Mang Fan Ni Thingar Uda Meybilgad Ni Gubin Ngiyal’?

“Mu um meybilgad ni gubin ngiyal’, demtrug e n’en nra yib ngomed ma gubin ngiyal’ ni nguum pininged e magar ngak Got.”​—1 Thessalonika 5:17, 18.

1, 2. Uw rogon ni dag Daniel ni i ta’ fan fare taw’ath nrayog ni nge meybil, ma mang e ke rin’ e re n’en ney ko tha’ u thilrow Got?

DANIEL ni fare profet e ke mecham ni nge meybil ku Got ni dalip yay u gubin e rran. Ma ragbug nga but’ nib chuchugur ko winda ko singgil rok ko thal ni lang, ni ba sap ko fare mach nu Jerusalem, me meybil ku Got. (1 Kings 8:46-49; Daniel 6:10) Mus nga nap’an ni kan pi’ reb e motochiyel ni yib rok fare pilung ni dabiyog ni ngan meybil ngak yugu reb e kan ya kemus ni Darius, ni fare pilung nu Media, me par Daniel nri de maruwaran’ ni nge ulul ko meybil. Demtrug ko bay e riya’ riy fa dariy, ma re pumoon ney ni ke mecham ko meybil ni gubin ngiyal’ e be par ni be wenig ngak Jehovah.

² Uw rogon Daniel u wan’ Jehovah? Nap’an ni yib Gabriel ni fare engel ni nge fulweg taban reb ko fapi meybil rok Daniel, me weliy murung’agen fare profet ni “be’ ni ri yi baadag daken.” (Daniel 9:20-23; The New English Bible) U lan fare yiiy rok Ezekiel, me weliy Jehovah murung’agen Daniel ni be’ nib mat’aw. (Ezekiel 14:14, 20) N’umngin nap’an e yafas rok, ma meybil rok Daniel e kari ayuweg ni nge fel’ thilrow Got, ma ireray e n’en ni mus ngak Darius ma manang.​—Daniel 6:16.

3. Rogon ni dag e n’en ni buch rok reb e missionary, ma uw rogon ni meybil e ra ayuweg ni nguud pared nib yul’yul’?

³ Meybil ni gubin ngiyal’ e ku ra ayuwegdad ni ngad sabaliyed e skeng nib gel. Ni bod ni, yira lemnag e n’en ni buch rok Harold King, ni reb e missionary u China ni kan dugliy ni ngan kalbusnag ni goo ir u lan lal e duw. Murung’agen e tin ni buch rok, me weliy Brother King ni gaar: “Kan tayeg ko gin ndariy e girdi’ riy, machane dariy be’ nrayog ni nge tayeg ko gin nib mal’af rok Got. . . . Ere, gu ma ragbug nga but’ u lan e cell rog ni dalip yay u gubin e rran ma gu ma meybil ni baga’ lamag, ni girdi’ ni ma yib e ra guyeg, ma gu ma lemnag Daniel, ni en ni be weliy fare Bible murung’agen. . . . Ngiyal’ nem e gowa fare kan ni thothup rok Got e be pow’iy lanin’ug ko tin ni ri baga’ fan me par ni ba gapas lanin’ug. Bochan e meybil e rib gel gelngin e tirok Got nge pagan’ ni keb ngog!”

4. Mang boch e deer u murung’agen e meybil ni yira weliy ko re article ney?

⁴ Fare Bible e be yog ni gaar: “Mu um meybilgad ni gubin ngiyal’, demtrug e n’en nra yib ngomed ma gubin ngiyal’ ni nguum pininged e magar ngak Got.” (1 Thessalonika 5:17, 18) Bochan e re fonow ney, ma ngad tedan’dad ko boch e deer ni gaar: Mang fan ni thingarda tedan’dad ko meybil ni gad ma ta’? Mang boch i fan ni ngad chuchugurgad ngak Jehovah ni gubin ngiyal’? Ma mang e thingarda rin’ed nfaanra kad thamiyed ni dariy rogodad ni ngad meybilgad ku Got nbochan e tin kireb ni kad rin’ed?

