Gonop Rok Got E Ba Gagiyel Ko Pi N’en Ni Ke Sunumiy — LIBRARY U ONLINE ni fan ko Wulyang ko Damit

Gonop Rok Got E Ba Gagiyel Ko Pi N’en Ni Ke Sunumiy

“Ir e pi’ e gonop ngodad, nib ga’ ko llowan’ rok e gamanman nge arche’.”—JOB 35:11.

ARCHE’ e bay bochi gelngin ni yira ngat ngay. Girdi’ ni yad ma fal’eg e skoki e ba fel’ u wan’rad rogon ni ma changeg e arche’ nib mom. Boor mit riy e yad manang e puluw ni yad ma changeg u lan e day ni bokum biyu’ e mayel ndariy ban’en riy, ma ranod ngar tawgad ko gin nga ranod ngay ni dabra olobochgad.

Maku reb e salap ko arche’ nib manigil—e kura dag e gonop ko ani Sunmiyrad—ni aram e rogon ni yad ma non ngorad ni yad ma pong ma yad be tang. Ngad lemniged boch ban’en ni yad ma rin’.

Numon ko Arche’

Bay yu mit e arche’ ni yad ma tabab ko numon ngorad ni dawori pil fare n’en ni dagurrad. Bod ba quail nib ppin, ni ma gargeleg pi fak ni meruk nra reb me gargeleg reb e rran. Faanra pi tamango nem e nge ilal nib taareb n’umngin nap’an, ma aram e yad ra pil u tomren meruk e rran. Ma aram e ra magawon fare matin i ayuwegrad ni nga i gafaliy boch ni ke pil ke gaman reb e wik yangaren maku be gowelnag reb ni daworiy ni nge pil. Ere rogon ni ma buch, e meruk i tamango nem u lan ere tafen e arche’ nem e ma pil ni gubin u lan nel’ i awa. Uw rogon ma rayog ni aram rogon? Reb i kenggin fan, ni ke yog e piin ni yad ma gay murung’agen ban’en, e pi pifak e quail nem e yad ma non ngorad u nap’an ndawori pil fapi n’en ni dagurrad ma rogned rogon ni ngar pilgad taa bangiyal’.

Nap’an nra ilal e arche’, mab ga’ ni tin pumoon ko fare miti arche’ e ma tang. Ba ga’ ni ma rin’ e re n’em ko ngiyal’ ni ma mada’ e arche’ ni pumoon nge ppin riy, ya nge dugliy e gin ke milfan ngak ara nge guy rogon nge yog reb e ppin ngak. Ra reb e re bokum biyu’ miti arche’ nem ma bay e birorad e thin, ma aray e n’en ni ma ayuweg e arche’ ni ppin nge pirieg e pumoon rok ni yow taab miti arche’.

Arche’ e ma tang nib ga’ nri kadbul nge maaw e yal’ ni bay fan nib fel’. Kab gapas e nifeng ma kab lich lingan ban’en ko gal ngiyal’ i nem. Piin ni ma gay murung’agen ban’en e kar pirieged ni tang ko arche’ e 20 yay ni kab ga’ laman ni yira rung’ag ni kadbul nge blayal’ ko thilin e kadbul nge blayal’.

Ba Tow’ath Nrib Fel’

Fare thamtham ni gonop ko arche’ e riyul’ nib manigil. Machane ra ngan welthin, ma kab salap e girdi’. Got e ke fal’eg rogon e girdi’ ‘ni kab llowan’ ngak e arche’ ni ma changeg u lan e lang,’ rogon ni yog Job 35:11. Kemus ni goo girdi’ e rayog ni nge welthin ara fanathinnag yaan ban’en.

Fare gelngin nrayog ni ngada weliyed rogon lanin’dad nge rogon e felfelan’ fa kireban’ rodad ni gad be welthin ara fanathin e rriyul’ nib tow’ath nrib fel’ ni yib rok Got. Machane, ku reb e tow’ath nri kab fel’ ni kan pi’ ko girdi’ e fare gelngin nrayog ni ngad nonad ngak Got u daken e meybil. Tin riyul’ riy, e Jehovah Got e be yog ngodad ni ngaud nonad ngak. Yog Got ko thin rok ni fare Bible ni gaar, “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.”—Filippi 4:6.

Nap’an nra ngad dugliyed ban’en nib mo’maw’, ma baadag Jehovah ni ngad fanayed fapi fonow ni boor ni ke yoloy nga lan e Bible. Maku ra ayuwegdad Got ni ngad nanged rogon ni ngada rin’ed e pi fonow ni gad be pirieg u Bible. James nib tayoloy e Bible e yog ni, “faanra dariy e gonop rok bigimed, ma nge wenignag ngak Got, ye ir e ra pi’ ngak; yi Got e ba gol ngak urngin e girdi’.”—James 1:5.

Mang e Ma Rin’ Ngom?

Mang e ga ma rin’ u nap’an ni ga ra motoyil ko tang rok ba arche’ nrib fel’ fa ngak ba bitir ni fin be fil rogon ni nge yog bbugithin ko som’on? Ga be nang rogon e gonop rok Got ko pi n’en ni ke sunmiy, fa?

Fare Psalmist i David e i fal’eg i lemnag rogon ni kan ngongliy me k’aring nge gaar ngak Got: “Gu be pining e sorok ngom, yi gur e ngan mudugdag ngom; urngin e tin ni ga ma rin’ e dabiyog ni nge tamilangan’uy riy, ma rib fel’. Gu manang u lan ngorongoreg ni polo’.” (Psalm139:14) Nap’an ni ga ra fal’eg i guy e gonop rok Got nib gagiyel ko pi n’en ni ke sunumiy, ma michan’ rom nga gelngin nra pow’iyem nib fel’ rogon e ra gel.

[Blurb on page 4]