Ke Mo’maw’ e Par e Chiney

KE YIIYNAG e Bible nra “mo’maw’” e par ko girdi’. Ke yog e “tin tomren e rran” ko pi rran ney. (2 Timothy 3:1-5; 2 Peter 3:3-7) Ku aray e re ngiyal’ i n’en ni weliy Jesus murung’agen ngak pi gachalpen u nap’an nra fithed ba deer ngak u murung’agen “tomren e re m’ag ney.” (Matthew 24:3, New World Translation) Gur, gad be par ko tin tomren e rran? Mu taarebrogonnag e n’en ni ke yiiynag e Bible ko pi thin ni beer nga but’, me mang gur e mu dugliy.

N’en ni ke yiiynag e Bible e: cham u ga’ngin yang e fayleng​—Luke 21:10; Revelation 6:4.

N’en ni ke yog e report ndawori n’uw nap’an e: “Girdi’ ni ke yim’ ni bochan e mahl ko bin 20 e chibog e ke mun daken ni dalip yay nga urngin e piin ni ur m’ad ko pi chibog ni ke yan nge ni mada’ ko ngiyal’ nni gargeleg Kristus riy.”​—Worldwatch Institute.

N’en ni ke yiiynag e Bible e: uyungol nge m’ar​—Luke 21:11; Revelation 6:5-8.

N’en ni ke yog e report ndawori n’uw nap’an e: Nap’an e duw ni 2004 ma sogonap’an 863 milyon e girdi’ u fayleng e be m’ar ni bochan e mak’iy, ni ke mun 7 e milyon ngay ko duw ni 2003.​—United Nations Food and Agriculture Organization.

Ba chugur nga reb e bilyon e girdi’ nib kirkireb e gin ni yad ma par riy, ma 2.6 bilyon e dariy e kolosis ara tafenedow rorad nib fel’ rogon; ma 1.1 bilyon e girdi’ e dariy e ran nib beech ni ngar unumed.​—Worldwatch Institute.

Keb e malaria nga 500 milyon e girdi’; ma 40 milyon e bay e HIV-AIDS rorad; ma 1.6 milyon e girdi’ e kar m’ad ko safrit ko duw ni 2005.​—World Health Organization.

N’en ni ke yiiynag e Bible e: fayleng ni yibe kirebnag​—Revelation 11:18.

N’en ni ke yog e report ndawori n’uw nap’an e: “Dabki n’uw nap’an ma boor mit e gamanman nge woldug ni bayi math mit ni bochan e n’en ni be rin’ e girdi’.” “Ba dake l’agruw guruy u dalip guruy e pi n’en ni immoy ni ma pi’ e ayuw ko girdi’ ni bod e gek’iy nge gamanman e kan pirieg ni be m’ay i yan.”​—Millennium Ecosystem Assesment.

“Ba mit e gas (green house gas) ni be ngongliy e girdi’ e ke chugurnag e yafang ko Fayleng i yan ko riya’ nra kirebnag e fayleng.”​—NASA, Goddard Institute for Space Studies.

N’en ni ke yiiynag e Bible e: fare thin nib fel’ ni murung’agen Gil’ilungun Got ni yira machibnag u ga’ngin e fayleng​—Matthew 24:14; Revelation 14:6, 7.

N’en ni ke yog e report ndawori n’uw nap’an e: Nap’an e duw ni 2007, ma 6,957,854 e Pi Mich Rok Jehovah ni kar machibniged fare thin nib fel’ ni murung’agen Gil’ilungun Got ni 1.4 billion e awa u lan 236 e nam.​—2008 Yearbook of Jehovah’s Witnesses (Tin ni Ke Rin’ e Pi Mich Rok Jehovah ko Duw ni 2008).

Rogon ni kad weliyed faram, e ke yiiynag e Bible ni yugu aram rogon ni boor ban’en nib kireb ni gad be rung’ag ni be buch, machane bay fan ni ngad athapeged e tin ni bay boch nga m’on. I weliy Jesus murung’agen fare “thin nib fel’” ko Gil’ilungun Got. Mange Gil’ilungun Got? Uw rogon nib peth ko athap ko girdi’ boch nga m’on? Ma uw rogon nra rin’ Gil’ilungun Got ban’en ngom?

[Blurb on page 3]

Ke yiiynag e Bible e pi n’en ni gad be guy ni be buch u fayleng e chiney