Nge Fel’ u Wan’um e Liw rok Jesus ni Yugub Thil Mab L’ag ko Tin nib M’agan’ Got Ngay
“I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.”—JOHN 14:6.
1, 2. Mang ni liw rok Jesus ni yugub thil ni bay rogon ko tin nib m’agan’ Got ngay e ba ga’ fan ni ngad guyed?
KAB KAKROM i yib ni boor e girdi’ ni yad ma athamgil ni nge m’ug ni yad ba thil ko yugu girdi’ u toobrad i yan machane ba ga’ ni der yib angin. Rib buchuuw e girdi’ e bay tapgin ni nga rogned nri yad ba thil rok boch e girdi’. Machane, Jesus Kristus ni Fak Got e boor e kanawo’ nrib thil riy ko yugu girdi’.
2 Mang fan nib ga’ fan u wan’dad e liw rok Jesus ni yugub thil? Bochan ni tha’ rodad ngak Jehovah ni Chitamangidad nu tharmiy e ba l’ag rogon ngay! I gaar Jesus: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6; 17:3) Ngad guyed boch e kanawo’ nib thil Jesus riy ngak boch e girdi’. Gad ra rin’ ni aram rogon ma ra ayuwegdad ngari ga’ fan u wan’dad e liw rok ni bay rogon ko tin nib m’agan’ Got ngay.
‘Fak Got ni Kari Maagirag Rok’
3, 4. (a) Mang fan nrayog ni nga dogned ni yugub thil e maruwel rok Jesus ni Fak Got nri maagirag rok? (b) Uw rogon ni yugub thil e maruwel rok Jesus u nap’an ni yibe sunmiy urngin ban’en?
3 Jesus e gathi kemus ni “Fak Got.” Aram rogon ni yog Satan u nap’an ni i waliy Jesus ko kireb. (Matt. 4:3, 6) Kan pining Jesus ni Fak Got ni “kari maagirag rok.” (John 3:16, 18) Fare bugithin ni Greek ni kan piliyeg ni “kari maagirag” e fan e “goo ir ngab mit, kemus ni goo ir,” ara “ba thil.” Jehovah e bokum milyon e engel nib pi fak. Ere uw rogon me aw ni Jesus e “goo ir ngab mit”?
4 Ke mus ni Jesus e goo Chitamangin e sunmiy nga pa’ ere ba thil ko urngin e piin ni kan sunmiyrad. Ir Fak Got ni bin nganni. Riyul’ riy e “ir e bin ni m’on i Fak.” (Kol. 1:15) Ir e “tabolngin urngin ban’en ni sunumeg Got.” (Rev. 3:14) Maruwel ko en nganni i Fak Got u nap’an ni kan sunmiy urngin ban’en e kub thil. Gathi ir e En Ta Sunmiy. Machane i fanay Jehovah Jesus nge sunmiy urngin ban’en. (Mu beeg e John 1:3.) Yoloy apostal Paul ni gaar: “Gadad e ri taareb e Got rodad ni ba’, ni ir e Chitamangiy, me ir e sunumiy urngin ban’en, me ir e gadad be par ni fan ngak; ma taareb e Somol ni ba’, ni aram Jesus Kristus, ni pa’ e sunumiy Got urngin ban’en ngay, me ir e be ta’dad ni gadad ba fos.”—1 Kor. 8:6.
5. Uw rogon ni be tamilangnag e Bible nib thil Jesus ko urngin e piin ni kan sunmiyrad?
5 Boor e kanawo’ nib thil Jesus riy ngak urngin e piin ni kan sunmiyrad. Be yog e Bible ni boor e liw rok Jesus ni be dag ni kan pi’ e maruwel ngak nyugub thil ni bay rogon ko tin nib m’agan’ Got ngay. Ngad guyed lal e liw rok Jesus nrogon ni bay ko Pi Babyor u Bible ni Greek.a
“Fare Thin”
6. Mang fan nib puluw ni kan pining “fare Thin rok Got” ngak Jesus”?
6 Mu beeg e John 1:14. Mang fan ni kan pining ‘fare Thin’ ngak Jesus? Re liw ney e be dag e maruwel ni ke rin’ u nap’an ni kan sunmiy e pi engel nge girdi’. I fanay Jehovah Fak ni nge wereg e thin rok ngak boch e engel, ni bod ni fanay Got Fak ni nge wereg e thin rok ngak e girdi’ u roy u fayleng. N’en ni yog Jesus ngak piyu Jew e be dag ni ir fare Thin ara En Ta Yog e Thin rok Got ni gaar: “N’en ni gu be machibnag e gathi gag e yib rog, yi yib rok Got, ni ir e ke l’ugeg ku gub. En nib m’agan’ ngay ni nge rin’ e tin ni ba adag Got e ra nang ko tin ni gu be machibnag e yib rok Got ara gu be weliy ni gag e thin rog.” (John 7:16, 17) Fare liw rok Jesus ni “Fare Thin rok Got” e i fanay ngki mada’ ko ngiyal’ ni ke sul nga tharmiy.—Rev. 19:11, 13, 16.
