Mang Fan ni Ke Pag Got e Kireb?

KIREB nge gafgow e ke garer u gubin yang. Boor e salthaw ni be yim’ ko mahl nib muun ngay e pumoon nge ppin nge bitir ni dariy ban’en ni kar bucheged. Cham nge oloboch e ke garer u gubin yang. Dabisiy ni bay ba ngiyal’ ni kan rin’ ban’en ngom nde mat’aw ara kan laniyan’ ngom. Bochan e pi n’ey ni kam guy fa kan rin’ ngom ma sana kam fith ko, ‘Mang fan ni ke pag Got e kireb?’

Boor e girdi’ ni ke fith e re deer ney. Sogonap’an 3,600 e duw ni ke yan me fith Job nreb e tapigpig rok Got nib yul’yul’ ni gaar: “Mang ni ma tay Got e girdi’ ni kireb ni dab ra m’ad?” (Job 21:7, BT) Ma sogonap’an 2,600 e duw ni ke yan, ma Jeremiah ni profet e ke dabuy e ngongol nib kireb ni be rin’ e girdi’ ko nam rok. Ere fith ni gaar: “Mang fan ni piin kireb e ba yoor ban’en rorad? Mang fan ni piin nde yul’yul’ e yad ba flaab?” (Jeremiah 12:1, BT) Job nge Jeremiah e yow manang ni Got e ba mat’aw. Machane kuur lemnag ko mang fan ni kaygi yoor e kireb. Dabisiy ni ka ga ma lem ni aray rogon.

Boch e girdi’ e ka ron’ed e kireb nga daken Got ni bochan e kireb nge gafgow ni be buch. Ma boch e girdi’ e yad ma lemnag ko: ‘Mang fan nib gel gelngin Got mab mat’aw ma ma t’ufegey ma der chuweg e kireb nge gafgow? Mang fan ni ke pag e kireb ka be ulul i yib ke mada’ ko chiney?’ Bin migid e thin e ra pi’ e fulweg ko gali deer ney nge ku boch e deer nib ga’ fan.

[Picture Credit Line on page 3]

AP Photo/​Adam Butler