Mu Fil ko Bitir Rom ni Nge T’uf Jehovah Rok

“Pi bitir ni pumoon ni fak be’ ni kab pagel e bod bogi gan e gat’ing ni bay u pa’ ba salthaw.”​—PSALM 127:4.

1, 2. Uw rogon ma bitir e yad “bod bogi gan e gat’ing ni bay u pa’ ba salthaw”?

BA GIRDIEN e gat’ing e be fal’eg rogon ni nge pag gan e gat’ing nge kan ko n’en ni nga nip’. Me fal’eg rogon i ta’ ko fare gaf ko gat’ing, ma gelngin me buguy fare gat’ing rok. Dariy fan feni mo’maw’ ma ribe guy rogon ni nge pulweg fare gan e gat’ing. Me pag nge yan! Gur ra aw fare gan e gat’ing ko n’en ni nga nip’? Boor ban’en nib t’uf ni ngan nang ko som’on fin da nanged e fulweg riy, nib muun ngay feni salap fare girdien e gat’ing, nge gelngin e nifeng, nge rarogon fare gan e gat’ing.

² Solomon ni pilung e ke yog ni bitir e “bod bogi gan e gat’ing ni bay u pa’ ba salthaw.” (Psalm 127:4) Mu lemnag rogon ni ngan fanay e re fanathin ney. Faen girdien e gat’ing e ra par fare gan e gat’ing ko gat’ing rok nib ngoch nap’an. Rogon me kan fare gan e gat’ing ko n’en ni nga nip’, e susun e nge pag nib papey. Maku arrogon e pi gallabthir ni kemus ni buchuuw e tayim rorad ni ngar ayuweged pi fakrad ni ngari t’uf Jehovah rorad. Tomren in e duw, me ilal e bitir me chuw u tabinaw. (Matthew 19:5) Gur yad ra taw ko gin ni yibe nameg​—ni fan e re deer n’ey, e ra par nib t’uf Got rorad ma ngaur pigpiggad ngak u tomren ni kar chuwgad ko tabinaw rorad? Boor ban’en nib l’ag ko fulweg riy. Bay dalip ban’en nib muun ngay ma reb riy e aram e salap rok e gallabthir u rogon i ayuweg e bitir rorow, nge mit i girdi’ ni bay u toobrad, nge faanra fol fare ‘gan e gat’ing,’ ara bitir, ko ayuw ara fonow ni yibe pi’ ngak. Ngada yaliyed e pi n’ey nreb nge reb. Som’on, e ngad weliyed boch e ngongol rok e gallabthir ni yad ba salap.

Gallabthir nib Salap e Ma Dag e Ngongol nib Fel’

3. Mang fan ni thin rok e gallabthir e thingari puluw ko ngongol rok?

³ I dag Jesus e kanawo’ ni fan ngak e gallabthir ya ma rin’ e tin ke machibnag. (John 13:15) Machane, ke togopuluw ngak fapi Farise, ya “darir rin’ed” e tin ni “yad be machibnag.” (Matthew 23:3) Rogon nrayog rok e gallabthir ni ngar k’aringed e bitir rorad ni ngar t’ufeged Jehovah, e susun ni nge puluw e thin rorad ko ngongol rorad. Thin nde un ngay e ngongol nib fel’ e ba m’ay fan ni bod e gat’ing ndariy e gaf riy.​—1 John 3:18.

4. Mang boch e deer nib fel’ ni nge fith e gallabthir yad riy, ma mang fan?

⁴ Mang fan nib ga’ fan e ngongol rok e gallabthir? Ri bod ni piin ni kar ilalgad e rayog ni ngar filed rogon ni ngar t’ufeged Jehovah nfaanra ngar sapgad ko ngongol rok Jesus, maku arrogon e bitir nrayog ni ngar filed rogon ni ngar t’ufeged Jehovah nfaan yad ra fol ko ngongol rok e gallabthir rorad nib fel’. Piin ni ma chag ba bitir ngorad e rayog ni nge gelnag ara nge kirebnag ‘pangin fare tir nib fel’.’ (1 Korinth 15:33) Ma rib riyul’ e re n’ey nib ga’ nu nap’an e tin som’on e duw ko bitir, ni piin nib ga’ ni ma chag e gallabthir rorad ngorad, ya tin ni yad ma guy e ma rin’ ban’en ko ngongol rorad ni ki mada’ ko ngiyal’ ni kar ilalgad. Ere, piin gallabthir e thingar ra fithed yad ni nge lungurad: ‘Gub miti mang girdi’? Ngongol rog e ra k’aring e bitir rog ni nge maruweliy nge yog ngak e ngongol nib fel’, fa? Mang e gu ma rin’ ni bay rogon ko tin nrib ga’ fan ni bod e meybil nge fol Bible?’

