Dabki N’uw Nap’an Me Paradis e Fayleng!

“Chitamangimad ni ga bay u tharmiy, ngan thothupnag fithingam, meb gil’ilungum ngomad, min rin’ e tin nib m’agan’um ngay u roy u fayleng ni bod rogon u tharmiy.”​—Matthew 6:9, 10, The Jerusalem Bible.

RE MEYBIL ney ni goo yimanang, ma boor e girdi’ ni ma yog e Chitamangimad ara Meybil rok Somol ngay, e be pi’ e athap ko girdi’. Uw rogon?

Re meybil rok Somol ney e be dag, ni Gil’ilungun Got e ra lebguy e tin nib m’agan’ ngay u roy u fayleng ni bod rogon ni be buch u tharmiy. Mab m’agan’ Got ngay ni nge Paradis e fayleng. (Revelation 21:1-5) Be mang Gil’ilungun Got, ma uw rogon nra Paradisnag e fayleng?

Ba Am nib Riyul’

Gil’ilungun Got e ba am nib riyul’. Faanra nge maruwel reb e am mab t’uf e pilung riy, nge motochiyel, nge piin ni ngar pared u tan e gagiyeg riy. Gur bay e pi n’em ko Gil’ilungun Got? Mu lemnag e fulweg ko Bible ko dalip i deer ni baaray:

Mini’ e piin ni yad ra gagiyeg u tan Gil’ilungun Got? (Isaiah 33:22) Ke dugliy Jehovah fak ni Jesus Kristus ni nge mang pilung ko re Gil’ilungun nem. (Matthew 28:18) Bay urngin e girdi’ ni kar bad u “urngin e ganong, nge thin, nge gubin mit e girdi’, nge nam” ni ke mel’egrad Jesus ni ngar gagiyeggad nrogon nib puluw ko yaram rok Jehovah.​—Revelation 5:9, 10.

Mange pi motochiyel ni fan ko piin ni ngar pired u tan Gil’ilungun Got? Boch e pi motochiyel nem e be yog boch ban’en nib t’uf ni ngan rin’. I tamilangnag Jesus e bin th’abi ga’ fan ko pi motochiyel nem ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom. Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku baga’ fan e bod e biney ni gaar, Gin’en ni ga ba’ riy e thingari t’uf rom e en ni ir e mmigid ngom ni gowe gur.”​—Matthew 22:37-39.

Boch e pi motochiyel nem e be yog ni girdi’ ni bay u tan gil’ilungun Got e thingara siyeged i rin’ boch ban’en. Bod ni be yog e Bible nib tamilang ni gaar: “Dab mu bannagged gimed! Ya dariy be’ ni ma un ko ngongol ni darngal ara be’ ni ma liyor ko liyos ara be’ nde yul’yul’ ko ani mabgol rok ara be’ ni ma un ko ngongol nde yalen ara pumoon ni ma darngalnag e pumoon e rayog ni nge un ko Gil’ilungun. Maku arrogon e girdi’ ni moro’ro’ ara tachingaw ara be’ ni ma yaba’ ma ma bannag e girdi’.”​—1 Korinth 6:9, 10, Contemporary English Version.

Mini’ e piin ni yad ra par u tan Gil’ilungun Gote? I taarebrogonnag Jesus e piin ni yad ra par u tan Gil’ilungun Got ko saf. I gaar: “Bay ra metelgad nga lungug, mi yad peth ko tiney ngar pired mi yad taab ran’ i saf ma taabe’ e be gafaliyrad.” (John 10:16) Ra baadag be’ ni nge par u tan Gil’ilungun Got ma gathi kemus ni nge yog ni be fol ko fare Ta Chugol Saf nib Fel’ ni Jesus ya ngki rin’ e tin ni ke motochiyelnag ni ngan rin’. I gaar Jesus: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay.”​—Matthew 7:21.

Ere piin ni yad ra par u tan Gil’ilungun Got e yad ma fanay ma yad ma tayfan fithingan Got, ni Jehovah, ni bod ni i rin’ Jesus. (John 17:26) Yad be fol ko motochiyel rok Jesus ni ngan fil fare ‘thin rok Got nib fel’ ni murung’agen e gagiyeg rok’ ngak e girdi’. (Matthew 24:14; 28:19, 20) Ma ri yad ma dag e t’ufeg nib riyul’ ngorad.​—John 13:35.

Ra “Kirebnag e Piin ni Kar Kirebniged e Fayleng”

Pi n’en ni be buch u fayleng e ngiyal’ ney e be micheg ndabki n’uw nap’an ma ra thilyeg Gil’ilungun Got boch ban’en u roy u fayleng. Uw rogon ni kad nanged e re n’em? L’agruw biyu’ e duw ni ke yan ni weliy Jesus murung’agen ba pow nra micheg ni “gagiyeg rok Got e ke chugur ni nge taw.” (Luke 21:31) Rogon ni kan dag ko fare article ni ke yan, e yu yang ko re pow nem e ke gagiyel u ga’ngin e fayleng.

