Pi Tapigpig Rok Jehovah Nib Felfelan’
“Ba felfelan’ e piin ni ri yad ma lemnag e tirok Got nib t’uf rorad.”—MATTHEW 5:3, NW.
1. Mang e bin riyul’ e felfelan’, ma mang e be dag yaan?
RIB GA’FAN u wan’ e girdi’ rok Jehovah e par rorad ni yad ba felfelan’. David ni fare psalmist e ke yog ni gaar: “Ba felfelan’ e girdi’ ni Jehovah e Got rorad!” (Psalm 144:15, NW) Felfelan’ e aram e lem ni ke fel’ lanin’uy. Felfelan’ nrib gel—e ban’en ni kari taw ko gin ba toar u lanin’dad—ni yib ko baaray ni kad nanged ni ke flaabnagdad Jehovah. (Proverbs 10:22) Felfelan’ ni aram rogon e be dag ni ke fel’ thildad e Chitamangidad nu tharmiy nge fare tamilangan’ ni gad be rin’ e tin nib m’agan’ ngay. (Psalm 112:1; 119:1, 2) N’en ni ma pug lanin’uy, ke weliy Jesus mereb i fan nrayog ni nge k’aring e felfelan’ ngodad. Ngan yaliy e pi n’en ni tapgin e felfelan’ ney, u lan e re article ney nge bin migid e ra ayuwegdad ni ngad guyed feni gel e felfelan’ rodad ni faanra ngada yul’yul’gad ko pigpig ku Jehovah ni “fare Got nib felfelan.”—1 Timothy 1:11.
Gad Manang e Tirok Got Ban’en nib T’uf Rodad
2. Mang e ngiyal’ ni i weliy Jesus murung’agen e felfelan’, ma mang e tabab riy ni som’mon?
2 U lan e duw ni 31 C.E., me pi’ Jesus reb e welthin ni bin nth’abi gilbuguwan ni gubin ngiyal’. Ka nog e Welthin u daken e burey ngay ya bochan ke pi’ Jesus e re welthin n’em u barba’ e burey nib sap nga Maday u Galile. Fare Gospel rok Matthew e be yog ni gaar: “Nap’an ni guy [Jesus] e girdi’ ni boor me yan nga daken fare burey; ma tomren ni ke par nga but’ me yib pi gachalpen ngak; me tabab ni nge machibnagrad, ni gaar: ‘Ba felfelan’ e piin ni ri yad ma lemnag e tirok Got ban’en nib t’uf rorad, ya gagiyeg nu tharmiy e ra yog ngorad.’ ” Ra ngan thiliyeg e thin riy u rogon ni kan yoloy kakrom, ma tin som’mon e thin rok Jesus e be gaar: “Ba felfelan’ e piin nib gafgow (ko) tirok Got ban’en,” ara “Ba felfelan’ e piin ni ri yad ba gafgow ko tirok Got ban’en.” (Matthew 5:1-3; Kingdom Interlinear; footnote) Fare Bible ni Today’s English Version e be yog ni gaar: “Ba felfelan’ e piin ni yad manang ni kar gafgowgad ni bochan e tirok Got.”
3. Uw rogon ma lem rodad nib sobut’ e ra ayuwegdad ni ngad felfelan’gad?
3 Nap’an e welthin rok Jesus u barba’ e burey, me dag ni ngari felan’ e cha’ nfaanra ke nang ni tirok Got e rib t’uf rok. Pi Kristiano nib sobut’an’rad, ni bochan ni ri yad manang ni yad e tadenen, e kar weniggad ngak Jehovah ni nge n’agfan u wan’ e kireb rorad u daken e maligach rok Kristus. (1 John 1:9) Ere ke gapas lanin’rad ma keb e felfelan’ ngorad nib riyul’. “Ba felan’ e cha’ ni ke n’ag Got fan e denen rok, ni bochan e kireb rok e ke thang Got.”—Psalm 32:1; 119:165.
4. (a) Uw rogon ni ngada daged ni gad manang e tirok Got nib t’uf rodad nge boch e girdi’? (b) Mang e ra gelnag e felfelan’ rodad nfaanra ri gad ma lemnag e tirok Got nib t’uf rodad?