Gallabthir nib Salap e Yad Ma Meybil e Bitir Rorad u Taabang

5. Mange rayog ni nge fil e bitir ko meybil rok e gallabthir rorad?

⁵ Bitir rom e rayog ni ngar filed ban’en ni boor u murung’agen Jehovah u nap’an ni yad ra motoyil ko meybil rom. Faanra yad ma motoyil ni gad ma pining e magar ku Got u nap’an e abich ngu nap’an e fol Bible, ma mang e rayog ni ngar filed? Yad ra fil ni Jehovah e ma pi’ ngodad e tin nib t’uf nga dowdad​—nge tirok Got ban’en—​mab t’uf ni ngad pininged e magar ngak. Rib ga’ fan e re n’ey.​—James 1:17.

6. Uw rogon ma rayog ni nge ayuweg e gallabthir e bitir rorad ngar nanged ni ma lemnag Jehovah rarogorad ni be’ nge be’?

⁶ Machane, faanra gimed ma meybil u taabang ni gathi kemus nu nap’an e abich nge fol Bible ma nap’an e pi meybil nem ni ga be weliy boch ban’en ni murung’agem nge murung’agen e bitir rom, e ba ga’ angin. Ga ra ayuweg e bitir rom ni ngar nanged ni Jehovah e bang ko tabinaw romed, ma ri ma lemnag rarogomed ni be’ nge be’. (Efesus 6:18; 1 Peter 5:6, 7) Reb e matam e yog ni gaar: “Ka nap’an e ngiyal’ nni gargeleg e bitir romow ni ppin, ma gamow ma meybil u taabang nge fare tir. Ma nap’an ni ke ilal boch, ma gamad ma meybil ni murung’agen e tha’ u thilmad boch e girdi’ nge boch ban’en ni bay rogon ngak. Ki mada’ ko ngiyal’ ni chuw u tabinaw nge un ko mabgol ma gamad ma meybil u taabang ni gubin ngiyal’.” Gur ku rayog ni ngam meybilgad e bitir rom u taabang ni gubin e rran? Rayog ni ngam ayuwegrad ngar sapgad ngak Jehovah ni Fager rorad, ni gathi kemus ni ma pi’ ngorad e tin nib t’uf nga dowrad nge tirok Got ya ku ma lemnag e n’en ni be magawonnag lanin’rad?​—Filippi 4:6, 7.

7. Mange ba t’uf ni nge nang e gallabthir, ma rayog ni ngar yibilayed boch ban’en nib tamilang?

⁷ Riyul’ ni, rogon ni nga mog boch ban’en u murung’agen rarogon e bitir ko meybil rom, mab t’uf ni ngam nang e n’en ni be buch rok. Mu lemnag e n’en ni yog ba matam ni l’agruw e bitir rok ni gaar: “U tomren gubin wik, ma gu ma fitheg u l’agruw e deer ni ma lungug: ‘Mang boch ban’en ni be lemnag e bitir rog ko re wik ney? Ma mang boch ban’en nib fel’ ni ke buch ko yafas rorad?’” Gallabthir, rayog ni ngam fithed gimed ko deer ni aram rogon mi gimed uneg boch e fulweg riy ko meybil romed u nap’an ni gimed be meybil e bitir u taabang? Faan gimed ra rin’ ni aram rogon, ma gathi kemus ni gimed be fil ngorad rogon ni ngan meybil ngak Jehovah​—ni Got ni ma Motoyil ko meybil—​ya ku gimed be fil ngorad rogon ni ngar t’ufeged.​—Psalm 65:2.

