Ba Felfelan’ e Piin ni Yad Ma Pigpig ko “Fare Got nib Felfelan’”

1. Mang fan nib felfelan’ e Pi Mich Rok Jehovah? (Mu guy e sasing ni bay u tabolngin e re article ney.)

RIB felfelan’ e Pi Mich Rok Jehovah. Nap’an ni yad ra tay e pi muulung nge pi assembly rorad ngu nap’an ni yad ra tay reb e abich u taabang, ma rayog ni ngam guyrad ni yad be sabethin u fithik’ e felfelan’ ma yad be minmin. Ere mang fan nri yad ba felfelan’? Bin th’abi ga’ fan nri yad ba felfelan’ e bochan ni yad manang Jehovah ni ir “fare Got nib felfelan’,” ma yad ma pigpig ngak, maku yad ma gay rogon ni ngar folwokgad rok. (1 Tim. 1:11, NW; Ps. 16:11) Ere bochan ni Jehovah e ir e En ma yib e felfelan’ rok, ma aram fan ni baadag ni ngad felfelan’gad. Ma boor ban’en ni ke pi’ ngodad ni ngad felfelan’gad ngay.​—Deut. 12:7; Ekl. 3:12, 13.

2, 3. (a) Faanra ba felfelan’ be’, ma mang e be yip’ fan? (b) Mang fan nrayog ni nge mo’maw’ ngodad ni ngad felfelan’gad?

² Me ere uw rogom, gab felfelan’, fa? Faanra ba felfelan’ be’ ma be yip’ fan nib fel’ laniyan’, mab fel’ u wan’ e pi n’en ni bay rok, ni aram e ba felfelan’ ko pi n’em. Be tamilangnag e Bible ni piin ni ma tow’athnagrad Jehovah e rayog e bin riyul’ e felfelan’ ngorad. Machane mang fan nrayog ni nge mo’maw’ ni ngan par e chiney ni yib felfelan’ u lan e re fayleng ney?

³ Rayog ni nge mo’maw’ ni ngad pared ni gad ba felfelan’ u nap’an nra buch boch ban’en rodad nra k’aring e mochuch ngodad ni bod rogon ni ke yim’ be’ nib t’uf rodad, ara kan tharbog be’ nib t’uf rodad ko ulung, ara ke dar e mabgol rodad, ara kan talegdad ko maruwel. Ku rayog ni nge mo’maw’ ngodad ni ngad pared ni gad ba felfelan’ ni faanra dariy e gapas u lan e tabinaw ni bochan e yibe cham, ara yibe moningnagdad u taban e maruwel ara skul, ara yibe gafgownagdad, ara ka nin’dad nga kalbus ni bochan e pigpig rodad ngak Jehovah. Ku reb e rayog ni bochan e gad be pilibthir i yan, ara bay mmit e m’ar rodad ndab kud golgad riy, ara gad be par nib kireban’dad. Machane dab da paged talin ni baadag Jesus Kristus ni ‘ir be’ nib felfelan’ ni be gagiyegnag urngin ban’en,’ ni nge fal’eg lanin’dad ni ngad felfelan’gad. (1 Tim. 6:15; Matt. 11:28-30) Ke weliy Jesus u lan fare Welthin Rok u Daken e Burey murung’agen boch e fel’ngin nrayog ni nge ayuwegdad ni ngad felfelan’gad ni yugu aram rogon ni boor e magawon rodad ni bochan e gad be par ko re fayleng rok Satan ney.

DABIYOG NI NGAD FELFELAN’GAD NI FAANRA BA KIREB E THA’ U THILDAD JEHOVAH

4, 5. Mang e rayog ni ngad rin’ed me yag e felfelan’ ngodad ma gad par ni gad ba felfelan’?