7. Uw rogon ni ngan folwok rok Jesus u rogon e sobut’an’ u nap’an ni be maruwel ko liw rok ni “fare Thin”?
7 Mu lemnag ko mang e be yip’ fan e re liw rok ney. Yugu aram rogon ni Jesus e bin th’abi gonop u fithik’ urngin e piin ni ke sunmiy Jehovah, ma der ma taga’ ko gonop rok. Ma non ni be fol ko thin ni ke yog e Chitamangin. Gubin ngiyal’ ni ma pining e sorok ngak Jehovah ma gathi ir e ma pining e sorok ngak. (John 12:50) Rib fel’ ni ngad folwokgad rok! Gadad e ku kan pi’ e maruwel ngodad nib fel’ ni ngad “feked i yib e Thin Nib Fel’ ni yib rok Got.” (Rom. 10:15) Gad ra nang rogon ni dag Jesus e sobut’an’ ma ra k’aringdad ngad paged i machibnag e thin ni gad e thin rodad. Gad ra wereg e Thin nu Bible ni ra ayuweg e yafas, ma thingarda “folgad ko pi motochiyel nib fel’.”—1 Kor. 4:6.
“Fare Amen”
8, 9. (a) Mang fan fare bugithin ni “amen” ma mang fan ni yima yog “fare Amen” ngak Jesus? (b) Uw rogon ni ke lebguy Jesus e liw rok ni “fare Amen”?
8 Mu beeg e Revelation 3:14. Mang fan ni kan pining “fare Amen” ngak Jesus? Fare bugithin ni “amen” ko thin ni Hebrew e be yip’ fan ni “arrogon.” Fare thin ni Hebrew ni ir i sum riy e be yip’ fan ni “ngan yul’yul’” ara “ma pagan’uy ngay.” Re thin ney e kun fanay ni nge weliy murung’agen e yul’yul’ rok Jehovah. (Deut. 7:9; Isa. 49:7) Ere, uw rogon nib thil Jesus u nap’an ni kan pining “fare Amen” ngak? Mu guy u rogon ni ke fulweg e 2 Korinth 1:19, 20 ni gaar: ‘Jesus Kristus, ni Fak Got, ni ir e kan machibnag . . . , murung’agen ngomed e gathi be’ ni ir e ‘Ke fel’’ nge Danga’. Gathi er rogon, yi ir e ‘Ke fel’’ rok Got; ya ir e aram e ‘Ke fel’’ rok Got ngak urngin ban’en ni yog Got ni bay rin’ ngak e girdi’. Ereray fan nu daken Jesus Kristus e ka dogned e ‘Amen’ rodad riy, ni aram e gadad be ta’ fan Got.’
9 Jesus e ir “fare Amen” ko urngin ban’en ni ke micheg Got. Yafas rok nib flont u fayleng, nib muun ngay e yam’ ni tay, e ke bing e kanawo’ ni nge lebug urngin ban’en ni ke micheg Jehovah Got. Bochan ni par Jesus nib yul’yul’, ma ke dag nde riyul’ e n’en ni yog Satan ni bay ko fare babyor rok Job, nra yib e gafgow nge skeng ngak e pi tapigpig rok Got ma yad ra pag Got. (Job 1:6-12; 2:2-7) U fithik’ urngin e piin ni ke sunumiy Got, ma Fak ni bin nganni e rayog ni nge pi’ e fulweg nrib tamilang ko thin ni yog Satan. Maku reb, e kari micheg Jesus ni be ayuweg e Chitamangin ko deer ni ke sum ni bay rogon nga mat’awun Jehovah ni ir e pilung u palpalth’ib nth’abi tolang.