Gallabthir nib Salap e Ma K’aring Ngan Adag i Fil Ban’en

8. Mang fan ni thingari ayuweg e pi gallabthir e bitir ngar adaged e fol Bible ni gubin ngiyal’?

⁸ Uw rogon ma rarogon e gallabthir ko fol Bible e ra yib rogon ko tha’ rok ba bitir ngak Got? Rogon ni nge gel me par e tha’ u thilin e girdi’, e ba t’uf ni bay e numon riy min motoyil. Reb e kanawo’ ni gad ma motoyil ngak Jehovah e ngad filed e Bible nge boch e babyor ni be pi’ ‘fare tapigpig nib yul’yul’.’ (Matthew 24:45-47; Proverbs 4:1, 2) Ere, rogon ni nge ayuweg e gallabthir e bitir rorad ni nge par nib fel’ e tha’ u thilrad Jehovah, e bfel’ ni ngar pied e athamgil nga lanin’rad ngar adaged e fol Bible ni gubin ngiyal’.

9. Uw rogon ni ngan ayuweg e bitir ni ngar mechamgad ko fol Bible?

⁹ Uw rogon ni ngan ayuweg e bitir nge mecham ko fol Bible? Tin ni ma rin’ e gallabthir e ir e kanawo’ nth’abi fel’ ni nge skulnag e bitir. Ma guyem e bitir rom ni ga be beeg ara ga be fil e Bible u fithik’ e felfelan’, fa? Riyul’ nsana boor e maruwel rom ya gabe ayuweg e bitir ko tin nib t’uf rorad, ma gabe lemnag ko mingiyal’ e rayog ni ngam beeg ara ngam fil e Bible. Machane mu fithem nge lungum, ‘Ma guyeg e bitir rog ni guma yaliy e television?’ Faanra aram rogon, ma rayog ni ngam fanay boch e tayim riy ngam dag ngorad e kanawo’ nib fel’ rogon ni ngan fil e Bible?

10, 11. Mang fan ni gallabthir e thingari fil e Bible ngak girdien e tabinaw rok ni gubin ngiyal’?

¹⁰ Reb e kanawo’ ni nge fil e gallabthir rogon ni nge fol e bitir rok Jehovah e ngan fil e Bible u tabinaw. (Isaiah 30:21) Boch e girdi’ e sana yad be lemnag ko, ‘Mang fan nib t’uf rok e pi bitir e fol Bible u tabinaw nfaanra gallabthir rorad e yad ma fekrad ko muulung?’ Bay boch i fan nib fel’. Ke tay Jehovah ni ke milfan ngak e gallabthir ni nge skulnag e bitir rok. (Proverbs 1:8; Efesus 6:4) Fol Bible u tabinaw e ma skulnag e bitir ni liyor e, gathi ban’en ni goo fithik’ e yoor e yima rin’ riy, ya ban’en ni ki yima rin’ u lan e tabinaw.​—Deuteronomy 6:6-9.

¹¹ Maku, fol Bible u tabinaw ni kan fal’eg nib fel’ rogon e rayog ni nge ayuweg e gallabthir ni ngar nanged ko uw rogon u wan’ e bitir rorad e tirok Got ban’en. Ni bod ni, nap’an ni kab bitir e bitir rorad, ma rayog ni ngar fanayed fare babyor ni Learn From the Great Teacher (Mu Fil Ban’en Rok Fare Sensey ni Rib Fel’).a Ba chuchugur ni nge urngin e paragraph ko re babyor ney, ni yibe yog ngak e bitir riy ni nga rogned lanin’rad u murung’agen e pi n’en ni yibe weliy. Ra fanay e gallabthir e thin nu Bible u lan fare babyor, ma rayog ni ngar ayuweged gelngin laniyan’ e bitir rorad nge yog ni “ngar nanged e tin nib fel’ ko tin nib kireb.”​—Hebrews 5:14.

12. Uw rogon ni nge puluwnag e gallabthir fare fol Bible u tabinaw ko tin nib t’uf ko bitir, ma mange n’en ni kam pirieg nib manging’?

