Kan Gafgownag Machane Ba Felfelan’

“Ngam felan’gad ko ngiyal’ nra yog e girdi’ e thin nib tagan’ ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdi’eg.”​—MATTHEW 5:11.

1. Mang e ke micheg Jesus ngak pi gachalpen u murung’agen e felfelan’ nge skeng?

NAP’AN ni l’og Jesus pi gachalpen ko yay ni som’mon ni ngar machibnaged fare Gil’ilungun, me ginangrad ni yad ra mada’nag e togopuluw. I yog ngorad ni gaar: “Ma gubin e girdi’ ni bay ra fanenikayed gimed ni bochag.” (Matthew 10:5-18, 22) Machane, u m’on riy, u nap’an fare Welthin ni pi’ u daken fare Burey, mi micheg ngak e pi apostal rok nge boch e girdi’ ni re togopuluw nem e susun e dabi kirebnag e felfelan’ ni bay u lan gum’ircharad. Ma riyul’, ni ki yog Jesus nib felfelan’ e pi Kristiano ni yibe gafgownagrad! Uw rogon ma gafgow e ra fek i yib e felfelan’?

Kan Gafgownag ni Bochan e Ngongol nib Mat’aw

2. Rogon ni yog Jesus nge Peter ni apostal, ma miti mang gafgow e ra yibnag e felfelan’?

² Bin meruk i tapgin e felfelan’ ni yog Jesus e be gaar: “Ba felfelan’ e piin ni yibe gafgownagrad nbochan e yad be rin’ e tin nib mat’aw, ya fare gil’ilungun e tharmiy e ra yog ngorad.” (Matthew 5:10, NW) Gafgow e gathi ban’en nib fel’. I yoloy Peter ni apostal ni gaar: “Ya mang e fel’ e bay riy nfaanra, nap’an ni kam rin’ed e tin nib kireb min batnagmed mi gimed kadan’med riy? Machane, faanra bochan ni gimed be rin’ e tin nib fel’ ma kam gafgowgad, ma kam kadan’med, ma ireray e n’en nib fel’ u wan’ Got.” Miki yog ni gaar: “Dariy bigimed nsusun e nge gafgow ni fan e ke thang e pogofan rok be’, ara ke iring ban’en rok be’, ara ke th’ab e motochiyel, ara fan e be guy rogon ni nge gagiyegnag e maruwel rok boch e girdi’. Machane faanra ni gafgownagmed ni bochan e gimed girdien Kristus ma dab mu tamra’gad ngay, ya ngam pininged e magar ngak Got ni bochan e ba’ fithingan Kristus u dakenmed.” (1 Peter 2:20; 4:15, 16) Rogon ni yog Jesus, gafgow e ra yibnag e felfelan’ nfaanra ke yib nbochan ni kan rin’ e tin nib mat’aw.

3. (a) Ngan gafgow nbochan e tin nib mat’aw ma be yip’ fan e mang? (b) Mang e ke rin’ e skeng ngak e pi Kristiano kakrom?

³ Tin nib mat’aw ban’en ma riyul’ e yima foleg u daken e nguun fol ko tin nib m’agan’ Got ngay nge motochiyel rok. Ere, yibe gafgow ya kan rin’ e tin nib mat’aw e be yip’ fan e gafgow ni ke yib ngak be’ ni bochan de th’ab e motochiyel nge tin ni baadag Got ni ngan rin’ u nap’an ni kan towasariy. Pi tayugang nu Jew e kar togopuluwgad ngak e pi apostal ya dar talgad i wereg e machib u fithingan Jesus. (Acts 4:18-20; 5:27-29, 40) Gur ke lichnag e re n’ey e felfelan’ rorad ara ke talegrad ko machib? Ri danga’! “Ka ranod kar chuwgad u Sanhidren, ni kar felfelan’gad ya bay rogon ni nga nog e thin nib tagan’ ngorad nbochan fithingan. Ma gubin e rran ni dar talgad nguur filed ma ur machibnaged e thin nib fel’ u murung’agen Kristus Jesus.” (Acts 5:41, 42) Re skeng nem e ke fek e felfelan’ i yib ngorad me gelnagrad ko maruwel ni ngan wereg e machib. Tomur riy, ma pi Kristiano kakrom e ke gafgownagrad piyu Roma ya dar uned ko liyor ko pilung.

