Mu Guy Rogon Ni Nge Gel E Fol Ni Ga Ma Tay E Chiney Ni Ke Chugur Ko Tomur

“Nge gagiyegnag [Shiloh] urngin girdien e pi nam ngar folgad rok.”​—Genesis 49:10.

1. (a) Mang e kub muun ko fol rok Jehovah kakrom? (b) Mang e i yog Jacob u m’on riy u morngaagen e fol?

PIIN NI ma fol rok Jehovah e ku yad ma fol rok e piin ni yad owchen. Piin ni yad owchen e yad e pi engel, nge pi matam ni kakrom, nge pi judges, nge pi prist, nge pi profet, nge pi pilung. Ka nog e chiya rok Jehovah nga chiya ko pi pilung nu Israel kakrom. (1 Chronicles 29:23) Ba gafgow ya boor e pi pilung nu Israel ni dar folgad rok Got, mi yib e gafgow ngorad nge girdi’ rorad. Machane de pag Jehovah e piin ni yad ba yul’yul’ ya i pi’ e athap ngorad; me fl’eg lanin’rad ni ke micheg ngorad ni ra duguliy reb e Pilung ni dabiyog ni nge kireb, ma ra falan’ e ppin nib mat’aw ni ngar folgad rok. (Isaiah 9:6, 7) Nap’an ni be n’en ni nge yim’ Jacob me weliy morngaagen e re pilung nem ni gaar: “Ke kol e sog rok nga pa’, ni sog ko pilung, ke tay nga thilin e rifrif u ay; ma bayi par rok nge mada’ ko ngiyal’ ni bay yib [Shiloh] e en ni fen riy, nge gagiyegnag urngin girdien e pi nam ngar folgad rok.”​—Genesis 49:10.

2. Mang fan fare ngochol ni “Shiloh,” ma mang e ra gagiyegnag?

² “Shiloh” e ba ngochol nu Hebrew ni be yip’ fan e “Ir e Ani Fen.” Arrogon, n’en ni fen Shiloh e aram mat’awen ni nge gagiyeg ni be yip’ fan fare sog ko pilung, maku bay rogon ni nge yog e thin ni be yip’ fan fare sog ko salthaw. Ma gathi ke mus ni ra gagiyegnag pi fak Jacob ya ku ra gagiyegnag “urngin girdien e pi nam.” Mab puluw e re thin ney ko n’en ni ke micheg Jehovah ngak Abraham ni gaar: “Piin ni owchem e ra gelgad ngak e piin ni bay ra mahlgad ngorad. Ma urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem.” (Genesis 22:17, 18) Ke tamilangnag Jehovah ko mini’ e ani “owchen” Abraham u nap’an ni ke duguliy Jesus nu Nazareth ko kan ni thothup ko duw ni 29 C.E.​—Luke 3:21-23, 34; Galatia 3:16.

Bin Somm’on I Gil’ilungun Jesus

3. Mang gagiyeg ni ke yog ngak Jesus u nap’an ni yan nga tharmiy?

³ Nap’an ni yan Jesus nga tharmiy ma de fek fare sog ko pilung me gagiyegnag e girdi’ nu fayleng ko chi ngiyal’ nem. (Psalm 110:1) Machane bay gil’ilungun ma bay e girdi’ ni ur folgad rok. I weliy apostal Paul morngaagen e re gil’ilungun nem ni gaar: “Yi ayuwegdad [Got] nge chuwegdad [pi Kristiano ni kan duguliyrad ko kan ni thothup] u fithik’ i gelngin e talumor me thapegdad ko gin nsuwon e en ni Fak nib t’uf rok.” (Kolose 1:13) Ke tabab ni nge thapegrad ko rorran ni Pentecost ko duw ni 33 C.E u nap’an ni kan puog e kan ni thothup nga daken pi gachalpen Jesus ni yad ba yul’yul’.​—Acts 2:1-4; 1 Peter 2:9.