¹² U nap’an ni be ilal e bitir rom i yan, ma ngam puluwnag e tin ngam fil ngorad ko tin nib t’uf rorad. Mu lemnag rogon ni ke ayuweg ba wu’ e mabgol e bitir rorow ngar weliyed murung’agen ni kan piningrad ni ngar uned ko churu’ u skul. Yog fare matam ni gaar: “Ku gognew ngak e pi bitir romow ni bang ko bin migid e fol Bible u tabinaw romad, me gag nge ppin rog e nggu tew ni gowa gamow e bitir, ma pi fakmow e ngar ted ni susun e yad e gallabthir. Demtrug ko mini’ e bitir ni nge mang Matam ara Matin, machane ba t’uf ni ngar maruwelgad u taabang ngar fal’eged i gay murung’agen e churu’ u skul ngar weliyed.” Mang angin? Me ul’ul ngay ni gaar, “Kug gingow ko n’en ni kar nanged (gowa yad e gallabthir) u nap’an nra weliyed ngomad (gowa yow e bitir) boch e thin nib puluw ko thin nu Bible ko mang fan nde fel’ ni ngan un ko churu’ u skul. Maku reb ni kug gingow ngay e ka rogned murung’agen ban’en nrayog ni ngan rin’ nib fel’ ni nge yan lon e re n’em. Pi n’ey e ke ayuwegmow ni nggu nangew lanin’rad nge tin yad baadag.” Riyul’ nre n’ey e ba t’uf e k’adan’ ma nguun lemnag ban’en ni fan e nge ul’ul e fol Bible u tabinaw ma ra m’ag ko tin nib t’uf rorad, machane ba ga’ angin.​—Proverbs 23:15.

Mu Maruweliy ni Nge Aw e Gapas nga Dakenmed

13, 14. (a) Uw rogon ni nge maruweliy e gallabthir nge aw e gapas u lan e tabinaw? (b) Mang angin nfaanra yog e gallabthir e oloboch rorow?

¹³ Rayog ni nge kan fare gan e gat’ing ko n’en ni ngan nip’ nfaanra pag fare girdien e gat’ing ko ngiyal’ ndariy e wagey riy. Maku arrogon, rayog ni nge fil e bitir rogon ni ngar t’ufeged Jehovah nfaanra maruweliy e gallabthir ni nge aw e gapas nga daken e tabinaw rorad. Yoloy James ni gaar: “Ma tin nib mat’aw e ngongol e wom’engin ni yib ko awoch ni piin ni ma fal’eg thiliy e ra yunged u fithik’ e gapas.” (James 3:18) Uw rogon ni nge maruweliy e gallabthir nge aw e gapas nga daken girdien e tabinaw? L’agruw e yabgol e ba t’uf ni ngar maruweliyew ni nge par nib fel’ e tha’ u thilrow. Ba matam nge matin ni yow ma t’ufeg ma yow ma tay farrow e ba mom ni ngar filew ko bitir rorow ni nge bagayad me t’uf me tay fan boch e girdi’, nib muun Jehovah ngay. (Galatia 6:7; Efesus 5:33) T’ufeg nge tay fan e ra mon’ognag e gapas. L’agruw e yabgol ni bay e gapas u thilrow e bay rogorow ni ngar pithigew e magawon ni ma sum u tabinaw rorow.

¹⁴ Riyul’ ndariy e mabgol nib flont, maku dariy e tabinaw nib flont e ngiyal’ ney. Rayog ni yu ngiyal’ ma dabiyog rok e gallabthir ni ngar daged wom’engin e kan ni thothup u rogon ni yad ma ayuweg e bitir rorad. (Galatia 5:22, 23) Faanra buch ni aram rogon ma mang e rayog ni nge rin’ e gallabthir? Gur faan yow ra yog ni kar olobochgow ma ra achig e tay fan ko bitir rorow ngorow? Mu lemnag e n’en ni rin’ Paul. Ke bod ba matam ngak boor e girdi’. (1 Korinth 4:15) Machane, me yog e oloboch rok ngorad. (Roma 7:21-25) Yugu aram rogon, ma sobut’an’ nge yul’yul’ rok e ke gelnag e tay fan rorad ngak. Yugu aram rogon ni ke oloboch, me yol Paul ngak e ulung nu Korinth u fithik’ e pagan’ ni gaar: “Ere um folwokgad rog, ni bod rogon ni gu be folwok rok Kristus.” (1 Korinth 11:1) Maku arrogon nfaan ga ra yog e oloboch rom, ma ra pag e bitir rom talin e oloboch rom.

15, 16. Mang fan ni gallabthir e thingar ra skulnaged e bitir rorad ni ngar t’ufeged e pi walag u lan e ulung, ma uw rogon ni ngan rin’?