4 Gad ra nang ni tirok Got ban’en e rib t’uf rodad ma ra k’aringdad ni nguud bieged e Bible ni gubin e rran, ni ngari fel’ rogodad ko ggan nib spiritual ni ke wereg “fare tapigpig nib yul’yul mab gonop” u “ngal’an,” ma ngada uned ko muulung ko Kristiano ni gubin ngiyal’. (Matthew 24:45; Psalm 1:1, 2; 119:111; Hebrews 10:25) T’ufeg rodad ko en buguli yoror rodad e ra ayuwegdad ni ngad naabgad nib t’uf e tirok Got rok boch e girdi’ ma ra k’aringdad ni ngad machibnaged ma ngad filed e thin nib fel’ ko Gil’ilungun ngorad u fithhik’ e pasig. (Mark 13:10; Roma 1:14-16) Ngan wereg e thin nib riyul’ u Bible ngak boch e girdi’ e ra fek e felfelan’ i yib ngodad. (Acts 20:20, 35) Maku ra gel e felfelan’ rodad u nap’an ni gad ra fal’eg i lemnag e athap rodad nib fel’ ko fare Gil’ilungun nge fapi taw’ath nra fek i yib ngodad. Ma athap ko “fachi ulung” ni piin Kristiano ni kan dugliyrad e yafas u tharmiy ni dabku nim’ biid ni yad ra mang bang ko am rok Kristus. (Luke 12:32; 1 Korinth 15:50, 54) Ma athap rok “yugu boch e saf,” e aram e yafas ni dariy n’umngin nap’an u paradis u fayleng u tan e re am nem.—John 10:16; Psalm 37:11; Matthew 25:34, 46.
Uw Rogon ni Rayog ni Nge Felfelan’ e Piin Ke Kireban’rad
5. (a) Mang fan fare bugithin ni “piin ni ke kireban’rad”? (b) Uw rogon ni ke fel’ laniyan’ e piin ni ke kireban’rad?
5 Thin ni bay ko bin migid e felfelan’ ni ke yog Jesus e gowa bay ban’en nib togopuluw ngay. I yog ni gaar: “Ba felan’ e piin ni ke kireban’rad, ya yira fal’eg lanin’rad.” (Matthew 5:4) Uw rogon ni nge felfelan’ be’ maku be kireban’? Rogon ni ngan nang fan e thin ni yog Jesus, mab t’uf ni ngad nanged ko miti mang kireban’ ni be weliy murung’agen. Be weliy James ni gachalpen ni bochan e denen rodad e aram e n’en ma k’aring e kireban’. I yoloy ni gaar: “Pi tadenen, mmalukniged pa’med! Gimed e piin ni gimed be dake modingniged gimed, mu klinnaged laninmed! Me kireban’med, mi gimed dolo’loy, mi gimed yor; mu thiliyeged e minmin romed ko meyor, mi gimed thiliyeg e felfelan’ romed ko taganan’! Mu sobut’niged lanin’med u p’eowchen Got me tolangnagmed.” (James 4:8-10) Piin ni riyul’ ni ke kireban’rad nbochan e denen rorad e kan fal’eg lanin’rad u nap’an ni kar filed ni rayog ni ngan n’agfan e denen rorad nfaanra ngara maruweliyed e michan’ rorad ko maligach rok Kristus ma ngara kalgadngan’rad mi yad rin’ e tin nib m’agan’ Jehovah ngay. (John 3:16; 2 Korinth 7:9, 10) Ra ngan rin’ ni aram rogon ma rayog ni nge fel’ thilrad Jehovah ma bay e athap ni ngar pared nib fas ndariy n’umngin nap’an ni fan ni ngar pigpiggad ngak ma nguura pininged e sorok ngak. Re n’ey e ra pi’ e felfelan’ ngorad ni rib gel.—Roma 4:7, 8.