10. Uw rogon ni ngan folwok rok Jesus u rogon ni be lebguy e liw rok nyugub thil ni “fare Amen”?
10 Uw rogon ni ngada folwokgad rok Jesus rogon ni lebguy fare liw rok ni yugub thil ni “fare Amen”? Ngad pared ni gad ba yul’yul’ ngak Jehovah ma ngad ngongolgad ko kanawo’ nra tamilangnag ni ir e th’abi tolang u palpalth’ib. Gad ra rin’ ni aram rogon, ma ri gad be fol ko thin rok ni bay ko Proverbs 27:11 ni gaar: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.”
“Ir e Ta Maaf ko fare M’ag nib Beech”
11, 12. Uw rogon ma liw rok Jesus ni Ta Maaf e yugub thil?
11 Mu beeg e 1 Timothy 2:5, 6. Jesus e ir e “ma chagiy Got nge girdi’ nga taabang.” I ir e “ta maaf ko fare m’ag nib beech.” (Heb. 9:15, NW; 12:24) Machane, ku yima yog ni Moses e ir e ta maaf ko fare m’ag ko Motochiyel. (Gal. 3:19) Ere, uw rogon ma liw rok Jesus ni Ta Maaf e yugub thil?
12 Fare thin ni Hebrew ni kan piliyeg ni “ta maaf” e bay rogon ko motochiyel. Re n’ey e be yip’ fan ni Jesus e ir e Ta Maaf ko fare m’ag nib beech nib puluw ko motochiyel ma re n’em e ke ayuweg nge sum fare nam nib beech, ni aram “fare Israel rok Got.” (Gal. 6:16) Piin ni yad bang ko re nam ney e Kristiano ni kan dugliyrad, ni aram e “pi prist rok e en ni Pilung.” (1 Pet. 2:9; Ex. 19:6) Fare m’ag ko Motochiyel ni Moses e ta maaf riy e de yog ni nge sunmiy ban’en ni aram rogon.
13. Mang e rayog ni nge rin’ e liw rok Jesus ni Ta Maaf?
13 Fare maruwel rok Jesus ni Ta Maaf e ba muun ngay e mang? Ma fanay Jehovah puluwon e racha’ rok Jesus ni fan ngak e piin ni yad bang ko fare m’ag nib beech. Bochan e re n’ey, ma kar manged e piin nib mat’aw u wan’ Jehovah. (Rom. 3:24; Heb. 9:15) Arfan nrayog ni nge sap Got ngorad ni bay rogorad ni ngar manged bang ko fare m’ag nib beech ngar manged pilung nge prist u tharmiy! Jesus ni ir e Ta Maaf u thilrad Got, e ra ayuwegrad ngaur pared ni yad ba klin u p’eowchen Got.—Heb. 2:16.
14. Mang fan ni urngin e Kristiano ndemtrug ko mang e athap rorad e thingara ted fan fare liw rok Jesus ni Ta Maaf?
14 Ma uw rogon e piin ni gathi yad bang ko fare m’ag nib beech, ma athap rorad e yad ra par u roy u fayleng ndariy n’umngin nap’an? Yugu aram rogon ni gathi yad bang ko fare m’ag nib beech, machane ra fel’ rogorad riy. Ke n’ag Got fan e denen rorad ma ke matheeg ngorad ni kar manged e girdi’ nib mat’aw ma kar manged fager rok. (Jas. 2:23; 1 John 2:1, 2) Demtrug ko athap rodad e gad ra yan nga tharmiy ara gad ra par u roy u fayleng, ma bay tapgin nib fel’ ni ngarda ted fan e liw rok Jesus ni ir fare Ta Maaf ko fare m’ag nib beech.
“Prist nib Tolang”
15. Uw rogon ma liw rok Jesus ni Prist nib Tolang e ba thil ko boch e girdi’ ni kar manged ni prist nib tolang?
15 Boor e girdi’ kakrom ni kar manged prist nib tolang, machane liw rok Jesus ni Prist nib Tolang e yugub thil. Uw rogon? I weliy Paul ni gaar: “I ir e gathi bod yugu boch e prist nib th’abi tolang; ya dariy fan ni nge pi’ e maligach ni gubin e rran, ni bod rogon urngin e prist ni bin som’on e maligach ni yad ma pi’ e fan ko denen rorad, ma bin migid e fan ko denen rok e girdi’. Ri taareb e maligach ni pi’ Jesus, ni aram e kemus e maligach. . . . Fare Motochiyel rok Moses e i turguy e girdi’ ni bogi girdi’ ndar yal’uwgad ngar manged e pi prist nib th’abi tolang; machane thin ni yog Got ni micheg nga fithingan ni yib nib tomur ko fare Motochiyel rok Moses, e ir e turguy e en ni Fak Got, ni ir e kan ngongliy rogon ni bay i par nib yal’uw ndariy n’umngin nap’an.”—Heb. 7:27, 28.b
