Thin rok Jesus e Ra Gelnag e Felfelan’
“Me yan [Jesus] nga daken e burey . . . me muulung pi gachalpen nga tooben, ma aram me tabab i machibnagrad.”—MATT. 5:1, 2.
1, 2. (a) Mingiyal’ e tababnag Jesus e Welthin rok u Daken e Burey? (b) Uw rogon ni tababnag Jesus e welthin rok?
KE CHUGUR ni nge gaman 2,000 e duw nap’an ni tal Jesus taaboch i ngiyal’ ko machib u Galile ni bochan e nge yan i un ko madnom ko Paluk’af nga Jerusalem. (John 5:1) Nap’an ni be sul i yan nga Galile ma reb e nep’ nib polo’ ni i meybil ngak Got ni nge ayuweg nge mel’eg 12 i gachalpen ni ngar manged apostal rok. Faani bin migid e rran me muulung e girdi’ ngak me golnag e piin nib m’ar u fithik’rad. Ngemu’ me tabab i machibnag fapi girdi’ u rom u daken e burey nib muun pi gachalpen ngay.—Matt. 4:23–5:2; Luke 6:12-19.
2 Nap’an ni tababnag Jesus e re Welthin rok nem u Daken e Burey me yog ni gad ra felfelan’ ni faanra ba fel’ e tha’ u thildad Got. (Mu beeg e Matthew 5:1-12.) Faanra ba felfelan’ be’ ma aram e be par ni ke fel’ u wan’ e tin ni bay rok. Fa mereb i n’en ni yog Jesus nra rin’ be’ me felfelan’ e be tamilangnag fan nib felfelan’ e Kristiano. Ma pi thin nem e ka ba ga’ angin e ngiyal’ ney ni yugu aram rogon ni ke chugur ni nge gaman 2,000 e duw ni ke yan. Ere, chiney e ngad weliyed e re mereb i n’em.
‘Piin ni Kar Pirieged u Lanin’rad Ndabisiy ni Nge Yog Got Ngorad’
3. Mang e be yip’ fan fare n’en ni ke pirieg be’ u laniyan’ ndabisiy ni nge yog Got ngak?
3 “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad, ya gagiyeg nu tharmiy e ke thap ngorad!” (Matt. 5:3) “Piin ni kar pirieged u lanin’rad . . . ndabisiy ni nge yog Got ngorad” e kar nanged nib t’uf ni nge pow’iyrad Got me runguyrad.
4, 5. (a) Mang fan nib felan’ e piin ni kar pirieged u lanin’rad ni dabisiy ni nge yog Got ngorad? (b) Uw rogon me fel’ rogodad ko tirok Got?
4 Ba felan’ e piin ni kar pirieged u lanin’rad ndabisiy ni nge yog Got ngorad ya “gagiyeg nu tharmiy e ke thap ngorad.” Tin som’on i gachalpen Jesus ni mich u wan’rad ni Jesus fare Messiah e ke mab e kanawo’ ngorad ni nga ra pigpiggad Jesus u taabang u Gil’ilungun Got u tharmiy. (Luke 22:28-30) Demtrug ko athap rodad e ngad pigpiggad Jesus u taabang u tharmiy fa yafas ni manemus u paradis u fayleng u tan e gagiyeg ko Gil’ilungun, ma rayog ni ngad felfelan’gad ni faanra riyul’ ni gad manang nib t’uf rodad e ayuw rok Got.
5 Gathi gubin e girdi’ ni kar pirieged u lanin’rad ni dabisiy ni nge yog Got ngorad ni bochan e boor i yad e dariy michan’ rorad ma dubrad e tirok Got nib thothup. (2 Thess. 3:1, 2; Heb. 12:16) Rogon me fel’ rogodad ko tirok Got e ngada tedan’dad ko fol Bible, ma da pasiggad ko machib, ma dab ud paged e muulung.—Matt. 28:19, 20; Heb. 10:23-25.
