Ngan Toy e Kingdom Hall—Bang nib Ga’ Fan ko Pigpig ku Got
1. Mang e kan rin’ ko maruwel ni ngan toy e Kingdom Hall, machane ma e ka ba t’uf riy?
1 Ka nap’an lal’ e duw faram ma kan toy 633 e Kingdom Hall, min biechnag 1,193, min fl’eg 1,785 u tan e branch ko United States. Ri gamad be tay fan e maruwel ni ke tay e Regional Building Committee nge urngin e girdi’ ni kar ayuweged yad. Yugu aram rogon ni boor e maruwel ni kan tay, machane kab t’uf boor e Kingdom Hall. Uw rogon ni gad gubin e rayog ni ngad ayuweged e re maruwel ney nib m’ag ko pigpig ku Jehovah.—Rev. 7:15.
2. Uw rogon nrayog ni ngad ayuweged fare maruwel ko dimow naun ko Kingdom Hall?
2 Nge M’agan’um Ngay: Faanra gur reb e publisher ma kam taufe ma yibe piningem ni ngam un ko maruwel ko Regional Building Committee u daken fare babyor ni Kingdom Hall Volunteer Worker Questionnaire. (Ps. 110:3) Urngin e piin ni ra un ngay e thingari m’agan’rad ngay ma thingara maruwelgad u taabang. (Ps. 133:1) Mus ni damu nang ko uw rogon e maruwel ko dimow naun ma ka rayog ni ngam pi’ boch e ayuw ko re maruwel nem. Ku rayog ni ngan fil boch ban’en ngom ma aram e rayog ni ngam un ko boor boch ban’en nga m’on.
3. Mang boch e kanawo’ ni rayog ni ngad daged ni gad be ayuweg e re yaram ney?
3 Faanra dabiyog ni ngam un ko re maruwel ney ma rayog ni ngam pi’ e athamgil nga laniyan’ yugu boch e girdi’ ni rayog ni ngar uned ngay. Rayog ni ngam rin’ boch ban’en ko ulung ni fan ko piin ni ra yan nga bang ko maruwel. Piin piilal e ra fl’eg rogon ma yad ra guy ni yibe ayuweg e ulung u nap’an ni be un boch e girdi’ ko maruwel ko dimow naun ko Kingdom Hall. Dabi siy ni ma felan’ Jehovah u nap’an ni gad ma maruwel u taabang ni ngan mon’ognag e pi n’en ni fan ko Gil’ilungun Got.—Heb. 13:16.
4. Uw rogon nrayog ni ngad pied e athamgil nga laniyan’ e piin ni ma un ko maruwel ko dimow naun ko Kingdom Hall?
4 Nge Mudugil Lanin’um: Boor e tayim nge maruwel nib gel ni yibe tay ni ngan toy e pi naun ni fan ko liyor. Ere boch e ngiyal’ ma piin ni kan piningrad ni ngar uned ko re maruwel ney e ran nog ngorad ni ngar chuwgad ko ulung ko binaw rorad. Ngad pininged e magar ko piin ni kar ognaged yad ko re maruwel ney ma yad ma pag farad ko “maruwel nib t’uf.”—Acts 6:3; Rom. 14:19.
5. Uw rogon nrayog ni nge dag e piin ni ma un ko maruwel ko dimow naun ni yad be par nib thabthebel?
5 Mu Par nib Thabthebel: Bin th’abi ga’ fan e maruwel ko tirok Got ban’en e aram e ngan machibnag fare thin ko Gil’ilungun Got. (Mark 13:10) Ere pi Regional Building Committee e ma tay e pi maruwel ni fan ni dabi par e piin ni kar uned ngay nib n’uw nap’an ni kar paged e ulung rorad. Maku piin ni ma un ko maruwel ko dimow naun e ma athamgil ni ngar pared nib thabthebel mar rin’ed e tin nib mil fan ngorad. Yad ma guy rogon ni ran rin’ e tin nib mil fan ngorad ko ulung u nap’an ni yad ra yan nga bang ko maruwel.
6. Mang angin ni yib u nap’an ni ra maruwel urngin e girdi’ ko ulung u taabang ni ngan mon’ognag e bin riyul’ e liyor?
6 I weliy apostal Paul u murung’agen girdien e ulung ni yad ma maruwel u taabang “ma aram mi i ilal fare dowef ma be ga’nag ir i yan u daken e t’ufeg.” (Efe. 4:16) Ba t’uf Jehovah rodad nge bin riyul’ e liyor ma aram e ma k’aringdad ni ngad maruwelgad u taabang ni ngan wereg fare thin nib fel’ ma ngan ayuweg e maruwel ko dimow naun ko Kingdom Hall.