16. Mang fan nriyul’ nib thil e maligach rok Jesus?
16 Jesus e ba flont ma taareb rogorow Adam u nap’an ni dawori denen Adam. (1 Kor. 15:45) Ere, Jesus e kemus ni ir e rayog ni nge pi’ e maligach nib flont ma de t’uf ni ngkun pi’ bayay. U nap’an fare Motochiyel ni kan pi’ u daken Moses e yima pi’ e maligach ni gubin e rran. Urngin e pi maligach nem nge tin ni ma rin’ e pi prist e kemus ni be dag yaan e n’en ni bayi rin’ Jesus. (Heb. 8:5; 10:1) Ere bochan ni ka boor ban’en nrayog ni nge rin’ Jesus ndabiyog ni rin’ boch e prist nib tolang ma aram e ra par nib prist ni manemus, e be m’ug ni liw rok ni Prist nib Tolang e yugub thil.
17. Mang fan ni ngari fel’ u wan’dad e liw rok Jesus nib Prist ni Th’abi Tolang, ma uw rogon ni ngad rin’ed e re n’ey?
17 Ba t’uf rodad e ayuw rok Jesus ni Prist ni Th’abi Tolang ni nge fel’ thildad Got. Ere rib fel’ e Prist rodad ni Th’abi Tolang! Yoloy Paul ni gaar: “Re prist rodad nem nib th’abi tolang e gathi reb e prist ndabi kireban’ ngodad nga fadad meewar. Ya re prist rodad nem nib th’abi tolang e yib ngak urngin kanawoen e pi n’en ni ma waliy e girdi’ nge denen ni bod gadad, machane de denen.” (Heb. 4:15) Riyul’ nfaanra fel’ e re n’ey u wan’dad ma thingari k’aringdad ni ‘ngad ngongolgad ni gad be yan ngan’ faanem ni ir e ke yim’ ni fan ngodad.’—2 Kor. 5:14, 15; Luke 9:23.
Faen “Fak” ni Kan Yiiynag
18. Mang e yiiy e ka nog u tomren ni ke denen Adam, ma mang e kan dag u murung’agen e re yiiy ney?
18 U Eden, u nap’an ni m’ug ni girdi’ e ke mul urngin ban’en u pa’rad ni bod e tha’ u thilrad Got, nge yafas ni manemus, felfelan’, nge Paradis me yog Jehovah ni bay yib be’ ni Ra Chuwegey ko Gafgow. Be weliy e Bible murung’agen e cha’ n’ey ni faen “fak.” (Gen. 3:15) En Fak n’ey nib mith e ke mang kenggin e yiiy u Bible ni kab kakrom i yib. Thingari yib ko tabinaw rok Abraham, Isak, nge Jakob. Maku ra yib ko tabinaw rok David ni Pilung.—Gen. 21:12; 22:16-18; 28:14; 2 Sam. 7:12-16.
19, 20. (a) Mini’ fare fak ni kan micheg? (b) Ma mang fan nrayog ni nga nog ni fare fak ni kan micheg e gathi goo Jesus?
19 Mini’ faen Fak ni kan micheg? Fulweg ko re deer ney e bay ko Galatia 3:16. (Mu beeg.) Machane, bang ko tomur ko re guruy nem, e yog apostal Paul ngak e pi Kristiano ni kan dugliyrad ni gaar: “Faanra ke mil suwmed ngak Kristus, me ere kam manged pi owchen Abraham, ni aram e bay yog ngomed e tin ni ognag Got nra pi’.” (Gal. 3:29) Uw rogon me Kristus e ir faen Fak ni kan micheg, machane ku bay boch e girdi’ ni kub muun ngak?
20 Bokum milyon e girdi’ e ma yog ni yad pifak Abraham, ma boch i yad e yad be ngongol ni bod e profet. Boch e teliw e yad be uf ko profet rorad ni kar sumgad rok Abraham. Machane gur yad urngin ni yad bang ko fare n’en ni ka nog e faen Fak ngay ni kan micheg? Danga’. Rogon e n’en ni ke weliy apostal Paul ni kan thagthagnag e gathi urngin pifak Abraham e rayog ni nge yog ni ir faen Fak ni kan micheg. Boch i fak Abraham ni pumoon e dan fanayrad ni ngar flaabnagged e girdi’. Fare fak ni ra flaabnag e kemus ni u daken Isak. (Heb. 11:18) Kemus ni taa be’ i Jesus Kristus nrogon ni yog e Bible e yib u tabinaw rok Abraham.c Urngin e girdi’ ni munmun e kar manged piin ni kan dugliyrad e bod ni kar manged pi fak Abraham ya bochan ni ‘ke mil suwrad ngak Kristus.’ Arrogon, maruwel rok Jesus ni nge lebguy e re yiiy ney e rib thil.