¹⁵ Ku mang e n’en nrayog ni nge rin’ e gallabthir nra ayuweg e bitir rorow ngar t’ufeged Jehovah? Yoloy John ni apostal ni gaar: “Dabiyog ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 4:20, 21) Ere, nap’an ni ga be skulnag e bitir rom ni ngar t’ufeged e pi walag u lan e ulung, ma ga be skulnagrad ni ngar t’ufeged Got. Gallabthir e thingara fithed yad ni nge lungurad, ‘Thin ni gu ma yog u murung’agen e ulung e ma gelnag e michan’ ko bitir rog fa danga’?’ Uw rogon ni ngam nang? Ngam motoyil nib fel’ rogon u nap’an ni be yog e bitir rom murung’agen girdien e ulung. Ba ga’ ni ga ra rung’ag ko thin rorad e tin gabe lemnag.

¹⁶ Uw rogon ni nge ayuweg e gallabthir e bitir rorad ni ngar t’ufeged pi walagrad u lan e ulung? Peter, nreb e matam u l’agruw i pagel e yog ni gaar: “Ka nap’an ni kab bitir e bitir romow, ma gubin ngiyal’ ni ma yib e walag ni ke ilal ko tirok Got nge un ngomad ko abich mar pared romad u tabinaw, ma ri ma yib e felfelan’ ngomad riy. Ke ilal e bitir romow ni yow ma chag ngak e girdi’ nib t’uf Jehovah rorad, ma kar guyed e chiney ni ngan pigpig ku Got e ireray kanawoen e yafas ni bay e felfelan’ riy.” Dennis, ni ba matam ni lal e bitir rok ni ppin, e yog ni gaar, “Gamow ma yog ngak e pi bitir romow ni ngar maruweliyed ni nge fel’ thilrad e piin pioneer u lan e ulung, ma ngiyal’ nrayog ma gamow ma ayuweg e piin ni ma lekag e ulung nge pi leengirad.” Gur ku rayog ni ngam ayuweg e pi bitir rom ni ngar sapgad ko ulung ni bang ko tabinaw romed?​—Mark 10:29, 30.

Ban’en nib Milfan ko Bitir

17. Munmun ma mang e thingari dugliy e bitir?

¹⁷ Mu lemnag bayay fare fanathin u murung’agen girdien e gat’ing. Yugu demtrug nib cheg e cha’nem ko re maruwel n’ey, mab ga’ ndabiyog ni nge kan fare gan e gat’ing ko n’en ni ngan nip’ nfaanra ba bugbug. Riyul’ ni, gallabthir e ngar guyed rogon ni ngar yal’uweged laniyan’ e bitir rorad nde puluw ni bod e gan e gat’ing ni ba bugbug. Machane munmun ma bitir e ra dugliy ko ra pag e fayleng ni nge gagiyegnagrad ara ngar paged Jehovah ni nge “dag ngorad e bin nib mat’aw e kanawo’.”​—Proverbs 3:5, 6; Roma 12:2.

18. Mange ra rin’ e n’en ni ke dugliy e bitir ngak boch e girdi’?

¹⁸ Yugu aram rogon ni kari mil fan ngak e gallabthir ni ngar chuguliyed fakrad “nrogon ni ma fonownigey Jehovah nge rogon ni ma pow’iy e lem,” machane bitir e tomur nra dugliy ko mang e baadag ni nge rin’ u nap’an ni ke ilal. (Efesus 6:4, NW) Ere, gimed e piin bitir, mu fithed gimed ni nge lungumed, ‘Gu ra fanay e n’en ni ke fil e gallabthir rog ngog, fa?’ Faan ga ra rin’, ma kam mel’eg e n’en th’abi fel’ ko yafas. Ma ra yib e felfelan’ nib gel ngak e gallabthir rom. Ma n’en ni th’abi ga’ fan, e ra felfelan’ Jehovah ngom.​—Proverbs 27:11.

[Footnote]

Ka Ga Manang?

• Uw rogon ma rayog rok e gallabthir ni nge dag e kanawo’ nib fel’ rogon ni ngan meybil nge fol Bible?

• Uw rogon ni nge aw e gapas nga daken girdien e tabinaw?

• Mange susun e nge dugliy e bitir, ma n’en ni kar mel’eged e mang e ra rin’ ngak boch e girdi’?

[Picture on page 10]

Gama dag e kanawo’ nib fel’ ngak e bitir rom u rogon ni gama fil e Bible ni goo gur?

[Picture on page 11]

Tabinaw ni ba gapas era ayuweg ni ngebe felfelan’ ngay