Ngan Gelnag e Tha’ u Thiliy u Daken e Meybil

5. Mang e re fager nib thil nra yog ni ayuwegdad e meybil ngad falfalan’gad ngay?

⁵ Ga baadag ni nge tay Jehovah ni gimew fager? I non ngak Abraham ni patriarch ni aram rogon. (Isaiah 41:8; James 2:23) Baadag Jehovah ni nge fel’ thildad. Ma tin riyul’ riy e be piningdad ni ngada chuchugurgad ngak. (James 4:8) Gathi be k’aringdad e re pong nem ni ngada fal’eged i lemnag fare taw’ath ni ke pi’ ngodad ni aram e meybil? Rib mo’maw rok be’ ni nge pirieg ba ngiyal’ ni nge non ngak be’ ni baga’ ko am, ma kab mo’maw ni nge mang fager rok! Yugu aram rogon, ma fa En Ke Sunmiy fare palpalthib e ir e ke pi’ e athamgil nga lanin’dad ni nguuda chuchugurgad ngak u daken e meybil, ndemtrug e ngiyal’ ni gad baadag ara ngiyal’ nib t’uf ni ngad meybilgad ngak. (Psalm 37:5) Meybil rodad ni gubin ngiyal’ e ke ayuwegdad ni ngari fel’ thildad Jehovah.

6. Mang e n’en ni rin’ Jesus ni be fil ngodad nib t’uf ni ngad “meybilgad ni gubin ngiyal’”?

⁶ Machane, rib mom ni ngad paged talin e meybil! Kemus ni ngan pithig e magawon ni ma yib ngodad u gubin e rran ma rayog ni ngarda tedan’dad ngay ma arfan ni dabiyog ni ngad athamgilgad ni ngad nonod ngak Got. Ke pi’ Jesus e athamgil nga laniyan’ pi gachalpen ni nguur “meybilgad ni gubin ngiyal’,” ya aram e n’en ni ma rin’. (Matthew 26:41) Yugu aram rogon ni Jesus e boor pa’ u puluwon ni kakadabul nge mada’ ko nep’, ma ke dugliy e tayim ni nge non ngak e Chitamangin nu tharmiy. Yu ngiyal’, ma ma od “ni tanirran ni kab nep’,” ni nge meybil. (Mark 1:35) Yu ngiyal’, me yan ko gin ni dariy e girdi’ riy u nap’an ni ke aw e yal’ ni nge non ngak Jehovah. (Matthew 14:23) Gubin ngiyal’ ni ma yarmiy Jesus ngal’an ni nge meybil ngak Got, ma ireray e n’en ni thingar uda rin’ed.​—1 Peter 2:21.

7. Bochan e mang e susun ni nge k’aringdad ni ngad nonod ngak e Chitamangidad u tharmiy ni gubin e rran?

⁷ Boor e tayim nib puluw ni ngad meybilgad ngak Got ni goo gadad u gubin e rran u nap’an ni gad be mada’nag boch e magawon, bay ban’en ni be wawliy lanin’dad ko kireb, nge ngiyal’ gad ra dugliy ban’en. (Efesus 6:18) Nap’an ni gad ra ning ngak Got ni nge pow’iydad ko urngin yang ko yafas rodad, ma ngari fel’ thildad. Faanra l’agruw ni’ ni yow fager e yow ma pithig e magawon rorow u taabang, ma gathi ngari fel’ thilrow? (Proverbs 17:17) Ku aram rogon gadad, riyul’ nfaanra nguuda pagedan’dad ngak Jehovah ma gad ra guy e ayuw ni be pi’ ngodad.​—2 Kronicles 14:11.

8. Mang e kada filed ko tin ni rin’ Nehemiah, nge Jesus, nge Hannah, u murung’agen n’umngin nap’an e meybil rodad ni goo gadad?

⁸ Ri gad ba falfalan’ ya bochan de yog Got n’umngin nap’an e meybil rodad ni fan ngak ma de yog n’umngin nap’an ni susun nge yan ma fin da meybilgad ngak biyay! I meybil Nehemiah ndabni rung’ag laman mab pay u m’on ni nge ning ban’en ngak fare pilung nu Persia. (Nehemiah 2:4, 5) Maku i meybil Jesus nib ngoch u nap’an ni ke ning ngak Jehovah ni nge pi’ gelngin ni nge faseg Lazarus ko yam’. (John 11:41, 42) Ma reb, e Hannah “ni i meybil nib n’uw nap’an” ngak Jehovah ko ngiyal’ ni ke weliy e tin laniyan’ ngak. (1 Samuel 1:12, 15, 16, NW) Rayog ni ngada meybilgad nib ngoch ara ba n’uw nap’an ni be yan u rogon e tin nib t’uf rodad nge magawon rodad.