⁴ N’en ni weliy Jesus murung’agen nsom’on e rib ga’ fan. I yog ni gaar: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad, ya gagiyeg nu tharmiy e ke thap ngorad!” (Matt. 5:3) Faanra ba t’uf e tirok Got ban’en rodad, ma aram e be yip’ fan ni gad manang nib t’uf ni ngad filed murung’agen, mab t’uf ni nge ayuwegdad me pow’iydad. Uw rogon ni ngad rin’ed e re n’ey? Aram e ngad filed e Bible, ma gad fol rok Got, ma gad tay ni pigpig rodad ngak e ir e th’abi ga’ fan u lan e yafos rodad. Faan gad ra rin’ e pi n’ey ma ireray e n’en nra yibnag e felfelan’ ngodad. Ku ra gelnag e michan’ rodad ko pi n’en ni ke micheg Got nra rin’ boch nga m’on. Maku reb e, rayog ni nge yib e athamgil nga lanin’dad ni bochan e pi n’en nib fel’ ni ke micheg e Thin rok Got ni fan ngak e piin ni yad be liyor ngak ni aram e n’en ni be “l’agan’dad ngay.”​—Titus 2:13.  

⁵ Faanra gad baadag ni ngad pared ni gad ba felfelan’ ndemtrug ko mang e ra buch u lan e yafos rodad, ma thingar da ululgad i gelnag e tha’ u thildad Jehovah. I yoloy apostal Paul ni gaar: “Gubin ngiyal’ ni nguum felfelan’gad ko taab girdi’ ni kam tiyed Somol. Ere ngku gog bayay ni nge lungug: mu felfelan’gad!” (Fil. 4:4) Ra nge chugur e tha’ u thildad Jehovah, mab t’uf ni nge yag e gonop rok ngodad. Be yog e Thin rok ni gaar: “Ba felan’ e en ni ke yog e gonop ngak, ya ke yib e tamilangan’ ngak. Piin nra ur pired ni yad ba gonop e yad ba felfelan’, ya gonop e ra pi’ e yafos ngorad, ni bod rogon ba ke gek’iy ni yugu be k’uf.”​—Prov. 3:13, 18.

6. Mang e kub t’uf ni ngad rin’ed me yag ni ngad pared ni gad ba felfelan’?

⁶ Machane ra ngad pared ni gad ba felfelan’, ma kub t’uf ni ngad ululgad ni ngad folgad ko pi n’en ni kad filed u lan e Bible. Ke tamilangnag Jesus feni ga’ fan e re n’ey u nap’an ni gaar: “Re bugithin ney nib riyul’ e kam nanged e chiney, faan gimed ra maruwel ngay ma ra um pired ni gimed ba felfelan’!” (John 13:17; mu beeg e James 1:25.) Ere ba ga’ fan e re n’ey ni faanra gad baadag ni nge gaman e tin nib t’uf rodad ni fan ko tirok Got ban’en mad pared ni gad ba felfelan’. Machane uw rogon ni ngad pared ni gad ba felfelan’ ni yugu aram rogon ni boor ban’en nrayog ni nge chuweg e felfelan’ rodad? Ngad weliyed e n’en ni migid ni weliy Jesus murung’agen u lan fare Welthin Rok u Daken e Burey.