6. Mang fan ni ke kireban’ boch e girdi’, ma uw rogon ni ke fel’ laniyan’rad?
6 Thin ni yog Jesus e kub muun ngay e piin ni ke kireban’rad ni bochan e tin nib kireb ni bay u fayleng. I puluwnag Jesus ngak fare yiiy ni bay ko Isaiah 61:1, 2 ni be gaar: “Fare Kan ni Thothup rok Somol ni Got e ke sugnigeg. Somol e ke turguyeg ke l’ugeg ni nggu fek e thin nib fel’ i yan ngak e girdi’ nib sobutan’, ni nggu fal’eg laniyan’ e piin ni ke kireban’rad.” Maku ireray e maruwel ni fan ko fapi Kristiano ni kan dugliyrad ni ka yad bay u fayleng, ni be ayuwegrad e piin nib chag ngorad ni “yugu boch e saf”. Yad gubin ni yad be un ko maruwel ni bod ni yibe ta’ e pow nga peri’ e “girdi’ ni yad be gelgel ma yad be dolo’loy nbochan e tin nib kireb ni yibe rin’ riy [yu Jerusalem nib apostate, ni be dag yaan e Kristiano ni googsur].” (Ezekiel 9:4, NW) Pi cha’nem ni ke kireban’rad e ke felan’nagrad fare “thin nib fel’ ko gil’ilungun.” (Matthew 24:14) Yad ba felfelan’ ni kar nanged ni fare m’ag rok Satan nib kireb e ke chuchugur ni ngan thiliyeg ko fa bin nib biech e fayleng rok Jehovah nib mat’aw.
Ba Felfelan’ e Piin ni Yad Ba Sumunguy
7. Mang e de yip’ fan fare bugithin ni “sumunguy”?
7 I ulul Jesus ko Welthin rok u daken fare Burey ni gaar: “Ba felfelan’ e piin nib sumunguy, ya bayra tafanayed e fayleng.” (Matthew 5:5) Yu ngiyal’ e yima lemnag ni be’ nib sumunguy e ba meewar. Machane gathi aram rogon. Nap’an ni be weliy reb e scholar fan fare thin ni kan thiliyeg ni “lem nib sumunguy,” me yoloy ni gaar: “Felngin ni th’abi fel’ ko girdi’ nib [sumunguy] e aram ir be’ nrayog rok ni ngari t’ar laniyan’. Gathi aram e lem ni ba meewar, ara bochan ni lem nib gel e be gagiyegnag, ara be par nib gapas laniyan’ ya dariy ban’en ni be un ngay. Ireray gelngin u fithik’ey nib mudugil.” I yog Jesus u murung’agen ni gaar: “Gub munguy ma gub sobut’an’.” (Matthew 11:29) Yugu aram rogon, ma der rus Jesus ni nge ayuweg kenggin e motochiyel nib mat’aw.—Matthew 21:12, 13; 23:13-33.
8. Sumunguy e rib peth ko mang, ma mang fan nib t’uf e re felngin ney ko tha’ u thildad yugu boch e girdi’?
8 Ere, sumunguy e rib peth ko t’ar laniyan’. Tin riyul’ riy, e sumunguy nge t’ar laniyan’ e ke tay Paul nga taabang u nap’an ni ke weliy murung’agen “wom’engin fare kan ni thothup.” (Galatia 5:22, 23) Sumunguy e thingar ni maruweliy nge gel u daken e ayuw ko kan ni thothup. Ireray reb e felngin e Kristiano ni ra mon’ognag e gapas u thildad e piin ni de michan’rad ngu thilin e piin ni bay u lan e ulung. I yoloy Paul ni gaar: “Ngam mon’ed nga dakenmed ni nge mang mad romed e wurengan’, nge gol, nge sobut’an, nge sumunguy, nge gum’an’. Nge bigimed mi i gum’an’nag ir u puluwon bigimed mu um n’iged fan u wan’med e n’en ni ke rin’ bigimed ngak bigimed.”—Kolose 3:12, 13, NW.
9. (a) Mang fan ni rogon ni ngan dag e lem nib sumunguy e gathi kemus ni fan ko tha’ u thildad yugu boch e girdi’? (b) Uw rogon ma piin ni bay e lem rorad nib sumunguy e yad ra “tafanay e fayleng”?