Mang e migid nra buch? Ke fulweg Jesus ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matthew 24:21) Gathi girdi’ e ra yibnag e biney e gafgow. Ya Got e ra “kirebnag e piin ni kar kirebniged e fayleng.” (Revelation 11:18) Girdi’ nib kireb, ni ngongol rorad nib kireb e ke chugur ni nge kirebnag e fayleng ni polo’, e ‘bay ni chuwegrad.’ Machane girdi’ nib mat’aw ni ma pigpig ku Got u fithik’ e yul’yul’ e “yad ra par” u fayleng.​—Proverbs 2:21, 22.

Ri bay rogon ni nge rin’ Jehovah e re n’em. Mang fan? Mu lemnag e re fanathin ni baaray: Susuna bay e naun rom ni ga ma pi’ ko girdi’ ngaur pared riy ma yad be pi’ puluwon. Boch i yad e ba manigil, ya yad ma pi’ puluwon e naun ma yad ma ayuweg. Machane, boch i yad e ba kireb ya yad ma pi’ e magawon ma dubrad ni ngar pied puluwon e naun ma yad ma kirebnag boch ban’en riy. Ke yoor yay ni kan ginangrad ma ka yad be rin’ e pi kireb ney. Mang e ga rin’? Ba mutrug ni ga ra tulufrad ngar chuwgad.

Ere, Jehovah Got ni ir e ke Sunmiy e fayleng nge urngin ban’en riy e bay mat’awun ni nge turguy e en nra par riy. (Revelation 4:11) Ke yog Jehovah nra chuweg e piin nib kireb ko re fayleng ney ni piin ni yad be darifannag e tin nib m’agan’ ngay ma yad be magawonnag mat’awun boch e girdi’.​—Psalm 37:9-11.

Paradis e Yira Sulweg nga Rogon

Dabki n’uw nap’an ma Gil’ilungun Got ni Jesus Kristus e pilung riy e ra gagiyegnag e fayleng. I yog Jesus e re n’ey ni “gubin ban’en ni kan beechnag.” (Matthew 19:28, New International Version) Ra uw rogon e fayleng e ngiyal’ nem? Mu guy e pi n’en ni baaray ni ke micheg e Bible:

Psalm 46:9. “Be taleg e pi mahl ni yibe tay u fayleng i yan.”

Isaiah 35:1. “Bayi felfelan’ e ted . . . , ma floras e bay i puf ko yungi binaw ni kan pag.”

Isaiah 65:21-23. “Pi n’en ni kar muruwliyed e ri bayi fel’ rogorad riy. Ma maruwel ni bay ur ngongliyed e bay yan i aw nib fel’, ma fakrad e dab ki yib e riya’ ngorad nib tomgin.”

John 5:28, 29. “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman [Jesus] mi yad yib u lan e low rorad nga wuru’.”

Revelation 21:4. “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.”

Fan ni Nge Mich u Wan’uy e Pi N’ey

Ba mich e tin ni ke micheg e Bible u wan’um, fa? Ke yiiynag e Bible ni boor e girdi’ ndabi mich u wan’. Be gaar: “Tin tomur e rran e bay yib i m’ug boch e girdi’ riy ni . . . ur moninggad ngomed ni be lungurad, ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney.’” (2 Peter 3:3, 4) Machane rib oloboch e pi cha’ney. Mu lemnag aningeg i fan ni nge mich u wan’um e n’en ni be yog e Bible:

(1) I gechignag Got e piin nib kireb kakrom. Fare Ran ni Tharey e Fayleng u nap’an Noah e ir e mich riy.​—2 Peter 3:5-7.

(2) Rib puluw e n’en ni ke m’ug ko Thin rok Got kakrom nga rarogon e fayleng ni ga’ngin e ngiyal’ ney.

(3) Gathi ka rogon urngin ban’en ni “ka nap’an e ngiyal’ ni sum e fayleng riy ke mada’ ko chiney.” Ke gel e kireb ko par nge ngongol ko girdi’ riy nge pi n’en u toobey i yan.

(4) Fare ‘thin nib fel’’ e yibe machibnag u ga’ngin e fayleng ni be dag ni ke chugur “tomuren” e re m’ag ney.​—Matthew 24:14.

Pi Mich Rok Jehovah e yad be piningem ni ngam filed e Thin rok Got ni fare Bible u taabang, nge yog ni ga’ e tamilangan’ rom u murung’agen e athap ko yafas ni manemus u tan Gil’ilungun Got. (John 17:3) Arrogon, bay ban’en nrib fel’ boch nga m’on ni fan ngak gubin e girdi’. Kari chuchugur ni nge lebug e re n’ey! Gur ra yog e pi flaab ney ngom?

Blurb on page 5]

Girdi’ ni be yog ndabi thil urngin ban’en e ri yad be oloboch

[Picture on page 6]

Gur ra yog e pi flaab ney ngom?