21. Mang e n’en ni ga baadag u rogon ni ke lebguy Jesus e liw rok ni yugub thil nib l’ag ko tin nib m’agan’ Jehovah ngay?
21 Mang e kad filed ya kad sulod nga daken e liw rok Jesus nib l’ag ko tin nib m’agan’ ngay? Ka nap’an e ngiyal’ ni kan sunmiy Fak Got ni kari maagirag rok, me par nrib thil ko urngin e piin ni kan sunmiy. Machane, i pigpig ku Got u fithik’ e sobut’an’ nrogon nib puluw ko tin nib m’agan’ e Chitamangin, ma de rin’ e re n’em ni nge pining e girdi’ e sorok ngak. (John 5:41; 8:50) Gadad e chiney e rib fel’ ni ngad folgad ko n’en ni ke rin’! Bod Jesus, manga yugu uda nameged ni ngad rin’ed urngin ban’en “ni fan e nga nog e sorok riy ngak Got.”—1 Kor. 10:31.
[Footnotes]
a Boch ko pi liw ney e kan yoloy ni bay bugithin ni Greek riy ni n’en ni be yip’ fan e ‘fare’ ko thin nu Waab. Rogon ni yog be’ nib llowan’ e re n’ey e “be yip’ fan, e ‘yugub thil.’”
b Rogon ni yog be’ ni boor e tamilangan’ rok ko Bible, e fare bugithin ni kan piliyeg “nri taab yay ma aram e ke mus” ni be weliy e machib nu Bible nib ga’ fan e “be yog feni mudugil, nge feni rib thil, nge ri taab yay ni nge yim’ Kristus.”
c Yugu aram rogon ni piyu Jew u nap’an e bin som’on e chibog C.E. e kar lemnaged ni yad e girdi’ nib flaab ya yad e pifak Abraham ma kar sonnaged be’ ni ngeb nge mang Kristus.—John 1:25; 7:41, 42; 8:39-41.
Ka Ga Manang?
• Mang e kam fil u murung’agen e liw rok Jesus ni yugub thil? (Mu guy fare kahol.)
• Uw rogon ni ngam folwok ko tin ke rin’ Fak Jehovah ni yugub thil?
[Box/Picture on page 27]
Liw rok Jesus ni Be Dag e Maruwel rok nib Thil ni Bay Rogon ko Tin nib M’agan’ Got Ngay
◼ Fak Got ni Kari Maagirag Rok. (John 1:3) Ke mus ni Jesus e ke sunmiy Chitamangin ndariy be’ ni be ayuweg.
◼ Fare Thin. (John 1:14) Ma fanay Jehovah Fak nge mang Ta yog e Thin rok nge yog e thin rok ngak boch e girdi’.
◼ Fare Amen. (Rev. 3:14) Yafas rok Jesus u fayleng nib flont, nib muun ngay e yam’ ni tay, e ke midugilnag miki ayuweg ni nge lebug e tin ni micheg Jehovah Got.
◼ Ir e Ta Maaf ko fare M’ag nib Beech. (1 Tim. 2:5, 6) Bochan ni Jesus e ir ma chagiy Got nge girdi’, ir e ke ayuweg ni nge sum fare nam nib beech, “fare Israel rok Got,” ni yad e Kristiano ni yad ra mang ‘pilung nge prist.’—Gal. 6:16; 1 Pet. 2:9.
◼ Fare Prist nib Tolang. (Heb. 7:27, 28) Kemus ni Jesus e ba girdi’ ni bay rogon ni nge pi’ ba maligach nib flont, ni aram e maligach ni kemus ni taab yay e ngan pi’. Rayog ni nge chuwegdad ko denen nge wenegan e denen.
◼ Fak fare Pin ni Kan Micheg. (Gen. 3:15) Kemus ni taabe’, ni Jesus Kristus, e bang ko n’en ni ka nog fak fare pin ni kan micheg. Piin ni ka ba’ ni munmun mar manged e gin l’agruw yang u owchen Abraham e ke mil suwrad ngak Kristus.’—Gal. 3:29.