N’en Ma Fith e Piin Ma Beeg

Bay Gil’ilungun Got U Gum’irchaem, Fa?

Boor e girdi’ e ngiyal’ ney nima mich u wan’ ni fulweg ko fare deer i er nga lang e arrogon. Bod ni, fare The Catholic Encyclopedia ebe yog ni: “Gil’ilungun Got ebe yip’ fan . . . rogon nima gagiyegnag Got gum’irchadad.” Ba ga’ nima fil e pi tayugang’ ko teliw ngak e girdi’ ni aray rogon. Ma fil e Bible ni Gil’ilungun Got e bay u lan gum’irchaen e girdi’, fa?

Ma lemnag boch e girdi’ ni Jesus e som’on ni mon’ognag ere machib nem ni Gil’ilungun Got e bay u lan gum’irchaen e girdi’. Jesus e yog ni gaar: “Mu sapgad! Gil’ilungun Got e bay u fithik’med.” (Luke 17:21, NW) Ma boch e kan piliyeg ni gaar: “Gil’ilungun Got e bay u lanin’med” ara “bay u fithik’ i dowmed.” Ba puluw rogon ni kan piliyeg ere n’em ni yog Jesus, fa? Riyul’ nibe yip’ Jesus fan ni Gil’ilungun Got e kan pirieg u gum’irchaen e girdi’, fa?

Som’on e, ngan lemnag ko mang gum’irchaen e girdi’. Rogon ni bay u Bible e, fare gum’ircha’ nibe yip’ fan ban’en ebe yip’ fan fithik’ i laniyan’ be’, nge ngongol rok, nge rarogon e lem rok. Fare lem ni ban’en ni er feni tolang mab ga’ fan ni bod Gil’ilungun Got e nge par u lan gum’irchaen e girdi’​—u rogon nra thilyeg e girdi’ ngar tolanggad—​e sana ba fel’ lingan, machane mog, ba puluw ere n’em, fa?

Be yog e Bible ngodad ni gaar: “Gum’ircha’ e kab gel e sasaliyeb riy nga yugu boch e ban’en mab gelfen.” (Jeremiah 17:9, NW) I gaar Jesus: “Fithik’ i laniyan’ be’ e ir e ma yib e lem nib kireb riy ni ir e ma pingeg faanem nge darngal, me moro’ro’ u fithik’ e yargel, me thang e fan ko girdi’, mi yow par be’ ni gathi mabgol rok, me chogow, me rin’ urngin mit e kireb.” (Mark 7:20-22) Am lemnag: Gathi gubin e kireban’ ni yibe guy u fayleng e ngiyal’ ney e be m’ug nibe sum u gum’irchaen e girdi’ nib sug ko denen? Ere uw rogon nra yib Gil’ilungun Got nib flont u ban’en ni aram rogon? Rriyul’, ni gum’irchaen e girdi’ e dabiyog ni nge sunmiy Gil’ilungun Got ni bod ni pan ni makankan e der k’uf ni fig.​—Matthew 7:16.

Bin migid e, mu lemnag fapi girdi’ nibe non Jesus ngorad u nap’an ni yog fapi thin ni bay ko Luke 17:21. Bin m’on e verse riy e gaar: “Me fith boch e Farise ngak Jesus ko ngiyal’ nra taw e gagiyeg rok Got. Me fulweg.” (Luke 17:20) Fapi Farise e yad e toogor rok Jesus. I yog Jesus ni pi Farise e dab ra uned nga Gil’ilungun Got. (Matthew 23:13) Ere faanra dabi un fapi Farise nga lan Gil’ilungun Got, ma rayog ni nge par fare Gil’ilungun u lan gum’ircharad, fa? Ri Dabiyog! Ere, mange be yip’ Jesus fan?

Boch e piin ni yad ma piliyeg e Bible e kar fanayed e thin nib dake taareb rogon ko fapi thin ni bay u lan fare New World Translation, u nap’an ni yad be piliyeg fapi thin ni yog Jesus. Boch e ma yog ni fare Gil’ilungun e bay u “fithik’med.” Uw rogon ni immoy Gil’ilungun Got rok e pi girdi’ nem e binem e tayim, nib muun e pi Farise ngay? Aram e, Jesus ni ire en nike dugliy Jehovah Got ni nge mang Pilung ko re Gil’ilungun nem. Jesus, ni ire kan Mel’eg ni nge mang Pilung e immoy rok e pi girdi’ nem. I fil murung’agen Gil’ilungun Got ngak e girdi’ miki ngongliy boor e maang’ang, nibe dag rarogon ere Gil’ilungun nem. Ere, bin nriyul’ riy e, bay fare Gil’ilungun rorad.

Ba tamilang, ndariy reb e thin nu Bible nibe yog ni Gil’ilungun Got e bay u lan gum’irchaen e girdi’. Ya, aram ba am, nra thilyeg ban’en u fayleng nib pey mab gagiyel, ni bod rogon ni yiiynag e pi profet.​—Isaiah 9:6, 7; Daniel 2:44.