4. Uw rogon ni dag pi gachalpen Jesus ni ur folgad rok, ma mang e ke pining Jesus ngorad?

⁴ Pi gachalpen Jesus ni kan duguliyrad ko kan ni thothup e “ya be wenig u pa’ Kristus” e kar folgad ko thin rok Jesus ni ngan kunuy e tin ni ka bay ko fachi ulung ni girdien “gin nsuwon e en ni Fak.” (2 Korinth 5:20; Efesus 2:19; Acts 1:8) Maku thingari “taareban’rad ma taab pa’ lanin’rad” ni fan e nge falan’ Jesus Kristus ngorad ni ir e pilung rorad. (1 Korinth 1:10) Yad gubin e yad fare “tapigpig nib yul’yul’ mab gonop.”​—Matthew 24:45; Luke 12:42.

Kar Flaabgad Ni Bochan e Kar Folgad Rok Fare “Tapigpig” Rok Got

5. Kab kakrom ma uw rogon ni ke machibnag Jehovah e girdi’ rok?

⁵ Gubin ngiyal’ ni ke pi’ Jehovah e pi tamachib ni fan ngak e girdi’ rok. Tomren ni ke sul piyu Jew u Babylon, Ezra nge boch e pumoon e kar “weliyed” e Motochiyel ngak e girdi’ ma gathi ke mus ni kar bieged nge rung’ag e girdi’ ya “kar tamilangnaged nge nang e girdi’ fan” e Thin Rok Got.​—Nehemiah 8:8.

6, 7. Uw rogon ni ma pi’ fare tapigpig e ggan ni machib u daken e Governing Body rok, ma mang fan nib puluw ni ngan fol rok fare tapigpig?

⁶ Nap’an e bin somm’on e chibog ke sum e magawon ko duw ni 49 C.E. ko ngan maad’ad ngak e girdi’ nrogon yalen fa danga’, me puruy’ e governing body u fithik’ e meybil mi yad turguy nrogon e thin ko Bible. Mi yad yoloy ngak urngin e ulung e n’en ni kar turguyed me fol e pi ulung ko thin rorad me flaabnagrad Got. (Acts 15:6-15, 22-29; 16:4, 5) Ku arrogon e ngiyal’ ney ni ke tamilangnag fare tapigpig nib yul’yul’ boor e machib ni bod rarogon e pi Kristiano ni yad ma par u mathilin e magawon ko pi nam, nge racha’ nib thothup, nge drugs nge tamagow, ma kar tamilangnaged u daken e Governing Body. (Isaiah 2:4; Acts 21:25; 2 Korinth 7:1) Be flaabnag Jehovah e girdi’ rok ni yad be fol ko Thin Rok nge tapigpig rok nib yul’yul’.

⁷ Nap’an ni be fol e girdi’ rok Got rok fare tapigpig nib yul’yul’ maku yad be fol ko fare Masta ni Jesus Kristus. Ma baga’ fan e fol ni yad be tay ngak e chiney ni bochan e ga’ e gin nsuwon Jesus ni bod rogon ni yog Jacob ko ngiyal’ ni be n’en ni nge yim’.

Ke Mang Shiloh Pilung nu Fayleng Ya Bay Mat’awen

8. Uw rogon ma wuin ni kan ga’nag e gin nsuwon Kristus?

⁸ I yog Jacob ni “urngin girdien e pi nam e ngar folgad rok” Shiloh. Ere ba tamilang ni gathi goo fare Israel nib spiritual ni ra par u tan pa’ Kristus. Chon mini’ e ra par u tan pa’ Kristus? Bay e fulweg riy u Revelation 11:15 ni gaar: “Ke yib gelngin Somol rodad nge Messiah rok ni ngar gagiyegnigew e girdi’ nu fayleng. Ma bayi gagiyegnag ndariy n’umngin nap’an.” Ke tamilangnag e Bible ni ke yib gelngin Jesus ni nge gagiyeg u tomren “fa medlip i ngiyal’” nrogon e thin ko profet​—ni aram e “ngiyal’ ni kan duguliy ni fan ko pi nam”—​ni ke tabab ko duw ni 1914.”a (Daniel 4:16, 17; Luke 21:24) Ke tabab e gagiyeg rok Kristus ko re duw nem me tabab ni nge “gagiyeg u fithik’ e pi toogor rok.”​—Matthew 24:3; Psalm 110:2.

9. Mang e rin’ Jesus u nap’an ni ke yib gelngin u Gil’ilungun, ma mang wenegan ni yib ngak e girdi’ nu fayleng, ni baga’ ngak pi gachalpen?