9. Mang fan nu fithik’ e meybil rodad e susun ni ku ngad pininged e sorok ngak Jehovah ma ngada pininged e magar ngak ko urngin ban’en ni ke rin’ ngodad?

⁹ Boor e meybil u lan e Bible ni be pining e magar nbochan e liw rok Jehovah nib tolang nge bochan e n’en ni ke rin’ ni yira ngat ngay. (Exodus 15:1-19; 1 Kronicles 16:7-36; Psalm 145) U reb e changar ni kan piliyeg rok John ni apostal e i guy fa 24 e piilal​—ni be yip’ fan e piin Kristiano ni kan dugliyrad ni yad urngin ni bay e maruwel rorad u tharmiy—​ni yad be pining e sorok ngak Jehovah, ni be lungurad: “Somol ni Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu lemnag mi yad sum ni yad ba fas.” (Revelation 4:10, 11) Maku gadad e bay fan ni ngad pininged e sorok ngak e En Tasunmiy ni gubin ngiyal’. Uw feni gel e falfalan’ ko gallabthir u nap’an ni ra pining fakrow e magar ngorow ni yib u gum’irchaen nbochan e n’en ni kar rin’ew ngak! Ngan fal’eg i lemnag u fithik’ e tayfan e ngongol rok Jehovah nib gol ma ngad pininged e magar riy ngak ni yib u gum’irchadad e aram reb e kanawo’ ni ra mon’ognag felngin e meybil rodad.

“Mu Um Meybilgad ni Gubin Ngiyal’”​—Mang fan?

10. Uw rogon ni nge ayuwegey e meybil me gel e michan’ rodad?

¹⁰ Meybil ni gubin ngiyal’ e baga’ fan ko michan’ rodad. Tomren ni weliy Jesus e fanathin ni be dag nib t’uf ni “gubin ngiyal’ ma nguu ra meybilgad ma ri dabi ngochngochan’rad,” me fith Jesus ni gaar: “Machane ra sul e en ni Fak e Girdi’ ma gur ra pirieg e girdi’ nu fayleng ni yad be par ni kab michan’rad ngak?” (Luke 18:1-8) Meybil ni yib u gum’irchaey e ra gelnag e michan’. Nap’an ni ke pillibthir i yan Abraham ni patriarch ma dawori yog e bitir ngak, me weliy ngak Got u murung’agen e re n’em. Ke fulweg Jehovah taban, som’mon e ke yog ngak ni nge sap nga tharmiy ni nge theeg e pi t’uf, nfaanra rayog rok. Me micheg Got ngak Abraham ni gaar: “Aram urngin e piin ni owchem ni bay yib.” Ma angin ni yib riy? Me “pagan’ Abraham ko tin ni ke yog Somol, ma aram me matheeg Somol ngak Abraham ni be’ ni ke mat’aw ni bochan e ke pagan’ ko tin ni ke yog ngak.” (Genesis 15:5, 6) Faanra ngada binged gum’irchadad ngak Jehovah u daken e meybil, ma ngada chaariyed e tin ke micheg u Bible, ma gad be fol riy, ma ra gelnag e michan’ rodad.

11. Uw rogon ni nge ayuwegdad e meybil ni ngad pithiged e magawon?

¹¹ Meybil e ku rayog ni nge ayuwegdad ni ngada pithiged e pi magawon rodad. Ke tomal lanin’dad ni bochan e par rodad u gubin e rran nib mo’maw ni ngad kadedan’dad fa? Fare Bible e be yog ni gaar: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw ni ngar dol’gad.” (Psalm 55:22, NW) Nap’an ni ga ra dugliy ban’en nib mo’maw’, ma rayog ni ngad folgad ko tin ni rin’ Jesus. Reb e nep’ ni polo’ ni be par ni be meybil ni goo ir u m’on ni nge mel’eg fa 12 e apostal rok. (Luke 6:12-16) Ma fare nep’ u m’on ni yim’ Jesus, me meybil nrib gel ni “athuw u downgin e bod yu mey i racha’ ni be map’ nga but’.” (Luke 22:44) Ma angin nib riy? Me “fulweg Got taban e meybil rok.” (Hebrews 5:7) Meybil rodad nib elmirin u gubin ngiyal’ e ra ayuwegdad ni ngad gelgad ko magawon nib gel nga fapi skeng nib mo’maw.

