Felngin ni Ra Yib ni Bochan ni Yibe Lek e Pi Kenggin e Motochiyel Rok Got

“Be’ ni ri baadag e silver e dabi gaman ko silver, maku arrogon e ani ri baadag e fel’ rogon ni ku dabi gaman ko tin ni be yib ngak.”​—Eklesiastes 5:10, New World Translation.

MARUWEL ni ra pag rogon e rayog ni k’aring e mochuch, ma mochuch e ra k’aring e m’ar, ni yu ngiyal’ ma ra k’aring e yam’. Boor e binaw, ni tabinaw riy e ke wagey ni bochan e mabgol ni be dar. Ri boor yay, ni yugu be gel i lemnag e chugum nu fayleng me buch e biney nib gel e kireban’ riy. Ma be’ ni ke par ni yigoo ban’en ni nge yog ngak e be lemnag e ra par ni gubin ngiyal’ ma baadag ni ngaki yog boch ngak ni yug demtrug ko mang e ra buch rok ni bochan-​ko bin ni nge fel’ u wan’ e tin ni bay rok. Reb e babyor ni ma ayuwegey e gaar: “Be’ ni ma athamgil nge yog boch ban’en ngak ni urngin ni rayog rok nge taareb rogon ngak e ani buguli yoror rok ni tinib ga’ ni yima rin’ u reb e nam, ni yugu ra faani Buguli yoror Mr. Jones e ke li’ ir ko maruwel ke taw ko gin ni ke chugur ni nge tal gum’irchaen riy ni kafini gaman e aningeg i ragag nge-​dalip e duw rok ni daworiy ni ngeb e binem e m’ar ngak.”

Gay rogon ni ngaki yoor boch ban’en, e ra yog ni ngal’ ni chogow ni ra chuweg e felfelan’ ni ma pirieg be’. Ba’ ba gelngin nib gel ni ma yib fanay e meewar rodad e girdi’ ni bochan e re n’ey, ni aram e yibe​—weliy murung’agen nge felngin ban’en! Television ni kan suguy ko murung’agen e chugum e ra k’aringem ni ngam chuw’iy bogi ban’en ni sana de t’uf rom maku dabiyog puluwon rom. Urngin e pi n’ey e rayog ni nge fekey i yan ko kireb nib gel.

Lem ni fel’ngak ni danir taleg e rayog ni nge dabi gagiyel machane angin e ra kirebnagdad, ni dowef nge pangiy. Ni bod rogon, Solomon ni Pilung ni llowan’ ni gaar: “Ba gum’ircha’ nib gapas e ma ayuweg e dowef.” (Proverbs 14:30, NW) Ba thil ko magar nib gel, magafan’, nge mochuch ko nge fel’ rogoy ko chugum ni ke yoor e rayog ni nge gothey e dowef nge felfelan’ rodad. Tha’ u thiliy e ku ma kireb u nap’an ni chugum ni yibe nameg e ir e be gagiyegnag e yafas rodad. Ma nap’an ni tabinaw rok be’ nge rarogon ngak boch e girdi’ e ra ulul i yan nga but’, maku e ri tay e yafas rok ni ga’ngin.

Feni Tolang e Pi Kenggin e Motochiyel Rok Got

“Ngan tal i fol ko ngongol ko re m’ag ney,” aray e fonow rok apostal Paul ni ke chugur i gaman e l’agruw e biyu’ e duw ni ke yan. (Roma 12:2, NW) Fayleng e bay e t’ufeg rok ngak e piin ni yad ma fol ko pi ngongol ko fayleng. (John 15:19) Fayleng e be guy rogon ni nge fel’ rogon ko pi thamtham rom ni guy ban’en, meth nga ban’en, ri’, fray bon, nge​—rungaag, e nge micheg u wun’um ni ngam adag e yafas nga u mum’ ni bochan e chugum. N’en ni yibe ta’ gelngin e “pi n’en ni yira guy ni yibe yim’ ni bochan” ya nge gur nge ku boch e girdi’ e ngam leked ni nge yoor ban’en romed.​—1 John 2:15-17.

Machane ka ba’ boch ban’en ni kab tolang puluwon ko salpiy, nge gilbuguwan, nge fel’ rogon ko chugum. Bokum miriay e duw ni ke yan, ni ulunguy Solomon ni Pilung urngin mit e chugum ni bay u fayleng. I toy bokum e naun nge yungi milay, nge orchards, nge sib, nge gamanman, nge pumoon nge ppin ni yad ma tang, ni kub muun ngay e gol nge silver. I yoornag Solomon e chugum rok nge thum’ nga wuru’ ko piin ni yad ba m’on rok. Yira yog ni be’ ni rib pag feni fel’ rogon. Solomon e rriyul’ riy ni urngin ban’en ni baadag ma immoy rok. Machane, nap’an ni changar ko pi n’en ni ke yognag, nib gaman me gaar: “Urngin ban’en e ba m’ay fan yibe athamgil i l’ol’og e nifeng.”​—Eklesiastes 2:1-11, NW.

Bochan e gonop rok Solomon nib gel ma ke nang ni ran lek e kenggin e motochiyel rok Got ma ra yib e felfelan’ nib gel. I yoloy ni gaar: “Ere tomuren e re n’em e urngin ban’en ni kan rungaag, e: Ngeb madgun e bin riyul’ e Got min fol ko pi motochiyel rok. Ya karimus e n’en thingari rin e girdi’.”​—Eklesiastes 12:13, NW.

