Ngan Fol Reb e Fonow Nrib Ga’ Fan ko Piin ni Bitir?

“PI Gallabthir E Yad Baadag Rarogon Be’ nge Be’, Ma Gathi Bitir Ni Yad Ma Fol.” Aram rogon ni yog reb e headline ko simbung. Chi yang i report ney e ni fek ko reb e survey ntay u New Zealand, ma keb i m’ug riy ni ri “22 e pasent ko piin ni kar pied e fulweg e kar lemnaged ni bitir e thingar ni fil ngak ni nge i fol u tabinaw.” Ki pirieg fare survey ni pi gallabthir e ngiyal’ ney e ke mich u wan’rad ni kub ga’ fan ni ngan fil ko bitir e ngongol ni bod e ngongol nib fel’ ngak be’, rogon ni nge lem ni ir rok, nge rogon ni nge lemnag e pi n’en ni nge milfan ngak.

U lan e re yangar ney ni ra be’ ma rogon ma ra be’ ma yigoo ir e ma lemnag ir, ma gathi rib gin owchey ngay ni boor e girdi’ e ba meewar e lem rorad ko fol nge rogon ni ngar filed ban’en ko bitir rorad. Machane fol ni ma ta’ e piin nib bitir e thingar ni pag ya aram e thin ko kakrom ara ban’en ni ke pag nap’an fa? Ara aram e bay u fithik’ e tin th’abi ga’ fan e thin ni rayog ni ngan fil ko bitir me fel’ rogorad riy? Maku bin baga’ fan, e Jehovah, ni ir e cha’ ni Sunmeg e yaram ko tabinaw, e yarmiy rogon ni ngan fol ko gallabthir, ma mang boch angin ni faanra uni fol riy?​—Acts 17:28; Efesus 3:14, 15.

“Biney e Bin nib Mat’aw”

I yol apostal Paul ngak e tin som’mon e Kristiano ko ulung nu Efesus, ni be gaar: “Piin ni bitir, thingar mu folgad rok e gallabthir romed nrogon girdien Kristus, ya ireray e tin nib mat’aw ni ngan rin’.” (Efesus 6:1) Ere, bin th’abi m’on i fan ni ngan fol e bochan nib bay fan nib chagil ko n’en ni ke yog e thin nu Bible nib mat’aw ni ngan rin’. Rogon ni ke yog Paul, “ireray e bin nib mat’aw.”

Muun ko re n’ey, ma gad ra guy ni Thin Rok Got e be weliy ni pi gechig ni ma pi’ e gallabthir ko bitir rorad ni ma yib u fithik’ e t’ufeg e ra bod e pi n’en ni yima nunuw ngay nib fel’ yaan, “t’elyaw nib fel’ yaan ni ngan tay nga lolugem nge churwa’ nib tolang puluwon ni ngan tay nga k’angam,” ma ku aram ban’en ni “fel’ u mit Got.” (Proverbs 1:8, 9; Kolose 3:20) Bin nib math’ keru ngay, faanra dabi motoyil e bitir ko gechig ni ke pi’ e gallabthir rok ma aram e n’en ni ke dag e thin nu Bible nrib kireb.​—Roma 1:30, 32.

“Ya Nge Yog Ni Nge Yib Angin Nib Fel’ Ngom”

Ki gaanag Paul fan reb e fel’ngin ni faanra ni fol faan ni gaar: “ ‘Mu liyor ko chitamam nge chitinam’; ni ereram e bin som’mon e motochiyel ma kan micheg ni gaar: ‘Ya nge yog ni fel’ rogom riy ma rayog ni ngam par nib n’uw nap’an u roy u fayleng.’ ” (Efesus 6:2, 3; Exodus 20:12, NW) Mang kanawo’ e rayog ni nge yib angin nib fel’ riy ngak ni faanra fol ko gallabthir?

Ra ngan tabab, ma gathi riyul’ ni pi gallabthir e boor e duw rorad ma boor e n’en ni kar uned ngay? Yu ngiyal’ e ma m’ug ni bod ni dar nanged boch ban’en u morngaagen e computer ara boch ban’en ni yima fil u skul, machane yad manang boor ban’en u morngaagen e par nge rogon ni ngan athamgiliy boch e magawon ni bay ko yafas rorad. Piin nib fel’ yangaren, e rib thil, ya dariy rorad e lem nib thabthabel nib chagil ko ngongol ko piilal. Ere, baga’ ni yad ma gurgur u rogon ni ngar mel’eged e tin ni ngar rin’ed, ngar uned ko pi fager nib kireb, ma angin e pi n’ey e goo yad e be kirebnagrad. Bin riyul’ riy, yog e Bible ni gaar: “Balyang e bay u gum’ercha’en e piin ni pagal.” Ma mang e falay riy? “Fare dimow ko gechig e ra palognag nga orel.”​—Proverbs 22:15.

