Jehovah E Ir Ba Got Ko Pi M’ag

“Ba’ ba ngiyal’ ni be yib ni bayi taw ngay mu gu ngongliy reb e m’ag nib beech u thilmad e girdi’ nu Israel nge girdi’ nu Judah.”​—JEREMIAH 31:31.

1, 2. (a) Mang madenom ni tababnag Jesus ko re nep’ i n’em ko Nisan 14, 33 C.E.? (b) Mang m’ag ni weliy Jesus morngaagen nib l’ag ko yam’ ni tay?

RE NEP’ nem ko Nisan 14, 33 C.E., me madenomnag Jesus fare Paluk’af ni yad fa 12 e apostal rok. Bochan ni manang ni aram e yay ni tomur ni yad ra abich u taabang ma dabki n’uw nap’an ma ra yim’ u pa’ e pi toogor rok, me ere ke weliy Jesus boor ban’en nib baga’ fan ko pi gachalpen.​—John 13:1–​17:26.

² Aram e ngiyal’ u tomren ni ke tuluf Jesus Judas Iskariot me tababnag fare Madenom ko yam’ ni tay ni ngan rin’ taab yay u reb e duw ma kari mus e n’en nra madenomnag e Kristiano. Be weliy ni gaar: “Ma nap’an ni yad be abich, me fek Jesus e flowa, me pining e magar riy ngak Got, me t’et’ar, me pi’ ngak pi gachalpen me gaar, ‘Mfeked ngam ked; ya ireray dowag.’ Me fek fare kap, me pining e magar riy ngak Got, nge mu’ me pi’ ngorad me gaar, ‘Mu unumed ni gimed gubin, ya ereray rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan ni nge n’ag Got fan e denen.’” (Matthew 26:26-28) Pi gachalpen Jesus e ra madenomnag e yam’ ni tay u rogon nib mom ni yibe tay fan. Miki weliy Jesus u morngaagen ba m’ag nib l’ag ko yam’ ni tay. U Luke, e ka nog “fa bin nib beech e m’ag” ngay.​—Luke 22:20.

3. Mang boch e deer ni yira fith u morngaagen e bin nib biech e m’ag?

³ Mang fa bin nib biech e m’ag? Faanra aram e bin nib biech e m’ag me ere ku immoy e bin Kakrom e m’ag fa? Ka bay boch e m’ag nib l’ag ngay fa? Pi deer ney e baga’ fan ya yog Jesus ni rachaen ni bay map’ nga but’ e bayi micheg e m’ag “ni fan e nge n’ag Got fan e denen.” Gad gubin ma ba t’uf ni ngan n’ag fan e denen rodad.​—Roma 3:23.

Kan Fl’eg e M’ag Ngak Abraham

4. Mang thin ni kan micheg kakrom ni ra ayuwegdad ngad nanged fan fa bin nib biech e m’ag?

⁴ Thingarni lemnag e ngiyal’ ni immoy Terah nge tabinaw rok ni 2,000 e duw u m’on ni immoy Jesus u fayleng ni aram e rayog ni ngan nang fan fa bin nib biech e m’ag​—aram nap’an Abram (ma boch nga tomren min pining Abraham ngak) nge Sarai ni an leengin (ni kan tunguy Sarah ngak)​—mu ur chuwgad u Ur ni reb e binaw nu Chaldea nib fel’ rogon ma ranod nga Haran u le’luch u Mesopotamia. Kar pared u rom nge mada’ ko ngiyal’ ni yim’ Terah. Nap’an ni ke gaman 75 e duw rok Abraham me yog Jehovah ngak ni nge th’ab e Lul’ ni Euphrates me milekag iyan nga yimuch nga Kanaan ni be par ko tento ma yugu be milekag iyan. (Genesis 11:31–​12:1, 4, 5; Acts 7:2-5) Aram e n’en ni buch ko duw ni 1943 B.C.E. Nap’an ni ka bay Abraham u Haran, me yog Jehovah ngak ni gaar: “Bay gu gagiyegnag nge yib owchem ni pire’ ni pire’, ni yad e bay ra manged girdien ba nam ni pire’ girdien. Bay gu fal’eg waatham mu gu gagiyeg nge gilbuguwan fithingam, nguu nog ko ngiyal’ ni yibe yibil ngak Got ni nge fal’eg waathan be’. Gu ra fal’eg waathan e piin ni yad ra fal’eg waatham, ma gu ra bucheg waathan e piin ni yad ra yibiliyem ni nge kireb waatham. Urngin e nam nu fayleng e bay i fel’ waathrad ni bocham.” Munmun u tomren ni yan Abraham nga Canaan, me ul’ul’ Jehovah ni gaar: “Ereray fare nam ni bay gu pi’ ngak e piin ni owchem.”​—Genesis 12:2, 3, 7.