Nge “Felan’” e Piin ni Be Kireban’rad
6. Mini’ e “piin ni be kireban’rad,” ma mang fan ni ke ‘felan’rad’?
6 “Nge felan’ e piin ni be kireban’rad, ya ra fal’eg Got lanin’rad!” (Matt. 5:4) “Piin ni be kireban’rad” e ku aram e piin ni “kar pirieged u lanin’rad . . . ndabisiy ni nge yog Got ngorad.” Kireban’ ni kar ted e gathi bochan e tin ni bay rorad ya bochan e denen rorad nge rarogorad ni dawor ra flontgad. Ere mang fan nib “felan’” e piin ni be kireban’rad? Bochan e ke michan’rad ngak Jehovah nge Jesus ma ke fel’ e tha’ u thilrad Jehovah.—John 3:36.
7. Nge uw rogon u wan’dad e re fayleng rok Satan ney?
7 Gur, ma kireban’dad ko tin de mat’aw ni ke garer ko re fayleng rok Satan ney? Ma uw rogon u wan’dad e tin ni yima yim’ ni bochan ni bay ko re fayleng ney? I yog apostal John ni gaar: “Gubin ban’en nib mil fan ngaray nga fayleng ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay—dariy reb e pi n’ey ni yib rok e en ni Chitamangiy; ya urngin me yib rok e fayleng.” (1 John 2:16) Ere mang e ngad rin’ed ni faanra kad nanged ni be meewarnagdad i yan e “lem nu roy u fayleng”? Aram e ngan pey’n’iy e meybil, min fil e Thin Rok Got, min ning e ayuw ko piin piilal u lan e ulung. Demtrug e n’en ni ma k’aring e kireban’ ngodad ma faan gad ra chugur ngak Jehovah ma ra “pi’ e pagan’” ngodad.—1 Kor. 2:12; Ps. 119:52; Jas. 5:14, 15.
Ri Ba Felan’ e “Piin nib Fel’ Lanin’rad”!
8, 9. (a) Ra ba fel’ laniyan’ be’ ma mang e be yip’ fan? (b) Mang fan nib felfelan’ e piin nib fel’ lanin’rad?
8 “Nge felan’ e piin nib fel’ lanin’rad, ya rayog ngorad e tin ni ke yog Got nra pi’!” (Matt. 5:5) Ra ba ‘fel’ laniyan’’ be’ ma gathi be yip’ fan nib meewar fa ma dake sumunguynag ir. (1 Tim. 6:11) Faanra ba fel’ lanin’dad ma aram gad ba sumunguy ma gad ra rin’ e tin nib m’agan’ Got ngay ma gad pag nge mang ir e i pow’iydad. Ku ma m’ug e sumunguy ko ngongol rodad ngak e girdi’ ni gubin nib muun pi walagdad ni Kristiano ngay. Ba puluw e re n’ey ko fonow ni pi’ apostal Paul.—Mu beeg e Roma 12:17-19.
9 Mang fan nib felan’ e “piin nib fel’ lanin’rad”? Bochan e yog Jesus nra “yog ngorad e tin ni ke micheg Got nra pi’” ni aram e ngar tafanayed e fayleng. Jesus e Tafen e fayleng. (Ps. 2:8; Matt. 11:29; Heb. 2:8, 9) Machane, piin nib fel’ lanin’rad fa yad ba sumunguy e ku yad ra ‘un’ i tafanay e fayleng. (Rom. 8:16, 17) Maku boor e piin ni yad ba sumunguy nra yog e yafas ni manemus ngorad u tan Gil’ilungun Jesus u fayleng.—Ps. 37:10, 11.
10. Mang e ra buch ni faanra ba papey e damumuw ngodad?
10 Thingar da sumunguygad ni bod Jesus. Machane, mang e ra buch ni faanra ba papey e damumuw ngodad? Mit ney e ngongol e ra dabuy e girdi’ dakendad riy. Ma faanra gad e walag ni pumoon nib papey e damumuw ngodad ma dabiyog ni ngan pi’ boch e maruwel u lan e ulung ngodad. (1 Tim. 3:1, 3) I yog Paul ngak Titus ni nge puguran ko Kristiano nu Krete ni “ngar pired nib fel’ thilrad e girdi’ ma ba fel’ owcherad nge thin rorad ngak e girdi’, ma gubin ngiyal’ ni ngar sumunguygad ngak urngin e girdi’.” (Titus 3:1, 2) Ere, sumunguy reb e tow’ath ngak e girdi’!