4. Mang boch i tapgin ni kan gafgownag e pi Kristiano?

⁴ Pi Mich Rok Jehovah e ngiyal’ n’ey, e yibe togopuluw ngorad ya bochan dubrad ni ngar talgad i machibnag “re thin nib fel’ n’ey ko gil’ilungun.” (Matthew 24:14) Nap’an ni yira taleg e pi muulung rorad, ba m’agan’rad ngay ni ngar gafgowgad ko bin ni dabkuura muulunggad u taabang nrogon e n’en ni i motochiyelnag e Bible. (Hebrews 10:24, 25) Kan togopuluw ngorad ya bochan yad ma par u mathilin ma yu ngiyal’ e bochan dar ma fanay e racha’ u kanawo’ nib kireb. (John 17:14; Acts 15:28, 29) Yugu aram rogon, e re n’en ney ni yad ma rin’ nib mat’aw e ma fek e felfelan’ i yib nga gum’irchaen e girdi’ rok Got.​—1 Peter 3:14.

Ka Nog e Thin nib Kireb ni Bochan Kristus

5. Bochan e mang kenggin i fan ni kan gafgownag e girdi’ rok Jehovah e ngiyal’ ney?

⁵ Bin mereb i tapgin e felfelan’ ni yog Jesus u nap’an e Welthin rok u daken fare Burey e kub muun ngay e skeng. I yog ni gaar: “Ngam felan’gad ko ngiyal’ nra yog e girdi’ e thin nib tagan’ ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg.” (Matthew 5:11) Kenggin i fan ni girdi’ rok Jehovah e yima togopuluw ngorad e bochan gathi yad bang ko fayleng ko fare m’ag nib kireb ni bay e chiney. I yog Jesus ngak pi gachalpen ni gaar: “Faan manga mmil famed ngak e girdi’ nu fayleng, me ere gimed ra t’uf rok e girdi’ nu fayleng, ya kam manged girdi’rad. Machane kug mel’egmed u fithik’ e girdi’ nu fayleng, ni gathi ki gimed boch i yad; ereray fan ni ke fanenikaymed e girdi’ nu fayleng.” (John 15:19) Maku arrogon Peter ni apostal ni ki yog ni gaar: “Piin ni dar nanged Got e kar gingad ni fan e dakumur uned ngorad ko ngongol nib kireb ni yad be ngongliy, ma aram fan ni yad be yog e thin nib kireb ngomed.”​—1 Peter 4:4.

6. (a) Mang fan ni tin ni ka ba’ ko piin kan dugliyrad nge piin nib chag ngorad e ka nog e thin nib kireb ngorad ma yibe gafgownagrad? (b) Gur bochan ni ka nog e thin nib kireb u murung’agdad ma ke war e felfelan’ rodad?

⁶ Kad guyed ni pi Kristiano e kan gafgownagrad ya dar talgad i wereg e machib u fithingan Jesus. I tay Kristus chilen ngorad ni gaar: “Gimed ra mang pi mich rog . . . nge yan i mada ko yungi n’en ni yan i mus e fayleng ngay.” (Acts 1:8, NW) Tin ni ka ba’ ko pi walagen Kristus ni kan dugliyrad mab yul’yul’, e yad be lebuguy e re maruwel ney u fithik’ e pasig ma piin kub chag ngorad nib yul’yul’ e “yugu boch e saf,” ni be ayuwegrad. (Revelation 7:9) Ere, ke cham Satan ngak e “piin ni yad ba’ ni owchen fare pin [fare owchen fare “pin,” ni aram bang ko ulung rok Got ni yad ra yan nga tharmiy], ni yad be fol ko motochiyel rok Got ma bay e maruwel rorad ni yad be machibnag murung’agen Jesus.” (Revelation 12:9, 17) Gadad e Pi Mich Rok Jehovah, e gad be machibnag murung’agen Jesus ni fare Pilung ni be gagiyeg ko fare am ni Gil’ilungun, ni ra kirebnag e am ko girdi’ ni be magawonnag fa bin nib biech e fayleng rok Got nib mat’aw. (Daniel 2:44; 2 Peter 3:13) Bochan e re n’ey ni ka nog e thin nib tagan’ ngodad min gafgownagdad, machane gad ba felfelan’ ni ngad uned ko gafgow u fithingan Kristus.​—1 Peter 4:14.