N’en ni kab tolang ko gol nge silver e fare machaf ni yira pirieg u lan fa yungi babyor ko Thin rok Got, ni fare Bible. (Proverbs 16:16) Bod e jewels, tin riyul’ e ba’ u rom nib toar ni fan ngom ni ngam pirieg. Ga ra ker ngam gay fa? (Proverbs 2:1-6) Ani Sunmiydad, ni Yib e tin riyul’ nib ga’ fan rok, e be ta’ ir ngom ni ngam rin’ ma ra ayuwegem. Uw rogon?

Jehovah e ma pi’ e tin riyul’ nib tolang puluwon u daken e Thin rok, nge kan ni thothup, nge ulung rok. (Psalm 1:1-3; Isaiah 48:17, 18; Matthew 24:45-47; 1 Korinth 2:10) Ga ra fal’eg i guy e re n’eney nib tolang puluwon ma ba mo’maw’ ni dabiyog i susunnag tolngin ma ra pi’ ngom rogon ni ngam gonop i mel’eg e bin th’abi fel’ mab th’abi fel’ puluwon i kanawoen e yafas. Jehovah, ni ir e Sunmiydad, e manang e n’en nib t’uf rodad ni riyul’ ni ngad felfelan’gad ngay.

Fare Bible e Ma Mon’ognag Kenggin e Motochiyel ni Th’abi Tolang

Bin nib fel’ e fonow, ni bay u lan e Bible e rayog ni ngan rin’ ma dariy ban’en ni ra taareb rogon ngay. Dodow nib fel’ u rogon pangiy nde pag rogon. Fonow riy e gubin ngiyal’ nib fel’. Ke n’uw nap’an ni ke micheg nib riyul’ ma rayog ni ngan rin’. Rogon e fonow nib fel’ nu Bible e ngan maruwel nib gel, ma ngan yul’yul’, ma nguun fanay e salpiy u fithik’ e gonop, ma dab un malmal.​—Proverbs 6:6-8; 20:23; 31:16.

Reb nib puluw ko re nem, e gaar Jesus: “Dab mu ulunguyed e flaab u roy u fayleng, ya ra kirebnag e ngal nge t’ay ma ra yib e moro’ro’ nga naun nge iring. Machane, ngam ulunguyed e flaab romed u tharmiy, ya dabi kirebnag e ngal nge t’ay, ma dabi yib e moro’ro’ nga naun nge iring.”​—Matthew 6:19, 20.

Binem nni giningey riy nib puluw ngal’an e ku bay rogon ngodad e chiney ni bod ko ngiyal’ nem ni nap’an 2,000 e duw ni ke yan. Ya nge dab da mitgad i gay e fel’ rogon nu fayleng, me yog ni fel’ rogodad e chiney ya gadad be lek reb e kanawo’ ko yafas nib manigil. Kiy riy e ngan ulunguy e flaab ko tirok Got ban’en ni ra fekdad i yan ko yafas nib felfelan’, ma gad felan’ ngay.

Kenggin e Motochiyel Rok Got e Ra Yibnag e Tow’ath

Faan gad ra rin’ nib fel’ rogon e kenggin e motochiyel rok Got ma ra fel’ rogodad riy ni dowdad, nge lanin’dad, nge rarogodad ko tirok Got ban’en. Apostal Paul ni Kristiano e yoloy ni gaar: “Machane piin ni yad baadag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma girngiy e girdi’ ko tagan’ mi yad malog. Ya chogowen e salpiy e ir lik’ingin urngin mit e kireb. Boch e girdi’ e ri yad baadag ni nge yog ngorad ni aram tapgin ma kar mal’afgad u rogon ni nge mich Kristus u wan’rad, ma ke m’ingan’rad ke yib e kireban’ ni pire’ ngorad.”​—1 Timothy 6:9, 10.

Yira adag e salpiy nge boch ban’en nib fel’ ma ra wawliy e girdi’ nga i gay e chugum nib tolang puluwon ni nge yog ngak, nge liw, ma nge yib gelngin. Boor yay, ni sasalap nge tin nde puluw e yima fanay ni nge yog e pi n’en ni yibe nameg ney. Ra un lek e fel’ rogon nu fayleng ma rayog ni nge maadab e tayim rodad nge gelngidad, nge tin nrayog ni ngad rin’ed. Maku rayog ni nge dabki mol owchey ni bochan. (Eklesiastes 5:12) Ma reb, e ra bay e tirok Got ma ra fal’eg rogon e tin th’abi t’uf rodad​—ni aram e ba t’uf rodad e t’ufeg, nge mang fadad, nge ba t’uf rodad ni ngad liyorgad ko fare Got ni ma t’ufegey, ni Jehovah.

Dabki n’uw nap’an ma nen ni be athapeg e girdi’ ko fare fel’ rogon e ri bay nnang nib fel’ rogon u lan e fayleng ku Got nib biech. (Psalm 145:16) Re ngiyal’ i n’em e gaangin e fayleng e “bayi sug ko tamilangan’ u murung’agen Jehovah.” (Isaiah 11:9, NW) Pi kenggin e motochiyel rok Got e bayi yoor nge garer. Ma tin u fayleng nge angin e bay ni chuweg nge chuw. (2 Peter 3:13) Ma aram fapi n’en ni ke fal’eg e yafas rodad ke fel’ rogon ma ke ga’ fan​—ke flont dowdad, ke fel’ rogon e maruwel, nge gosgos nib manigil, ke fel’ e th’a u thilin e tabinaw, nge fager ngak Got ni manemu—​pi n’ey e ra yibnag e felfelan’ ni riyul’ ngak e girdi’.

[Pictures on page 4]

Fayleng e baadagem ni ngam fol ko kanawoen e yafas rok ni nga u mum’ ni bochan e chugum

[Picture on page 5]

N’en ni kab ga’ fan ko gol ara silver e tin nib ga’fan ni yira pirieg u lan e Bible