Pi Flaab Ni Kab Fel’ U Daken E Bin Nib Biech E M’ag

“Jesus . . . e ir e maaf ko fare m’ag nib kab fel’ ko bin kakrom e m’ag.”​—HEBREWS 8:6.

1. Mini’ ‘owchen fare ppin’ ni kan weliy morngaagen u Eden, ma uw rogon ni kan ‘bechnag wurilen ay’?

TOMREN ni denen Adam nge Efa, me pufthinnag Jehovah Satan ni ir e en ni bannag Efa me gaar: “I gur nge fare pin e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif u ay.” (Genesis 3:15) Nap’an ni kan taufenag Jesus u lan e lul’ ni Jordan ko 29 C.E., ma aram ke m’ug fare Owchen ni kan micheg u Eden. Ke lebug bang ko re thin ko profet nem nkakrom u nap’an ni yim’ Jesus u daken fare ley i ren ko duw ni 33 C.E. Ke ‘k’ad Satan wurilen ay’ fare Owchen.

2. Rogon ni yog Jesus ma mang angin nra yib ko girdi’ ko yam’ nra tay?

² Bay e falfalan’ riy ya re maadad nem e yugu aram rogon nib gel e amith riy machane de mudugil. Ya kan faseg Jesus ko yam me mang ba kan ni ra par ndariy n’umngin nap’an me yan i par ko Chitamangin u tharmiy, ma aram me pi’ puluwon fare biyul’ ni rachaen ni ke map’ nga but’ me ‘biyuliy boor e girdi’ ngay.” Ere ke riyul’ e thin rok ni gaar: “Thingar nsuweg e en ni Fak e girdi’ nga lang, ni fan e nge urngin e girdi’ ni ra michan’rad ngak e nge yog e yafos ndariy n’umngin nap’an ngorad. Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (Matthew 20:28; John 3:14-16; Hebrews 9:12-14) Fa bin nib biech e m’ag e ba l’ag ko pi thin ni i yiiynag Jesus.

Fa Bin nib Biech e M’ag

3. Wuin ni ke m’ug ni ke tabab e bin nib biech e m’ag?

³ Boch u m’on ni yim’ Jesus, me weliy ko pi gachalpen ni rachaen ni bayi map’ nga but’ e ir “rachaen e [bin biech e] m’ag.” (Matthew 26:28; Luke 22:20) Ragag e rran u tomren ni ke yan nga tharmiy, ma ke maruwel e bin nib biech e m’ag u nap’an ni kan puog e kan ni thothup nga daken 120 gachalpen u lan e singgil ko thal ni lang e naun u Jerusalem. (Acts 1:15; 2:1-4) Kan uneg fa 120 i gachalpen ko fa bin nib biech e m’ag ma aram e be dag ni fa bin “kakrom” e m’ag ni aram fare m’ag ko Motochiyel e ke m’ay angin.​—Hebrews 8:13.

4. Fa bin kakrom e m’ag e de lubeg e n’en ni ke micheg fa? Mu weliy.

⁴ Ere dariy fan e bin kakrom e m’ag? Danga’. Rriyul’ ni kan tay ban’en nga luwan me ere piyu Israel e dakura pared ni yad girdien Got. (Matthew 23:38) Machane aram rogon ni bochan ni de fol yu Israel ku Got mar n’aged e An ni Dugliy Jehovah. (Exodus 19:5; Acts 2:22, 23) Machane u m’on ni kan chuweg fare Motochiyel ma boor ban’en ni ke lebuguy. U lan in e chibog aram kanawoen min thap ngak Got ma ke ayuweg e girdi’ ni ngar paloggad ko liyor ni googsur. Ma bay boch ban’en riy nib sor fan ko fa bin nib biech e m’ag ma pi maligach ni un pi’ ni gubin ngiyal’ u tan e re m’ag nem e ke tamilangnag nib t’uf ko girdi’ ni ngan biyuliyrad ko denen nge yam’. Rriyul’ ni fare Motochiyel e “sensey rodad nge yan i mada’ ko ngiyal’ ni yib Kristus riy.” (Galatia 3:19, 24; Roma 3:20; 4:15; 5:12; Hebrews 10:1, 2) Machane fa bin nib biech e m’ag e ir e ra yibnag e pi flaab ni kan micheg ngak Abraham nib mus rogon.