12. Uw rogon ma meybil e be dag rogon e t’ufeg rok Jehovah ngodad?

¹² Ku reb i fan ni ngada chuchugurgad ngak Jehovah u daken e meybil, ya ra ngad yodoromgad ma ku ra chuchugur ngodad. (James 4:8) Nap’an ni gad ra bing gum’irchadad ngak Jehovah u daken e meybil, gathi gad be thamiy ni baadag ni nge ayuwegdad ko tin nib t’uf rodad ma be ayuwegdad u fithik’ e runguy rok? Kari dag Got e t’ufeg rok ngodad ni be’ nge be’. De pi’ Jehovah mat’awon yugu be’ ni ir e nge motoyil ko meybil rok bagayad e pi tapigpig rok ni ba puluw ngak e Chitamangirad nu tharmiy. (Psalm 66:19, 20; Luke 11:2) Me piningdad ni ‘ngad paged e pi n’en ni ke magafan’dad ngay nga daken ya bochan ni ri be lemnagdad.’​—1 Peter 5:6, 7.

13, 14. Mang boch i fan ni ngad meybilgad ni gubin ngiyal’?

¹³ Meybil e ra pasignagan’dad ni ngad uned ko machib u fithik’ e girdi’ ni yoor ma ma gelnagdad u nap’an ni gowa ke fel’ u wan’dad ni ngad talgad ko machib nbochan e girdi’ ni ma dariyfannagdad ara tatogopuluw. (Acts 4:23-31) Meybil e ku ra yororiydad ko “pi ban rok Moonyan’.” (Efesus 6:11, 17, 18) Nap’an ni gad be athamgil ni ngad gelgad ko skeng ni ma yib ngodad u gubin e rran, ma rayog ni ngada ninged ngak Got ni nge gelnagdad. Meybil rok Jesus ni yima fol riy e ba muun ngay ni gad be ning ngak Jehovah ni nge “ayuwegdad rok faanem nib kireb,” i Satan ni fare Moonyan’.​—Matthew 6:13.

¹⁴ Faanra uda ululgad ni nguuda ninged e ayuw ma rayog ni ngada gagiyegnaged lanin’dad ni tadenen, ma ra ayuwegdad Jehovah. Kan micheg ngodad ni gaar: “Yi Got e dabi thiliyeg e tin ni ke yog ni ra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy; machane re ngiyal’ i n’em e ra pi’ gelngimed ngam kadedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.” (1 Korinth 10:13) Paul ni apostal e ku kan pi’ ngak gelngin Jehovah ni be ayuweg u nap’an ni keb e magawon ngak nib thilthil. “Demtrug e mit i n’en ni gu ra mada’nag ma bay gelngig nbochan e en ke pi’ gelngig,” i yog ni aray rogon.​—Filippi 4:13; 2 Korinth 11:23-29.

Yugu Demtrug e Kireb ni Kam Rin’ed Mu Um Meybilgad ni Gubin Ngiyal’

