit ko tirok Got, ma dakuriy e mad u dakenrad, ma urngin e girdi’ ni bod rogon e pi cha’ nem e chiney e ba t’uf ni ngar chuwiyed rok Kristus e ‘gol ni de maathuk ban’en ngay’ ni aram e michan’ ni kan skengnag, nge “mad nib wechwech” ni aram e ngongol nib mat’aw, nge “falay ko lan owchey” ma ra fel’ boch lan owchey nib spiritual. Pi Kristiano ni ma ayuweg e ulung e yad ba falfalan’ ni ngar ayuweged yad ngar tedan’rad ko tirok Got ban’en ma “ngari gel e michan’ rorad.” (James 2:5; Matthew 5:3) Maku, piin ni ma ayuweg e ulung e ba t’uf ni ngar ayuweged yad ko uw rogon ni ngar fanayed fare “falay ko owchey” nib spiritual​—ni aram e ngar taarebnaged e yafas rorad ko thin ni ke fil Jesus, nge fonow, nge tin ke rin’, nge lem rok. Ireray e falay ko magawon nib l’ag ko “tin nib tagan ban’en ni yima ar’arnag, ni tin nra guy e girdi’ ma yad baadag ni nge yog ngorad, nge urngin ban’en ni bay u roy u fayleng nri ma uf e girdi’ ngay.”​—1 John 2:15-17.

¹⁹ Ma pi’ Jesus e fonow ma ma yal’uweg e piin ni nib t’uf rok. Ma piin ma ayuweg e ulung ni bay u tan pa’ e thingara rin’ed ban’en ni aram rogon u fithik’ e sumunguy. (Acts 20:28, 29) Piyu Laodicea e ba t’uf ni ngar daged ni “yad ba pasig mar kalgadngan’rad,” ma ngar thiliyeged e lem rorad nge kanawoen e yafas rorad. Ere, bay boch i gadad ni ke mecham ko kanawoen e yafas ni yugu be tay ni pigpig ku Got nib thothup e gathi rib ga’ fan ko yafas rodad? Ere ngada ‘chuw’iyed rok Jesus e falay ko lan owchey’ ma aram e rayog ni ngad guyed feni ga’ fan ni ri nguun m’oneg e gagiyeg rok Got.​—Matthew 6:33.

20, 21. Mini’ e be motoyil e chiney mi yad pining Jesus ni “be tugtuguy” e mab, ma mang e athap rorad?

²⁰ “Am sap!” ireray e n’en ni yog Kristus, “Kug sak’iy nga langan e mab gu be tugtuguy; ma faanra rung’ag be’ lungug me bing e mab ma ra gub nga lan e naun rok nggu un ngak ko abich, me un ngog ko abich.” Gubin ngiyal’ ni ma fil Jesus ban’en u nap’an ni be abich. (Luke 5:29-39; 7:36-50; 14:1-24) Chiney ma be tugtuguy fare mab ko ulung ni taareb rogon ko ulung rok piyu Laodicea. Gur ra motoyil e girdi’ riy ngak ni be tugtuguy e mab, nge gel biyay e t’ufeg rorad ngak, ma ra pininged nge par u fithik’rad, mar paged ni nge fil ban’en ngorad? Faanra aram rogon, ma ra un Kristus ngorad ko abich ma ra fel’ rogorad riy.

²¹ Fare “yugu boch e saf” e chiney e kar pininged Jesus nga naun rorad ni be fanathinnag ban’en, ma ra fekrad e re n’ey ko yafas ni dariy n’umngin nap’an. (John 10:16; Matthew 25:34-40, 46) Ra bagayad e piin ni kan dugliyrad ni ke gel, ma ra taw’athnag Kristus ma rayog ni nge ‘par nga but’ u tooben u tagil’, ni bod rogon ni ke gel ngak e kireb, me ere ke par nga but’ u tooben e Chitamangin u tagil’.’ Arrogon, piin kan dugliyrad ni ka ra gelgad, e ke micheg Jesus ngorad e taw’ath nib ga’ ni ngar uned ngak ngar pared nga tagil’ u ba’ nib mat’aw i pa’ e Chitamangin u tharmiy. Ma piin ni bang ko yugu boch e saf e yad be sap nga m’on nga bangi n’en ni rib fel’ u roy u fayleng u tan e gagiyeg ko Gil’ilungun.

Pin’en ni Be Fil Ban’en Ngodad ni Gad Gubin

22, 23. (a) Uw rogon ma urngin e Kristiano e rayog ni nge fel’ rogorad ko thin rok Jesus ngak fa medlip i ulung? (b) Mang e susun ni ngada rin’ed?

²² Dariy e maruwar riy ni urngin e Kristiano e rayog ni ngari fel’ rogorad ko thin rok Jesus ni fan ko fa medlip i ulung u Asia Minor. Yibe guy ni ke yog Kristus boch e thin nib fel’ mab puluw u murung’agrad, ni bod rogon ni ke k’aring e piin Kristiano ni piilal nga rogned e thin nib fel’ u maurung’agen e girdi’ ni be’ nge be’ nge murung’agen e pi ulung ni ke fel’ rogorad ko tirok Got. Gin ni bay e meewar riy, e ra ayuweg e piin piilal pi walagrad riy ngar fanayed e Thin nu Bible nge golnagrad. Gad gubin e rayog ni ngi i fel’ rogodad ko fonow nib thilthil ni ke pi’ Kristus ngak fa medlip i ulung, nfaan gad ra fol riy u fithik’ e meybil ma ngad rin’ed nib papey.a

²³ Ngiyal’ ney ni tin tomren e rran e dabda lemnaged ni kari fel’ e yafas rodad, ara ngarda adaged e chugum, ara boch ban’en nrayog ni ra k’aringdad ni ngad pigpiggad ku Got ni yugu dariy fan u wan’dad. Ere yibe athapeg ni urngin e ulung e ra pi’ e tamilang nib gel ni bod tagil’ e magal ni dabi chuweg Jesus ko gin ni bay riy. Gadad e Kristiano ni gadad ba yul’yul’, e yibe athapeg ni nguuda tedan’dad u nap’an ni be non Kristus ma nguuda motoyilgad ko thin ni be yog fare kan ni thothup. Ngemu’ ma ra yib e falfalan’ ngodad ndariy n’umngin nap’an ni gadad be fek e tamilangan’ nra pining e sorok ngak Jehovah.

[Footnotes]

Uw Rogon ni Ngam Pi’ e Fulweg?

• Mini’ e “re ppin nem i Jezebel,” ma mang fan ni piin ni ppin ni bay madgun Got u wan’rad e dabra folwokgad rok?

• Mang magawon ni immoy ko ulung nu Sardis, ma mang e gad ra rin’ ma rayog ni ngad paloggad ma dabda boded boor e Kristiano ni yad ma par u rom?

• Mang e ke micheg Jesus ngak e ulung nu Philadelphia, ma uw rogon ni ra puluw e pi n’em ko ngiyal’ ney?

• Mang fan ni kan pi’ e fonow nib gel ngak piyu Laodicea, machane mang e athap e kan ta’ nga p’eowchen e Kristiano nib pasig?

[Picture on page 14]

Ngongol nib kireb ko “re ppin nem i Jezebel” e thingarni pilo’ riy

[Pictures on page 16]

I tay Jesus fare “mab nib ga’ ” nga p’eowchen pi gachalpen nra pow’iyrad ko boch e taw’ath ko Gil’ilungun

[Picture on page 18]

Ga ra pining Jesus ma ga motoyil ngak fa?