‘Kug Pirieged fare Messiah’!

Sogonap’an aningeg e chibog u m’on nni yoloy e ken tomur e babyor ko Bible ni thin ni Hebrew, me lebug e n’en ni yiiynag Mikah u murung’agen fare Messiah ni aram e: Kan gargeleg Jesus u Bethlehem. Sogonap’an 30 e duw nga tomuren ko duw ni 29 C.E., me lebug e gin som’on ko yiiy rok Daniel u murung’agen e wub nra tay fare Messiah. Aram e ngiyal’ nni taufenag Jesus me dugliy Got nga gelngin nib thothup. Ere, riyul’ ni ke taw fare Messiah ara Faen Owchen ni ka un sonnag ko ngiyal’ ni kan dugliy riy!

De n’uw nap’an nga tomuren me tabab Jesus ko machib ni be “machibnag ngak e girdi’ e Thin Nib Fel’ ni murung’agen e gagiyeg rok Got.” (Luke 8:1) Jesus e ir be’ nib gol, mab sumunguy, ma ma lemnag e girdi’ ni bod rogon ni kan yiiynag. Pi n’en ni i fil e ba m’ag ko girdi’ ma i rin’ u fithik’ e t’ufeg, miki golnag e girdi’ u “urngin mit e liliy nge m’ar.” Re n’ey e i m’ug riy ni bay Got rok. (Matthew 4:23) Gubin yangar e girdi’ ni u ranod ngak Jesus me lungurad: ‘Kug pirieged fare Messiah’!​—John 1:41.

I yiiynag Jesus nu m’on nra tabab Gil’ilungun ko gagiyeg, ma ra gel e mahl u fayleng, ma ra i yib e durru’, nge ku boch e magawon. I yog ni ‘ngan tiyan’uy ko matanag.’​—Mark 13:37.

Jesus e ir be’ nib flont ma i par nib yul’yul’ ngak Got. Machane, munmun me chel e pi toogor rok ngar lied nge yim’. Yam’ ni tay e ke yognag e re maligach nrayog ni ngan pi’ ngkun sulweg e n’en ni mul u pa’ Adam nge Efa, ni aram e yafas ndariy n’umngin nap’an u Paradis.

Yam’ ni tay Jesus e ke lebguy reb e yiiy, maku er rogon e n’en ni rin’ Got u nap’an ni faseg Jesus nga reb e dowef ni gathi downgin e girdi’. Tomuren ni ke fas ko yam’ me m’ug nga boor ko 500 i gachalpen. Ma u m’on ni sul nga tharmiy, me tay chilen ngak pi gachalpen ni ngar wereged fare thin nib fel’ u murung’agen nge Gil’ilungun ngak “girdien e pi nam u gubin yang.” (Matthew 28:19) Uw feni ga’ yang e gin ni kar machibgad riy?

​—Kan fek ko Matthew, Mark, Luke, John, 1 Korinth.