BOCH E FEL’NGIN NRA YIBNAG E FELFELAN’ NGODAD

7. Uw rogon nrayog ni nge felfelan’ e piin ni ke kireban’rad?

⁷ “Nge felan’ e piin ni be kireban’rad, ya ra fal’eg Got lanin’rad!” (Matt. 5:4) Sana rayog ni ngad lemnaged ko, ‘Uw rogon nra felfelan’ e piin ni ke kireban’rad?’ N’en ni be weliy Jesus u roy e der yip’ fan gubin e girdi’ ni ke kireban’rad. Ya mus ngak e girdi’ ni kireb maku ma kireban’rad ni bochan e magawon ni yad be yan u fithik’ e ngiyal’ ney ko “tin tomren e rran” ni kari “mo’maw’” e par. (2 Tim. 3:1) Machane pi girdi’ ney e yigoo yad e yad be lemnagrad, ma darur lemnaged murung’agen Jehovah. Maku reb e, de fel’ e tha’ u thilrad Jehovah, ere aram fan ndabiyog ni ngar felfelan’gad. Ere piin ni be weliy Jesus murung’agrad u roy e aram e piin ni yad manang nib t’uf e tirok Got ban’en rorad. Pi girdi’ ney e ma kireban’rad ni bochan e yad be guy ni boor e girdi’ ni kar darifannaged Got ara darur pared nrogon nib m’agan’ ngay. Ku yad manang ni yad bogi tadenen, maku yad be guy e pi n’en nib kireb ni be buch u lan e re fayleng ney. Manang Jehovah e piin nriyul’ ni ke kireban’rad, ma ma fal’eg lanin’rad u daken e Thin rok, me pi’ e felfelan’ nge yafos ngorad.​—Mu beeg e Ezekiel 5:11; 9:4.

8. Uw rogon nra ayuwegem e sobut’an’ ni ngam felfelan’?

⁸ “Nge felan’ e piin nib sobut’an’rad, ya rayog ni ngar pared u daken e fayleng!” (Matt. 5:5, NW) Uw rogon nra ayuwegem e sobut’an’ ni ngam felfelan’? Boor e girdi’ ni yad ma darifannag e girdi’ mab papey e damumuw ngorad. Girdi’ ni aram rogon e boor e magawon ni yad ra mada’nag. Machane nap’an ni yad ra nang e tin riyul’, ma ireray e n’en nra thilyeg e ngongol rorad nga ron’ed e “bin nib beech” i yad nga dakenrad. Ma bochan e re n’ey ma aram e ke yag ni ngar daged e “runguy, nge gol, nge sobut’an’, nge sumunguy, nge gum’an’.” (Kol. 3:9-12) Ma angin ni ke yib ngorad e ke yag ni ngar pared ni yad ba gapas mab fel’ e tha’ u thilrad e girdi’ ma yad ba felfelan’. Maku reb e, ke micheg e Thin rok Got ni ku yad ra ‘par u daken e nam.’​—Ps. 37:8-10, 29

9. (a) Mang e be yip’ Jesus fan u nap’an ni yog ni piin nib sobut’an’ e yad ra ‘par u daken e fayleng?’ (b) Mang fan nrayog ni nge felfelan’ e “piin kar m’ad ngan’rad ni tin ba m’agan’ Got ngay nib mat’aw e nge rin’ e girdi’”?

⁹ Mang e be yip’ Jesus fan u nap’an ni yog ni piin nib sobut’an’ e yad ra ‘par u daken e fayleng?’ Piin ni kan dugliyrad e ra yag e re tow’ath ney ngorad u nap’an ni yad ra gagiyegnag e fayleng ni yad e pilung nge prist. (Rev. 20:6) Ma bokum milyon e girdi’ ndariy e athap rorad ko yan nga tharmiy e ku ra yag e re n’ey ngorad u nap’an ni yad ra par u daken e fayleng ni manemus. Ngiyal’ nem e yad ra par ni yad ba flont, ma bay e gapas nge felfelan’ rorad. Ireray e piin ni weliy Jesus murung’agrad ni gaar: “Nge felan’ e piin kar m’ad ngan’rad ni tin ba m’agan’ Got ngay nib mat’aw e nge rin’ e girdi’.” (Matt. 5:6, BT) Nap’an nra chuweg Jehovah e tin nib kireb, ma aram e ngiyal’ nra felfelan’ e girdi’ ko tin nib mat’aw. (2 Pet. 3:13) U lan e bin nib beech e fayleng e ra par e girdi’ nib mat’aw u fithik’ e felfelan’, ma dariy ba ngiyal’ ni yad ra kireban’ ni bochan e tin nib kireb ban’en ni be rin’ e girdi’.​—Ps. 37:17.