⁹ N’en ni somm’on ni rin’ Jesus u nap’an ni yib gelngin ni nge gagiyeg e ke tharbog Satan​—ni ir e ani der ma fol—​nge pi moonyan’ rok nga daken e fayleng. Ka nap’an e ngiyal’ nem e ke gafgownag e pi kan nib kireb ney e girdi’ nu fayleng, ma ke mo’maw’ rok e girdi’ ni ngar folgad rok Jehovah. (Revelation 12:7-12; 2 Timothy 3:1-5) Be mahl Satan ngak e piin ni ke duguliyrad Jehovah ko kan ni thothup ni yad e “piin ni yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.” Maku be mahl Satan ngak “fa yugu boch e saf” ni be chag ngorad.​—Revelation 12:17; John 10:16.

10. Mang thin ko profet u Bible ni ke lebug ni be micheg ni dabi m’ag e mahl ni be tay Satan ngak e tin riyul’ e Kristiano?

¹⁰ Dabi m’ag e maruwel rok Satan ya aray e “rran rok Somol” ma dariy ban’en ni ra taleg Jesus ni nge “gel ko mahl.” (Revelation 1:10; 6:2) Mmich ni ra m’ay e maruwel rok Jesus ni nge tay e pow nga daken fa 144,000 girdien fare Israel nib spiritual. Maku ra matanagiy “fare ulung ni pire’ ni pire’​—ndariy be’ nrayog ni nge theegrad! Nra bad ko gubin e nam, nge ganong, nge gubin mit e girdi’, ngu gubin e thin.” (Revelation 7:1-4, 9, 14-16) Yad ba thil ko piin ni kan duguliyrad ko kan ni thothup ya yad ra par u daken e fayleng ni yad be fol rok Jesus. (Daniel 7:13, 14) Ke m’ug e re ulung ni baga’ ney u fayleng ma aram reb e mich riy ni be gagiyegnag Shiloh “girdien e pi nam nu fayleng.”​—Revelation 11:15.

Ir Aray e Ngiyal’ ni “Ngan Fol ko Fare Thin Nib Fel’”

11, 12. (a) Ke mus ni chon mini’ e ra magay nib fas ko tomren e re m’ag nib kireb ney? (b) Uw rarogon e piin ni yad be fil “nifengen e fayleng”?

¹¹ Thingari fol urngin e piin ni yad ba adag e yafas ni manemus, ya ke tamilangnag e Bible ni “piin nde t’uf rorad ni ngar nanged murung’agen Got ni piin ndarir folgad ko Thin Nib Fel’ ni yib rok Got ni murung’agen e Somol rodad i Jesus” e dab ra magaygad nib fas ko rofen ni dumumuw rok Got. (2 Thessalonika 1:8) Machane mo’maw’ ni ngan fol ko fare thin nib fel’ ni bochan e kireb u fayleng nge togopuluw ko pi motochiyel u Bible.

¹² Kan nog e “lem nu roy u fayleng” ko re laniyan’ ney nib togopuluw ngak Got. (1 Korinth 2:12) I weliy apostal Paul morngaagen e re lem ney u nap’an ni yol ngak e pi Kristiano nu Efesus ni gaar: “Re ngiyal’ i n’em e um marod u kanawoen e kireb nu fayleng; um folgad rok e en ni ir e pilung rok nifengen e fayleng, ni fare nifeng ni ir e chiney e be gagiyegnag e piin ndarir folgad rok Got. Ma bin riyul’ riy e gadad gubin ni ud moyed ni gadad bod yad, ma ud pired ni gadad be ngongol nrogon e tin ni gadad be ar’arnag, ma gadad be rin’ e pi n’en ni ir e mm’agan’ dowdad nge lanin’dad ngay; ma ku er rogon ni ud pired ni ke mudugil ni ngad gafgowgad ko damumuw rok Got ni bod urngin e girdi’.”​—Efesus 2:2, 3.

