Gay Rogon ni Nge Yoor Ban’en

“Faanra gubin ngiyal’ ma der gaman ban’en u wan’dad, ma aram e ri dariy ban’en ni ra gaman rodad.”​—Ba report ko Worldwatch Institute.

“MANG e gamad baadag? Urngin ban’en. Wuin e gamad baadag? Chiney.” Re thin ney e baga’ ni i yog boch e bitir u skul ko college ko pi duw ko 1960. Chiney, e pi thin ney e sana dakunir rung’ag ni rogon, machane lem riy e ke magey. Riyul’, fare gay rogon ni nge yoor ban’en e ba pow ko ngiyal’ rodad ney.

Boor e girdi’, e nge yog e fel’ rogon ngak nge chugum ni boor e ir e th’abi m’on ko yafas rorad. Reb e tin kafram e President nu Meriken ni Jimmy Carter e yog biyay ni gaar: “Girdi’ e dakunir nang ni bochan e pi n’en ni ke rin’ ya bochan e pi n’en ni ba’ ni fen.” Ka ba’ boch ban’en ni kab ga’ fan ko chugum fa? Faanra ka ba’, ma bogi mang, ma mang boch felngin ni ra yib riy?