15. Mang e ra buch nfaanra ngada ngongolgad nib togopuluw ko motochiyel rok Got?

¹⁵ Thingar dabda n’aged e fonow ko thin rok Got ni yira rung’ag e meybil rodad. “Demtrug e n’en ni gadad ra ning ngak ma ma pi’ ngodad,” i yoloy John ni fare apostal, me ulul ngay ni gaar, “ni bochan e gadad be fol ko tin ke yog ngodad ma gadad be rin’ e tin nib m’agan’ ngay.” (1 John 3:22) Machane, mang e ra buch nfaanra dakir yog ni da rin’ed e motochiyel rok Got? Tomren ni ke denen Adam nge Efa mi yow mith rok Got u lan fare milay’ nu Eden. Ku arrogodad ni rayog ni ngad lemnaged ni ngad “mithgad rok Jehovah” ma dab kuuda meybilgad. (Genesis 3:8, NW) “Kug guy ni tin som’mon e oloboch ni rin’ e piin ni kar mal’afgad rok Jehovah nge ulung rok e baga’ ni kar talgad ko meybil,” rogon ni yog Klaus, ni reb e piilal ni ma lekag e ulung ni ke yoor boch e tin ni manang. (Hebrews 2:1) Ireray e n’en ni buch rok José Ángel. Ke yog ni gaar: “Ke chuchugur ko meruk e duw, ni gathi ri gu ma meybil ngak Jehovah. Kug thamiy ndariy rogog ni nggu non ngak Got, nyugu aram rogon ni ka gu be lemnag ni ir e Chitamag nu tharmiy.”

16, 17. Mu dag ko uw rogon ma meybil ni gubin ngiyal’ e ra ayuweg fadad meewar ko tirok Got.

¹⁶ Sana boch i gadad e be lemnag ni dariy rogodad ni ngada meybilgad ngak Got ya bochan kad wargad ko tirok Got ara kad rin’ed e tin kireb. Machane ireray e tayim ni rib t’uf ni ngad meybil gad ngak Got. Ke mil Jonah me yan nga bang nib palog ko binaw ni kan tay chilen ni nge yan ngay. Machane ‘bochan e gafgow ni ke yib ngak, me pining Jonah Jehovah, me fulweg taban. U lan e yal ko Sheol, ke ning Jonah e ayuw, me rung’ag Jehovah laman.’ (Jonah 2:2, NW) I meybil Jonah, me fulweg Jehovah taban e meybil rok, me gol Jonah ko m’ar ko tirok Got.

¹⁷ Maku ke meybil José Ángel nib gel me ning e ayuw. Me yib ngan’ e tin ni rin’ me yog ni gaar: “Kug bing gum’irchaeg ma kug wenig ngak Got ni nge n’ag fan e kireb rog. Ma kari ayuwegeg. Gu be lemnag ni dabiyog ni nggu sul ko tin riyul’ nfaanra gathi bochan e meybil. Chiney ma bay ngal’an ni gu ma meybil ni gubin e rran, ma ri gu ma lemnag ngal’an ni nggu meybil ya gu baadag.” Thingar dabi maruwaran’dad ni nga dogned ngak Got u murung’agen e oloboch rodad ma ngada ninged ngak u fithik’ e sobut’an’ ni nge n’agfan e kireb rodad. Nap’an ni ke weliy David ni pilung e kireb rok ngak Jehovah, me n’ag fan u wan’. (Psalm 32:3-5) Baadag Jehovah ni nge ayuwegdad, ma dabun ni nge turguy e kireb nga dakendad. (1 John 3:19, 20) Ma meybil rok e piin ni piilal u lan e ulung e ra ayuwegdad ko tirok Got, ya bochan meybil rorad e ba’ “gelngin nib gel.”​—James 5:13-16.

18. Demtrug feni palog ni ke sor e pi tapigpig rok Got nga bang ma mang e rayog ni ngara pagedan’dad ngay?

¹⁸ Mini’ e en chitamangiy ni nge n’ag fak ni keb ngak ni be ning e ayuw nge fonow u fithik’ e sobut’an’ u tomren ni ke rin’ e tin nib oloboch? Fare fanathin u murung’agen fare fak ni pumoon ni prodigal e be dag ni demtrug palogen e gin ni kad maloggad ngay, ma ra falfalan’ e Chitamangidad nu tharmiy nfaan gad ra sul ngak. (Luke 15:21, 22, 32) Be pi’ Jehovah e athamgil nga laniyan’ urngin e girdi’ ni kar rin’ed e tin nib kireb ni ngar pininged, ya ri ma “n’ag fan ban’en u wan’.” (Isaiah 55:6, 7) Yugu aram rogon ni boor yay ni ke rin’ David e denen nib ubchiya’, me pining Jehovah, ni be gaar: “Mu motoyil, O Got, ko meybil rog; ma dabmu mith rog ni gu be ning e ayuw rom.” Maku ke yog ni gaar: “Nep’ nge kakadabul nge misiw ma be par ni be magafan’ug ma gu ma gelgel, me rung’ag [Jehovah] lamag.” (Psalm 55:1, 17, NW) Ri ma pasignagan’uy!