Kar M’ad ni Bochan e Tin nib “Mat’aw”
11-13. (a) Faanra be yim’ be’ ni bochan e tin nib mat’aw, ma mang e be yip’ fan? (b) Uw rogon ni yira “chum’ernag” e piin ni yad be yim’ ni bochan e tin nib mat’aw?
11 “Nge felan’ e piin kar m’ad ngan’rad ni tin ba m’agan’ Got ngay nib mat’aw e nge rin’ e girdi’, ya Got e ra chum’ernagrad ko tin ni ur fineyed.” (Matt. 5:6, BT) N’en ni yog Jesus e “mat’aw” ngay u roy e be yip’ fan ni ngan rin’ e tin nib mat’aw ban’en nib puluw ko tin nib m’agan’ Got ngay nge motochiyel rok. I yog e en ni yoloy e psalm ni ‘kem’ ni bochan’ e tirok Got nib mat’aw. (Ps. 119:20) Gur, rib ga’ fan e tin nib mat’aw u wan’dad ni gubin ngiyal’ ma gad be yim’ ni bochan?
12 Yog Jesus nib felan’ e piin ni kar m’ad ni bochan e tin nib mat’aw ya yira “chum’ernagrad.” Yib i riyul’ e re n’ey u tomren e duw ni 33 ni bochan e aram e ngiyal’ ni dag gelngin Got nib thothup “ko girdi’ nu fayleng . . . e tin nib mat’aw.” (John 16:8) I thagthagnag Got ko girdi’ u daken gelngin nib thothup e thin ni ngar yoloyed nga babyor ko Bible ni yoloy som’on ni thin ni Greek. Pi thin nem e ba ga’ angin ma ma “fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Tim. 3:16) Gelngin Got nib thothup e ku ma ayuwegdad ni nga ‘don’ed nga dakendad e bin nib beech i gadad . . . ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw.’ (Efe. 4:24) Ri gad ba felfelan’ ni kad nanged ni ke fel’ e tha’ u thilin Got nge piin ni kar kalgadngan’rad ko denen rorad u daken e biyul ni pi’ Jesus.—Mu beeg e Roma 3:23, 24.
13 Oren i gadad e ra chum’er ko tin nib mat’aw u nap’an nra yog e yafas ni manemus ngak u fayleng ya gad gubin ma gad be yim’ ni bochan e tin nib mat’aw. Machane, nap’an ni gad be sonnag e re ngiyal’ i n’em ma ngad pired ni kad puluwniged e ngongol rodad ko motochiyel rok Jehovah. I yog Jesus ni gaar: “Ngam m’oneged u wan’med e gagiyeg rok Got nge tin nib m’agan’ ngay.” (Matt. 6:33) Ra aram rogon ma ra yoor e maruwel rok Got ni gad ra rin’ ma gad ra felfelan’.—1 Kor. 15:58.
Fan nib Felfelan’ e “Piin ni Ma Runguy e Girdi’”
14, 15. (a) Uw rogon ni nge m’ug ni riyul’ ni gad be runguy e girdi’? (b) Mang fan nib felfelan’ e “piin ni yad ma runguy e girdi’”?
14 “Nge felan’ e piin ni yad ma runguy e girdi’, ya ra runguyrad Got!” (Matt. 5:7) “Piin ni yad ma runguy e girdi’” e yad ma ayuweg e girdi’. I ngongliy Jesus e maang’ang kakrom ni fan ngak e piin ni kar gafgowgad ni bochan e ke taganan’ ngorad. (Matt. 14:14) Faanra n’ag be’ fan e kireb ku be’ ma aram e ke runguy faanem ni bod Jehovah ni ma runguy e piin ni kar kalgadngan’rad me n’ag fan e kireb rorad. (Ex. 34:6, 7; Ps. 103:10) Aram reb e kanawo’ ni ngad runguyed e girdi’ riy, ma ku reb e thin nge ngongol rodad nra fal’eg laniyan’ e piin ni kar gafgowgad. Bin th’abi fel’ e kanawo’ ni nge m’ug riy ni riyul’ ni ga be runguy e girdi’ e ngam weliy e thin nu Bible ngorad. Bod Jesus ni nap’an ni guy e girdi’ ni kar muulunggad mi ri taganan’ ngorad ma “aram me tabab i machibnag boor ban’en ngorad.”—Mark 6:34.