13. Uw rogon ni nge togopuluw e pi Kristiano ko lem nu fayleng, ma mang taw’ath nra yib ni bochan?

¹³ Machane daki par e pi Kristiano nu Efesus ni yad e sib rok e re lem nib togopuluw nem. Danga’, ya kar manged pi fak Got ni yad ma fol ma yad be par u tan pa’ fare kan ni thothup rok me yib waamngin nib fel’ ma boor. (Galatia 5:22, 23) Maku arrogon e ngiyal’ ney ni be ayuweg e kan ni thothup rok Got​—ni ir e bin th’abi gel gelngin—​bokum million e girdi’ ni ngar folgad rok Jehovah ma wenegan riy e rayog “ni nge yib i m’ug nib riyul’ e pi n’en ni ir e be l’agan’rad ngay.”​—Hebrews 6:11; Zechariah 4:6.

14. Uw rogon ni ke ginang Jesus urngin e Kristiano ni yad be par ko tin tomren e rran ko pi n’en ni ra skengnag e fol ni yad be tay?

¹⁴ Mu tay fanam iyan riy ni ku bay e ayuw rok Shiloh nge Chitamangin ma dab ra pagew ni nge skengnagdad e pi toogor rodad​—ni pi kan nib kireb ara girdi’ nib kireb—​ni ngar skengnaged gadad ni ke pag e tin nrayog rodad. (1 Korinth 10:13) I weliy Jesus boch e magawon nra yib ngodad e chiney ko tin tomren e rran, ma re thin ney e ra ayuwegdad ni ngada mahlgad ngak moonyan’. I yoloy Jesus medlip e babyor ngak medlip e ulung me pi’ e pi babyor ney u daken apostal John u nap’an ni pig e changar rok. (Revelation 1:10, 11) Bay e fonow riy ni baga’ fan ngak e pi Kristiano kakrom, machane kab ga’ fan ngak e pi Kristiano ni be par ko “chirofen ni rran rok Somol”​—ni ka nap’an e duw ni 1914.” Ere bpuluw ni ngada tedan’dad ko thin ni bay ko pi babyor nem!b

Mu Palog ko Dariy Fan U Wan’, Ngongol Ndarngal Nge Chogowen e Chugum

15. Mang fan ni thingar da ayuwgad ko n’en ni ke magawonnag e ulung nu Efesus, ma uw rogon ni ngada ayuwgad? (2 Peter 1:5-8)

¹⁵ I yoloy Jesus e bin somm’on e babyor rok ngak fare ulung nu Efesus. Somm’on ma i pining e sorok ngorad ni bochan e guman’ ni ur ted ma aram e gaar: “Machane baaray e n’en ndabug rom: da kug t’uf rom e chiney ni bod fanag t’uf rom ko som’on.” (Revelation 2:1-4) Maku arrogon e chiney ni bay boch e Kristiano ni kar pasiggad ko somm’on ma chiney e ke war e t’ufeg rorad ma gathi bod fene t’uf Got rorad ko somm’on. Ra war e t’ufeg rok be’ ma rayog ni nge war fare thin u thilrow Got me ere thingar ni gelnag. Ra diin me gel e t’ufeg biyay? Rayog ni ngan gelnag ko fol Bible, ma ngan fl’eg i lemnag e thin riy, ma ngan un ko muulung ma ngan meybil. (1 John 5:3) Riyul’ ni thingar ni “athamgiliy” machane bay e flaab nra yib riy. (2 Peter 1:5-8) Amu skengnag lanin’um ma faan ga ra pirieg ni ke war e t’ufeg rom ma ga yal’uweg e chi ngiyal’ ney, ni ga be fol ko thin rok Jesus ni gaar: “Mu lemnag n’umngin yang e gin ni kam mul riy! Mpi’ keruum ko denen ni ga be rin’ ngam rin’ e n’en ni um rin’ ko som’on.”​—Revelation 2:5.

16. Mang boch ban’en nib kireb ni ke suruy e ulung u Pergamum ngu Thyatira, mang fan ni kub puluw e thin rok Jesus ngodad e ngiyal’ ney?