9 Machane, sumunguy e gathi kemus ni ngada daged ngak yugu boch e girdi’. Gad ra par u tan e gagiyeg rok Jehovah ni th’abi tolang nib m’agan’dad ngay, ma gad be dag ni gadad ba sumunguy. Ani kari dag e ngongol ni aram rogon e Jesus Kristus, ya nap’an ni immoy u fayleng ma ke dag nib sumunguy ma kari fol ko tin nib m’agan’ e Chitamangin ngay. (John 5:19, 30) Jesus e ir e en som’mon ni tafen e fayleng, ya ir e kan dugliy ni nge mang Pilung riy. (Psalm 2:6-8; Daniel 7:13, 14) Ke pi’ e re taw’ath ney ngak fa 144,000 e girdi’ ni ngar “fanayed e tin ni ke tay Got ni fen,” ni kan mel’egrad “u fithik’ e girdi’” ni ngar manged “boch e pilung nguur gagiyegniged e fayleng.” (Roma 8:17; Revelation 5:9, 10; 14:1, 3, 4; Daniel 7:27) Kristus nge piin nra uned ngak ko gagiyeg e ra gagiyegnaged bokum milyon e girdi’ ni yad bod e saf ni pumoon nge ppin nu dakenrad e fare yiiy ni psalm e ra lebug u fithik’ e felfelan’ ni gaar: “Piin nib sumunguy e ra tafanay e fayleng, ma riyul’ ni bayra pirieged e felfelan’ nib gel u fithik’ e gapas nib gel.”—Psalm 37:11, NW; Matthew 25:33, 34, 46.
Ba Felfelan’ e Piin ni Keb e Bilig Ngorad ko Tin nib Mat’aw
10. Mang reb e kanawo’ ma piin ni ‘ke yib e bilig ngorad ko tin nib mat’aw’ e rayog ni ngan suguyrad?
10 Bin migid e felfelan’ ni ke yog Jesus u nap’an ni be welthin u daken e burey nu Galilee e gaar: “Ba felan’ e piin ni ke yib e bilig nge belel ngorad ko tin nib mat’aw, ya yad ra fas.” (Matthew 5:6, NW) Rogon ni be lemnag e pi Kristiano, Jehovah e ir e ke pi’ e motochiyel ni fan ko tin nib mat’aw ban’en. Ere, riyul’ ni piin ni ke yib e bilig nge belel ngorad ko tin nib mat’aw ban’en e keb e bilig nge belel ngorad ko thin rok Got ni be pow’iyey. Pi cha’ nem e ri yad manang e denen nge thibngirad ma yad be yim’ ni bochan ni ngar fel’gad u wan’. Ri yad ba felfelan’ u nap’an ni kar filed e thin rok Got nfaanra ngar kalgadngan’rad ma ra wenignaged ni ngan n’ag fan e denen rorad u daken e maligach rok Kristus, ma rayog ni ngar manged piin nib mat’aw u mit Got!—Acts 2:38; 10:43; 13:38, 39; Roma 5:19.
11, 12. (a) Uw rogon ma pi Kristiano ni kan dugliyrad e ngara manged e piin nib mat’aw? (b) Uw rogon ma piin nib chag ngak e piin ni kan dugliyrad ni ke yib e belel ngorad ko tin nib mat’aw ban’en e yad ra gaman ko gubin?
11 I yog Jesus ni ra felfelan’ e pi cha’nem, ni yad ra “gaman ko gubin”. (Matthew 5:6, Kingdom Interlinear) Pi Kristiano ni kan dugliyrad e kan piningrad ni ngar “gagiyeggad ni yad e pilung” ngar uned ngak Kristus nga tharmiy ma ka nog ni yad “ba mat’aw ni fan ko yafas.” (Roma 5:1, 9, 16-18) Jehovah e ke pofrad ngar manged pifak nib spiritual. Kar uned ngak Kristus ngar feked boch e taw’ath, kan piningrad ni ngar manged pilung nge prist ko am rok u tharmiy.—John 3:3; 1 Peter 2:9.
12 Piin nib chag ngak fapi cha’ ni kan dugliyrad e dawor nog ni kan mat’awnagrad ni fan ko yafas. Machane, ke tay Jehovah ni yad ba mat’aw ni bay e gin ni ngan mus riy u daken e michan’ rorad nga rachaen Kristus ni kan puog. (James 2:22-25; Revelation 7:9, 10) Kan ta’ ni yad ba mat’aw ni yad e pi fager rok Jehovah ma bay ra uned ko piin ni ra magaygad nib fas u nap’an ni ra yib fare “gafgow ni baga’.” (Revelation 7:14) Belel rorad ko tin nib mat’aw ban’en e ku yira chuweg u nap’an ni yad ra mang bang ko fa bin nib biech e fayleng ni “tin nib mat’aw e ngongol e bay i par riy” u tan fa “bin nib biech e lan e lang.”—2 Peter 3:13; Psalm 37:29.