10. Mang e be yip’ fan ni ngam dag e runguy?

¹⁰ “Nge felan’ e piin ni yad ma runguy e girdi’, ya ra runguyrad Got!” (Matt. 5:7) Ra ngam dag e runguy ma aram e be yip’ fan ni gur be’ ni gab fel’ ngak e girdi’, ma gab sumunguy, ma ga ma guy rogon ni ngam nang laniyan’ e piin ni yad be gafgow. Machane runguy ni gad ma dag e gathi kemus ni ban’en ni ngad thamiyed. Ya be yog e Bible ni faanra ngad runguyed e girdi’, mab muun ngay ni ngad rin’ed ban’en ni ngad ayuweged yad riy.

11. Mang e gad ra fil ko fare fanathin u murung’agen fare moon nu Samaria?

¹¹ Mu beeg e Luke 10:30-37. Fare fanathin rok Jesus ni murung’agen fare moon nu Samaria e ri be tamilangnag e n’en ni be yip’ fan ni ngan dag e runguy. Fare moon nu Samaria e ke nang gelngin e gafgow ni ke tay fare moon nu Jew me kireban’ ngak, ma aram e n’en ni k’aring ni nge ayuweg e re moon ney. Tomuren ni weliy Jesus fare fanathin me gaar: “Mman ma ga rin’ ni aram rogon.” Ere rayog ni nge bagadad me fith ir ni gaar: ‘Gur, gu be rin’ e n’en ni rin’ fare moon nu Samaria? Nap’an nra gafgow e girdi’, ma gur, gu ma rin’ boch ban’en ni nggu ayuwegrad? Bod ni, gur rayog ni nggu ayuweg e piin pilibthir u lan e ulung, ara piin ni ke yim’ figirngirad, ara piin bitir nder pigpig e gallabthir rorad ngak Jehovah? Rayog ni nggu “pi’ e athamgil ngak e piin ni yad be rus [“piin ni yad be mochuch,” NW]” ni aram e nggu fal’eg lanin’rad, fa?’​—1 Thess. 5:14; Jas. 1:27.

12. Mang fan ni gad ma felfelan’ u nap’an ni gad ra dag e runguy?

¹² Mang fan ni gad ma felfelan’ u nap’an ni gad ra dag e runguy? Nap’an ni gad ra runguy e girdi’ ma aram e bod ni gad be pi’ ban’en ngorad, ma re n’ey e ba puluw ko n’en ni yog Jesus nra yibnag e felfelan’ ngodad. Ku reb i fan ni gad ba felfelan’ e bochan ni gad manang ni gad be rin’ e n’en nib m’agan’ Jehovah ngay. (Acts 20:35; mu beeg e Hebrews 13:16.) I weliy David ni Pilung murung’agen e piin ni yad ma dag e runguy ni gaar: “I Somol e ra yororiyrad me ayuweg e pogofan rorad; ra tayrad ni yad ba felfelan’ u daken fare but’.” (Ps. 41:1, 2, BT) Ere faan gad ra dag e runguy ngak e girdi’, ma gad gay rogon ni ngad nanged fan lanin’rad ko gafgow ni yad be yan u fithik’, ma aram e ku ra dag Jehovah e runguy ngodad ma gad par u fithik’ e felfelan’ ni manemus.​—Jas. 2:13.

FAN NIB FELFELAN’ E “PIIN NI KE MACHALBOG LANIN’RAD”

13, 14. Mang nib ga’ fan ni nge par lanin’dad nib “machalbog”?

¹³ Ke yog Jesus ni gaar: “Nge felan’ e piin ni ke machalbog lanin’rad, ya yad ra guy Got!” (Matt. 5:8) Ra nge machalbog lanin’dad, ma aram e ba t’uf ni nge par e lem rodad nge pi n’en ni gad baadag nib machalbog. Re n’ey e rib ga’ fan ni faanra gad baadag ni nge m’agan’ Jehovah ko liyor rodad.​—Mu beeg e 2 Korinth 4:2; 1 Tim. 1:5.