5. Mang thin ko profet nkakrom e ba l’ag ko n’en ni micheg Jehovah ngak Abraham?

⁵ N’en ni ke micheg Jehovah ku Abraham e ba l’ag nga yugu reb e n’en ni ke micheg. Ma ke n’igin nge gilbuguwan Abraham u chepin e girdi’, ni aram e n’en nib peth ko bin som’on e thin ni kan yiiynag. Tomren ni denen Adam nge Efa u lan fare milay’ nu Eden, me pufthinnagrow Jehovah, miki weliy ban’en ku Satan ni ir e en ni bannag Efa ni gaar: “I gur nge fare pin e bay mpirew ni gimew ba toogor; maku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif u ay.” (Genesis 3:15) Fare m’ag ni fl’eg Jehovah u thilrow Abraham e ke tamilangnag ni fare Owchen ni ra thang mit e tirok Satan ban’en e ra m’ug ko pi fak e re moon nem.

6. (a) Ra lebug e n’en ni micheg Jehovah ngak Abraham u daken mini’? (b) Mang fare m’ag rok Abraham?

⁶ Bochan ni n’en ni micheg Jehovah e ma sor fan ngak be’ ni owchen, me ere ba t’uf ni nge fakay Abraham reb e bitir ni ra yib fare Owchen u daken. Machane ir nge Sarah e goo kar pillibthirgow ma dawora diyennagew e bitir. Machane munmun me taw’athnagrow Jehovah mu daken e maangang me yog ni nge gargeleg Sarah bochi tir ni pagal ni Isak fithingan, ma aram e rayog ni nge lebug e n’en ni kan micheg u morngaagen fare owchen. (Genesis 17:15-17; 21:1-7) In e duw nga tomren, u tomren ni kan skengnag e michan’ ku Abraham​—ni mus ko ngiyal’ ni nge pi’ Isak ni fak nrib t’uf rok ni maligach​—miki weliy Jehovah biyay e n’en ni ke micheg ku Abraham ni gaar: “Bay gu pi’ ngom e girdi’ ni owchem ni bod urngin e t’uf u lan e lang ara urngin e yan’ ni bay u dap’e l’ay. Piin ni owchem e bay ra gelgad ngak e piin ni bay ra mahlgad ngorad. Ma urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem, ni bochan e kam fol ko tin ni kug gog ngom ni ngam rin’.” (Genesis 22:15-18) Re thin ney ni kan micheg e kan nog e m’ag rok Abraham ngay, ma ra munmun ma ra peth fa bin nib biech e m’ag ngay.

7. Uw rogon ni ke yoor e piin ni owchen Abraham, ma ke diin ni kar pared u Egypt?

⁷ Munmun me fakay Isak l’agruw e pagal ni yow ba athlog ni Esau nge Jakob fithingrow. I mel’eg Jehovah Jakob ni ir e nge mang e an nra diyennag e girdi’ nra yib fare Owchen ni kan Micheg rok. (Genesis 28:10-15; Roma 9:10-13) I fakay Jakob 12 e bitir ni pumoon. Ere ke taw ko ngiyal’ ni ra yoor e piin ni owchen Abraham. Nap’an ni ke ilal pi fak Jakob, ma ke yog e tabinaw nge bitir ngorad, me yib ba uyungol ma aram e thingar ranod nga Egypt ma aram e gin ni ke n’igin Got ni nge fl’eg Josef ni fak Jakob e kanawo’ ni ngar bad ngay. (Genesis 45:5-13; 46:26, 27) Tomren in e duw me war fare uyungol u Kanaan. Machane me par e tabinaw ku Jakob u Egypt​—ni som’on e kab fel’ thilrad yu Egypt machane munmun mar manged sib rorad. Nap’an fare duw ni 1513 B.C.E., ni 430 e duw nga tomren ni ke th’ab Abraham fare Lul’ ni Euphrates, me pow’iy Moses pi fak Jakob ngar chuwgad u Egypt ni ke puf rogorad. (Exodus 1:8-14; 12:40, 41; Galatia 3:16, 17) Chiney ma ra tiyan’ Jehovah ko fare m’ag ni ke fl’eg u thilrow Abraham.​—Exodus 2:24; 6:2-5.