15 Bay fan ni nge m’agan’dad ko n’en ni yog Jesus ni: “Nge felan’ e piin ni yad ma runguy e girdi’, ya ra runguyrad Got!” Faan gad ra runguy e girdi’ maku yad ra runguydad, ma ku rayog ni nge runguydad Got ko ngiyal’ nra pufthin riy. (Jas. 2:13) Kemus ni goo piin ni yad ma runguy e girdi’ e yira n’ag fan e denen rorad me yog e yafas ndariy n’umngin nap’an ngorad.—Matt. 6:15.
Fan nib Felan’ e ‘Piin nib Machalbog Lanin’rad’
16. (a) Ra nge ‘machalbog lanin’uy’ ma mang e be yip’ fan? (b) Piin nib machalbog lanin’rad e uw rogon ni yad be “guy Got”?
16 “Nge felan’ e piin nib machalbog lanin’rad, ya yad ra guy Got!” (Matt. 5:8, BT) Faanra ba ‘machalbog lanin’dad’ ma ra m’ug ko tin nib ga’ fan u wan’dad nge ar’aren lanin’dad nge n’en ni ma k’aringdad ni ngad rin’ed ban’en maku ra ayuwegdad ni ngad ngongolgad u fithik’ e bin ni riyul’ e “t’ufeg ni ma yib ko gum’ircha’ nib machalbog.” (1 Tim. 1:5) Ma ku faanra ba machalbog lanin’dad ma gad ra “guy Got.” Re n’ey e gathi be yip’ fan ni gad ra guy Jehovah nga owchedad, ya ‘dariy be’ nrayog ni nge guy [Got] nge mu’ me par ni kab fos.’ (Ex. 33:20) Ba puluw ni gaar Jesus, “cha’ ni ke guyeg e ke guy e en ni Chitamangiy” ya ir e ri m’ug fel’ngin Got rok ni rib fel’ rogon. (John 14:7-9) Gowa gad be “guy Got” ni bochan e gad e tapigpig rok u fayleng ni ma ayuwegdad. (Job 42:5) Ma Kristiano ni kan dugliyrad e nap’an ni yad ra yan nga tharmiy ma ri yad ra guy e Chitamangirad.—1 John 3:2.
17. Uw rogodad ni faanra ba machalbog lanin’dad?
17 Be’ nib machalbog e lem rok e ba fel’ e ngongol rok ma dar ma rin’ e kireb u mit Jehovah. (1 Kron. 28:9; Isa. 52:11) Ma faanra ku ba machalbog lanin’dad mab beech e thin nge ngongol rodad, ma dab ud dake gad be pigpig ngak Jehovah ma ba kireb e ngongol rodad.
Piin ni Ma ‘Awnag e Gapas’ e Yad Pi Fak Got
18, 19. Uw rogon e ngongol rok e “piin ni yad ma guy rogon ni nge aw e gapas”?
18 “Nge felan’ e piin ni yad ma guy rogon ni nge aw e gapas u thilin e girdi’, ya ra yog Got ni yad pi fak!” (Matt. 5:9, BT) “Piin ni yad ma guy rogon ni nge aw e gapas” e yad manang e tin ni ngar rin’ed nge tin ni dab ra rin’ed. Faanra gad bod e piin ni ke weliy Jesus murung’agrad, ma aram e gad ma awnag e gapas u thilin e girdi’ ma darud ‘fulweged taban e kireb’ ya gad ma ‘rin’ e tin nib fel’ ngak e girdi’.’—1 Thess. 5:15.
19 Piin ni ma ‘awnag e gapas’ e darur rin’ed ban’en ni ra kirebnag e gapas u thilin e girdi’ ara ur ‘wereged thilin e pi tafager.’ (Prov. 16:28) Ere, gadad e piin ni gad ma guy rogon ni nge aw e gapas e ngad gayed rogon ni nguud pired nib aw e gapas u thildad urngin e girdi’.’—Heb. 12:14.
20. (a) Mini’ e piin ni kar manged “pi fak” Got? (b) Mini’ e piin ni yad ra mang pi fak Got boch nga m’on?