¹⁶ Kan pining e sorok ngak e pi Kristiano u Pergamum ngu Thyatira ni bochan e yul’yul’, nge guman’ nge pasigan’ ni ur ted. (Revelation 2:12, 13, 18, 19) Machane ke suruyrad boch e girdi’ nib kireb ni yad bod Balaam nge Jezebel, ni kar fanayed e ngongol ko darngal nge meybil ngak Baal ni ngar kirebnaged piyu Israel kakrom. (Numbers 31:16; 1 Kings 16:30, 31; Revelation 2:14, 16, 20-23) Ma uw rogon e ngiyal’ ney​—ni “chirofen ni rran rok Somol”? Taareb rogon e kireb ni be suruy e girdi’ e chiney, fa? Taareb rogon, ya ngongol ko darngal e aram tapgin ni kan tharbog boor e girdi’ ko ulung rok Got. Ere ri baga’ fan ni ngada ayuwgad rok urngin e girdi’—​u lan e ulung ngu wuru’ e ulung​—ni rayog ni ngar kirebnaged gadad! (1 Korinth 5:9-11; 15:33) Piin ni yad ba adag ni ngar pared u tan pa’ Shiloh ni yad be fol rok e thingar ra paloggad ko fafel ni de fel’ nge tin puwlag ni bay ko babyor ara Internet.​—Amos 5:15; Matthew 5:28, 29.

17. Uw rogon nib thil rarogon piyu Sardis ngu Laodicea u wan’rad nge rarogorad u wan’ Jesus?

¹⁷ Dan pining e sorok ngak e ulung nu Sardis ma ke mus ni boch e girdi’ riy ni yad ba fel’. “Be yog e girdi’ ni yad ba fos” machane gowa yad ba “yam’” u wan’ Jesus ni bochan e dariy fan e machib u wan’rad. Yad be fol ko fare thin nib fel’ ni bochan ni ka nog ni ngan fol machane dariy lanin’rad riy. Rib gel e puf thin ntay ngorad! (Revelation 3:1-3) Maku aram rogon fare ulung u Laodicea. Yad ba uf ni bochan e ke fel’ rogorad ko salpiy ni be lungurad, “Ke yoor ban’en rog ni ke fel’ rogog,” machane u wan’ Kristus ma yad “ba gafgow, ma dakuriy e mad u dakenrad ma yad mmalmit.”​—Revelation 3:14-17.

18. Uw rogon nrayog ni ngada ayuwgad ni gathi gad be par u mathilin e garbeb nge gawel u wan’ Got?

¹⁸ Ngiyal’ ney ma bay boch e Kristiano ni ur yul’yul’gad faram machane dakur folgad. Boch i yad e kar paged e lem nu fayleng ni nge warnag e pasigan’ rorad, ma gathi yad ba garbeb ara gawel ko fol Bible, nge meybil nge muulung, nge machib ni yad be tay. (2 Peter 3:3, 4, 11, 12) Ere ri baga’ fan rok e girdi’ ni aray rogon ni nge folgad rok Kristus ma ngar kunuyed e tirok Got ban’en​—arrogon, ngar “chuw’iyed e gol rog [Kristus] ni gol ni de maathuk ban’en ngay”! (Revelation 3:18) Re gol ney e be yip’ fan e “ngongol nib fel’ e nge yoor ni ngar ngongliyed, ma ngar golgad ni nge m’agan’rad ngay ni ngar pied boch e tin ni ba’ rorad ban’en ngak boch e girdi’.” Faanra aram e pi n’en nib fel’ ni gad ra kunuy ma aram “kanawoen ni gadad ra kunuy e flaab ni fan ngodad ni ir e bay mang def ngodad nib fel’ ni fan ngodad e chiney i yan ngaram. Ma aram e ra yog ngodad e yafos ni ir e bin riyul’ e yafas.”​—1 Timothy 6:17-19.