“Fa Bin Kakrom e M’ag”

8. Mang e ke fl’eg Jehovah u thilrad pi fak Jakob u daken fare burey ni Sinai, ma uw rogon nib l’ag e re n’ey ko fare m’ag rok Abraham?

⁸ Nap’an ni yan Jakob nge pi fak nga Egypt, ma yad ba tabinaw nib baga’, machane nap’an ni chuw pi fakrad u Egypt ma yad ba ulung ni baga’ ni yad boch e ganong ni pire’ e girdi’ riy. (Exodus 1:5-7; 12:37, 38) U m’on ni ke fekrad Jehovah nga Kanaan, me fekrad nga yimuch ko burey ni Horeb (ara, Sinai) u Arabia. Mu rom, e fl’eg reb e m’ag u thilrad. Ereram fa bin ni yib i mang e “bin kakrom e m’ag” u puluwon “fa bin nib biech e m’ag.” (2 Korinth 3:14) U daken fa bin kakrom e m’ag me lebuguy Jehovah boch ban’en ko fare m’ag u thilrow Abraham.

9. (a) Mang aningeg i n’en ni ke micheg Jehovah u daken fare m’ag rok Abraham? (b) Ku mang boch e flaab nrayog ko piyu Israel u daken fare m’ag u thilrad Jehovah, ma mang e thingara rin’ed me yog ngorad?

⁹ I weliy Jehovah ngak piyu Israel ko uw rogon e re m’ag nem ni gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg. Bay mpired ni gimed girdien ba nam ni gimed be pigpig ngog ni kam manged pi prist, ma ke mus ni gag e ke mil suwmed ngog.” (Exodus 19:5, 6) I micheg Jehovah ni piin ni owchen Abraham e ra (1) mang ba nam nib baga’ fan, ma yad ra (2) gel ko mahl ngak e pi toogor rorad, (3) ma yad ra par ko fare binaw nu Kanaan, mu (4) dakenrad e bay ni flaabnag e pi nam riy. Ma ngiyal’ nem me tamilangnag ngorad ni yad ra un ko pi flaab ney ni yad girdien ni piyu Israel, mi yad mang “ba nam nib thothup ni yad e pi prist,” nfaanra yad ra fol ko motochiyel rok. Ke fel’ u wan’ yu Israel ni ngar uned ko re m’ag ney fa? Ke fulweg fapi girdi’ ni gubin ntaab yay ni lungurad: “Bay gu rin’ed urngin e tin ni ke yog Jehovah.”​—Exodus 19:8, New World Translation.

10. Uw rogon ni yarmiy Jehovah piyu Israel ngar manged ba nam, ma mang e ba t’uf ni ngar rin’ed?

¹⁰ Me ere ke yarmiy Jehovah piyu Israel kar manged ba nam. Me pi’ e motochiyel ngorad ni fan ko liyor nge par rorad. Miki yog ni ngan fl’eg e e tabernacle (boch nga tomren, min fl’eg e tempel u Jerusalem) me dugliy e pi prist ni ngar pigpiggad u lan fare tabernacle. Rogon ni ngan par ko fare m’ag e ngan fol ko pi motochiyel rok Jehovah ma ke mus ni go’ ir e ngan liyor ngak. Fa bin som’on e motochiyel ko Fa Ragag i Motochiyel e aram kenggin e pi motochiyel nem ma be gaar: “I gag faanem i Jehovah ni Got rom, ni ir faram e fekem nga wuru’ e nam nu Egypt, ngam chuw u tafen e sib. Dariy yugu reb e kan ni nge mang got rom, ya ke mus ni gag.”​—Exodus 20:2, 3, NW.

Pi Flaab ni Yib u Daken fare M’ag ko Motochiyel

11, 12. Uw rogon ni ke lebug e pi n’en ni kan micheg ko fa bin kakrom e m’ag u daken yu Israel?

