Ba T’uf Rodad Ba Messiah, Fa?

SANA ga ra fith e deer ni aram rogon, “Ba t’uf rodad ba Messiah, fa?” Arrogon, bay fan ni ngan fith ko riyul’ ni bay ban’en ni ra rin’ fare Messiah ngom, fa.

Fare Bible e be weliy nib tamilang ni rib mudugil nib t’uf rodad ba Messiah. Be’ nib cheg ko motochiyel rok yu Jew ko bin som’on e chibog e ke yoloy murung’agen fare Messiah ni gaar: “Ya ir e aram e “Ke fel’” rok Got ngak urngin ban’en ni yog Got ni bay rin’ ngak e girdi’.” Ere ke tamilangnag fare maruwel rok fare Messiah nrib ga’ fan ni bay rogon ko tin nib m’agan’ e en ke Sunmiydad ngay ni nge taw’athnag urngin e pi nam u fayleng. (2 Korinth 1:20) Maruwel rok fare Messiah e rib ga’ fan ma arfan ni pi yiiy u Bible e ri ma weliy murung’agen e yafas rok u fayleng. Machane ba t’uf e wub rok, fa? Ma mang fan ni thingar mu lemnag?

Fare bugithin ni “Messiah” e be yip’ fan ni “Kan Dugliy” ma taareb rogon fan ko fare bugithin ni ri yi manang ni “Kristus.” Cha’ ney e thingari yib ni bochan e ngongol nib kireb ni rin’ Adam nge Efa. Kan sunmiyrow ni yow ba flont, ni bay athap rorow nib felfelan’ ni ngaur parew u Paradis ni dariy n’umngin nap’an, machane ke mul u pa’row e re athap nem. Ba engel ni tatogopuluw, ni ir e ke mang Satan ni fare Moonyan’, e ke yog ni en ke Sunmiyrow e kaygi gel e thin rok ma kab fel’ ni faanra yow e ngar turguyew ko mang e ba fel’ nge mang e kireb.​—Genesis 3:1-5.

Kan bannag Efa me mich u wan’ e re thin nem nde riyul’. Adam, e m’ug ni kab ga’ fan u wan’ Efa ko yul’yul’ rok ku Got, ma aram e ke un ngak fare Moonyan’ ko togopuluw ni ta’. (Genesis 3:6; 1 Timothy 2:14) Bochan e ngongol rorow, ma aram e kar rin’ew ban’en ni gathi kemus ni athap rorow ko yafas ni manemus u paradis e ke mul u pa’row. Kar pagew ni nge af e denen nge yam’ ngak pi fakrow ni dawor ni gargelnagrad.​—Roma 5:12.

Ani Sunmiydad, ni Jehovah, e chi ngiyal’ nem me dugliy laniyan’ ko kanawo’ ni nge chuweg e magawon ni ra yib nbochan e pi n’en ni bay i buch ni reb nge reb ni ke tabab nbochan fare togopuluw. U nap’an ni i pufthinnag fare Moonyan’, me yog Jehovah Got boch e thin ko bin som’on e yiiy u Bible ni gaar: “I gur nge fare pin e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif ay.” (Genesis 3:15) Reb e tayu llowan’ ko Bible e ke yog ni fare Messiah e talin e maruwel rok Got ni nge “chuweg urngin e magawon ni ke yibnag fare denen,” me sulweg fare taw’ath ngak e girdi’.​—Hebrews 2:14, 15.

Machane, sana, kam guy ni ri dan taw’athnag e girdi’ e ngiyal’ ney. N’en ni ke buch, e ke yog ngak e girdi’ e yafas ni be m’ug ndariy e athap riy. Ere, fare The World Book Encyclopedia e be yog ni “boor piyu Jew ni ka yad be sonnag ba Messiah ni nge yib” me “yal’uweg e tin ni ba oloboch me gel ngak e pi toogor ko girdi’.” Machane, be yog e Bible ni fare Messiah e ke yib, ma ir e be micheg ni Jesus e fare Messiah. Rayog ni ngad pagedan’dad ko n’en ni be yog e Bible.