7, 8. Mang e de riyul’ ni ke yog e piin tatogopuluw nib togopuluw ko pi Kristiano kakrom?

⁷ I yog Jesus ni pi gachalpen e susun ni ngar felan’gad ni mus u nap’an ni “be tunguy e girdi’ urngin mit e thin nib kireb” nib togopuluw ngorad ni bochan. (Matthew 5:11) Re n’en ney e riyul’ ni ke buch ko piin ni Kristiano kakrom. Nap’an ni kan kalbusnag Paul ni apostal u Roma, ni sogonapan duw ni 59-61 C.E., ma pi tayugang u rom ni piyu Jew e ka rogned murung’agen e piin ni Kristiano ni gaar: “Gamad manang ni urngin yang ma be non e girdi’ riy nib togopuluw ko re raba’ i girdi’ nem ni gab muun ngay.” (Acts 28:22) Paul nge Silas e ka nog ni “kar k’aringew e wagey u fayleng,” ma “kar togopuluwgow ko pi motochiyel ko am.”​—Acts 17:6, 7.

⁸ I yoloy u murung’agen chepin e Kristiano u nap’an ni kari gel e am nu Roma, ma en ta yoloy chep ni K. S. Latourette fithingan e ke yog ni gaar: “Thin nib kireb ni ka nog nib togopuluw ngorad e ba thilthil. Bochan dar ma un e Kristiano ko tin ma rin’ e girdi’ nib thil e Got rorad ma yima yog ni yad e girdi’ ni ma lemnag ni dariy e Got. Bochan yad ma siyeg boor e tin ma rin’ e girdi’ ni yoor​—ni bod e pi madenom ni ma rin’ e girdi’ nib thil e got rorad, nge boch e fafel ni ma tay e girdi’ . . .​—ma yibe moningnagrad ni yad e piin ma fanenikayrad e girdi’. . . . Ka nog ni piin ni pumoon nge ppin e yad ma mada’ ni nep . . . ni ngar uned ko ngongol ni darngal. . . . Bochan ni [fare Puguran ko yam’ ni tay Kristus] e kemus ni piin ni ke michan’rad e ma madenomnag ma ka nog ni piin Kristiano e yad ma pi’ e bitir ni maligach ngar ked racha’en nge ufin.” Maku, bochan pi Kristiano kakrom e dar liyorgad ko pilung, ma ka nog ni yad e piin ni toogor ko Am.

9. Mang e ke rin’ e pi Kristiano ko fa bin som’mon e chibog ni bochan e thin de riyul’ ni ka nog nib togopuluw ngorad, ma uw rarogon e ngiyal’ ney?

⁹ Pi thin nem nde riyul’ ni ka nog nib togopuluw ngak e pi Kristiano kakrom e de talegrad ngar lebguyed e maruwel rorad ni ngan machibnag fare thin nib fel’ ko Gil’ilungun. U lan e duw ni 60-61 C.E., e ke yog Paul ni fare “thin nib fel’” e “be yib wenegan nib fel’ ngak e girdi’ ma be wer u fayleng i yan” ma kan “machibnag ngak urngin e girdi’ u fayleng.” (Kolose 1:5, 6, 23) Maku aram rogon e n’en ni be buch e chiney. Ka nog e thin ni de riyul’ nib togopuluw ko Pi Mich Rok Jehovah, ni bod rogon e n’en ni buch rok e pi Kristiano ko fa bin som’mon e chibog. Yugu aram rogon, ma fare maruwel ni ngan machibnag fare thin ko Gil’ilungun e be mon’og i yan me pi’ e felfelan’ nib gel ngak e piin ni yad be un ngay.

Ba Felfelan’ ma Yibe Gafgow ni Bod Fapi Profet

10, 11. (a) Uw rogon ni ke mu’nag Jesus i weliy e bin mereb i tapgin e felfelan’? (b) Mang fan ni kan gafgownag e pi profet? Mog boch rogon.