20 Ba felan’ e “piin ni yad ma guy rogon ni nge aw e gapas” ni bochan e “ra yog Got ni yad pi fak!” Pi Kristiano nib yul’yul’ ni kan dugliyrad e kar manged “pi fak” Jehovah. Ke fel’ thilrad Jehovah ni bochan e ke michan’rad ngak Kristus ma yad be pigpig ngak fare “Got ni gadad ba t’uf rok me ir e ma pi’ e gapas” u polo’ i lanin’rad. (2 Kor. 13:11; John 1:12) Uw rogon “yugu boch e saf” rok Jesus ni ku yad ma awnag e gapas? Ra mang Jesus e ‘Chitamangirad ni Manemus’ u nap’an e gagiyeg rok u lan fare biyu’ i duw. Ma nap’an nra m’ay fare biyu’ i duw ma aram e ra sulweg Jesus gubin ban’en ngak Jehovah me par fapi saf ni yad pi fak Got ni kar flontgad.—John 10:16; Isa. 9:6; Rom. 8:21; 1 Kor. 15:27, 28.
21. Uw rogon e ngongol rodad ni faanra gelngin Got e be gagiyegnagdad?
21 Faanra gelngin Got e be gagiyegnagdad mar u da ngongolgad u fithik’ e gapas, ni aram reb i fel’ngin Got. Mar u da gayed rogon ni dabi “k’aring bagadad e damumuw ngak bagadad” fe “awan’ bagadad ngak bagadad.” (Gal. 5:22-26) Ya ra u da gayed rogon ni nge ‘aw e gapas u thildad nge urngin e girdi’.’—Roma. 12:18.
Ba Felan’ e Piin ni Yibe Gafgownagrad!
22-24. (a) Mang fan nib felfelan’ e piin ni yibe gafgownagrad ni bochan e yad be rin’ e tin nib m’agan’ Got ngay? (b) Mang e gad ra weliy ko gal ni migid e thin?
22 “Nge felan’ e piin ni yibe gafgownagrad ni bochan e yad be rin’ e tin nib m’agan’ Got ngay, ya gagiyeg nu tharmiy e ke thap ngorad!” (Matt. 5:10) Miki yog Jesus ni gaar: “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni ba ga’ ni fan ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.”—Matt. 5:11, 12.
23 Piin Kristiano e yad manang ni yira moningnagrad, mu un gafgownagrad, ma yibe t’ar e thin nga dakenrad ni bochan e “yad be rin’ e tin nib m’agan’ Got ngay” ni bod ni un rin’ ngak e pi profet rok Got kakrom. Machane, faanra da k’adedan’dad u fithik’ e pi skeng ney ma aram e gad be felan’nag Jehovah ma gad be tayfan. (1 Pet. 2:19-21) Gafgow ni yibe tay ngodad e dabi chuwegan’dad ko pigpig ni gad be tay ngak Jehovah e chiney i yan nga m’on. Demtrug ko athap rodad e ngad uned ngak Jesus ko gagiyeg u tharmiy fa yafas ni manemus u fayleng u tan e re gagiyeg nem, ma gafgow ni yibe tay ngodad e dabi warnag e felfelan’ rodad. Pi tow’ath ney e be dag fene gol nge fene mat’aw Got.
24 Ka boor ban’en ni gad ra fil ko fare Welthin ni tay Jesus u Daken e Burey. Bay boch ban’en ni ka gad ra fil riy ko gal ni migid e thin. Ngad guyed rogon ni ngad folgad ko pi n’en ni yog Jesus Kristus.
Uw Rogon ni Ga Ra Fulweg?
• Mang fan nib felfelan’ e ‘piin ni kar pirieged u lanin’rad ndabisiy ni nge yog Got ngorad’?
• Mang fan nib felfelan’ e “piin nib fel’ lanin’rad”?
• Mang fan nib felfelan’ e Kristiano ni yugu aram rogon ni yima gafgownagrad?
• Bin ngan ko fapi n’en ni yog Jesus nra yibnag e felfelan’ e ka ri pi’ e athamgil nga lanin’um?
[Picture on page 11]
Fa mereb i n’en ni yog Jesus nra rin’ be’ me felfelan’ e ka ba ga’ angin e ngiyal’ ney
[Picture on page 12]
Bin th’abi fel’ e kanawo’ ni nge m’ug riy ni riyul’ ni gad be runguy e girdi’ e ngad weliyed e thin nu Bible ngorad