Kan Flaabnag e Pi Nam u Daken Owchen Abraham

5, 6. Mini’ fare Owchen Abraham u rogon nra lebug nib spiritual, ma bin ngan e nam e yad e som’on ni kan flaabnagrad ni bochan?

⁵ I micheg Jehovah ku Abraham ni gaar: “Ma urngin e nam nu fayleng ni bay ra flaabgad ni bochan owchem.” (Genesis 22:18) U tan e bin kakrom e m’ag ma boor e girdi’ nib sobut’an’rad ni yad e girdi’ nu bang ni kar flaabgad ni bochan ni kar uned ko piyu Israel, ni yad e piin ni owchen Abraham. Machane rogon nib sor fan ko tirok Got ban’en ni ra lebug, e fare Owchen Abraham e aram taabe’ nib flont. Weliy Paul e re n’ey faani gaar: “Ere Got e ognag ngak Abraham e tin ni nge pi’ ngak Abraham nge ngak be’ ni bay sum ni owchen Abraham. Ma de yog ni gaar, ‘nge ngak e piin ni bay ra sumgad ni owchen Abraham’ ni fan e re bugithin nem e boor e girdi’. Machane rogon ni yog e gaar, ‘nge ngak be’ ni bay sum ni owchen Abraham” ni fan e re bugithin nem e ke mus ntaabe’,’ ni aram Kristus.”​—Galatia 3:16.

⁶ Arrogon, Jesus e ir fare Owchen Abraham, ma pi nam e ra un ko flaab ni kab fel’ ko urngin e flaab ni kan pi’ ngak yu Israel u daken e re Owchen nem. Fa bin som’on e nam ni kan flaabnag e aram yu Israel. De n’uw nap’an u tomren e Pentekost 33 C.E., me yog apostal Peter ngak boch e girdi’ nu Jew ni gaar: “Tin ni ke yog Got u l’ugun e pi profet rok e fan ngomed, ma gimed mmuun nga lan fare m’ag ni ngongliy Got ngak e pi chitamangimed, ni bod rogon ni yog ngak Abraham ni gaar, ‘U daken e piin ni bay ra bad ni owchem e bay gu fal’eg waathan urngin e girdi’ nu fayleng riy.’ Ma aram me dugliy Got ni gimed e som’on ni nge l’og e Tapigpig rok nge yib ngomed, nge ayuwegmed ni aram e nge ngongliymed ni gimed gubin ngam pied keru’med ko kireb ni gimed be rin’.”​—Acts 3:25, 26.

7. Tin ngan e pi nam e kan flaabnag u daken Jesus, ni ir fare Owchen Abraham?

⁷ Ma de n’uw nap’an nga tomren min uneg piyu Samaria nge piin ni gathi yad piyu Israel ko re flaab nem. (Acts 8:14-17; 10:34-48) U ba ngiyal’’ u thilin e duw ni 50 nge 52 C.E., me yol Paul ngak e pi Kristiano u Galatia u Asia Minor ni gaar: “Dawori taw ngay ma ke yog e babyor nib thothup ni Got e bayi mat’awnag e piin ni gathi yad piyu Israel ngak u daken e michan’ rorad ngak. Aram fan ni machibnag e babyor nib thothup ngak Abraham e thin nib fel’ ni yib rok Got u m’on riy ndawori taw nga nap’an ni baaray ni gaar: ‘U dakenam e bayi fal’eg Got waathan urngin e girdi’ nu fayleng riy.’ Me mich u wan’ Abraham e re bugithin nem min fal’eg waathan; ere urngin e girdi’ nra mich Got u wan’rad e yira fal’eg waathrad ni bod rogon Abraham.” (Galatia 3:8, 9; Genesis 12:3) Yugu aram rogon ni boor e Kristiano u Galatia e yad “girdien e pi nam” machane kan flaabnagrad u daken Jesus ni bochan e michan’ rorad ngak. Uw rogon?