Ba Felfelan’ e Piin Tarunguyey
13, 14. Mang boch e kanawo’ ni rayog ni ngada daged e runguy riy, ma uw rogon ni nge fel’ rogodad riy?
13 Be ulul ko Welthin rok u daken e Burey, i yog Jesus ni gaar: “Ba felfelan’ e piin tarunguyey, ya yira runguyrad.” (Matthew 5:7, NW) Ngan lemnag ni rogon e motochiyel, ma yibe lemnag ni runguy e aram e runguy ni dag reb e tapuf oloboch ni be siyeg ni nge pi’ e gechig ni gubin ngak be’ ni ke oloboch rogon ni yog e motochiyel. Machane rogon ni i fanay e Bible, ma fare bugithin ni som’mon ni kan thiliyeg ni “runguy” e baga’ nib sor fan ko ngan dag e runguy ara wurengan’ ni ra fal’eg laniyan’ e piin ni kar gafgowgad. Ere, piin ni tarunguyey e ri yad ma dag e runguy rorad ko ngongol rorad. Fanathin rok Jesus ku be’ nu Samaria ni tarunguyey e ir e en kari “dag e runguy” ngak be’ nib t’uf e ayuw rok.—Luke 10:29-37.
14 Rogon ni nge yog ngodad e felfelan’ ni bochan e runguy, mab t’uf ni ngarda golgad ngak e piin nib t’uf rorad e ayuw. (Galatia 6:10) I runguy Jesus e girdi’ ni ke guy. “Me ri taganan’ ngorad, ya yad bod e saf nde moy e en ni ma gafaliyrad rorad. Ma aram me tabab i machibnag boor ban’en ngorad.” (Mark 6:34) Manang Jesus ni tirok Got e kab ga’fan ko urngin ban’en nib t’uf rok e girdi’. Maku rayog rodad ni ngad daged ni gadad ba wurengan’ ma gad ma runguyey u daken e maruwel ni ngan pi’ ngak e girdi’ e tin ni rib t’uf rorad—ni fare “thin nib fel’ ko gil’ilungun.” (Matthew 24:14) Maku rayog ni ngad pied e ayuw ngak e Kristiano ni kar pillibthirgad, nge piin ppin ni kem’ figirngirad, nge piin ni kem’ e gallabthir rorad ma nguu “dogned e thin nra fal’eg lanin’rad.” (1 Thessalonika 5:14; Proverbs 12:25; James 1:27) Bochan e re n’ey, e gathi kemus ni ra yib e felfelan’ ngodad ya ku ra runguydad Jehovah.—Acts 20:35; James 2:13.
Piin nib Machalbog Gum’ircharad ma Ma M’oneg Gapas
15. Uw rogon ma rayog ni ngad manged piin nib machalbog gum’irchaen nge piin ni ma m’oneg e gapas?
15 I yog Jesus e bin nel’ nge bin medlip e felfelan’ ni rogon e thin ni baara’ ni gaar: “Ba felfelan’ e piin nib machalbog gum’ircharad, ya bayra guyed Got. Ba felfelan’ e piin ni ma maruweliy nge aw e gapas u thilin e girdi’, ya yira yog ni yad ‘pifak Got.’ ” (Matthew 5:8, 9) En ni bay e gum’ircha’ nib machalbog rok e gathi kemus nib biech e ngongol rok ya kub biech ko tirok Got ban’en ma be pigpig ku Jehovah ni polo’ e lem rok. (1 Chronicles 28:9; Psalm 86:11) Tin som’mon e thin ni kan fanay min thiliyeg ni “ma m’oneg e gapas” e be yip’ fan ni “ma maruweliy ni nge aw e gapas u thilin e girdi’.” Piin ni ma maruweliy nge aw e gapas u thilin e girdi’ e yad ma ngongol u fithik’ e gapas ngak pi walagrad ni Kristiano, mab muun ngay e piin buguli yoror rorad nrogon nrayog rorad. (Roma 12:17-21) Yad ma “gayiy e gapas nguur pared riy.”—1 Peter 3:11.
