Ngaun K’adan’uy u Fithik’ e Kireban’

“Me yib urngin pi fak [Jakob] ni pumoon nge ppin ngak ni ngar fal’eged laniyan’, machane de motoyil ngorad. Me gaar, ‘Danga’, ya nggu wan nga low ko yam’ u fithik’ e kireban’ ngak fakag.’ Ma aram mi i par e chitamangin ni be yornag.”​—GENESIS 37:35, The Holy Bible​—New International Version.

RIB gel e kireban’ ni tay Jakob nbochan e dakuriy fak. I lemnag ni nga i par nib kireban’ nge mada’ ko ngiyal’ ni ra yim’. Bod Jakob, rayog ni ngam lemnag ni fare amith ni bochan ni ke yim’ be’ nib t’uf rom e kaygi gel ndabkiyog ni nge chuw. Gur kireban’ nib gel ni aram rogon e be dag ni ke war e michan’? Danga’!

Be weliy e Bible nib gel e michan’ rok Jakob. Thin rok Got e be yog ni Abraham ni tutuw rok nge Isak ni chitamangin, nge Jakob e ba gel e michan’ rorad. (Hebrews 11:8, 9, 13) Immoy ba ngiyal’ ni fathal Jakob nge reb e engel nge kadbul ni fan ni nge yog e tow’ath rok Got ngak! (Genesis 32:24-30) Rib tamilang nrib fel’ thilrow Got. Ere mang e gad ra fil ko kireban’ ni tay Jakob? Girdi’ nib gel e michan’ rok e ku ra kireban’ u nap’an nra yim’ be’ nib t’uf rok. Gad ma kireban’ u nap’an nra chuw ara yim’ be’ nib t’uf rodad.

Mang e Kireban’?

Boor e kanawo’ nrayog ni nge magawonnagdad e kireban’ riy. Mu lemnag e n’en ni buch rok Leonardo, ni 14 e duw rok me yim’ e chitamangin nib tomgin ni bochan e kireb e gum’ircha’ rok. Dabi pagtalin Leonardo fare rran ni yog walagen e chitiningin ngak ni kem’ e papa’ rok. Som’on, ma dabun ni nge riyul’ u wan’. I guy e chitamangin u nap’an e tayam’, machane gowa de riyul’ e re n’em u wan’. Sagonap’an nel’ e pul nde yog ni nge yor Leonardo. Boor yay ni ma sonnag e chitamangin ni nge sul ko maruwel nga tabinaw rorow. I yan reb e duw fini riyul’ u wan’ ni ke yim’ e chitamangin. Ngiyal’ nem me thamiy ni goo ka ir. Nochi n’en nib achig ni bod ni nap’an nra yib nga tabinaw rok ndariy e girdi’ riy me k’aring ni nge yib ngan’ ndakuriy e chitamangin. Yu ngiyal’ i n’em e ir e ma yor riy nib gel. Kari tawrengnag e chitamangin nrib gel!

N’en ni buch rok Leonardo e kari dag ni kireban’ e rayog ni nge gel. N’en nib fel’ riy e rayog ni nge chuw. Machane, rayog ni n’uw nap’an buchuuw. Bod e maad’ad u dowey nib gel nra n’uw nap’an buchuuw fini fas, maku arrogon e kireban’ nbochan ni ke yim’ be’ nib t’uf rodad. Rayog ni nge chuw e kireban’ u tomren ni ke yan in e pul, ara in e duw, ara kab n’uw boch nap’an. Machane fare kireban’ nib gel ni yib ngom ko som’on e ra war i yan, ma dabkum lemnag ndakuriy fan e yafas rom.

Chiney e yima yog ni kireban’ e ban’en nib t’uf ko rogon ni nge chuw e kireban’ rodad ma gad fil rogon ni gad mechamgad ko bin nib beech e par. Chiney e daki moy be’ ni ud pired u taabang kafram. Ere ngad maruweliyed ni ngad mechamgad ko par nde moy e cha’ nem riy. Kireban’ e rayog ni nge ayuwegem ngam weliy ngak boch e girdi’ e magawon rom. Riyul’ nib thilthil rogon e kireban’ ni ma tay e girdi’. Machane bay ban’en nib riyul’ ni: Ngam tay e kireban’ rom rom ni dab mu weliy ku be’ e rayog ni nge magawonnag lanin’um, nge dowef rom. Ere, mang boch e kanawo’ nib fel’ ni ngam dag e kireban’ rom riy? Bay boch e fonow u lan e Bible nib fel’.

Ngan Gel ko Kireban’

Boor e girdi’ ni ke yim’ be’ nib t’uf rorad e kar pirieged ni numon e rayog ni nge ayuwegrad. Mu lemnag e thin rok Job u Bible u nap’an ni ke yim’ ragag e bitir rok maku ke yib boch e magawon ngak. I gaar: “Ke ngochan’ug ko yafos rog. Dabgu mithag lanin’ug. Nggu weliy e tin ke kireban’ug ngay.” (Job 1:2, 18, 19; 10:1, New World Translation) Kad guyed u roy nib t’uf ni nge dabi “mithag” Job laniyan’. Uw rogon? I yog ni gaar: “Nggu weliy.”

Paulo ni ke yim’ e chitiningin e gaar: “Reb e n’en ni ke ayuwegeg e gu ma weliy murung’agen e chitinag.” Ere faanra ngam weliy ngak e fager rom e magawon rom ma ra baudnag e kireban’ rom. (Proverbs 17:17) Tomren ni ke yim’ chitiningin Yone, me wenig ngak pi walagen u lan e ulung ni ngaur bad ra guyed ni boor yay. Ke yib ngan’ ni “Numon e ra warnag e kireban’.” Maku arrogon gur nra mom ngom ni ngam k’adan’um nfaanra mu weliy lanin’um ngak be’.