8. Uw rogon ni kan flaabnag e pi Kristiano u nap’an Paul u daken Owchen Abraham, ma in e girdi’ e ra un ko re flaab nem?

⁸ Yog Paul ko pi Kristiano u Galatia ndemtrug e nam rorad ni gaar: “Faanra ke mil suwmed ngak Kristus, me ere kam manged pi owchen Abraham, ni aram e bay yog ngomed e tin ni ognag Got nra pi’.” (Galatia 3:29) Piyu Galatia e ra flaab u daken Owchen Abraham ya yad ra un ko fa bin nib biech e m’ag ma yad ra un ngak Jesus ko gagiyeg, ni yad bang fa piin ni yad owchen Abraham. Dada nanged ko ri in e girdi’ ni immoy u Israel kakrom. Gad manang ni yad boor ni “bod oren e yan’ u dap’ e l’ay.” (1 Kings 4:20) Ma gad manang ko in e girdi’ ni yad ra un ku Jesus ni yad girdien fare owchen nib spiritual​—144,000. (Revelation 7:4; 14:1) Pi girdi’ nem ni yad 144,000 e girdi’ u “urngin e ganong, nge thin, nge gubin mit e girdi’, nge nam” ma yad ra ayuweg yugu boch e girdi’ ngar flaabgad u daken e m’ag rok Abraham.​—Revelation 5:9.

Ke Lebug e Thin ko Profet

9. Uw rogon ni bay e motochiyel rok Jehovah u gum’ercha’en e piin ni bay ko fa bin nib biech e m’ag?

⁹ Nap’an ni i yiiynag Jeremiah morngaagen e bin nib biech e m’ag me yoloy ni gaar: “ ‘Ra taw ko ngiyal’ nem, ma baaray e re m’ag ni bay gu ngongliy u thilmad e girdi’ nu Israel: bay gu tay e motochiyel rog nga lanin’med mu gu yoloy nga lan gum’ercha’rad. I gag Jehovah e ku gog e pi thin ney.” (Jeremiah 31:33, NW.) Piin ni bay ko fare m’ag nib biech e ma pigpig ku Jehovah ni bochan e t’ufeg. (John 13:35; Hebrews 1:9) Kan yoloy e motochiyel rok Jehovah nga gumer’cha’rad, ma ri yad ba adag ni ngar rin’ed e tin nib m’agan’ ngay. Rriyul’ ni immoy boch e girdi’ nu Israel nkakrom ni rib t’uf e motochiyel rok Jehovah rorad. (Psalm 119:97) Machane boor i yad e gathi aram rogon. Ma ka yad bang ko re nam nem. Dariy be’ nrayog ni nge par ko fa bin nib biech e m’ag nfaanra dan yoloy e motochiyel rok Got nga gumer’cha’en.

10, 11. Uw rogon ni ke mang Jehovah “Got rorad” e piin ni bay ko fa bin nib biech e m’ag, ma uw rogon ni yad ra nang Got?

¹⁰ Ki yog Jehovah u morngaagen e piin ni bay ko fa bin nib biech e m’ag ni gaar: “Bay gu mang Got rorad, ma bay ra manged girdi’ rog.” (Jeremiah 31:33) Boor e girdi’ nu Israel kakrom e ur liyorgad ko pi got ngoogsur ko pi nam, machane ka yad e girdi’ nu Israel. U daken e bin nib biech e m’ag me sunmiy Jehovah ba nam nib spiritual ni “fare Israel rok Got,” ni nge yan nga luwan fare nam nu Israel. (Galatia 6:16; Matthew 21:43; Roma 9:6-8) Machane dariy be’ nrayog ni nge par ni ir e girdi’ ko re nam nem nib spiritual nfaanra dabi liyor ku Jehovah ni ir e kari mus.