¹¹ Ke lebug e pi n’en ni kan micheg ko fare m’ag ko Motochiyel ngak yu Israel? Ke mang yu Israel “ba nam nib thothup”? Yad pi fak Adam, ere piyu Israel e yad e ta denen. (Roma 5:12) Me ere pi maligach ni un pi’ ko fare Motochiyel e nge upunguy e denen rorad. Weliy Jehovah u morngaagen e pi maligach ko Rofen ni Biyul’ ni gaar: “Rofen nem e ngan biyuliyrad u urngin e denen rorad nrogon ni ke yog e motochiyel ni ngar pired ni kar machalboggad u p’eowchen Jehovah.” (Levitikus 16:30) Ere nap’an ni par yu Israel nib yul’yul’ ma yad ba nam nib thothup mab machalbog ni fan ko pigpig ku Jehovah. Machane yad ra par nib machalbog ni ke mus ni faanra yad ra fol ko fare Motochiyel ma yad ra pi’ e maligach u gubin ngiyal’.

¹² Ke mang yu Israel ba “nam ko pi prist”? Ngiyal’ ni kan fl’eg fare m’ag ma aram ba nam, ma Jehovah e Pilung riy u tharmiy. (Isaiah 33:22) Miki weliy fare Motochiyel u morngaagen e ngiyal’ nran dugliy e girdi’ ngar manged pilung ni yad owchen Jehovah u Jerusalem. (Deuteronomy 17:14-18) Machane immoy yu Israel ni yad ba nam ko pi prist? Immoy e piin ni kan dugliyrad ni yad e prist ni yad ma pigpig u lan fare tabernacle. Fare tabernacle (munmun, ma kan toy fare tempel) e aram e tochuch ko bin machalbog e liyor ni fan ko piyu Israel nge piin ni gathi yad piyu Israel. Ma re nam nem e aram lungun e thin riyul’ ni yibe pi’ ko girdi’. (2 Kronicles 6:32, 33; Roma 3:1, 2) Urngin piyu Israel ni yad ba yul’yul’ ma gathi ke mus ni pi prist nu Levi e yad e “pi mich” rok Jehovah. Yu Israel e yad e “tapigpig” rok Jehovah ni fan ni ngar ‘pininged e sorok ngak.’ (Isaiah 43:10, 21) Boor e girdi’ nib sobut’an’rad ni gathi yad piyu Israel e kar guyed gelngin Jehovah ni ke ayuweg e girdi’ rok ma aram mi yad un ko liyor nib machalbog. Kar manged e piin proselyte. (Joshua 2:9-13) Machane ke mus ntaareb e ganong e yad ma mang prist.

Piin Proselyte u Israel

13, 14. (a) Mang fan nrayog ni ngan nog ni piin ni proselyte e gathi yad bang ko fare m’ag ko Motochiyel? (b) Uw rogon nib l’ag e piin ni proselyte ko fare m’ag ko Motochiyel?

¹³ Uw rogon e liw ko piin proselyte? Fare m’ag ni fl’eg Jehovah e kari mus nu thilrad yu Israel; ma piin ni “yugu boch e girdi’,” ni yad ba’ u fithik’rad e dan unegrad ko re m’ag nem. (Exodus 12:38; 19:3, 7, 8) Tin nganni’ e bitir rorad e dan uneg ko mathaeg u nap’an ni kan sumarnag e tin nganni’ e bitir nu Israel ni ngan pi’ puluwon e biyul’ ni fan ko tin nganni’ e bitir. (Numbers 3:44-51) In e duw nga tomren u nap’an ni kan yu raba’nag fare binaw nu Kanaan ni fan ko fapi ganong nu Israel, ma dariy reb e binaw ni kan fal nga bang ni fan ko piin ni gathi yad piyu Israel ni be par rorad. (Genesis 12:7; Joshua 13:1-14) Mang fan? Ya fare M’ag ko Motochiyel e dan fl’eg ni fan ko piin ni proselyte. Machane thingari maadad ngak e pi pumoon ni proselyte ni fan ni ngar folgad ko fare Motochiyel. Kar folgad ko urngin e motochiyel, ma kar uned ko ayuw ni pi’ fare Motochiyel. Piin proselyte nge piyu Israel e ra bad nga tan pa’ fare m’ag ko Motochiyel.​—Exodus 12:48, 49; Numbers 15:14-16; Roma 3:19.