16, 17. (a) Mang fan ni piin ni kan dugliyrad e yibe pining “pifak Got” ngorad, ma uw rogon ni bayra “guyed Got”? (b) Uw rogon ni ra guy “yugu boch e saf” “Got”? (c) Uw rogon ma mang ngiyal’ e fare “yugu boch e saf” e ngara manged “pifak Got” ni polo’?
16 Kan micheg ngak e piin ni ma maruweliy ni nge aw e gapas u thilin e girdi’ mab machalbog gum’ircharad ni “yira yog ni ‘yad pi fak Got’ ” ma “bayra guyed Got.” Piin Kristiano ni kan dugliyrad e ke fakayrad fare kan ni thothup ma ke pofrad Jehovah ngar manged “pi fak” u nap’an ni ka yad bay u fayleng. (Roma 8:14-17) Nap’an ni yira fasegrad ko yam’ mar uned ngak Kristus nga tharmiy, ma nguura pigpiggad u p’eowchen Jehovah ma aram e ri yad ra guy Got.—1 John 3:1, 2; Revelation 4:9-11.
17 Fare “yugu boch e saf” ni piin ni ma m’oneg e gapas e yad be pigpig ku Jehovah u tan pa’ fare Tachugol saf nib Fel’, ni ke mang “Chitamangirad ni Manemus” ni ir Kristus Jesus. (John 10:14, 16; Isaiah 9:6) Piin ni ra yog rorad e bin tomur e skeng u tomuren e Gagiyeg rok Kristus u lan Taareb e Biyu’ e Duw e yira pofrad ngar manged pi fak Jehovah u fayleng ma “ra yog ngorad e felfelan’ ko puf rogon ni fan ngak pifak Got.” (Roma 8:21, NW; Revelation 20:7, 9) Nap’an ni yad be sonnag e re n’en ney, yad ra pining Chitamangirad ngak Jehovah, ya bochan ni kar ognaged e yafas rorad ngak, ni yad manang ni ir e En ma Pi’ e Yafas. (Isaiah 64:8) Ni bod Job nge Moses kakrom, nrayog ni ngar “guyew Got” u daken e michan’. (Job 42:5; Hebrews 11:27) U daken e changar u ‘gum’ircharad’ ngu daken tamilangan’ rok Got nib puluw, ma kar nanged e pi felngin Jehovah nib fel’ ma yad be athamgil ni nguur folwokgad rok ya yad be rin’ e tin nib m’agan’ ngay.—Efesus 1:18; Roma 1:19, 20; 3 John 11.
18. Rogon ko medlip ni som’mon i felfelan’ ni yog Jesus, mini’ e ke pirieg e felfelan’ nib riyul’ e ngiyal’ ney?
18 Kada guyed ni piin ni ri yad ma lemnag e tirok Got nrib t’uf rorad, nge piin ni ke kireban’rad, nge piin nib sumunguy, nge piin ni ke yib e bilig ngorad ko tin nib mat’aw ban’en, nge piin nib tarunguyey, nge piin nib machalbog gum’ircharad, nge piin ma m’oneg e gapas e ra pirieg e felfelan’ nib riyul’ ko pigpig ku Jehovah. Yugu aram rogon, ma pi cha’ nem e ka ma yib e togopuluw ngorad, maku yima gafgownagrad. Gur ra kirebnag e re n’ey e felfelan’ rorad? Re deer nem e yira weliy ko bin migid e article.
Rogon ni Ngan Sul Nga Daken
• Mang felfelan’ e ra yib ngak e piin ni ri ma lemnag e tirok Got nib t’uf rorad?
• Uw rogon ma piin ni ke kireban’rad e ra fel’ lanin’rad?
• Uw rogon ni ngada daged e sumunguy?
• Mang fan ni thingarda manged e piin nib tarunguyey, mab machalbog gum’ircharad, ma ma m’oneg e gapas?
[Picture on page 8]
“Ba felfelan’ e piin ni ri yad ma lemnag e tirok Got nib t’uf rorad”
[Pictures on page 8]
“Ba felfelan’ e piin tarunguyey
[Picture on page 8]
“Ba felfelan e piin ni ke yib e bilig nge belel ngorad ko tin nib mat’aw ban’en