¹¹ Miki yog Jehovah ni gaar: “Yad gubin ni bay ra nanged gag ni mus rok e en nth’abi sobut’ nge mada’ ngak e en nth’abi tolang rorad.” (Jeremiah 31:34) Boor e girdi’ nu Israel, e ur dariy fannaged Jehovah ni ba dake ur gaargad: “Dabi rin’ Jehovah ban’en nib fel’ maku dabi rin’ ban’en nib kireb.” (Zefaniah 1:12) Dariy be’ ni rayog ni nge par ni ir reb e girdi’ ko fare Israel rok Got nfaanra ke dariy fannag Jehovah ara ke alitnag e liyor nib machalbog. (Matthew 6:24; Kolose 3:5) Yu Israel nib spiritual e yad e “bay ra pired ni yad mmudugil ma yad be mon’og.” (Daniel 11:32) Yad ba falfalan’ ni ‘ngar nanged e bin riyul’ e Got mi yad nang ko mini’ Jesus Kristus.’ (John 17:3) Ngan nang ko mini’ Jesus e ma tamilangnag ngorad u morngaagen Got ya Jesus e “ir e ke weliy murung’agen Got kan nang.”​—John 1:18; 14:9-11.

12, 13. (a) U daken e mang ni ma n’ag Jehovah fan e denen ko piin ni bay ko fa bin nib biech e m’ag? (b) Uw rogon ni kab fel’ e bin nib biech e m’ag ko fa bin kakrom ni fan ko n’ag fan e denen?

¹² Bin tomur me micheg Jehovah ni gaar: “Bay gu n’ag fan e denen rorad u wun’ug ma dab ku gu lemnag e kireb ni kar ngongliyed.” (Jeremiah 31:34b) Fare Motochiyel rok Moses e bay boor ban’en ni kan tay chilen ko piyu Israel nthingara folgad riy. (Deuteronomy 28:1, 2, 15) Urngin e piin ni kar th’abed fare Motochiyel e kar pied e maligach ni nge upunguy e denen rorad. (Levitikus 4:1-7; 16:1-31) Boor piyu Jew e ke mich u wan’rad ni rayog ni ngar mat’awgad u p’eowchen Got nfaanra yad ra fol ko fare Motochiyel. Machane i nang e pi Kristiano ni dabiyog ni ngan pi’ puluwon e mat’aw u daken e n’en ni ngan maruweliy. Dabiyog ni nge dabra denengad. (Roma 5:12) U daken e bin nib biech e m’ag e rayog ni ngan par nib mat’aw u p’eowchen Got ni kari mus ni bochan fare maligach ni pi’ Jesus. Machane, aram ba taw’ath, ni bochan ni ke runguyrad Got. (Roma 3:20, 23, 24) Machane ku be tay Jehovah chilen ni nge fol e pi tapigpig rok ngak. Yog Paul ni piin ni bay ko fa bin nib biech e m’ag e yad “ba’ u tan e motochiyel rok Kristus.”​—1 Korinth 9:21.