¹⁰ I mu’nag Jesus i weliy e bin mereb i tapgin e felfelan’ ni gaar: “Ngari felan’med . . .  ya erera’ rogon e gafgow ni i tay e girdi’ ngak e pi profet ni yad ba kakrom ngomed.” (Matthew 5:12) Fapi profet ni ke l’ograd Jehovah ngar ginanged piyu Israel ni dar yul’yul’gad ma dar motoyilgad ngorad e baga’ ni kan togopuluw ngorad. (Jeremiah 7:25, 26) Paul ni apostal e ke micheg ni riyul’ ni aram rogon, i yoloy ni gaar: “Maku mang e n’en ni rayog ni nggog? Ya dabi gaman e tayim rog nfaanra nggu ulul ni nggu weliy murung’agen . . . yugu boch e profet, ni bochan e michan’ rorad . . . me yib e skeng ngorad kan moningnagrad min li’rad, tin riyul’ riy, e kab gel boch, ya kan m’agrad min kalbusnagrad.”​—Hebrews 11:32-38.

¹¹ Nap’an e gagiyeg rok Ahab ni Pilung nib kireb nge leengin, ni Jezebel, boor e profet rok Jehovah e kan li’rad ko sayden kar m’ad. (1 Kings 18:4, 13; 19:10) Jeremiah ni profet e kan ta’ nga stocks ma tomur riy e kanin’ nga luwed nib sug ko bar. (Jeremiah 20:1, 2; 38:6) Daniel ni profet e kanin’ nga taffen e layon. (Daniel 6:16, 17) Urngin e pi profet nem u m’on ndawori yib e Kristiano e kan togopuluw ngorad ya bochan kar ayuweged e liyor ngak Jehovah nib machalbog. Boor e profet e ke gafgownagrad e pi tayugang ni piyu Jew. I piningrad Jesus ni “owchen e piin nra li’ed fapi profet ngar m’ad” ngak e piin ni scribe nge Farise​—Matthew 23:31.

12. Mang fan ni gadad e Pi Mich Rok Jehovah e gad ma ta’ ni ba taw’ath ni ngan gafgownagdad ni bod e pi profet kakrom?

¹² Ngiyal’ ney, ma baga’ ni yima togopuluw ngodad ni gadad e Pi Mich Rok Jehovah ya bochan gad ma machibnag e thin nib fel’ ko Gil’ilungun u fithik’ e pasig. Fapi toogor rodad e ma yog ni “gad ma pingeg e girdi’ ngar uned ngodad u fithik’ e yargel” machane gad manang ni piin ma liyor ku Jehovah kakrom u fithik’ e yul’yul’ e ku ka nog ngorad ni aram rogon. (Jeremiah 11:21; 20:8, 11) Gad ma ta’ ni reb e taw’ath ni ngada uned ko gafgow ni taareb rogon ko fapi profet kakrom nib yul’yul’ ni kan gafgownagrad. James ni reb i gachalpen Jesus e i yoloy ni gaar: “Pi walageg, um folgad u rogon ni un e pi profet ko gafgow nge rogon ni kar guman’gad, ni ka rogned e thin u fithingan Jehovah. Am sap! Kug turguyed nib felfelan’ e piin ni kar kadedan’rad.”​—James 5:10, 11, NW.

Tapgin ni Ngan Felfelan’ nib Gel

13. (a) Mang fan ni dabi mulan’dad nbochan e gafgow ni yima ta’ ngodad? (b) Mang e ra ayuwegdad ni nguuda pared ni gadad ba gel, ma re n’ey e be micheg e mang?

¹³ De war lanin’dad nbochan ni kan gafgownagdad, ya ke fel’ lanin’dad ni gad manang ni gad be lek luwan ay e pi profet, nge pi Kristiano kakrom, nge Kristus Jesus. (1 Peter 2:21) Kari gamanegdad e Thin nu Bible, ni bod e thin ni baaray rok Peter ni apostal ni be gaar: “Pi tafager rog ni gimed ba t’uf rog, dab mu gingad ko gafgow nib gel ni yibe tay ngomed ni ba sikeng ngomed, ni gowa ban’en ni ngam gingad ngay. Mu felfelan’gad ni faanra nog e thin nib kireb ngomed ni fan e gimed girdien Kristus; ya ra er rogon ma fare Kan nib sorok ni aram fare Kan ni Thothup rok Got e ke yib nga dakenmed.” (1 Peter 4:12, 14) Kada guyed ko n’en ni buch rodad ni rayog ni ngad pared nib gel u nap’an ni ra yib e skeng ma kemus ni bochan e kan ni thothup rok Jehovah ni bay rodad ni be gelnagdad. Ayuw ko kan ni thothup e be micheg ni be taw’athnagdad Jehovah, ma ireray e n’en ni ra yib e felfelan’ nib gel riy ngodad.​—Psalm 5:12; Filippi 1:27-29.