Ngan yoloy ban’en e ku rayog ni nge chuweg boch e kireban’. Boch e girdi’ nib mo’maw’ ngorad ni ngar weliyed lanin’rad e sana ra mom boch ngorad ni ngar yoloyed nga but’ e n’en ni bay u lanin’rad. Tomren ni ke yim’ Saul nge Jonathan, ma David ni be’ nib yul’yul’ e ke yoloy ba tang nib kireban’ me weliy e kireban’ rok nib gel riy. Munmun ma re tang ney e ke mang bang ko fare babyor u Bible ni Bin L’agruw e Samuel.​—2 Samuel 1:17–27.

Meyor e ku rayog ni nge chuweg e kireban’. Ya be yog e Bible ni gaar, “Urngin ban’en ma bay ngal’an, ni ki mus nga ngal’an e . . . meyor.” (Eklesiastes 3:1, 4, NW) Ba mudugil ni nap’an nra yim’ be’ nib t’uf rodad ma ngad ‘yorgad.’ Ngan yor e gathi ban’en ni ngan tamra’ ngay. Bible e be weliy ni boor e girdi’ nib yul’yul’ ni ur yorgad ni boor yay. (Genesis 23:2; 2 Samuel 1:11, 12) I “yor Jesus” u nap’an ni ke chuchugur ngak Lazarus ni kafini yim’ ndawori n’uw nap’an.​—John 11:33, 35.

Ra ngan maruweliy ni nge chuw e kireban’ mab t’uf e gum’an’, ya bochan ni ma yib ngan’um fare magawon ni gubin ngiyal’. Dab mu pagtalin ni dariy fan ni ngam tamra’ ni bochan ni ga be yor. Boor e girdi’ nib yul’yul’ e kar pirieged ni ngan yor ni bochan e kireban’ e aram e n’en ni ma rin’ e girdi’ me ayuwegey nge baud lanin’uy.

Ngam Chugur Ngak Got

Be gaar e Bible: “Mu chugurgad ngak Got, me chugur ngomed.” (James 4:8) Reb e kanawo’ nrib fel’ rogon ni ngad chugurgad ngak Got riy e daken e meybil. Dab mu lemnag ndariy fan e meybil! Bible e ke micheg ni gaar: “I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.” (Psalm 34:18) Miki micheg ngodad ni gaar: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra yoyowolgad.” (Psalm 55:22, NW) Mu lemnag e re n’ey. Kad weliyed faram ni boor e girdi’ ni kar nonad ngak e fager rorad mab ga’ angin ko magawon rorad. Ere gur gathi kab ga’ angin nfaanra ngam weliy e magawon rom ngak Got ni ke micheg nra fal’eg lanin’dad?​—2 Thessalonika 2:16, 17.

Paulo, ni kan weliy murung’agen faram e yog ni gaar: “Ngiyal’ ni ndabkiyog ni nggu k’adan’ ko kireban’ mug ragbug nga but’ nggu meybil ku Got. Nggu wenig ngak ni nge ayuwegeg.” Kari mich u wan’ Paulo nri ma yib angin e meybil ni ma tay. Maku rayog ni ngam pirieg ni bochan e meybil nib gel ni kam tay, ma “Got ni urngin mit e ayuw me ir e be yib rok ngodad” e ra pi’ e athamgil nga lanin’um nge yog nim k’adan’um riy.​—2 Korinth 1:3, 4; Roma 12:12.

Fare Athap ko Fas ko Yam’

I gaar Jesus: “I gag owchen e fos ko yam’ nge yafos. Yigu ra ke yim’ be’ ni gub mich u wan’ ma ra fos.” (John 11:25) Bible e be fil ni yam’ e ra fas bayay.a Nap’an ni immoy Jesus u fayleng, me dag ni bay gelngin ni nge faseg e yam’. Immoy ba ngiyal’ ni i faseg reb e buliyel ni 12 e duw rok. Mang e ke rin’ e gallabthir rok? Kar ‘gingow ngak ni ke balyangan’row.’ (Mark 5:42) Nap’an e gagiyeg rok Jesus Kristus ma ra faseg boor e girdi’ ni ke yim’ u roy u fayleng, machane ke gapas ma ke fel’ rogon gubin ban’en. (Acts 24:15; 2 Peter 3:13) Mu susunnag feni gel e felfelan’ u nap’an ni yira faseg e piin ni kar m’ad mar chaggad bayay ngak e girdi’ nib t’uf rorad!

Renato ni fak Claudete e yim’ u nap’an ni kireb nge pil e sikoki ni bay riy. Me tay Claudete e sasing rok Renato nga dow e ice box rok. Ma sap ko re sasing nem ma ma gaar u laniyan’, ‘Gadow ra mada’ bayay, u nap’an e fas ko yam.’ Ma susunnag Leonardo e chitamangin ni ke fas ko yam’ ko bin nib beech e fayleng ni ke micheg Got. Arrogon, athap ko fas ko yam’ e riyul’ ni ireray e n’en nra fal’eg lanin’rad nge boch e girdi’ ni ke yim’ be’ nib t’uf rorad. Maku rayog ni nge fal’eg e re n’ey lanin’um!

[Footnote]

[Picture on page 4, 5]

Ke micheg Jesus e fas ko yam’ ngak e piin ni yad be dag ko ngongol rorad ni ke michan’rad ngak