19. Mang fan ni thingar dab dogned ni fapi meybil ni gowa dan fulweg taban e ireray e mich riy ni de puluw e re n’em u wan’ Got?

¹⁹ Uw rogon nfaanra dan fulweg taban e meybil rodad nib papey? Thingarda maruweliyed ni tin ni kad ninged e nge m’agan’ Jehovah ngay ma kada ninged u fithingan Jesus. (John 16:23; 1 John 5:14) James ni reb i gachalpen e i weliy murung’agen boch e Kristiano ni dan rung’ag e meybil rorad ya kar “ninged ban’en nib kireb e tin yad be finey ngay.” (James 4:3) N’en nib thil riy, e thingar dabda gurgad ni ngad lemnaged ni bochan dan fulweg taban e meybil rodad ma gubin ngiyal’ ni ireray e mich riy ni de falfalan’ Got ngodad. Yu ngiyal’ ma pag Jehovah ni nge yan e tayim ni pi tapigpig rok e nguura yibilayed ban’en ni boor yay ma fin ni m’ug e fulweg rok. “Mu ninged, me yog ngomed,” i yog Jesus ni aram rogon. (Matthew 7:7) Ere, ba t’uf ni nguuda “meybilgad ni gubin ngiyal’.”​—Roma 12:12.

Ngan Meybil ni Gubin Ngiyal’

20, 21. (a) Mang fan nib t’uf ni ngada meybilgad ni gubin ngiyal’ e ngiyal’ ney ni “tin tomren e rran”? (b) Mang e n’en ni nge yog ngodad nfaanra nguuda chuchugurgad nga tagil’ Jehovah?

²⁰ Pi n’en ni be mochuchnagey nge magawon e be yoor i yan e ngiyal’ ney ni “tin tomren e rran,” ni pow riy e “ke mo’maw ni ngan par”. (2 Timothy 3:1) Ma fapi skeng e mom ni nge magawonnag lanin’dad. Machane, meybil rodad ni gubin ngiyal’ e ra ayuwegdad ni ngada tedan’dad ko tirok Got ban’en nyugu aram rogon ni ma yib e magawon, nge pi n’en ni ma wawliy lanin’dad ko kireb, nge n’en ni rayog ni nge mulan’dad riy. Meybil rodad ngak Jehovah ni gubin e rran e ra pi’ e ayuw ngodad nrib t’uf rodad.

²¹ Jehovah, ni “En ma fulweg taban e meybil,” e gathi rib boor pa’ u puluwon ni dab kiyog ni nge motoyil ngodad. (Psalm 65:2) Dabda paged ni nge dakuriy e tayim rodad ni ngada nonod ngak. Fager rodad Got e ireray e n’en ni bod e chugum ni bin tha’bi tolang puluwon. Yibe athapeg ni dabda dariyfannaged. “Ere nge dab kud tamdaggad ngad bad nga tagil’ Got, ko gin ni bay e ayuw riy. Ya ereram e gin ni yira runguydad riy min ayuwegdad ko ngiyal’ ndabi siy ni ngar ni ayuwegdad.”​—Hebrews 4:16.

Uw Rogon ni Ngam Pi’ e Fulweg?

• Mang e gad ra fil ko n’en ni rin’ Daniel ni profet u murung’agen puluwon e meybil?

• Uw rogon ni ngada gelnaged e tha’ u thildad Jehovah?

• Mang fan ni thingarda meybilgad ni gubin ngiyal’?

• Mang fan ni lem rodad ndariy rogodad e susun dabi talegdad ni ngada meybilgad ngak Jehovah?

[Picture on page 12]

I meybil Nehemiah nib ngoch nap’an, ma dabiyog ni ngan rung’ag laman u m’on ni nge non ngak e pilung

[Picture on page 13]

Me par Hannah “ngi i meybil ngak Jehovah nib n’uw nap’an”

[Picture on page 14]

I meybil Jesus u lan reb e nep’ ni polo’ u m’on ni mel’eg fa 12 e apostal rok

[Pictures on page 16]

U lan reb e rran ni polo’ ma bay boor e tayim riy nrayog ni ngan meybil