¹⁴ Susun, faanra be’ ni proselyte e ke li’ be’ kem’ ni gathi tafinay rok, ma aram e rayog ni nge mil nga reb e mach ko ayuw ni bod rogon piyu Israel. (Numbers 35:15, 22-25; Joshua 20:9) Nap’an e Rofen ni Biyul’ ma kan pi’ e maligach ni “fan ko urngin e piin ni yad bang ko ulung nu Israel.” Ere un e piin ni proselyte ko pi n’en ni un rin’ ni fan ko maligach ma ke yib angin ngorad ya yad bang ko re ulung nem. (Levitikus 16:7-10, 15, 17, 29; Deuteronomy 23:7, 8) Ma kari chuchugur ni nge taareb rogon e piin proselyte nge piyu Israel ni fan ko fare Motochiyel ma aram e nap’an e Pentekost 33 C.E. ma ke un e piin proselyte ko flaab u nap’an ni kan fanay e bin som’on e ‘kiy ko gagiyeg nu tharmiy’ ni fan ngak piyu Jew. Me ere “Nikolaus, ni be’ ni proselyte nu Antiok” e ke mang reb e Kristiano ma kan dugliy ni ir bagayad fa “medlip ni’” ni kan mel’egrad ni nge mil fan ngorad e tin nib t’uf ko fare ulung u Jerusalem.​—Matthew 16:19; Acts 2:5-10; 6:3-6; 8:26-39.

Ke Flaabnag Jehovah Owchen Abraham

15, 16. Uw rogon ni ke lebug fare m’ag u thilin Jehovah nge Abraham u daken fare m’ag ko Motochiyel?

¹⁵ Kan yarmiy pi fak Abraham ni yad ba nam u tan fare Motochiyel, me taw’athagrad Jehovah u rogon ni ke micheg ngak Abraham. Nap’an e 1473 B.C.E., me Joshua ni ir e ke yan nga luwan Moses e ke pow’iy yu Israel nga ranod nga lan e binaw nu Kanaan. Kan yu raba’nag fare binaw ni yu ganong, ma aram me lebug e n’en ni micheg Jehovah ni ra pi’ fare binaw ngak piin owchen Abraham. Nap’an ni i par yu Israel nib yul’yul’ ma ke lebuguy Jehovah e n’en ni ke micheg me ayuwegrad ngar gelgad ko mahl ngak e pi toogor rorad. Aram e n’en ni buch u nap’an ni gagiyeg David ni Pilung. Ma ngiyal’ u nap’an Solomon ni fak David ma ka bay ban’en ni kan micheg ko fare m’ag rok Abraham ni ke lebug. “Piyu Judah nge piyu Israel e yad boor ni bod fene yoor e yan’ u dap’e l’ay, ma yad be abich ma yad be garbod u fithik’ e falfalan’.”​—1 Kings 4:20.

¹⁶ Machane uw rogon ni ra flaab e pi nam u daken yu Israel ni yad owchen Abraham? Kan weliy faram ni yu Israel e yad girdien Jehovah ni yad owchen ngak e pi nam. Boch nga m’on ni yan yu Israel nga Kanaan me yog Moses ni gaar: “Gimed e pi nam, thingar mpininged e sorok ngak e tirok Somol e girdi’.” (Deuteronomy 32:43) Boor e girdi’ nu bang e kar uned ngay. “Boor yugu boch e girdi’” e kar leked yu Israel mar chuwgad u Egypt, ma kar guyed gelngin Jehovah u nap’an ni yad be milekag u daken e ted, mar rung’aged e pong rok Moses mar falfalan’gad. (Exodus 12:37, 38) Munmun, ma Ruth ni be’ nu Moab e ke leengiy Boaz ni be’ nu Israel ma ke mang reb e girdi’ ko fare Messiah. (Ruth 4:13-22) Ma Jehonadab ni be’ ni Kenite nge pi fak nge Ebed-Melech ni be’ nu Ethiopia e kar pared nib yul’yul’ u nap’an ni de fol piyu Israel. (2 Kings 10:15-17; Jeremiah 35:1-19; 38:7-13) Ma boor e girdi’ nu Persia ni kar manged e proselyte mar ayuweged piyu Israel u nap’an ni kar chamgad e pi toogor rorad.​—Esther 8:17, footnote.

