Susun Kemus Ni Tin Nrayog Nda Guyed E Nge Mich U Wan’dad?
Boch e girdi’ e ma lemnag ni “dabiyog ni ngan nang e tin riyul’ ko pi n’en ni bod e Got nge yafos nga m’on ni aram e n’en ni ma lemnag e Kristiano nge yurba’ e teliw. Faanra rayog ma gathi ngiyal’ ney.”—PHILOSOPHER BERTRAND RUSSELL, 1953.
FACHA’ ni yog rogon e lem ni aray rogon e be’ nib ta fil murung’agen e gamanman ni fithingan e Thomas Huxley. Ni gargeleg ko duw ni 1825, Huxley e immoy u nap’an Charles Darwin ni i gelnag fare machib ni sum e girdi’ ko gamanman. U lan e duw ni 1863, me yoloy Huxley nder guy e mich riy ni immoy ba Got ni gad “ba t’uf rok ma ma ayuwegdad ni bod rogon ni ma yog e Kristiano.”
Boor e girdi’ e chiney nra taareban’rad ko lem ko pi girdi’ nem nib gilbuguwan, ni yad be yog ni kemus ni tin rayog ni ngar guyed e ra mich u wan’rad. Yad ma yog nde puluw ni nge mich u wun’uy ban’en ndariy e mich riy.
Ma gur arrogon ni be yog e Bible ni nge mich Got u wan’dad ndariy e mich riy rodad ni ba’ Got? Rib thil nga rogon ni be fil e Bible. Be dag e Bible ni piin ndemtrug e n’en ni ma mich u wan’rad e—ku yad ba aliliy—ni nge mich u wan’rad e n’en ni be yog e girdi’ ndariy ban’en ni nge micheg. Be yog e Bible ni: “Be’ ni de yoor ban’en ni manang e ra mich urngin e thin u wan’, machane be’ nib gonop e ma lemnag rogon i wuf ay.”—Proverbs 14:15, New World Translation.
Ere, uw rogon murung’agen e michan’ ngak Got? Riyul’ ni bay e mich riy ni bay Got? Gathi riyul’ nrayog ni ngad daged ni Got e ma t’ufegdad ma ma lemnag rarogodad?
Kan Dag Pi Fel’ngin Got
Paul ni ma yoloy e Bible, e nap’an ni be non ngak ba ulung i girdi’ nu Athen nib tolang e skul rorad, me yog ni Got e “ir e sunmiy e fayleng nge urngin ban’en ni ba’ riy.” Yog Paul ngak e piin ni be motoyil ngak ni Got e ma lemnag e girdi’ ma tin riyul’ riy “e dariy bagadad nib mal’af Got rok nga orel.”—Acts 17:24-27.
Mang fan ni ke mich u wan’ Paul ni bay Got ma ma lemnag e girdi’ ni Ir e sunumiy? I dag Paul reb i fan u nap’an ni yol nge yan ngak pi walagen ni Kristiano u lan e mach nu Roma. I yog murung’agen Got ni gaar: “Fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang. Girdi’ e rayog ni nge nang fan e pi n’ey u fithik’ e pi n’en ni ke m’ay i sunumeg rok Got.”—Roma 1:20.
Tin migid e page e be dag dalip i fel’ngin Got nrayog i guy nib fel’ rogon ko pi n’en ni ke sunumiy. Nap’an ni ga ra fal’eg i guy e pi n’ey, ma ga fithem, ‘Pi fel’ngin ney ni kug fil e mang e ke rin’ ngog?’
[Blurb on page 3]
Bible e der yog ni nge pagan’dad ngak Got ndariy e mich riy