14. Mang boch i tapgin ni ngad felfelan’gad ni yibe gafgownagdad nbochan e tin nib mat’aw?

¹⁴ Reb i fan ko mang fan ni togopuluw nge skeng nra yib nbochan gad be rin’ e tin nib mat’aw e ra felfelan’nagdad e bochan ireray e mich riy ni gadad e Kristiano nib riyul’ ni gad be pigpig ku Got u fithik’ e yul’yul’. I yoloy Paul ni apostal ni gaar: “Urngin e girdi’ ni yad baadag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Timothy 3:12) Ri gad ba felfelan’ ni gad be lemnag e yul’yul’ ni kada ted u nap’an ni yib e skeng ngodad e ra pi’ e fulweg ko thin ni yog Satan ni urngin e tin ke sunmiy Jehovah e be pigpig Ngak ni bochan e lem ni fel’ ngak. (Job 1:9-11; 2:3, 4) Gad ba felfelan’ ni gad ma un i tamilangnag e gagiyeg rok Jehovah nib mat’aw mab th’abi tolang ni yug aram feni rib achichig ni gad be rin’.​—Proverbs 27:11.

Mu Og nga Lang ko Felfelan’ ni Bochan Labgen

15, 16. (a) Mang tapgin ni i pi’ Jesus ngodad ni ngad “felfelan’gad ma ngada oggad nga lang ko felfelan’”? (b) Mang labgen ni kan chaariy u tharmiy ni fan ko Kristiano ni kan dugliyrad, ma uw rogon ni “yugu boch e saf” nib chag ngorad e ku yira taw’athnagrad?

¹⁵ Ke pi’ Jesus reb i tapgin e felfelan’ ni yugu aram rogon ni kan gafgownag min skengnag ni bod rogon e n’en ni buch rok e pi profet kakrom. Tin tomur e thin ko bin mereb i tapgin e felfelan’, i yog Jesus ni gaar: “Ngari felan’med, ya bay labgen ni baga’ ni fan ngomed ni kan tay u tharmiy.” (Matthew 5:12) I yoloy Paul ni apostal ni gaar: “Ya denen e ma pi’ puluwoy​—ni yam’, machane tow’ath rok Got ngodad ndariy puluwon e yafas ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) Arrogon, fare ‘labgen ni baga’’ e aram e yafas, ma gathi puluwon nrayog ni ngada maruweliyed. Ireray e taw’ath ndariy puluwon. I yog Jesus fare taw’ath ni bay “u tharmiy” ya bochan ni yib rok Jehovah.

¹⁶ Yira pi’ fare “teeliyaw ko yafas” ngak e piin ni kan dugliyrad, ni aram e yafas ni dab kuur m’ad biid ngar uned ngak Kristus u tharmiy. (James 1:12, 17) Piin ni bay e athap rorad u fayleng, fare “yugu boch e saf,” e yad be nameg ni nge yog ngorad e yafas ni dariy n’umngin nap’an u paradis u fayleng. (John 10:16; Revelation 21:3-5) Yow lagruw, ma “labgen” e dabiyog ni nge yog ngorow ni bochan e maruwel ni kar tew. Piin ni kan dugliyrad nge fare “yugu boch e saf” e ra yib labgen ngorad ni bochan e gol rok Jehovah “nib pag rogon” ni ireray e n’en ke k’aring Paul ni apostal ni nge yoloy ni gaar: “Ere ngad pininged e magar ngak Got ko tow’ath ni ke pi’ ngodad ndabiyog puluwon.”​—2 Korinth 9:14, 15.