¹³ Ere bay e maligach ni fan ko denen ko pi Kristiano, machane kab baga’ fan ko pi maligach ni un pi’ u tan fare m’ag ko Motochiyel. I yoloy Paul ni gaar: “Ra reb e prist [u tan e m’ag ko Motochiyel] rok piyu Israel ma ma sak’iy nga lang ngi i ngongliy e maruwel rok ni gubin e rran, ni taab mit i maligach e be pi’ ni pire’ yay. Machane pi maligach nem e ri dabiyog ni nge chuweg e denen. Machane Kristus e ri taareb e maligach ni pi’ ni fan ko denen, nib maligach ni bay i par nib fel ndariy n’umngin nap’an, nge mu’ me yan i par nga but’ u ba’ ni mat’aw rok Got.” (Hebrews 10:11, 12) Pi Kristiano ni yad bay ko fa bin nib biech e m’ag e ke mich u wan’rad e maligach ni pi’ Jesus, ma aram me yog Jehovah ni yad ba mat’aw, ndariy e denen rorad, me ere rayog ni ngan dugliyrad ni yad pi fak nib spiritual. (Roma 5:1; 8:33, 34; Hebrews 10:14-18) Ma faanra yad ra denen ni bochan ni dar flontgad, ma rayog ni ngar weniggad ku Jehovah ni nge n’ag fan, ma ma n’ag Jehovah fan e rorad u daken e biyul’ ni pi’ Jesus. (1 John 2:1, 2) Machane, faanra ke m’agan’rad ngay ni ngar denengad ma dabkura pared nib mat’aw u p’eowchen Got ma yira chuwegrad u tan e bin nib biech e m’ag.​—Hebrews 2:2, 3; 6:4-8; 10:26-31.

Fa Bin Kakrom nge Bin Biech e M’ag

14. Mang maadad ni kan tay chilen ko fare m’ag ko Motochiyel? nge fa bin nib biech e m’ag?

¹⁴ Piin pumoon ni bay u tan fa bin kakrom e m’ag e kan maadad ngorad ni aram e pow ni yad bay u tan fare Motochiyel. (Levitikus 12:2, 3; Galatia 5:3) Tomren ni sum e ulung ko Kristiano ma ke lemnag boch e girdi’ ni pi Kristiano ni gathi yad e Jew e thingarni maadad ngorad. Machane pi apostal nge piilal nu Jerusalem e ke pow’iyrad e Thin Rok Got nge fare kan ni thothup ma aram e ke tamilang u wan’rad ni aram ban’en ni de t’uf ni ngan rin’. (Acts 15:1, 5, 28, 29) In e duw nga tomren me weliy Paul ni gaar: “Gathi cha’ ni be’ u Israel ko pow ni ba’ u downgin, ni maad’ad ni kan ta’ ngak e kan ta’ nga downgin. Machane cha’ nriyul’ ni ir be’ u Israel u fithik’ e laniyan’, ni aram e cha’ ni kan maad’ad nga laniyan’, ni fare kan ni thothup rok Got e ke yodoromnag, machane gathi fare Motochiyel ni kan yoloy.” (Roma 2:28, 29) Daki ga’ fan u wan’ Jehovah ni nge maadad e piin pumoon ngorad ni mus ko pi pumoon nu Jew. Ya piin ni bay ko fa bin nib biech e m’ag e thingara rin’ed e re n’em ko gumer’cha’rad ma gathi dowrad. Thingara chuweged u lanin’rad urngin ban’en ni dabi felan’ Jehovah ngay mar chuweged e tin nib alit ko tin ni yad ma lemnag, nge tin ni yad ma ar’arnag, nge tin ni ma k’aringrad.a Boor e girdi’ e ngiyal’ ney e yad e mich riy ni kan ni thothup e bay gelngin ni nge piliyeg laniyan’ e girdi’ ni aram rogon.​—1 Korinth 6:9-11; Galatia 5:22-24; Efesus 4:22-24.

15. Uw rogon ni ran taarebnag fare nam nu Israel nge fare Israel rok Got ko gagiyeg?

¹⁵ U tan e m’ag ko Motochiyel ma Jehovah e ir fare Pilung nu Israel, ma munmun me gagiyeg u daken e girdi’ ni kan dugliyrad ni yad ra mang pilung u Jerusalem. (Isaiah 33:22) Jehovah e ku ir e Pilung ko fare Israel rok Got, ni Israel nib spiritual spiritual, mal ma ka nap’an e 33 C.E., ma ke gagiyeg u daken Jesus Kristus ya “kan pag fan urngin ban’en ngak u tharmiy ngu but’.” (Matthew 28:18; Efesus 1:19-23; Kolose 1:13, 14) Ngiyal’ ney ma fare Israel rok Got e manang ni Jesus e Pilung ko Gagiyeg rok Got u tharmiy, ni kan dugliy ko duw ni 1914. Jesus e ba Pilung ni kab fel’ ku Hezekiah, nge Josiah, nge urngin e tin ni ka bay e pilung ni yad ba yul’yul’ u Israel kakrom.​—Hebrews 1:8, 9; Revelation 11:15.

