Mang e N’en nri Yira Rin’ Min Felfelan’

JEHOVAH, “fare Got nib falfalan’,” nge Jesus Kristus, “faan nib falfalan’ ma kemus e pilung,” ma ir e boor e tin manang ngak urngin e girdi’ ko mang e yira rin’ min falfalan’. (1 Timothy 1:11; 6:15) Arfan, ni dab ni gin ngay ni kiy ko falfalan’ e yima pirieg ko thin rok Got, ni fare Bible.​—Revelation 1:3; 22:7.

U lan fare Machib rok Jesus nib gilbuguwan u daken e Burey, e be weliy rogon e n’en ni yira rin’ min falfalan’. I yog ni gaar: “Ba falfalan’ e piin” ni (1) kar nanged nib t’uf rorad e tirok Got ban’en, (2) ke kireban’rad, (3) ba sumunguy laniyan’, (4) kar k’iygad ma kar belelgad ni bochan e tin nib mat’aw, (5) yad ma runguyey, (6) ba machalbog gum’ircharad, (7) yad ba gapas, (8) yibe gafgownagrad ni bochan e tin nib mat’aw, nge (9) yibe yog e kireb ngorad ma yibe gafgownagrad ni bochan.​—Matthew 5:3-11, NW.a

Mini’ e ra yog ni de riyul’ ni be’ nib sumunguy laniyan’, mab tarunguyey, nge be’ nib gapas ni ma k’aring ba gum’ircha’ nib machalbog e ra gel e falfalan’ rok ngak be’ nib tadamumuw, ma baadag e cham, ma der runguy be’? Maku ke yog e Bible ngodad ni kan ni thothup rok Got e ba’ rogon ko falfalan’, ma ma par rok e piin ni ma fol rok Got ya ir e pilung. (Acts 5:32) Pi girdi’ nem e yad baadag ni ngar gayed e fonow ni yib rok rok Got ya kar nanged ni goo ir e rayog ni nge ayuweg e girdi’ ni ngar gelgad ko meewar rorad.​—Proverbs 16:3, 9; 20:24.

Ar’ar ko Dowef fa Wom’engin e Kan ni Thothup?

Der ma pi’ Jehovah e kan ni thothup rok ngak e piin ma rin’ “e ar’ar ko dowef.” Pi maruwel ni ba aram, nib mu un ngay e par ni dan mabgol, nge pig, nge chingnag, ni ba’ ni kan yoloy ko Galatia 5:19-21. Bathil gowa ngebnag e falfalan’, ma pi n’enem e ma kirebnag e th’a u thilin chon e tabinaw, nge tafager, nge piin gadad manang. Maku reb, e be yog e Thin rok Got ni piin “ma rin’ e pi n’enem e dabiyog gil’ilungun Got ngorad.”

N’en nib thil riy, e ma pi’ Got e kan ni thothup rok ngak e piin ni ma fil rogon ni nge mon’og ko pi “wom’engin e kan ni thothup.” Pi felngin ni ir e re wom’engin ney e “t’ufeg, falfalan’, gapas, gum’an’, gol, fel’ ngak e girdi’, michan’, sumunguy, nge t’ar laniyan’.” (Galatia 5:22, 23, NW) Nap’an ni gad ra dag e pi felngin ney, ma aram e kad sunmiyed rogon ni nge yog e th’a nib gapas u thildad boch e girdi’ nge Got, ni ra yib angin ni bin riyul’ e falfalan’. (Mu guy e kahol.) Bin kab ga’ fan, e kad falfalan’naged Jehovah ma ke yog ngodad fare athap ni falfalan’ ko yafas ni manemus u lan e bin nib biech e fayleng rok Got ko tin nib mat’aw.

Mang e Ngan Rin’ Min Falfalan’?

Ngan ngochnag i yog ma ngan gaar: Ngan pilo’ ko “arar ko dowef,” min fil rogon ni ngan mon’og ko “fare wom’engin e kan ni thothup rok [Got].” Ra ngan falfalan’, ma be’ ma nge yim’ ni bochan ni nge chugur e tha’ u thilrow Got. Be’ ni be athamgil ni nge taw ko re n’ey e ra m’ag nga rogon ni ke weliy Jesus ni be’ nib falfalan’.

Arfan, ni dab ni oloboch riy ngam dugliy ni falfalan’ e dabiyog ngom. Riyul’, chiney ma ra yog ni ngam pirieg e magawon ko m’ar rom, fa mabgol rom, fa maruwel rom, ara rarogon e salpiy rom. Yugu aram rogon, ma dab mu rus; dariy rogon ni nge mulan’um! Gagiyeg rok Got e ra yaluweg e pi magawon ney nge ku bokum miriay ban’en. Riyul’, ke chugur ni nge lebuguy Jehovah Got e n’en ni micheg ni yog fare psalmist ni gaar: “Gagiyeg rom e ba gagiyeg ni bay i par ni manemus . . . Kam pithig paam ga be gamaneg urngin e tin nib fas ko tini yad be yim’ ni bochan.” (Psalm 145:13, 16, NW) Ni bod bokum milyon e pi tapigpig rok Jehovah u fayleng i yan ni rayog ni ngara micheged, ni ra un lemnag e n’en ni yibe micheg ko n’en ni ke micheg Jehovah ma rib ga’ e gin ra puthuy ko falfalan’ rom e chiney.​—Revelation 21:3.

[Footnote]

[Box/Picture on page 5]

Pi N’en ni Ba’ Rogon ko Falfalan’

T’ufeg e ma k’aring boch e girdi’ ngam t’uf rorad ni puluwon.

Falfalan’ e ma pi’ gelngim ngam man u fithik’ e magawon nge skeng.

Gapas e ra ayuwegem ni dab um un ko tugthin nge cham.

Gum’an’ e ra yognag ngom ni ngam par ni gab falfalan’ ni ku yu gu ra keb e skeng ngom.

Gol e ra chuchugurnag e girdi’ ngom.

Fel’ ngak e girdi’ e n’en fan ngom e ngiyal’ ni ra t’uf e ayuw rom ma ra pi’ boch e girdi’ e ayuw.

Michan’ e ra micheg ngom e fonow rok Got u fithik’ e t’ufeg.

Sumunguy e ra yibnag e gapas nga gum’irchaem, lem, nge dowef rom.

T’ar laniyan’ e fan e ra lichnag e oloboch rom.