¹⁴ Piin nib machalbog lanin’rad e rayog ni nge fel’ e tha’ u thilrad Jehovah, ya ke gaar: “Nge felan’ e piin ni kar lukniged e mad rorad ke beech.” (Rev. 22:14) Mang e be yip’ fan e re n’ey ni kar “lukniged e mad rorad” ke beech? Ra nge luknag e piin Kristiano ni kan dugliyrad e mad rorad ke beech, ma be yip’ fan ni kar beechgad u wan’ Jehovah, ni aram e ra pi’ e yafos ngorad u tharmiy ndab kur m’ad, ma yad ra felfelan’ ni manemus. Ma faanra nge luknag e piin ni yad bang ko fare ulung nib ga’ ni athap rorad e ngar pared u fayleng e mad rorad ke beech, ma be yip’ fan ni ke pagrad Jehovah ni ngar manged fager rok ni aram e kar mat’awgad u wan’. Aram fan ni be yog e Bible ni “kar lukniged e mad rorad kar wechwechniged nga rachaen fare Fak e Saf.”​—Rev. 7:9, 13, 14.

15, 16. Uw rogon nrayog ni nge “guy” e piin nib machalbog lanin’rad Got?

¹⁵ Ke yog Jehovah ni gaar: “Dariy be’ nrayog ni nge guyeg nge mu’ me par ni kab fos.” (Ex. 33:20) Ere uw rogon nrayog ni nge “guy” e piin nib machalbog lanin’rad Got? Fare bugithin nu Greek ni kan pilyeg ni “guy” e rayog ni nge yip’ fan ni ngan susunnag ban’en u lanin’uy, ara ngan nang fan ban’en. Ere faanra nge “guy” be’ Got ma be yip’ fan ni ngan nang rarogon me t’uf pi fel’ngin rok. (Efe. 1:18) Bochan nib fel’ rogon ni ke dag Jesus pi fel’ngin Got, ma aram fan nrayog ni nge gaar: “Cha’ ni ke guyeg e ke guy e en ni Chitamangiy.”​—John 14:7-9.

¹⁶ Maku reb e, rayog ni ngad ‘guyed’ Got u nap’an ni gad ra nang rogon ni be ayuwegdad u fithik’ e n’en ni gad be yan u fithik’. (Job 42:5) Ku rayog ni ngad ‘guyed’ ara da tedan’dad ko pi n’en nib manigil ni ke micheg Jehovah nra rin’ ni fan ngak e piin ni kar pared ni yad ba machalbog ni yad be pigpig ngak u fithik’ e yul’yul’. Machane piin ni kan dugliyrad e riyul’ ni yad ra guy Jehovah u nap’an ni kan fasegrad ko yam’ ka ranod nga tharmiy.​—1 John 3:2.

RAYOG NI NGAD FELFELAN’GAD NI YUGU ARAM ROGON NI BAY E MAGAWON RODAD

17. Mang fan nib felfelan’ e piin ni yad ma guy rogon ni nge aw e gapas u thilin e girdi’?

¹⁷ Bin migid me gaar Jesus: “Nge felan’ e piin ni yad be muruwliy ni nge aw e gapas u thilin e girdi’.” (Matt. 5:9) Faan gad ra gay rogon ni ngad awnaged e gapas u thildad e girdi’, ma aram e rayog ni ngad felfelan’gad. Ke yoloy James nreb i gachalpen Jesus ni gaar: “Tin nib mat’aw e ngongol e wom’engin ni yib ko awoch ni piin ni ma fal’eg thiliy e ra yunged u fithik’ e gapas.” (Jas. 3:18) Ere faanra ba mo’maw’ ngom ni nge fel’ e tha’ u thilmew be’ u lan e ulung, ara u lan e tabinaw rom, ma ngam wenig ngak Jehovah ni nge ayuwegem ni ngam awnag e gapas u thilmew. Ma aram e ra pi’ Jehovah gelngin nib thothup ngom ni nge ayuwegem ni ngam dag e pi fel’ngin ni ma m’ug rok e piin Kristiano, ma angin nra yib ngom e ga ra felfelan’. Ke tamilangnag Jesus feni ga’ fan ni gadad e som’on ni ngad awnaged e gapas u thildad e girdi’. Ke yog ni gaar: “Faanra mman ni ngam pi’ e n’en ni ngam pi’ ngak Got u altar me yib ngan’um ni bay ban’en nib togopluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got.”​—Matt. 5:23, 24.