16. Uw rogon e yaram ko prist ko fare Israel rok Got?

¹⁶ Fare nam nu Israel e gathi ke mus ni bay e pilung riy ya ku bay e pi prist ni kan dugliyrad. Nap’an e 33 C.E., ma fare Israel rok Got e ke yan nga luwan yu Israel mar manged e pi “tapigpig” rok Jehovah ni yad e “pi mich” rok. (Isaiah 43:10) Ere n’en ni yog Jehovah ngak yu Israel ni bay ko Isaiah 43:21 nge Exodus 19:5, 6 e ba sor fan ko fare Israel rok Got. Girdien fa bin nib biech e nam rok Got e yad girdien fare nam ni ‘ke mel’egrad Got, ni yad e pi prist rok e en ni Pilung, ma yad fare nam ni yad ba thothup, ni yad girdien Got, ni mel’egrad Got ni ngar wereged murung’agen e n’en nrib fel’ ni ke ngongliy Got.’ (1 Peter 2:9) Urngin girdien fare Israel rok Got ni piin pumoon nge ppin e yad ba ulung i prist. (Galatia 3:28, 29) Yad fa bin l’agruw thal i owchen Abraham me ere yad ma gaar: “Gimed e pi nam, thingar mpininged e sorok ngak e tirok Got e girdi’.” (Deuteronomy 32:43) Piin ni yad girdien yu Israel nib spiritual ni ka yad bay u fayleng e yad “fare tapigpig nib yul’yul’ mab gonop.” (Matthew 24:45-47) Ngan chag ngorad e ke mus ni aram rogon nrayog ni ngan pigpig ku Got me felan’ ngay.

Gil’ilungun Got​—Fa Bin Tomur Yay Nra Lebug

17. Miti mang gargel nra un e piin ni bay ko fa bin nib biech e m’ag ngay?

¹⁷ Piyu Israel ni kan gargelnagrad u tomren e 1513 B.C.E. e yad bang ko fare m’ag ko Motochiyel u nap’an nni gargelnagrad. Piin ni ke piningrad Jehovah ni ngar uned ko fa bin nib biech e m’ag e ku kan gargelnagrad​—u rogon nib spiritual. Aram e n’en ni yog Jesus ngak Nikodemus ni ir reb e Farise faani gaar: “Nggog e tin riyul’ ngom: ndariy be’ nrayog ni nge guy e gin nsuwon Got ni faanra dab ni gargelnag bayay.” (John 3:3) Nap’an e Pentekost 33 C.E. ma fa 120 gachalpen Jesus e yad e som’on ni kan gargelnagrad biyay. U tan fare m’ag nib biech ma kan nog ni yad ba mat’aw, ma kan pi’ e kan ni thothup ngorad ni aram e “pow riy ni ke mudugil” ni yad ra mang pilung. (Efesus 1:14) Kan “gargelnagrad ko kan ni thothup” kar manged pi fak Got, mi yad pi walagen Jesus ma yad ra “fanay e tin ni ke tay Got ni fen Kristus.” (John 3:6; Roma 8:16, 17) Ere boor ban’en nib fel’ ni ke yog ngorad ni bochan ni “kan gargelnagrad biyay.”