Fapi fel’ngin e fol e ma gelnag boch fare tha’ u thilin e gallabthir nge bitir. Faanra baadag e pi ulung ko girdi’ ni nge fel’ rogon e maruwel e yib angin, ma thingar ra maruwelgad u taabang, ma aram e ra moy urngin e motochiyel ni thingari fol e pi girdi’ nem riy. Ni bod e biney, u lan e mabgol, ma aram e nge puf rogoy i pi’ ban’en, ko bin ni ngan ning u fithik’ e damumuw ma dariy bochi yang e lem u rarogon mat’awun ara rogon e lem ku be’, ni ra yib angin riy ko fel’ thilin boch e girdi’, ba gapas, mab falfalan’. U tabon maruwel, ngan maruwel u tan pa’ be’ e aram ban’en ni baga’ fan ko reb e siyobay ara maruwel ni nge fel’ rogon. Ran taareb rogonnag ko pi motochiyel ko am, ma ra ngan fol ko pi motochiyel ma gathi kemus nra chuweg be’ ko gechig nra yib riy machane ku ra pi’ boch e kanawo’ nib palog ko tin rayibnag e kireb ngak maku ra ayuweg.​—Roma 13:1-7; Efesus 5:21-25; 6:5-8.

Piin ni fel’ yangaren ni yad ma kirebnag e motochiyel e baga’ ni dar m’ag gad ko fare ulung. Ba thil ko fare fonow, ni kan fil morngaagen u nap’an ni ka yib bitir nrayog ni nge fel’ rogon be’ riy u n’umngin nap’an e yafos rok. Uw fene manigil ni faan yira fil ban’en ko ngiyal’ ni ka yib bitir!

Bin Th’abi Ga’ e Taw’ath ni Faan Yira Fol

Ran ngan fol ma gathi kemus ni ra fek i yib e falfalan’ nga thilin e tabinaw nge yugu boch e girdi’ ya kura fel’ e yafos rodad ma ra fek i yib e kanawo’ ni rayog ni ngam fal’eg e bin th’abi ga’ fan e tha’​—ni aram e tha’ u thilin be’ nge cha’ ni Tasunumiy. Aram e bin “Th’abi Ga’ Tasunmiy” ni ir e “cha’ ni tabolngin e yafos,” Jehovah Got e rib bay mat’awun ni dariy e maruwar riy ni ngan fol rok.​—Eklesiastes 12:1; Psalm 36:9.

Fare thin ni “fol” u urngin mit fan ni kan ni yoloy e ke m’ug nib pag 160 yay u lan e Bible. Kan chaggiliy ko re n’ey, boor ken e babyor ni goo ma weliy e pi motochiyel rok Got, pi n’en ni yog ni ngan rin’, nge motochiyel, nge motochiyel u rarogon mat’awuy, nge pi n’en ni thingar ni rin’, urngin e pi n’ey e goo ba sor fan ni thingar ni fol rok. Ma kan tay dad ni dariy e maruwar riy ni Got e ma tay ni baga’ fan ni ngad folgad ko pi motochiyel rok ni faanra ngad falfalan’gad ko pi n’en ni ke micheg. Arrogon, ngan fol e aram ban’en ni thingar ni dabin digey ni faanra nge fel’ thildad Jehovah. (1 Samuel 15:22) Rib kireban’, ya rarogon e girdi’ e aram e gathi ngar folgad ya aram e dabra folgad. “Re n’en ni be nameg e gum’ercha’ ku be’ nib moon e ba kireb ko ngiyal’ kab fel’ yangaren nge ilal,” aram rogon ni yog e Bible. (Genesis 8:21) Ere, ra ngan fil rogon e fol ma aram e gathi kari mus ni ngiyal’ ni ka yib bitir machane u n’umngin nap’an e yafos. Ma faanra yira rin’ ma ra yib angin nrib fel’.

Am sul ngam lemnag, rogon ni yog apostal Paul, fare motochiyel ni thingar ni fol ko gallabthir e ke yib nib muun ngay l’agruw ban’en ni micheg riy, ni aram e “ra fel’ rogom riy nge ku gara par nib n’uw nap’an u roy u fayleng.” Ran pirieg fare thin ni be gelnag fan e re n’ey u Proverbs 3:1, 2: “Fakag, dab mu pag talin e pi motochiyel rog, ma ga tay e pi thin rog nga gum’ercha’em, ya n’umngin e rran nge pi duw ko yafos nge gapas e ra mun ngom.” Bin th’abi ga’ e taw’ath nran pi’ ngak e piin ni yad ra fol e aram e ra fel’ thilrad Jehovah e chiney nge yafos ndariy n’umngin nap’an u lan e fayleng nib gapas mab biech.​—Revelation 21:3, 4.

[Pictures on page 30, 31]

Gad ra fol ma ra fek i yib e falfalan’ nga thilin e girdi’ u tabinaw, nge tabon e maruwel, nge ngak Jehovah