18, 19. Mang fan nrayog ni nge felfelan’ e piin Kristiano ni yugu aram rogon ni yibe gafgownagrad?

¹⁸ “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopluw ngomed ni bochan e gimed girdieg.” Mang fan ni yog Jesus e re thin ney? I ulul ngay nge gaar: “Ngari felan’med, ya bay labgen ni ba ga’ ni fan ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.” (Matt. 5:11, 12) Nap’an ni un toy e pi apostal ko dimow min nog ngorad ndab kur machibgad, ma aram ma ranod “ngar chuwgad ko fare ulung, ni kar felfelan’gad.” Bin riyul’ riy e, dar felfelan’gad ni bochan e kan toyrad ko dimow. Ya yad be felfelan’ ni bochan “e tafinaynag Got ni ba’ rogorad ni ngar gafgowgad ni fan nga fithingan Jesus.”​—Acts 5:41.

¹⁹ Ngiyal’ ney e ku be athamgil e girdi’ rok Jehovah ni ngar pared ni yad ba felfelan’ ni yugu aram rogon ni yibe gafgownagrad ni bochan e yad be fek fithingan Jesus. (Mu beeg e James 1:2-4.) Ere ku taareb rogodad ko pi apostal, ni dubdad ni ngan gafgownagdad. Machane, faan gad ra athamgil ngad pared ni gad ba yul’yul’ ngak Jehovah, ma ra ayuwegdad ni nge dab da rusgad ya nge yag ni ngad athamgilgad. Mu lemnag e n’en ni buch rok Henryk Dornik nge ba pagel ni walagen. Nap’an e duw ni 1944 ko August, min kalbusnagrow u reb e concentration camp. Ma baaray e n’en ni yog e piin ni ur gafgownaged yow. Ra gaargad: “Dabiyog ni ngan k’aringrow ni ngar rin’ew ban’en ndubrow. Ya gafgow ni gad be tay ngorow e be yibnag e felfelan’ ngorow.” I weliy Henryk ni gaar: “Yugu aram rogon ndabug ni nggum’ ni bochan e michan’ rog, machane gub felfelan’ ni nggu gafgow ni bochan e da gur rus ni nggu par ni gub yul’yul’ ngak Jehovah.” Ki ulul ngay nge gaar: “Bochan ni gu be peyn’iy e meybil, ma aram e n’en ni chugurnag e tha’ u thilmow Jehovah ma riyul’ ni ir e ma Ayuwegeg.”

20. Mang fan ni ngad felfelan’gad ni ngad pigpiggad ko “fare Got nib felfelan’”?

²⁰ Nap’an nra felfelan’ Jehovah ngodad, ni ir “fare Got nib felfelan’,” ma aram e rayog ni ngad pared ni gad ba felfelan’ ni yugu aram rogon ni yibe gafgownagdad, ara be togopuluw chon e tabinaw rodad ngodad, ara kad m’argad, ara kad pilibthirgad. (1 Tim. 1:11, NW) Ku rayog ni ngad felfelan’gad ni bochan e ke micheg fare Got rodad “nder ma ban” nra rin’ boor ban’en nib manigil ni fan ngodad. (Titus 1:2) Ngiyal’ nra lebguy Jehovah e tin ke micheg, ma aram e dabki yib ngan’dad e pi magawon ni bay rodad e ngiyal’ ney. Bin riyul’ riy e, dabiyog ni ngad lemnaged rogon feni fel’ e yafos rodad u Paradis, nge gelngin e felfelan’ ni gad ra tay! Arrogon, fin aram e ngiyal’ ni gad ra par ‘u fithik’ e gapas ni gad ba felfelan’.’​—Ps. 37:11.