Ba T’uf Reb e M’ag nib Biech

17. (a) Mang fan ni ke n’ag Jehovah fa gali nam nu le’luch nge yimuch u Israel? (b) Ke diin ma kan n’ag piyu Jew?

¹⁷ Machane thingari par fare nam rok Got nib yul’yul’ ni faanra nge yog ni nge lebug urngin ban’en ni ke micheg. Machane dar yul’yul’gad. Rriyul’ ni immoy boch e girdi’ nu Israel ni rib gel e michan’ rorad. (Hebrews 11:32–​12:1) Machane, boor yay ni ke liyor fare nam ko pi got nu bang, mi yad lemnag nra yib angin ngorad. (Jeremiah 34:8-16; 44:15-18) Boch e girdi’ e kar thiliyeged fare Motochiyel ara ur dariy fannaged. (Nehemiah 5:1-5; Isaiah 59:2-8; Malaki 1:12-14) Tomren ni yim’ Solomon ma ke ruw raba’ fare nam nu Israel ni baraba’ e fare nam nu le’luch ma baraba’ e fare nam nu yimuch. Nap’an ni togopuluw fare nam nu le’luch me yog Jehovah ni gaar: “Gimed e pi prist e kam dabuyed ni nguug par ni bay madgug u wun’med ma kam pied keru’med ko thin rog, ere kug pi’ keruug ngomed nge pi pumoon ni fakmed ni gathi ki gimed e pi prist rog.” (Hosea 4:6) Ma kun gechignag fare nam nu yimuch ya dar pared nib yul’yul’ ko fare m’ag. (Jeremiah 5:29-31) Nap’an ni n’ag piyu Jew Jesus ni ir e Messiah, ma ki n’agrad Jehovah. (Acts 3:13-15; Roma 9:31–​10:4) Ma tomur riy me yarmiy Jehovah ban’en ni nge lebuguy fare m’ag rok Abraham.​—Roma 3:20.

18, 19. Mang ban’en nib biech ni ke yarmiy Jehovah ni fan ni nge lebug e m’ag rok Abraham nge mus nga rogon?

¹⁸ Re yaram nem aram e bin nib biech e m’ag. I yiiynag Jehovah u morngaagen e re n’em u nap’an ni yog ni gaar: “I Jehovah e be gaar, ‘Ba’ ba ngiyal’ ni be yib ni bayi taw ngay mu gu ngongliy reb e m’ag nib beech u thilmad e girdi’ nu Israel nge girdi’ nu Judah’ . . . ‘Ra taw ko ngiyal’ nem ma baaray e re m’ag ni bay gu ngongliy u thilmad e girdi’ nu Israel: bay gu tay e motochiyel rog nga lanin’rad mu gu yoloy nga lan gum’ercha’rad. Bay gu mang Got rorad, ma bay ra manged girdi’ rog.’”​—Jeremiah 31:31-33.

¹⁹ Ereram e bin nib biech e m’ag ni weliy Jesus morngaagen ko rofen ni Nisan 14, 33 C.E. Ngiyal’ nem me tamilangnag ni ran dugliy e re m’ag nem ni kan micheg u thilin pi gachalpen nge Jehovah me ir e maaf. (1 Korinth 11:25; 1 Timothy 2:5; Hebrews 12:24) U daken fa bin nib biech e m’ag ma n’en ni micheg Jehovah ngak Abraham e ra lebug nib fel’ rogon ma ra par ndariy n’umngin nap’an, ma aram e n’en ni ran weliy ko bin migid e article.

Rayog ni Ngam Weliy?

◻ Mang e ke micheg Jehovah ko fare m’ag rok Abraham?

◻ Uw rogon ni ke lebuguy Jehovah e m’ag rok Abraham u daken yu Israel?

◻ Uw rogon ni ke yib angin fa bin kakrom e m’ag ngak e piin proselyte?

◻ Mang fan ni ke t’uf e bin nib biech e m’ag?

[Sasing ko page 17]

I lebuguy Jehovah e m’ag rok Abraham ko yay nsom’on u daken fare m’ag ko Motochiyel