18. Mang boch e flaab nra yib ko piin ni kan gargelnagrad biyay ni yad bang ko fa bin nib biech e m’ag?

¹⁸ Nap’an ni ke n’igin Jesus fa bin nib biech e m’ag miki ngongliy yugu reb e m’ag u thilrad pi gachalpen ni gaar: “Bay gu fl’eg e m’ag u thildad ni ngam uned ko gagiyeg ya er rogon ni ke fl’eg e Chitamag e m’ag u thilmow ni ngug gagiyeg.” (Luke 22:29, NW.) Re m’ag ney ko Gil’ilungun Got e ke fl’eg rogon e kanawo’ ni nge lebug e n’en ni kan nog u Daniel 7:13, 14, 22, 27. I guy Daniel be’ ni “bod yaan ba fak e girdi’” ni ke pi’ “Faanem ni kab kakrom i yib ni immoy” ni aram Jehovah Got mat’awun ko gagiyeg. Nge mu’ me guy Daniel ni ke taw nga nap’an ni “fa piin nib thothup e ngan pi’ gelngirad ngar pired ni yad e ngar manged pilung.” Jesus e ir fa “en ni bod yaan ba fak e girdi’” ni ka nap’an e 1914 ma Jehovah Got e ke pi’ mat’awun ni nge gagiyeg u tharmiy. Pi gachalpen ni kan dugliyrad ko kan ni thothup e yad e “piin nib thothup” ni ra un ngak ko gagiyeg. (1 Thessalonika 2:12) Uw rogon?

19, 20. (a) Uw rogon nra lebug e n’en ni micheg Jehovah ku Abraham u daken e piin ni bay ko fa bin nib biech e m’ag? (b) Ku mang boch e deer nib t’uf ni ngan weliy?

¹⁹ Tomren ni kar m’ad ma pi girdi’ ney ni kan dugliyrad e ran fasegrad ko yam’ ni bod Jesus mi yad mang kan ni dabiyog ni ngar m’ad biid ma yad ra un ngak Jesus bay ra manged pilung nge prist u tharmiy. (1 Korinth 15:50-53; Revelation 20:4, 6) Rib fel’ e re athap nem! “Yad ra gagiyegnaged e fayleng” ni gathi ke mus fare binaw nu Kanaan. (Revelation 5:10) Ma ‘bay ra gelgad ngak e piin ni bay ra mahlgad ngorad’ fa? (Genesis 22:17) Arrogon, ma yad ra rin’ nib mus rogon, u nap’an ni yad ra guy e ngiyal’ nran thang fare ppin ni ma chuway’ ngak ni be yip’ fan e pi yuraba’ i teliw ni ir Babylon nib Gilbuguwan, ma pi girdi’ ney ni kan fasegrad ko yam’ e bay ra uned ku Jesus mi yad gafaliy e pi nam nga “ba ley i wasey” ngar t’etared girdien e pi nam ngay mi yad pirdiiy lolugen Satan. Ma aram ma yad ra lebuguy e bin tomur e n’en ko fare thin ni kan yiiynag u Genesis 3:15.​—Revelation 2:26, 27; 17:14; 18:20, 21; Roma 16:20.

²⁰ Machane ku rayog ni ngad fithed, Ke mus ni pi girdi’ ney ni yad 144,000 e yad ba l’ag ko fare m’ag rok Abraham nge fa bin nib biech e m’ag fa? Danga’, ya ka bay yugu boch e girdi’ ni gathi yad bang ko gali m’ag ney machane yad ra flaab u daken, ma aram e n’en nran weliy ko bin migid e thin.

[Boch e Thin nra Tamilangnag Murung’agen]

Ka Ga Manang?

◻ Wuin e kan guy ko yay nsom’on ni be maruwel fa bin nib biech e m’ag?

◻ Mang e kan lebuguy u tan e bin kakrom e m’ag?

◻ Mini’ Owchen Abraham, ma uw rogon ni kan flaabnag e pi nam ni som’on nge migid u daken e re Owchen nem?

◻ Uw rogon nra lebug e m’ag rok Abraham nge fa bin nib biech e m’ag ni fan ko fa 144,000 e girdi’ ko yan tomur?

[Sasing ko page 23]

Kab baga’ fan rogon ni ngan n’ag fan e denen ko piin ni bay u tan e bin nib biech e m’ag ko piin ni bay u tan fa bin kakrom