Kan Pining e Sorok Ngorad ni Bochan e Ur Folgad

19. Mang e i yog Jesus ngak e pi Kristiano nu Smyrna ngu Philadelphia ni be pining e sorok ngorad ma be fonownagrad?

¹⁹ Ke lingagil e ulung nu Smyrna ngu Philadelphia ni bochan e kar pied kanawoen e fol ma dariy e ginang rok Jesus ko babyor ni yoloy ngak e gali ulung ney. I yol ngak e ulung nu Smyrna ni gaar: “Gu manang e pi n’en ni ga be gafgow riy; ma gu manang ni gab gafgow​—machane bin riyul’ e rib fel’ rogom.” (Revelation 2:9) Ri yad ba thil rok e piin nu Laodicea ni ur ufgad ni bochan e boor ban’en rorad, machane bin riyul’ riy e ri yad ba gafgow! Machane dubun Moonyan’ ni nge guy e piin nib yul’yul’ ni yad be fol rok Kristus. Ere i gaar Jesus: “Dab mu rus ko n’en ni bay mu gafgow riy. Mmotoyil ngog! I moonyan’ e bayi sikengnagmed ya bayi gagiyegnag nga nin’ boch i gimed nga kalbus; ma gafgow ni nge yib ngomed e bayi par ni ragag e rran. Ere ngam yul’yul’ ngog ni mus ni faanra ngan thang e fan rom, ma aram mu gu pi’ e teeliyaw ko yafos ngom.” (Revelation 2:10) Miki pining Jesus e sorok ngak e ulung u Philadelphia ni gaar: “Kam fol ko tin ni kug fil ko girdi’ ma ga be par ni gab yul’yul’ ngog. Dabi n’uw nap’an mu gub. Mu ayuweg e n’en ni ba’ rom, nge dabi fek be’ puluwon ko gel ni kam ta’.”​—Revelation 3:8, 11.

20. Uw rogon ni be fol bokum million e girdi’ rok Jesus, ma yibe rin’ ni uw rarogorad?

²⁰ Nap’an e “chirofen ni rran rok Somol” ni ke tabab ko duw ni 1914 ma ke fol e tin ni ka bay ko fachi ulung nge fa yugu boch e saf ni be un ngorad ni yad bokum million ni yad ba pasig ko machib ma yad ba yul’yul’. Kan gafgownag boch i yad ma ka nin’ boch i yad nga kalbus ni bochan e ur folgad rok Kristus ni bod ni un gafgownag e pi walagrad ko bin somm’on e chibog. Yugu boch i yad e kar folgad rok Jesus ni nge “fel’ lan owcherad” ni yugu aram rogon ni yad be par u fithik’ e fel’ rogon nge chogow. (Matthew 6:22, 23) Arrogon, ma falan’nag e tin riyul’ e Kristiano gumerchaen Jehovah ni bochan e fol ni ur ted ni yugu de mutrug rarogorad.​—Proverbs 27:11.

21. (a) Mang maruwel rok fare tapigpig ni ka be rin’? (b) Uw rogon ni ngada daged ni gad ba adag ni ngada folgad rok Shiloh?

²¹ Gad be chugur iyan ko fare gafgow nib gel ma ke mudugil u wan’ fare “tapigpig nib yul’yul’ mab gonop” ni nguur folgad rok e Masta rorad ni Kristus. Bay e maruwel rorad ni ngar pied e ggan ni machib ni fan ko chon e tabinaw rok Got ko ngiyal’ ni ngan pi’ riy. Ere nguuda ted fan e ulung rok Jehovah nib theocratic nge pi n’en ni ma yib ko ulung rok. Aram rogon ni gad ra dag ni gad be par u tan pa’ Shiloh, ma ra taw’athnag urngin e girdi’ rok ni yad ma fol rok me pi’ e yafas ni manemus ngorad.​—Matthew 24:45-47; 25:40; John 5:22-24.

[Footnotes]

Ka Ga Manang?

• Mang e liw rok Jesus nrogon ni yog Jacob ko ngiyal’ ni be n’en ni nge yim’?

• Uw rogon ni ngada ted fan Jesus ni ir Shiloh, ma mang lem e ngada ayuwgad riy?

• Mang fonow ni bay fan ngodad e ngiyal’ ney ni bay ko fapi babyor nyoloy ngak fa medlip i ulung u Revelation?

• Uw rogon ni ngada folwokgad rok e ulung u Smyrna ngu Philadelphia?

[Pictures on page 26]

Ma flaabnag Jehovah e girdi’ rok ni bochan e yad ma fol rok fare “tapigpig” nib yul’yul’

[Picture on page 27]

Mo’maw’ ni ngan fol rok Got ni bochan Satan

[Pictures on page 29]

Fare thin nib fel’ u thildad Jehovah e ma ayuwegdad ni ngad folgad rok