17. Mang fan ni gad ra felfelan’ u nap’an ni yibe gafgownagdad ma bod ni gowa “ngad oggad nga lang ko felfelan’”?

¹⁷ I yoloy Paul ni apostal ngak e Kristiano ni ngiyal’ nem ma boch i yad e ke chuchugur ni ngari gafgownagrad Nero ni fare Emperor, ni gaar: “Ma ku er rogon ni gadad ma felfelan’ u fithik’ e tin ni ma yib ngodad ni gadad ma gafgow riy, ya gadad manang ni pi n’em e ma yognag e k’adan ngodad, ma k’adan e ma fal’egdad u wan’ Got, ma fel’ u wan’ Got ni gadad ma tay e ma yog e l’agan’ ngodad. Re l’agan’ ney e dabi m’ing lanin’dad riy.” Miki yog ni gaar: “Mpired ni be l’agan’med ngak Got nge mang ir e i ta’med ni gimed ba felfelan’, mu um pired nib gum’anmed u fithik’ e tin ni be yib ngomed ni gimed be gafgow riy.” (Roma 5:3-5; 12:12) Yugu demtrug e athap rodad ko gad ra yan nga tharmiy ara gad ra par u roy u fayleng, ma puluwon ni yira pi’ ngodad nbochan kad pared nib yul’yul’ u nap’an ni keb e skeng ngodad e kab ga’ ndawori chuchugur ko urngin ban’en ni bay rogodad ni ngad feked. Rib gel e felfelan’ rodad nbochan e athap rodad ni yafas ni dariy n’umngin nap’an ma nguuda pigpiggad ma nguuda pininged e sorok ngak e Chitamangidad ni ma t’ufegey, ni Jehovah, u tan pa’ e Pilung rodad i Jesus Kristus. Ni bod ni ngada “oggad ngalang ko felfelan’.”

18. Mang e rayog ni nge rin’ e pi nam u nap’an ni be chuchugur i yib e tomur, ma mang e bayi rin’ Jehovah?

¹⁸ U lan boch e nam, ma kan gafgownag e Pi Mich Rok Jehovah ma ka yibe gafgownagrad. U lan e yiiy rok Jesus ko tin tomuren e rran, i ginang e tin riyul’ e Kristiano ni gaar: “Urngin e girdi’ ni bay ra fanenikayed gimed ni bochag.” (Matthew 24:9) Chiney ni gad be chuchugur i yan ko tomur, ma ra k’aring Satan e pi nam ni ngar fanenikayed e girdi’ rok Jehovah. (Ezekiel 38:10-12, 14-16) Ireray e pow ni keb e tayim ni nge rin’ Jehovah ban’en. “Gu ra tolangnigeg ma gu ra thothupnigeg ma gu ra gagiyegnag ni ngari nang girdien boor e nam murung’ageg; ma thingara nanged ni gag Jehovah.” (Ezekiel 38:23, NW) Ere bayi thothupnag Jehovah fare ngochol rok nib ga’ me ayuweg e girdi’ rok ko gafgow ni yibe tay ngorad. Ere, “ba felfelan’ e en nra par nib yul’yul’ ngak Got ko ngiyal’ ni be yib e tin nib mo’maw’ riy ngak, ni aram e yibe skengnag.”​—James 1:12.

19. Nap’an ni gad be sonnag fare “rran rok Jehovah” nib ga’ ma mang e thingarda rin’ed?

¹⁹ Chiney ni fare “rran rok Jehovah” nib ga’ e ri be chuchugur i yib, ma ngada felfelan’gad ya bochan ni “kan ta’ ni bay fan ni ngan dariyfannagdad” ni fan nga fithingan Jesus. (2 Peter 3:10-13; Acts 5:41) Ni bod e pi Kristiano kakrom, e yibe athapeg ni nguuda “ululgad ni dabda talgad i fil ngak e girdi’ ma gad be machibnag fare thin nib fel’ ni murung’agen Kristus” nge Gil’ilungun e am rok u nap’an ni gad be sonnag labgen ni ngeb ngodad u lan e bin nib biech e fayleng rok Jehovah nib mat’aw.​—Acts 5:42; James 5:11.

Rogon ni Ngan Sul u Daken

• Kan gafgow nbochan e tin nib mat’aw e be yip’ fan e mang?

• Mang e ke rin’ ngorad e gafgow ni kan ta’ ngak e pi Kristiano?

• Mang fan ni rayog ni nga dogned ni Pi Mich Rok Jehovah e yibe gafgownagrad ni bod e pi profet kakrom?

• Mang fan ni rayog ni nge “felfelan’dad ma ngada oggad nga lang ko felfelan’” u nap’an ni kan togopuluw ngodad?

[Pictures on page 14, 15]

“Ngam felan’gad u nap’an ni ra yog e girdi’ ni gimed ba kireb ma yad be gafgowniged gimed”

[Credit Line]

Ba ulung ko girdi’ ni kan kalbusnag: Chicago Herald-American