Dariy Rifrifen Pa’ Machane Baadag ni Nge Maruwel

FAAN ga ra mada’nag Leonardo ma ga ra lemnag ni dabiyog ni nge un ko maruwel ko gin ni yibe toy e naun riy. Dariy pa’ ni ruwraba’ ya ke mat’ u nap’an reb e maruwel ni un ngay. Yugu aram rogon ni dariy rifrifen pa’ machane be un ko maruwel ko gin ni yibe toy e Kingdom Hall riy u Acatjula, El Salvador, ma rayog ni ngan guy ko sasing.

Ke fal’eg Leonardo talin e maruwel rok ya nge yog ni un ko maruwel ko gin ni yibe toy e naun riy. Ke fal’eg kolngin e shovel rok ya nge yog ni nge yin’ pa’ nga langgin me shovelnag e but’ nga wheelbarrow. Ma ke fal’eg ban’en ni ba tulolbuy nga kolngin e wheelbarrow rok ya nge yin’ pa’ nga langgin me pi’ e wheelbarrow. Mang e k’aring ni nge un ko biney e maruwel?

Baadag Leonardo ni nge un ko maruwel ni ngan toy e Kingdom Hall ara naun ni ma muulung e Pi Mich Rok Jehovah riy. Boor fan ni rayog ni nge yog ni dabiyog ni nge un ko re maruwel ney. Bay reb e maruwel ni ma un ngay ni gubin ngiyal’, ma dariy rifrifen pa’ maku ir reb e ministerial servant u lan e ulung. Machane, baadag ni nge rin’ e tin rayog rok ni nge pigpig ngak Got ni aram e nge un ko maruwel ni ngan toy e Kingdom Hall.

Ere bay e lem rom ni aram rogon ni ga baadag ni ngam pigpig ngak Got? Rayog ni nge yog Leonardo ni dabiyog ni nge un ko maruwel ya dariy rifirfen pa’, machane ke lemnag rogon ni nge fal’eg talin e maruwel rok ya nge bung rogon ni nge un ko maruwel. Ere ke pigpig ngak Got u ‘polo’ i laniyan’.’ (Matthew 22:37) Demtrug e magawon ni bay rok be’, machane piin ni yad ma un i toy e Kingdom Hall ko Pi Mich Rok Jehovah u ga’ngin yang e fayleng e yad ma ognaged yad ni ngar uned ngay u polo’ i lanin’rad. Bay e pi muulung ni yad ma tay ma ba puf mat’awun e girdi’ ni gubin ni nge un ngay, ma rayog ni ngam un ngay.